Apocalipsis 21:2 - La'aqtaqa Ñim Lo'onatac 'Enauacna 2013

² Nataqa'en sela'a so dalaxaic nỹecpi ỹataqta qui'itta, som dalaxaic Jerusalén anacta chegoqo'ot na piguem maye hueta'a Ñim Lo'onatac 'Enauacna, se'eso nỹecpi sogote da 'enauac imeta, 'eeta'am da no'otaxac aca qa'añole da mashe huotaique da huaroneguet ca nauonaxaua.

Nuevo Testamento Toba Sur

² Qaq aÿim Juan sela'aguet so dalaxaic la ciudad Jerusalén. Somayi ÿataqta qui'itta, chigaqshiguem, chigoqo'ot ñi Dios. Mashi sogote da 'enauac imeta, 'eeta'am da n'otaxac aca qa'añole da mashi huotaique da huadonguet ca nauonaxaua.

Nuevo Testamento Toba Sombrero Negro

² Nataq'aen jauana ga'me noic let'adaic jo'ne ja 'nalegue, nach'edi di'me Jerusalén jo'ne dalaĝaic. Qama'le nenochiñe, chiyoqo'ot joñe'me Dios jo'ne ne'tague di'me piyem, queda'me joote yiyamaĝatetac, ena'am jaga'me nojaĝaua qom joote niyamaĝate'taguet qaedi male 'uoneguet ga'me lojaĝaua.

Apocalipsis 21:2 Referans Kwoze

Hebreos 11:10

So Abraham huo'o da lpi'iỹaxac da huo'o ca na'a'q, nache ỹauana cam nỹecpi maye maiche lo'onatac Ñim Lo'onatac 'Enauacna qataq qaica ca ishet da nlaxaañi.

Apocalipsis 3:12

Qaq cam saishet da iqallem na lqalaiguesat, qataq saishet da ỹaxanec da lpi'iỹaxac Aỹem, nache Aỹem sami' ca ndaqa' maye ỹataqta ỹo'oxoraq añi lo'onaxanaxaqui Ñim Lo'onatac 'Enauacna, qataq saishet da ca'ai añimaye. Qaq camayepi serelec da le'enaxat Ñim Ita'a maye Lo'onatac 'Enauacna qataq ca le'enaxat ye nỹecpi maye neta'ague da piguem. Qaq yemaye nacheye yem dalaxaic Jerusalén maye anacta. Nataqa'en serelec camayepi ca dalaxaic ỹe'enaxat.

Apocalipsis 21:10

Qaq can ñaq sootaigui se'eso ỹauanaqchec maye aỹem ỹachaxana So Saqcha'a La'añaxac Ñim Lo'onatac 'Enauacna, nache som namaxashec aỹem ỹaviguisheguemec aso qaỹoqotcheguemec 'alhua. Huaña, nache aỹem ỹachaxana so lta'araic nỹecpi qui'itta le'enaxat Jerusalén, anacta chegoqo'ot na piguem, chegaqa'a cam hueta'a Ñim Lo'onatac 'Enauacna.

Isaías 61:10

Aỹem ỹataqta lta'araic da ñetootapeguec Ñim Nataxala', da ñachaalataxac qalaq nlaqchigui da ntonaxac souaxat Ñim Ñatamnaxala', cha'aye Ñimaye aỹem ỹanaxanaxangui da nca'alaxa qataq aỹem napogonaxaaña da nalochiguiñi lataxac, Aỹem no'otaxanaxan sheeta'am ca auonaxaua qataq ỹauo'o ana ño'otaqtepi sheeta'am naqa'en aca auonaxaua.

Hebreos 13:14

Cha'aye ana souaqtalec 'alhua qaica ca qarma' da chochaq tatec, nachaqrata da seuataqta'aguet ca qarma' maye naỹa'acna.

Hebreos 12:22

Qami' qalaxaye mashe qanquiquiiua'a añi saqaỹoqotcheguemec 'alhua maye le'enaxat da Sión, añim netalec ye nỹecpi maye lalamaxat Ñim Lo'onatac 'Enauacna maye nache 'eetai' da nca'altauec. Yi'iye nỹecpi nacheye ye Jerusalén maye neta'ague da piguem, yem hueta'a nam ỹataqta qalota namaxashec piguem le'ecpi da ỹo'oxoreetac Ñim Lo'onatac 'Enauacna,

Apocalipsis 22:19

Qataq da huo'o ca nqat ca 'oonolec ne'ena la'aqtaxanaxacpi Ñim Lo'onatac 'Enauacna maye nanettalec ana'ana nere, nache Ñim Lo'onatac 'Enauacna saishet da ỹashenem da ỹacona ana ala ara qo'oipaq maye chegaqaigui da nca'alaxa, qataq saishet da ỹashenem da hueta'a ye nỹecpi maye ỹataqta qui'itta, ipacchigui da la'aqtaxanaxac ana'ana nere.

