Apocalipsis 14:10 - La'aqtaqa Ñim Lo'onatac 'Enauacna 2013

¹⁰ nache Ñim Lo'onatac 'Enauacna ỹataqta dalemataỹa camaye qataq ỹataqta lta'araic ca nque'eenaxac naqa'en. Qaq que'eca nhuaxanaguec saishet da isotta, nachaqrata da nque'etaxangui na norec le'eraxa qataq nam quiquiaxaraic maye ỹavictaigui. Qaq nam qui'itta namaxashecpi piguem le'ecpi qataq Ñi Qagueta Llalec ỹauaachigui da nque'eenaxac camaye.

Nuevo Testamento Toba Sur

¹⁰ nachi camayi nÿomgui qome dam qaica ca 'en'am da lchiquiaxac lhuaxanaxanaxac ñi Dios, qom ivita da icodeec dam ÿaqataxaatapigui' layiloxo mayi 'eeta'am ca ndoteec lataxa. Nachi camayi ÿataqta nque'etaxangui qome da lqui'ic ca nodec qataq nam quiquiaxadaic mayi ÿavictaigui. Qaq ÿauaachigui qome nam lamaxashicpi ñi Dios qataq so qagueta llalec.

Nuevo Testamento Toba Sombrero Negro

¹⁰ nach'ega jo'ne niyomigui qoyen ga'me lataĝa jo'ne lalemataic ñe'me Dios. Ena'am ta'le qaya'te lale'gue da'me le'uaĝanaĝanaĝac joñe'me, qama'le qoyen da'me layaliaĝac ga'me jiyaĝaua da'me yaviyeque ga'me dole', nataq'aen ga'me azufre jo'ne yataqata edetañgui, nataq'aen da'me dajo'tagueta ñaa'me piyem laje' jo'ne ja 'nalo'te choqoñe'me 'Naĝanaĝate Lec'oĝot.

Apocalipsis 14:10 Referans Kwoze

Isaías 51:17

Ñaq 'anlouec, ñaq 'anlouec 'am Jerusalén, ña qoñesheguem. 'Am 'anque'etaxangui co'ollaxa da nnogoxonaxac Ñim Nataxala', qoneta'am ca nỹomgui aca ỹomaxaqui nache ivitta'a da qui'itchigui naqa'en, nache ivitta'a da ỹataqta da taxaic.

Apocalipsis 16:19

Nache se'eso qalagoxoñi 'alhua, somaye tres soua lpoxoỹaqa'ate naqa'en ye lta'araic nỹecpi ye Babilonia, qataq na hueta'a na lta'araic nỹecpi 'enauac ana 'alhua qalaq qalagoxoñi. Ñim Lo'onatac 'Enauacna saishet da icoua'ai ye nỹecpi ye Babilonia, nachaqrata da ỹauo'o so nhuaxanaguec ỹataqta qaica ca 'ena'am da lchec qataq imatalec da layeloxo.

Salmos 75:8

Ñim Nataxala' nasoqta'a aso ỹomaxaqui, huetagui na lataxa maye ỹotta'a't na lalegue qaq Ñimaye qom icorec somaye, nache 'enauac na qauemaicpi maye huetalec ana 'alhua, nỹomigui qome nache ivitta'a da ỹauta.

Salmos 11:6

Qataq talec naqa'en na qauemaicpi, na auot maye 'eeta'am ana 'ettaigui poqo qataq na 'ettaigui quiquiaxaraic, qataq anacot ca la'at maye ỹavigaxat 'enauacna, da ỹanem namayepi da 'itchiguiñi nhuaxanaguec.

Apocalipsis 20:10

Qaq so pa'aguenataxanaxaic maye ỹatenachet somayepi, qaỹasaxangui so lta'araic norec maye huaña da ỹavictac na quiquiaxaraic, som huaña da qaỹasaxangui co'ollaxa so shiguiỹac leguemaxaic qataq so 'eetega da la'aqtaxanaxanec Ñim Lo'onatac 'Enauacna qalaxaye saq 'en. Huaña, nache huo'o da nque'eenaxac somayepi chochaq tatec ye na'a'q qataq ye pe.

Apocalipsis 19:20

Qaq se'eso shiguiỹac leguemaxaic noxonec, nataqa'en so 'eetega la'aqtaxanaxanec Ñim Lo'onatac 'Enauacna qalaxaye saq 'en maye ỹo'ottac na na'anecpi sa qaỹauanapega, da yaqto' qaỹa'amaqten so shiguiỹac. Qaq se'eso 'eetega da na'aqtaxanaxanec irolec nam saq qaỹauanapegapi da ỹatenachet 'enauac nam nasheeteguet aso la'anaxanaqte so shiguiỹac leguemaxaic, qataq ỹo'oxoreetac so ne'enaqtac maye lqui'i somaye. Qaq se'eso shiguiỹac qataq som 'eetega da na'aqtaxanaxanec, soomaye nache nca'altraue'c qanqa'en da qaỹasaxayingui so lta'araic norec maye huaña da ỹavictac na quiquiaxaraic.

