Apocalipsis 15:3 - La'aqtaqa Ñim Lo'onatac 'Enauacna 2013

³ Nache somayepi ỹo'ootac som lo'onec so Moisés da qaỹo'oxoren So Qagueta Llalec maye 'eeta': «'Am Qarataxala' maye 'Aro'onatac 'Enauacna, qataq qaica ca 'auqalanapec, 'enauac nam 'auo'otpi ỹataqta lta'araicpi, qataq huo'o da llo'oxoyec. 'Am maye 'am Lataxala' 'enauac nam huetalec ana 'alhua, 'enauac na 'auo'otpi ỹataqta ỹaỹamaqchiguiñi, qataq nalochiguiñi.

Nuevo Testamento Toba Sur

³ Nachi somayipi i'ootac som l'onec so Moisés som lamaxashic ñi Dios qataq som n'onec da qaÿi'oxoden so qagueta llalec mayi 'eeta': Ÿataqta lta'adaic qataq ÿi'oxodaq 'enauac nam 'au'otpi, 'am qadataxala' Dios mayi qaica ca 'auqalanapec. Ÿataqta ÿashictreec qataq 'eesoda nam 'anqa'aico, 'am mayi 'am lataxala' nam ÿotta'a't shiÿaxauapi.

Nuevo Testamento Toba Sombrero Negro

³ Qama'le t'onaĝa'tape jogaa'me, 'yotedac da'me lalac ñe'me Moisés choqoda'me lalac ñe'me 'Naĝanaĝate Lec'oĝot jo'ne eetac: “Let'adayaqa naa'me auauo'oe, Nataq'aen da'me onaĝayaqa ena'uaque naa'me at'onataqa, Am Jaliaĝanec Dios jo'ne qaya'te auaqalatac; Eja da'me chimaqategue da'me adadiquiyaĝac nataq'aen da'me yataqatelegue, Am Lejaliaĝane'j ena'uaque ga'me jiyaĝadipi jo'ne neda'ña jena'me aleua.

Apocalipsis 15:3 Referans Kwoze

Salmos 111:2

Ỹataqta lta'araic na ỹo'otpi Ñim Nataxala', qaq cam ỹauotec namayepi nache napaxaguena.

Salmos 139:14

Ỹoqo'oye 'am sho'oxoreetac cha'aye lta'araic da ỹa'aalaxa, cha'aye huo'o da llo'oxoyec 'enauac na 'auo'otpi. Qaq damaye ỹataqta saỹateeta.

Salmos 145:17

Ñim Nataxala' nalochiguiñi da nqa'aicỹaxac, da lchoxonnataxanaxa huetalec 'enauac na lo'onatacpi.

Hebreos 3:5

So Moisés do'onataxaatacot Ñim Lo'onatac 'Enauacna qataq ỹalaxaguet 'enauac, ỹoqo'oye itauan so nhuo' le'ecpi maye lalamaxatpi Ñim Lo'onatac 'Enauacna ỹataqta ipagaqchiichigui dam la'aqtac Ñimaye, qataq da'aqtaxaateguem se'eso lalamaxatpi Ñim Lo'onatac 'Enauacna dam huotaique ỹa'axat Ñimaye maye ñaq natauo.

Isaías 33:22

Cha'aye Ñim Nataxala' nacheñi Ñim qomi' ỹauecta'agueta nacheñi Ñim qomi' ilotegueto qataq nacheñi Ñim qarta'a. Qaq Ñimaye nacheñi ñim qomi' nca'alaxatrec qome.

Oseas 14:9

Qaq ca ỹaanaxanaxaic nache ỹaỹateeteguet qome de'era, qataq ca ỹaanataxanaxaic nache ỹauattoota qome de'era na'aqtac. Cha'aye 'enauac na ỹo'otpi Ñim Nataxala' ỹataqta nalochiguiñi, qaq cam no'on da lataxac nache quetegue qome namayepi, qalaxaye nam qauemaicpi nache pogolaxaisop qome damaye.

Zacarías 9:9

¡Ñaq 'antonapigui' qome, 'am nỹecpi maye qonetalec ana qasoxonaxa Sión! ¡'Auo'onaxaatac souaxat da 'antonaxac 'am Jerusalén! Mashe 'am nata'a na 'arta'a, maye no'on da lataxac, qataq deca'alaqtaxan, namaye qaica ca la'amaqchec, netalec na 'ashena llalec.