2 Corintios 11:2

Cha'aye aỹem huo'o da 'eco' ica'alaxanaxac da qoñiita. Qalaxaye de'era ica'alaxanaxac, damaye chegoqtot Ñim Lo'onatac 'Enauacna. Cha'aye aỹem sauotaique da qami' saronaxanaxanegueta So Cristo, qataq sauotaique da qami' sachaxaneua'alo Somaye, da 'eeta'am ñaqa'en aca qa'añole maye saxanaxa da huaron, da huaroneguet ca 'oonolec ỹale.

Isaías 54:5

Cha'aye Ñim 'am lo'onata co'ollaxa ñimaye ỹauo'o 'am lhua. Qaq da le'enaxat 'eeta', Nataxala' maye Qaica ca Ỹaqalanapec, Ñim 'arca'alaxaqui nacheñi Ñim Qui'itta Natamnaxala' na Israel le'ecpi, nacheñi Ñim Lo'onata 'enauac ana 'alhua.

Isaías 52:1

Ñaq 'anlouec 'am Sión, ñaq 'anlouec, ñaq 'auauo'o da 'ara'añaxac, 'am Jerusalén, huaqta'a't nỹecpi maye qui'itta, 'aỹa'aayiñi naua 'ogo maye ỹataqta 'onaxaiqa, cha'aye na shiỹaxauapi maye ỹaqa'a da la'amqaanataxanaxac qataq nshepaxan da lataxac, namayepi saishet qome da ỹe'eguelaxalec da 'am huenoxoneua'a.

Isaías 62:4

Nache saishet qome da qaltaq 'am qaỹamata'ac da «Nỹecpi qaỹalat», qataq na 'ana'alhua saishet qome da qaỹamata'ac «'Alhua nlachiguiñi», maye nacherata da 'are'enaxat qome da «Ỹauotaqte», qaq nam 'ana'alhua qalaq «Ỹalamaqte ihua» Cha'aye 'am lauotaqte Ñim Nataxala', qaq Ñimaye 'eeta'am qome da lhua na 'ana'alhua.

Salmos 87:3

¡Qaq 'am Sión maye 'am lalamaxat Ñim Lo'onatac 'Enauacna, ỹataqta huo'o da 'ayo'oxoyec da 'am qaitaqtega!

Apocalipsis 11:2

Qalaxaye saishet qome da 'analoqten ye nqasoxoc añi no'onaxanaxaqui, cha'aye yi'iye ndaqa' sanem nam saishet da ỹa'amaqten Aỹem. Namayepi ilo'ogue qome ye Jerusalén iviraxattre'c caua tres vi'iye qataq laiñi ca lỹa vi'i.

Apocalipsis 1:9

Aỹem Juan, maye maiche aỹem qarỹai da sa'amaqtenaqtac So Cristo, cha'aye qami' qataq aỹem huo'o da qarpi'iỹaxac Somaye. Qaq souaxat da ỹataqta huo'o da ipi'iỹaxac Somaye, nache ñeuanaua'a da lo'onataxanaxac Ñim Lo'onatac 'Enauacna 'eeta'am 'enauac da qoñiita: Qataq nataqa'en huo'o da ñeqalanaxac da satata'aguet na lqalaic, sheeta'ama qami'. Qalaxaye nataqa'en huo'o da ỹa'añaxac maye aỹem ỹami' Ñim Lo'onatac 'Enauacna da yaqto' ñala'aguet ne'ena que'eenaxacpi. Qataq souaxat da sa'axattac da la'aqtac Ñimaye qataq da sa'axattac So Jesucristo, nache aỹem qaỹamaxauga ana ỹaqa'ata 'alhua maye le'enaxat Patmos.