Apocalipsis 18:6

Qauo'ochec ayemaye 'enauac nam qauem maye ỹo'otec co'ollaxa nataqa'en na laỹepi shiỹaxauapi; ỹataqta ỹactec qanqa'eñi cam lsheetenaxanaxat ayemaye, da isheeten 'enauac na qauem maye ỹo'ot. Qauo'ochec ayemaye da dos da ỹe'eguelaxalec da talec dam lta'araic nqui'ic maye talec co'ollaxa na laỹepi shiỹaxauapi souaxat ayemaye.

Apocalipsis 21:8

Qalaxaye nam colanqaicpi, qataq nam saq pi'iỹa'a Aỹem, qataq nam ỹo'ot nam qauem maye sa saỹamaxaren qataq nam ỹalauat ca lỹa qataq nam huetapeeguet aca sa lhua maye saq qaỹashen da qaỹo'ot, qataq nam napaxagueetega da naconaxanaxac qataq nam ỹo'oxoreetac nam qanatameetacotpi maye saq 'en, qataq nam tenataxanaxaicpi, 'enauac qome namayepi qaỹasaxangui ca lta'araic norec maye huaña da ỹavictaigui na quiquiaxaraic. Huaña, nache chochaq tatec da saishet da nauane' Ñim Lo'onatac 'Enauacna.»

Mateo 25:41

Ime, nache shenapega na qauem da lataxac, sheeta': «¡Aỹem qoquiỹa'ai! Cha'aye Ñim Lo'onatac 'Enauacna 'oonolec da iqataxaatapigui' qauem maye qami' taleguete. Qanqo'oñiuga yem chochaq tatec norec maye iqataxaatai' Ñim Lo'onatac 'Enauacna, da yaqto' ỹasaxangui so pa'aguenataxanaxaic qataq nam lamaxashecpi.

Da na'aqtaguec so Job 21:20

Nache cam qauemaic maiche nque'etaxangui da talec ca nhuaxanaguec, qataq da nque'etaxangui da lalemataic Ñim Qaica ca Ỹaqalanapec.

Deuteronómio 29:23

Nache ỹauaachigui qome que'eca 'alhua da nda'a't da nlaqtelec na quiquiaxaraic, qataq na toue, qataq ỹataqta ỹavicta, nache saishet da qoỹanaxaalec, cha'aye qaica ca ñaxaalec camaye. Qaq nache 'eeta'am qome som huaqta'a't nỹecpi ye Sodoma, Gomorra, Admá qataq ye Seboim maye ilaxachigui co'ollaxa Ñim Nataxala', irolec da ỹataqta lta'araic layeloxo.

Génesis 19:24

nache Ñim Nataxala', anac naqa'en so norec, chegoqtot na piguem, qataq so 'eco' quiquiaxaraic da 'eeta'am na auot, da talec ye Sodoma qataq Gomorra,

Judas 1:7

Qataq nache 'eeta'am da huaigui co'ollaxa so shiỹaxauapi maye lma' ye Sodoma qataq Gomorra qataq som nỹecpi maye saqaỹapeque yeemaye. Som hueta'a yemaye ỹataqta ỹaguec da lle'etaxaloxo qataq ỹo'ottac na ỹotta'a't lataxac da quisheguetaxac maye sa qaishetapec. Qaq ỹoqo'oye Ñim Lo'onatac 'Enauacna ỹauo'o da nhuaxanaguec, icorelec so norec maye saishet da 'om da yaqto' ỹo'ot da nque'eenaxac somayepi. Qaq damaye nachera da 'enauac qomi' qaivitaqteetegalo.

Isaías 30:33

Qaq cha'aye mashe qaỹoqteguelo soua vi'iye da qaiqataxaatai' da taỹa'a qanqa'en ye Asiria qataq ñim nta'a yemaye, yem ỹataqta qaỹoqchiguingui qataq qalochiguiñi nma' maye huetangui ye 'ettangui norec maye qalota na lalonaxat qo'oipaqpi. Ñim Nataxala' qom iquetetec la la'at nache 'eeta'am ca la'auaxac na quiquiaxaraic da 'eroigui nache ỹavigaxat yemaye.

Apocalipsis 18:3

Cha'aye 'enauac nam ỹotta'a't shiỹaxauapi ỹataqta quetegue da lataxac qataq ỹo'oxoreetac nam qanatameetacotpi maye saq 'en. Nataqa'en ỹo'ot damaye nam nta'alpi maye huetalec ana 'alhua. Qataq 'enauac nam nmenaxaicpi maye huetalec ana 'alhua ỹataqta ivira'a da sallaxanecpi, cha'aye nmene' co'ollaxa yemaye da yaqto' ỹo'ot na qalota lqopitaxanaqtaic maye qauem.»