Juan 1:17

Na namaxasoxonaxacpi co'ollaq ỹan Ñim Lo'onatac 'Enauacna, qalaq chegoqchigui naqa'en so Moisés, qalaxaye dam lqouagaxanaqtaic qataq dam 'eesa lataxac, damaye chegoqchigui So Jesucristo.

Salmos 100:5

Cha'aye Ñim Nataxala' ỹataqta soxoraic, da lta'araic lauotaxanaqtaic chochaq tatec, qataq chochaq tatec da saishet da nquic da lataxac.

Génesis 17:1

Qaq so Abram mashe ivi' co'ollaxa soua noventa y nueve vi'iye da nachaalataxac, co'ollaq Ñim Nataxala' nachaxana somaye, nache 'enapega, 'eeta': «Aỹem, nachaỹem Ỹo'onatac 'Enauacna, maye Qaica ca Seqalanapec, saisheto' qome da 'aushepaxanaqchet da 'anachaalataxac da aỹem qoueto'ot,

Apocalipsis 19:2

Cha'aye Ñim Lo'onatac 'Enauacna saishet da depe'enaxan da huo'o ye nmit qataq ipagaqchiichigui da 'eesa lataxac. Ỹauo'o da nhuaxanaguec añi ỹataqta lta'araic da lquisheguetaxac maye ỹapaxaguenec 'enauac na huetalec ana 'alhua, da natamnot nam qanatameetacotpi maye saq 'en. Qataq qaỹo'ot da nhuaxanaguec, souaxat da ỹalauat nam lo'onataxanaxanecpi Ñimaye.»

Apocalipsis 14:3

Qaq som ciento cuarenta y cuatro mil shiỹaxauapi maye nachattaua'a aso so'onaxaqui qataq soua cuatro shiguiỹa'c maye nca'altraue'c qataq soua veinticuatro nqueroxonqa soomaye ỹo'ootac so dalaxaic no'onec maye saishet da huo'o ca na'a'q nache qaỹa'aqtega. Se'eso no'onec qaica ca ishet da ỹaỹaten na leraxat, nachaqsota som shiỹaxauapi maye qanca'alaxatec, chegoqtoigui na laỹepi shiỹaxauapi maye huetalec ana 'alhua.

Deuteronómio 31:30

Nache so Moisés ỹo'ootauegue co'ollaxa se'eso no'onec ỹachegoxotchiguiña so hua'auchiguiñi lerec nache choche ivitta'a so pa'atec, hua'aqchigui naqa'en 'enauac so lapoota'a't Israel le'ecpi.

Apocalipsis 17:14

Ime, nache se'eso shiguiỹac leguemaxaic qataq soua diez nta'al deloguito So Qagueta Llalec. Qalaxaye So Qagueta Llalec qataq som ca'attague'pi nauec soomaye. So Qagueta Llalec dauegaxan, cha'aye nacheso so ỹactec da 'amaqtaqaic, saq 'ena'am na laỹepi nataxala'pi qataq nacheso so ỹactec da la'añaxac napacalec na laỹepi nta'alpi. Somaye hueta'aguet nam ca'attague'pi. Ñim Lo'onatac 'Enauacna iỹaxana namayepi qataq lca'aguishecpi, cha'aye nache 'eetai' naxa da ỹalaq.»

Apocalipsis 11:17

'eeta': «'Am Qarataxala' maye 'Aro'onatac 'Enauacna, qataq qaica ca 'auqalanapec; 'am maye 'anca'altauec, qataq nache 'eetai' da 'am huo'o. Qana'achec, cha'aye 'auachaxan da lta'araic 'ara'añaxac, qataq mashe 'auo'onataxan da 'alo'ogue 'enauac ana 'alhua.

Apocalipsis 4:8

Qaq ñi 'oonolec se'esoua cuatro shiguiỹa'c qalaq ivi' seis ana laua't ñi 'oonolec, qataq nlaxagui ana la'aitepi qataq saishet da ỹa'axaneguet da lo'onaxanaxa'c ye na'a'q qataq ye pe da 'eetra': «¡Ỹataqta qui'itta, ỹataqta qui'itta, ỹataqta qui'itta Ñim Nataxala', Ñim Lo'onatac 'Enauacna maye qaica ca ỹaqalanapec, maye nache 'eetai' da huo'o, Ñim nca'altauec qataq mashe nayeetai'!»

Daniel 6:20

Qaq so nta'a co'ollaq mashe saqaỹapeque aso nshere, nache iỹaxanaique so Daniel, qalaxaye da lỹaxanaxac ỹataqta daquico, nache 'eeta': 'Am Daniel, maye 'am lamaxashec Ñim Lo'onatac 'Enauacna maye nca'altauec, Ñim ỹataqta 'aualaxaguet naxa ¿ishet peta'a da 'am nca'alaxateeguesop na llonpi Ñim 'Anatamnaxala'?

