Apocalipsis 14:1 - La'aqtaqa Ñim Lo'onatac 'Enauacna 2013

¹ Qaq can ime, nache qaltaq ñamatasheguem, nache sela'a So Qagueta Llalec petalec añi qaỹoqotcheguemec 'alhua le'enaxat Sión. Qaq Somaye nache hueta'aguet som ciento cuarenta y cuatro mil shiỹaxauapi maye quetague' Somaye, som qoỹettalec na latap da le'enaxat som Qagueta Llalec qataq da le'enaxat Ñim Lo'onatac 'Enauacna maye Lta'a.

Nuevo Testamento Toba Sur

¹ Qaq can ime, nachi qaltaq ñamatashiguem, nachi sela'a so qagueta llalec petalec aso qasoxonaxa l'enaxat Sión. Qaq somayi nachi hueta'aguet som ciento cuarenta y cuatro mil shiÿaxauapi mayi qoÿittalec na latap da l'enaxat som qagueta llalec qataq da l'enaxat ñi lta'a Dios.

Nuevo Testamento Toba Sombrero Negro

¹ Yem da'me dojo' qama'le yitaĝa jelojeguem, qama'le jauana ñe'me 'Naĝanaĝate Lec'oĝot da'me petalegue ga'me qajoĝonaĝa jo'ne lenaĝat da'me Sión. Qama'le uo'oe gaa'me naequetedapegue' jo'ne ciento cuarenta y cuatro mil ga'me jiyaĝadipi, gaa'me jo'ne qoyedetalo'te jana'me nepe da'me lenaĝat joñe'me 'Naĝanaĝate Lec'oĝot choqoda'me lenaĝat ñe'me Let'a.

Apocalipsis 14:1 Referans Kwoze

Joel 2:32

Qalaxaye 'enauac nam iỹaxaatega da le'enaxat Ñim Nataxala' nca'alec qome, cha'aye añi qasoxonaxa Sión qataq ye Jerusalén, huaña qome da nca'alaxa, cha'aye maiche la'aqtac co'ollaxa Ñim Nataxala'. Qaq que'eca lca'alaxaicpi, nache ỹalectaigui qome nam lca'aguishecpi Ñim Nataxala'.

Apocalipsis 3:12

Qaq cam saishet da iqallem na lqalaiguesat, qataq saishet da ỹaxanec da lpi'iỹaxac Aỹem, nache Aỹem sami' ca ndaqa' maye ỹataqta ỹo'oxoraq añi lo'onaxanaxaqui Ñim Lo'onatac 'Enauacna, qataq saishet da ca'ai añimaye. Qaq camayepi serelec da le'enaxat Ñim Ita'a maye Lo'onatac 'Enauacna qataq ca le'enaxat ye nỹecpi maye neta'ague da piguem. Qaq yemaye nacheye yem dalaxaic Jerusalén maye anacta. Nataqa'en serelec camayepi ca dalaxaic ỹe'enaxat.

Lucas 12:8

Da qami' qaua'aqtaxañim na laỹepi shiỹaxauapi da Aỹem qoquiitague', nache Aỹem Shiỹaxaua Llalec, sa'aqtaxanem na lamaxashecpi Ñim Lo'onatac 'Enauacna da 'eesa da Aỹem qoquiitague'.

Miqueas 4:7

Qaq anamayepi nache sauaxaỹaxaneguet anam no'onañi co'ollaxa, qaq nache sachegoxotchigui qome ca shiỹaxauapi maye ỹataqta 'añaxaicpi. Qaq aỹem Nataxala' selo'ogue qome namayepi, qom huaña añi qasoxonaxa Sión, nagui qataq nache 'eetai' qome.

Romanos 9:33

Ana nere maye huetalec na la'aqtacpi Ñim Lo'onatac 'Enauacna Ñimaye 'eeta': «Aỹem sanaña qome ye Jerusalén ca 'oonolec coma'. Qaq camaye qome qalota na depoxolaxaisop qataq huañi naqa'en. Qalaxaye Ñim Lo'onatac 'Enauacna sa ỹatenachet 'enauac nam pi'iỹa'a Ñimaye.»

Salmos 2:6

«Mashe sogote da sauo'o ñi nta'a da ilo'ogue añi Sión, añim qui'itta ñeqasoxonaxa.»

Apocalipsis 14:14

Ime, qaltaq ñamatasheguem, nache sela'a so lo'oc na piguem lapagaxaic, qaq se'eso lo'oc nso'ootalec so 'eeta'am na shiỹaxaua llalec. Somaye ỹaatañi aso naro'o na nta'a maye chegaqaigui na oro, qataq lasoqta'a so lpetegaxanaxat ỹataqta ỹaxaraic.

Apocalipsis 15:5

Qaq can ime de'era, nache qaltaq samato'ot na piguem, nache sela'a aso no'onaxanaxaqui da nauatoigui.

Isaías 49:14

Qalaxaye ye Sión, 'eeta': «Ñim Nataxala' aỹem ca'ai, Ñim Ñatamnaxala' aỹem icoua'ai.»