Habacuc 2:16

Qaq damaye saishet qome da ỹo'ot ca 'ayo'oxoyec, nacherata da 'am talec naqa'en da 'ara'agaxa, cha'aye Ñim Nataxala', 'am ỹanem qome da 'anỹomgui aca ỹomaxaqui, maye ỹo'ot da 'aula'a dam sa nateneuo 'arataxac, huaña nache da 'ayo'oxoyec nmeneguet da qaica ca 'ara'amaqchec.

Ezequiel 20:48

Qaq 'enauac qome na shiỹaxauapi ana 'alhua, da ỹaỹaten da Aỹem Nataxala', nachaỹem da shegueua'a, qaq que'eca norec saishet qome da 'om.»

Jeremías 25:27

Qaq ime, nache aỹem 'enapega Ñim Nataxala', 'eeta': «Qonapega namayepi da, Aỹem Nataxala' maye Qaica ca Seqalanapec, maye Natamnaxala' na Israel le'ecpi, samaxalec namayepi da nỹomgui qome, nache ivitta'a da taxaicpi qataq noltañi, qataq hueta'aguet na 'alhua, nache saishet da ñisheguem, souaxat ca alaataxac maye ñamaxa qome namayepi.

Isaías 34:9

Qaq nam la'auaxacpi ye Edom qalaq ipaxanegue qome nam 'eeta'am na napannaxanaxat le'enaxat brea, qataq na lsoche yemaye nañigui qome na quiquiaxaraic, qataq na 'alhua 'ettaigui qome 'eeta'am na napannaxanaxat le'enaxat brea.

Isaías 29:9

¡Qaq nache qoquiito'ot qome da qaica ca qaraỹaanataxanaxaqui! ¡Qataq nache qoquiito'ot qome da sa qanauañiiñi qataq qaica ca qauloỹa'a! ¡Qataq nache qoquiito'ot qome da qavi'egochiitapigui' qoñiita'am ca taxaic, na'aictaxa da saishet da qanỹomiigui ca lataxa maye itaqchet ca shiỹaxaua!

Mateo 26:39

Nache So Jesús taỹa ca qaỹata'a soomaye, nache ỹa'alyiñi naua l-llectel qataq iviraxata'aguet na latap na 'alhua, nache nqouagaxaunot Ñim Lo'onatac 'Enauacna, 'eeta': «'Am Ita'a, ¡ỹataqta huo'o da iyaxa da Aỹem 'antelaqna'aguet de'era que'eenaxac! Qalaxaye saishet da ipacchigui qome da maiche sheetapeguec, nachaqrata dam maiche qonetapeguec.»

Mateo 20:22

Nache So Jesús 'enapeco': –Qami' saishet da qauaỹaañi dam qauỹaxañiitapegueua'a. ¿Qami' lhuotte' peta'a da qanque'etaxañiigui na qauemsat maye Aỹem talec qome? Nache soomaye 'ena'apo': –Aja', seshetaq.

Lamentaciones 4:21

¡'Am huaqta'a't nỹecpi Edom, 'Antootapigui' qataq 'auamachiguiñi, 'am maye 'aulotague' ye 'alhua Us! Cha'aye nataqa'en taỹa'a da 'am qanỹomaxangui qome ana ỹomaxaqui maye huetagui na ỹataqta chem, nache 'am itaqchet qome ivitta'a da qouetauec.

Jeremías 51:57

Ñim Nta'a, Ñim Nataxala' maye Qaica ca Ỹaqalanapec, 'eeta': «Setaqchet qome na lataxala'pi ye Babilonia, nam ỹaanaxanaxaicpi qataq na nta'alpi, qataq na ltauapi, qataq na alleppi nache talec qome ca chochaq tatec lo'ochaxa nache saishet da qaltaq nlouec.

Jeremías 49:12

Ñim Nataxala', 'eeta': «Som saishet taxa da nỹomgui aso ỹomaxaqui maye ỹo'ot da nhuaxanaguec, qalaq nỹomgui asomaye, qaq nache 'eetec nataqa'en 'am da saishet da saqca ca 'anhuaxanaguec, nacherata da nataqa'en 'anỹomgui asomaye.

Salmos 91:8

Nacherata da naua 'ara'ai'te ỹauaachigui qome da 'eetec da ỹaconeguet da nsheetenaguec na qauemaicpi.