Apocalipsis 1:4

Aỹem Juan, samaxa ana ỹere qataq sequiita'ape naua siete 'aleu' maye netaleguete na ỹa'amaqten so Jesús maye netaigui ye 'alhua Asia. Ñim Lo'onatac 'Enauacna, Ñim nache 'eetai' da huo'o, qataq Ñim do'onataxaatac nagui, qataq naỹa'acna. Aỹem ỹataqta huo'o da iyaxa da Ñim Lo'onatac 'Enauacna qataq So Jesucristo qataq soua siete na'añaxaco saqcha'alo maye nachattraua'a añi nso'onaxaqui Ñimaye, da qami' ỹauoteque qataq qami' ỹanema ca qarlagaxayiqui. Sa'amaqtenaq da So Jesucristo qomi' ỹauoteque qataq qomi' da'aqtaxanema da 'eesa na'aqtaguec Ñim Lo'onatac 'Enauacna. So Jesucristo nacheso so la'auaxanec da nca'aleeguesop da nleuaxa, qataq nacheso so ilotague' 'enauac nam nta'alpi maye ilotague' nam 'alhuapi. Qataq chegoqchigui da l-leuaxa So Jesucristo da Ñim Lo'onatac 'Enauacna ỹapalaxat na qarasouaxashetpi.

Apocalipsis 1:1

Ñim Lo'onatac 'Enauacna ỹachaxana So Jesucristo, nam mashe nayeeta'a da yo'oq da yaqto' Somaye ỹaỹaanaxanaxanec na lo'onataxanaxanecpi. Qaq ỹoqo'oye So Jesucristo da'aqtaxanem so Juan maye lamaxashec, ỹachegoxotchigui so lamaxashec piguem le'ec Ñim Lo'onatac 'Enauacna; qaq so Juan, nache ỹiyiñi 'enauac de'era na'aqtaxanaxac maye ỹataqta 'eesa.

Juan 3:29

Da huo'otaq huo'o ca naronaxac, qaq cam ỹataqta huaroneguet aca auonaxaua, nacheca cam nauonaxaua. Qaq cam nauochaxaua que'eca auonaxaua, camaye ỹataqta machiguiñi da choche hua'aqtega da lvilỹaxac. Qaq nache 'eetec nataqa'en nagui aỹem ỹataqta aỹem nlaqchigui da ñetonaxac, cha'aye ca Lca'aguishec Ñim Lo'onatac 'Enauacna mashe hueta'a ne'ena.

Jeremías 31:23

Ñim Nataxala' maye Qaica ca Ỹaqalanapec Ñim Natamnaxala' na Israel le'ecpi, 'eeta': «Qom Aỹem ñaralaxat ca na'achecỹaxac na lma' na Judá, qataq namayepi qom mashe qaltaq hueta'a ye maiche na'alhua, qataq ye maiche lma' huaqta'a't nỹecpi, nache qaltaq 'enapec qome: ‹¡Ñim Nataxala' ỹaalec da no'on añi qasoxonaxa maye qui'itta, maye hueta'a da nalochiguiñi lataxac!›

Isaías 1:21

¡'Am huaqta'a't nỹecpi maye 'am laxaraic co'ollaxa qaq nagui qalaq 'avira'a da sa 'aualaq! Som shiỹaxauapi maye 'am netaigui co'ollaxa ỹataqta ỹo'ottac co'ollaxa da ỹaỹamaqchiguiñi lataxac, qataq ỹataqta no'on da lataxac, qaq nagui qalaq nda'a't na laataxanaxaicpi na 'am netaigui.

Hebreos 11:16

Cha'aye da lyaxayec somayepi, huotaique da huo'o ca lalamaxat na'alhua maye ỹataqta no'on hueta'ague da piguem. Qaq ỹoqo'oye Ñim Lo'onatac 'Enauacna saishet da na'aloxootac da ỹamata'ac da llalaqpi somayepi, cha'aye Ñimaye sogote da iqataxaatai' da pa'asheguem cam nỹecpi maye huotaique da lma' somayepi.

Apocalipsis 21:9

Ime, nache anac so 'oonolec soua siete namaxa'she piguem lashe' maye lasoqta'alo soua siete ỹomaxaqui' maye nlaqchiguilo soua pa'atre'c chaqaiqa napaxaco, nache aỹem 'enapega, 'eeta': «'Aỹala, 'anquigueuo yaqto' 'am sachaxana añim nauonaxaua maye huotaique da lhua Ñim Qagueta Llalec.»

Apocalipsis 22:17

Qaq So Saqcha'a La'añaxac Ñim Lo'onatac 'Enauacna qataq aso huotaique da lhua Ñim Qagueta Llalec 'eeta': «¡Ña 'auanac 'am Qarataxala' Jesús!» Qataq 'enauac nam hua'axaỹa de'era na'aqtac, qaq nataqa'en 'eeta': «¡Ña 'auanac 'am Qarataxala' Jesús!» Qaq cam ilem na laquip, qaq da nshapeque da nỹom, qaq no'on da anac, nache nỹomgui ca 'etaxat maye chegaqaigui da nca'alaxa chochaq tatec. Qaq camaye choche qoỹaatem.