Apocalipsis 6:8

Ime, nache sela'a so lỹa caaỹo qovialec da lo'oxoỹaxac qataq ỹataqta qauem. Qaq som netalec somaye le'enaxat Nleuaxa. Qaq so ilotague' da lo'onataxanaxac da nleuaxa ca'attaueegue somaye. Qaq 'enauaque soomaye ỹaconegueta da la'añaxa'c da yaqto' ỹalauat na shiỹaxauapi so 'oonolec naua cuatro lpa'axaco namayepi ana 'alhua, irolec ca alaataxac, qataq na nqouaxa, qataq na nalolaxa qataq nam shiguiỹacpi dequi'iỹapec maye huetalec ana 'alhua.

Apocalipsis 4:1

Qaq co'ollaq ime de'era, nache sela'a so lasom, nauattaigui, neto'ot na piguem. Qaq som nvilỹaxac maye hua'auchiguiñi co'ollaxa da sa'axaỹa maye 'eeta'am da l-lamaxa ana nasheere, aỹem 'enapega, 'eeta': «¡Ñaq Aỹem 'anquigueua'a!, yaqto' 'am sachaxana nam huotaique da yo'oq.»

Zacarías 4:2

'Am Zacarías «¿Negue't ca 'aula'a?» Nache aỹem sasateguet sheeta': «Qomye selota'a ara lashe ana ncoỹaraxanaxaqui maye chegaqaigui na oro, aramaye na'attalec añi laỹe' na aceite. Qaq na pa'asheguem aramaye nache huo'oi ñeua siete ncoỹaraxanaxaqui' maye netaua'alo naua siete lleco na aceite.

Amós 8:2

nache Ñimaye aỹem inat, 'eeta': Amós, ¿negue't na 'aulota'a? Nache aỹem sheeta': Qomye selota'a añi npaqta maye huetagui ana mashe ỹeta ala ana nañiguishe. Nache Ñimaye 'eeta': Na Israel le'ecpi, mashe ỹoqta ỹe, ỹoqo'oye aỹem saishet da qaltaq she'eguelaxa da sechoxoreetac qome.

Daniel 12:5

Qaq aỹem Daniel, sela'alo soua lỹa't dos ỹale't nachattrañi, so 'oonolec neto'ot na loigue so tala, qaq so lỹa qalaq neto'ot so lỹa loigue.

Ezequiel 44:4

Qaq ime nache se'eso shiỹaxaua qaltaq aỹem ỹauega som ñegueuo maye pa'aỹa'ague da sheu', maye datateguet aso atamnaxaqui. Huaña nache sela'a da llo'oxoyec Ñim Nataxala' da nlaxatchigui aso atamnaxaqui, nache aỹem sa'alyiñi naua illecte qataq seviraxata'aguet na ỹatap na 'alhua.

Ezequiel 10:1

Qaq ime nache sela'a na pa'asheguem som 'eco' 'eeta'am na lapoxot maye nalotcheguema naua lqaigo soua huo'oi naua laua't, da huo'o so netalec 'eeta'am aca so'onaxaqui maye chegaqaigui na coma' zafiro.

Ezequiel 8:7

Qaq ime qaltaq aỹem ỹauega so ñegueuo ye qasoxoc. Nache sela'a so mpaqtaxanaxat da huo'o so lauac.

Ezequiel 2:9

Qaq huaña nache sauaateguet so nhuaq da aỹem naỹaña, qaq somaye nasoqta'a aso nere maye qalpatta'ague.

Ezequiel 1:4

Qaq huaña nache sela'aguet so la'at lta'araic chegoxogue da sheu', qataq so lta'araic lo'oc na piguem maye chegoqtapoigui so norec, 'eeta'am na nqashelgaxa, qaq naua loiguiye somaye nache huo'o so ne'eraxa. Qaq na laiñi se'eso norec huo'o so 'eeta'am na lcat bronce da lqashelgaxa,

Jeremías 1:11

Ñim Nataxala' aỹem inat, 'eeta': «'Am Jeremías, ¿negue't dam 'aulota'a?» «Nache aỹem sheeta', selota'a ara lcoue ana almendro.»

Ezequiel 10:9

Qaq aỹem samata'a nache sela'a da ñi 'oonolec soua huo'oi naua laua't huaqta'ai'salo soua cuatro saxannal, qaq da lataxac se'esoua saxannal qalaq 'eeta'am na coma' crisólito.

Ezequiel 9:4

nache 'enapega, 'eeta': «'Aucoleelec qome ye huaqta'a't nỹecpi ye Jerusalén, nache 'auauo'o ca la'anaxat na latap 'enauac nam huo'o da lta'araic laquicoxo, souaxat 'enauac nam ỹataqta qaiqaiga maye qaỹo'ottac da huaña yemaye.»

Apocalipsis 14:3

Qaq som ciento cuarenta y cuatro mil shiỹaxauapi maye nachattaua'a aso so'onaxaqui qataq soua cuatro shiguiỹa'c maye nca'altraue'c qataq soua veinticuatro nqueroxonqa soomaye ỹo'ootac so dalaxaic no'onec maye saishet da huo'o ca na'a'q nache qaỹa'aqtega. Se'eso no'onec qaica ca ishet da ỹaỹaten na leraxat, nachaqsota som shiỹaxauapi maye qanca'alaxatec, chegoqtoigui na laỹepi shiỹaxauapi maye huetalec ana 'alhua.

Apocalipsis 22:4

Huaña, nache qanma'ai' da qanauane' Ñim Lo'onatac 'Enauacna. Qaq da le'enaxat Ñimaye, nache nanettalec naua lata'api namayepi.