Isaías 45:21

Ña qaua'aqtaxañi qataq qauachaxañi cam ỹo'ot da 'eesa de'era, qana'aqtaxañiỹa't ñi 'oonolec na'aqtaxane' ca lỹa. ¿Negue't ca ỹa'axatta'a co'ollaxa de'era? qataq ¿Negue't cam ỹa'axatta'aguet co'ollaxa de'era soua hua'au' vi'iye? ¿Saisheto' da nachaỹem, Aỹem Nataxala'? Qaq qaica ca lỹa Atamnaxala', maye huegaxanaxaic qataq ca'alaqtaxanaxaic.

Salmos 145:6

Ỹa'axattac qome da lta'araic la'añaxac na 'aro'onatacpi, aỹem qalaq sa'axattac qome da 'ara'amaqchec.

Salmos 99:4

'Am Nta'a 'añaxaic maye 'auauotec da nalochiguiñi lataxac, 'am, 'alapaxañi co'ollaxa da 'eeta'a't lataxac, qataq so Jacob 'auo'otec da nalochiguiñi qataq ỹaỹamaqchiguiñi lataxac.

Apocalipsis 19:16

Qaq Somaye so lapo' qataq na ltele'eta nache nanettalec so le'enaxat, 'eeta': «Lta'a na nta'alpi qataq Lataxala' na nataxala'pi.»

Sofonías 3:5

Qalaxaye Ñim Nataxala' hueta'a ne'ena huaqta'a't nỹecpi; Ñimaye ỹo'ot da no'on, qaq saishet da ỹo'ot ca qauem. Qataq nacheye ye nte'eta naua na'axa'te da ỹachaxan nam huotaique da ỹo'ot, Qalaxaye cam qauemaic qalaq ỹataqta saishet da ỹauatton cam na'agaxa.

Miqueas 7:20

'Am Nataxala', nache 'eetai' qome da 'aupacchigui da 'ara'aqtac qataq da 'arauotaxanaqtaic, maye soua hua'au' vi'iye 'auachaxanapeguema co'ollaxa soua hua'au' qarta'al Abraham, qataq so Jacob.

Salmos 105:5

Qataq qauennachiỹa'a na ỹo'ot da na'aalaxa maye ỹo'ot co'ollaxa, qataq na lapaxañi lataxacpi maye ỹan co'ollaxa Ñimaye.

Salmos 78:12

Ñim Lo'onatac 'Enauacna ỹo'ot co'ollaxa nam ỹo'ot da na'aalaxa ỹauaachigui naqa'en so qarta'ailpi huaña ye 'alhuapi ye Soán maye huaigui ye Egipto.

Da na'aqtaguec so Job 5:9

¡Cha'aye Ñimaye qalota na ỹo'ot lta'araicpi maye ỹo'ot da na'aalaxa, qataq na lataxacpi maye qaica ca ivi' da ỹaỹaten!

2 Crónicas 24:6

Huaña nache so nta'a, iỹaxaneuga so Joyadá som lataxala' so ntaxaỹaxanaxanecpi, nache 'enapega 'eeta': «Ta'ainco' da sa 'auỹalapegue' da qonapega nam leviitapi da ndouo aca lachetaqtaxanaqte na lma' na Judá, qataq na Jerusalén, maye so Moisés, som lamaxashec Ñim Nataxala' ỹamaxalec co'ollaxa so Israel le'ecpi da yaqto' iroua'a so npe'l maye netaña aso laỹe' da aỹamaxataxac.»

1 Crónicas 6:49

Qaq so Aarón qataq soua llalqa, nachesoua soua pa'aỹa'agueta ana qoỹaneuo nachetaqtaxanaqtepi, maye qaỹasaxalec naxa aso nca'atoxonaxalate, maye lmalate anam nachetaqtaxanaqte maye qaỹavigaxatta, qataq aso nca'atoxonaxalate da qaỹavigaxat na nchenaxanaxat. Qaq nataqa'en huetague' 'enauac nam no'onataxanaxacpi maye hueta'a yem ndaqa' maye sa qaishetapec, qataq da yaqto' qaỹapalaxat nam lasouaxashetpi so Israel le'ecpi, da yaqto' ipacchigui da lamaxasoxonaxac co'ollaxa so Moisés, maye lamaxashec Ñim Lo'onatac 'Enauacna.