Salmos 60:3

Nache qomi' nhuo' le'ecpi maye qomi' 'aralamaxatpi, qomi' 'aỹa'anegueta na sansatta qañe'eguenataguecpi, qataq qomi' 'aỹa'anema na lataxa, maye qomi' ỹe'etaxaloqche't.

Salmos 37:34

Qaq 'am 'auata'aguet qome Ñim Nataxala', qataq 'aupacchigui na 'eetapeguecpi, yaqto' Ñimaye 'am ỹo'oxoraq naqa'en, qom 'am ỹanem yi'iye 'alhua da 'aralamaxat. Qataq 'auauaachigui qome da qanlaxaañi na qauemaicpi.

Da na'aqtaguec so Job 18:15

Nache ca norec qalaq imattalec ca lma', qataq ca quiquiaxaraic maye 'ettaigui talec ca logoxoshetpi.

Salmos 73:10

Ỹoqo'oye na shiỹaxauapi ỹo'oxoreetac, cha'aye saishet da ỹanata ca lasouaxashet namayepi.

Salmos 52:6

Qaq na no'on da lataxac qom ỹauaachigui de'era, nache ỹataqta huo'o da la'aalaxa, nache lashetac que'eca shiỹaxaua, 'eeta':

Ezequiel 38:22

'Am Gog, qataq na 'analleppi, qataq na qalota alleppi maye 'antaueetague', sauo'o qome ca qanhuaxanaguiiqui, qami' seroleguete ca napiina, qataq qaicorec qome na ntago'q, qataq so'ot qome da naañi ca lta'araic auot, qataq aca lache, qataq ca norec, qataq ca quiquiaxaraic.

Marcos 8:38

Da qaualliquiitaigui ne'ena shiỹaxauapi maye 'etaxaloxoicpi qataq saishet da ỹaconeguet Ñim Lo'onatac 'Enauacna, nache saishet da Aỹem qaua'aquiiteguelec qataq naua ỹa'aqtaqa. Qaq da Aỹem qaua'aquiilec, nache nataqa'en Aỹem Shiỹaxaua Llalec qami' sa'agueleguete qom ñe'eguelaq da ñanactaigui da la'añaxac Ñim Ita'a qataq na lamaxashecpi.»

Hechos 10:22

Nache soomaye 'ena'apo': –Qomi' lamaxa'she ñi huataxanaq lta'a, le'enaxat Cornelio. Ñimaye no'on da lataxac qataq ỹataqta ỹalaxaguet Ñim Lo'onatac 'Enauacna. Ỹoqo'oye 'enauac na judiopi ỹataqta huo'o naq 'enec naqa'en qataq lauotaxat. Qaq huo'o so chegaqasheguem lamaxashec Ñim Lo'onatac 'Enauacna 'enapega da 'am namaxasoxona, da yaqto' 'anqo'ona ye lma', nache ñimaye ishet da na'axaỹaxana cam 'ara'aqtaxanaxac.

2 Ts 1:7

Qaq So Qarataxala' Jesús, qom ñe'eguelaq chegoqtot na piguem, nactaigui na le'eraxa ca norec qataq nnaictague' ca 'añaxaicpi lamaxashecpi piguem le'ecpi. Nache Ñim Lo'onatac 'Enauacna qami' ỹanema ca qaramaicỹaxaqui 'eeta'am da 'eetec naqa'en da shenaqta.

Apocalipsis 15:7

Nache so 'oonolec soua cuatro shiguiỹa'c maye nca'altraue'c ỹami' aso ỹomaxaqui nlaqchigui na lataxa ñi 'oonolec soua namaxa'she piguem lashe'. Qaq se'esoua siete ỹomaxaqui' maye huetagui na lataxa, naigui da layeloxo Ñim Lo'onatac 'Enauacna Ñim nache 'eetai' da nca'altauec.

Apocalipsis 19:15

Qaq na alap Somaye chegaqaigui so ỹeelonec ỹataqta ỹaxaraic, naigui da la'aqtaxanaxac maye huo'o da la'añaxac; qaq nacheso se'eso ỹeelonec da chegoqchigui da nauec na ỹotta'a't shiỹaxauapi. Qataq da yaqto' ilo'ogue namayepi irolec da la'añaxac. Qaq Somaye nlom na lli'i ana uva da ỹo'ot na lataxa, qaq damaye naigui da lta'araic layeloxo Ñim Lo'onatac 'Enauacna maye qaica ca ỹaqalanapec.

Apocalipsis 20:14

Ime, nache so nleuaxa qataq da lo'onataxanaxac somaye qaỹasaxayingui so lta'araic norec. Qaq nam tangui se'eso lta'araic norec, nache chochaq tatec da sa nauane' Ñim Lo'onatac 'Enauacna.

Marcos 9:44

[Qataq hueta'a na qoche'l maye saishet da ileu, qataq ca norec maye saishet da 'om.]