Apocalipsis 14:8

Qaq ca'attaueegue so lỹa namaxashec piguem le'ec nataqa'en detaqtac, 'eeta': «Mashe noxonec ye lta'araic nỹecpi le'enaxat Babilonia, mashe sogote da qailaxachigui yemaye, cha'aye yemaye ỹapaxaguenec 'enauac nam ỹotta'a't shiỹaxauapi da lasouaxashet, qataq da ỹalaxaguet naqa'en nam qanatameetacotpi maye saq 'en.»

Daniel 9:11

'Enauac na Israel le'ecpi saỹalaxaguet na 'arapaxaguenataxanaxacpi qataq 'aramaxasoxonaxacpi, ỹoqo'oye qomi' taleguete dam qauem, qataq da qoỹan co'ollaxa na'aqtac, maye nanettalec aso lmalate na lamaxasoxonaxacpi so 'aramaxashec Moisés, cha'aye huo'o da qarasouaxashet 'am hueto'ot.

Nehemías 9:14

Qataq 'auapaxaguenec da huo'o naq 'enec naqa'en ye na'a'q mataxaqui, qataq chegoqchigui so 'aramaxashec Moisés da 'aỹa'anem na 'aramaxasoxonaxacpi, qataq naua 'alapaxayiñi lataxaco, qataq na 'arqataxacpi.

Deuteronómio 34:5

Qaq nache huaña ye Moab da ileu so Moisés maye lamaxashec Ñim Nataxala', nache ipacchigui da la'aqtac Ñim Nataxala',

Deuteronómio 32:3

Aỹem sa'axattac qome da le'enaxat Ñim Nataxala': ¡qauauattoñiita qome da la'amaqchec Ñim Qanatamnaxala'!

Josué 22:5

Qalaxaye nacherata da qami' seqaaleguete da ỹataqta qaupaquiichiguilo qome 'enauaque naua 'ena'ape naua namaxasoxonaxaco qataq naua nqataxaco, maye qami' ỹanema so Moisés, maye lamaxashec Ñim Nataxala' maye 'eeta': Ỹataqta qauauochec Ñim Nataxala' maye Qanatamnaxala'ai, qataq nache 'eetai' qome da qoquiiteguelo naua lleco Ñimaye, qataq da qaualaqaigueta naua lamaxasoxonaxaco, qaq nacheñita qome da qoquiitegue, qataq ỹataqta qaumachiỹo'ot da qarquiyaqteỹaxaqui, qataq da qanachaalataxaqui da qauo'onataxañiitacot Ñimaye.»

Da na'aqtaguec so Job 36:24

Qataq 'auennata'a qome da 'avio'oxoreetac na lo'onatacpi Ñimaye, cha'aye 'enauac na shiỹaxauapi ỹo'oxoreetac namayepi.

Salmos 18:30

Da nqa'aicỹaxac Ñim Lo'onatac 'Enauacna ỹataqta ỹaỹamaqchiguiñi, qataq naua ỹachaxana'ape Ñim Nataxala' ỹo'o't da aquitaxac, Ñim Lo'onatac 'Enauacna mpaxattalec nam ỹataqta pi'iỹa'a Ñimaye.

Salmos 92:5

'Am Nataxala', ỹataqta ỹapac lta'araic na 'aro'onatacpi, qataq ỹataqta qaỹoqotchemeque naua 'arhuennataxaco.

Salmos 111:7

Na lo'onatacpi Ñimaye ỹataqta 'eesa qataq nalochiguiñi, qataq na lamaxasoxonaxacpi ishet qaipi'iỹa'a,

1 Timoteo 1:17

Ỹoqo'oye nagui sanaxam da qayo'oxonnataxanaxa qataq da qaryacnataxanaxac Ñim Lta'a 'enauac nam shiỹaxauapi maye choche tatec, Ñim qaica ca loga't qataq saishet da qaila'a. Ñimaye nacheñi Ñim Lo'onatac 'Enauacna maye qaica ca lỹa 'ena'am, qataq ỹaanaxanaxaic. Aja', nache 'eetec de'era.

Apocalipsis 1:8

Ñim Nataxala' maye qaica ca 'ena'am da la'añaxac, Ñim nache 'eetai' da huo'o qataq Ñim do'onataxaatac nagui qataq Ñim mashe nayeetai', 'eeta' da la'aqtac: [«Aỹem maye Nachaỹem la'atchiguiñi, qataq Nachaỹem pa'atec.»]