2 Ts 1:7 - La'aqtaqa Ñim Lo'onatac 'Enauacna 2013

⁷ Qaq So Qarataxala' Jesús, qom ñe'eguelaq chegoqtot na piguem, nactaigui na le'eraxa ca norec qataq nnaictague' ca 'añaxaicpi lamaxashecpi piguem le'ecpi. Nache Ñim Lo'onatac 'Enauacna qami' ỹanema ca qaramaicỹaxaqui 'eeta'am da 'eetec naqa'en da shenaqta.

Nuevo Testamento Toba Sur

⁷ qataq da qami' nmataxanaxaneeguesopa qome na qanque'ejnaxaqui, nataq'en qomi', que'eca na'a'q qom ñi'iguelaq so qadataxala' Jesús, chigoqo'ot na piguem da nachaxan, nactaigui na 'ico' l'edaxa na nodec qataq na chigaqshiguem Dios lamaxashicpi mayi 'añaxaicpi.

Nuevo Testamento Toba Sombrero Negro

⁷ Qama'le ami yichoĝode'n qomle, da'me ami jo'ne 'uo da'me adachoĝodequi nayi, qaedi qadalo'ta't da'me qo'mi yichoĝode'n, qom yovita ga'me nolo' da'me yitaĝa 'niyelaq joñe'me Qadejaliaĝanec Jesús chiyaqa'ague jodi'me piyem, da'me naquetaue joga'me ena'am ta'le dole' lauaq, nataq'aen naequetedapegue' jogaa'me piyem laje' jo'ne yataqata p'ajodaye.

2 Ts 1:7 Referans Kwoze

Apocalipsis 14:13

Ime, nache sa'axaỹa so na'aqtac chemqot na piguem, aỹem 'enapega, 'eeta': «'Iyiñi qome de'era: ‹¡Ỹataqta machiguiñi qome nagui ca ileu, da huo'otaq na'attaua'a So Qarataxala' Jesucristo!›» Qaq som Saqcha'a La'añaxac Ñim Lo'onatac 'Enauacna 'eeta': «Aja', nache 'eetec, cha'aye namayepi nmateeguesop 'enauac nam nque'eenaxacpi qataq lqalaiguesat, qaq Ñim Lo'onatac 'Enauacna ỹauo'o ca nsheetenaguec namayepi souaxat nam qalota no'on maye ỹo'ot.»

Mateo 16:27

Cha'aye Aỹem Shiỹaxaua Llalec, saqaỹaloq da ñe'eguelaq ñanactaigui da la'añaxac Ñim Lo'onatac 'Enauacna qataq na ỹamaxashecpi da yaqto' sanem ca laueguec nam 'onaxaic nam ỹo'ottacpi qataq sauo'o ca nhuaxanaguec na qauem nam ỹo'ottacpi.

Apocalipsis 22:16

«Aỹem samaq so ỹamaxashec piguem le'ec, da yaqto' da'aqtaxanem 'enauac de'era nam Aỹem ỹa'amaqteetac. Qaq Nachaỹem maye sachegoxoguet so nta'a David. Qataq nache Aỹem huaqaañi yo'oxoñi lashe maye ỹataqta 'eroigui da yo'oxoñitai'.»

Tito 2:13

Nataqa'en qomi' ỹapaxagueneque da qolaqtot da qarhuataxanaxac da seuataqta'aguet que'eca na'a'q maye qomi' qaỹachaxanapeguema, da ñe'eguelaq da nactaigui da llo'oxoyec So Qarataxala' Jesucristo maye Qarta'a, qataq Qarca'alaxaqui.

2 Corintios 4:17

Cha'aye naua qanque'eenaxaco nagui de'era qanachaalataxac, naamaye saq 'amaqtache qataq saqaỹaloq da inoxoore'c. Qaq qana'achec da nachenaua naua chegoqchiguilo naqa'en Ñim Lo'onatac 'Enauacna da ỹataqta qomi' nlaxatchiguilo da lta'araic ño'oxoyec maye qaica ca loga't.

Apocalipsis 21:4

Ñimaye iỹore'c naua lache' namayepi. Huaña, nache saishet da ileu, nataqa'en saishet da ỹe'eguelaxalec da nỹeetac, huo'otaq da na'alaqtapiguiñi, huo'otaq da huo'o da nqui'ic, cha'aye 'enauac nam huo'o co'ollaxa qalaq nagui 'enauac da imeuo.»

Romanos 8:17

Qaq nagui da mashe qomi' llalqa, nache nataqa'en qomi' taleguete 'enauac nam 'onaxaic maye iqataxaatapigui' Ñimaye da qomi' ỹanema. Qaq 'enauac ỹataqta ñeuanaqte' So Cristo, qaq da huo'otaq huo'o da qanque'eenaxac da shenaqta'am Somaye, nache nataqa'en ỹoqta 'eesa da ñeuanaqaua'a Somaye da llo'oxoyec maye ỹaconeguet qome.

Lucas 17:30

Qaq 'era qome da sheetec Aỹem Shiỹaxaua Llalec, qom ivita que'eca na'a'q da ñachaxan.

Mateo 25:31

Qaq Aỹem Shiỹaxaua Llalec qom ivita da ñe'eguelaq, nache ca iviraxac 'eeta'am da lviraxac ca nta'a 'añaxaic, Aỹem coleesop na ỹamaxashecpi nache ñeso'ongui aca ñeso'onaxaqui da Aỹem Nta'a.

Isaías 57:2

qalaxaye namayepi inoxoneua'a da nlagaxayec. Cha'aye quetegue co'ollaxa da no'on ñecỹaxac, qaq nagui qalaq huetangui añi nhuachiqui da nmatteguec.

Apocalipsis 22:9

Qalaxaye somaye aỹem 'enapega, 'eeta': «Saishet da nache qonetec de'era, 'avio'oxoren Ñim Lo'onatac 'Enauacna, cha'aye 'enauac qomi' lo'onataxanaxanecpi Ñimaye, 'am qataq aỹem qataq na la'aqtaxanaxanecpi, qataq 'enauac nam ỹalaxaguet da la'aqtac Ñimaye.»

Apocalipsis 22:6

Ime, nache so namaxashec piguem le'ec aỹem 'enapega, 'eeta': «Ne'ena na'aqtacpi ỹataqta 'eesa, qaq namayepi ishet da qaipi'iỹa'a. Qaq Ñim Lo'onatac 'Enauacna maye Nataxala' Ñim ỹanem So Saqcha'a la'añaxac nam la'aqtaxanaxanecpi nacheñi Ñim namaq na lamaxashec da yaqto' ỹachaxana na lo'onataxanaxanecpi nam mashe nayeeta'a da yo'oq.» Nache So Jesús 'enapeco':

Apocalipsis 20:11

Qaq can ime de'era, nache sela'a aso late'erai so'onaxaqui lapagaxai qataq som nso'ootangui asomaye. Huaña, nache ana 'alhua qataq na piguem ỹataqta nlagaxatapec, nache qaica ca ishet da qaltaq ila'a.

Apocalipsis 1:7

¡Ñaq qauloỹa! ¡Na Cristo mashe anacta, netalec na lo'oc na piguem! 'Enauac da qailota'aguet da anacta, ivira'a nam ỹalauat co'ollaxa; qataq nataqa'en 'enauac na huetalec ana 'alhua, nỹen souaxat namaye. 'Era dam 'eetec qome, ¡aja', nache 'eetec!

Hebreos 9:28

Qaq nache 'eeta'am So Cristo da 'oonolec da nañan da yaqto' qalota da shenaqta na qaỹapalaxat na lasouaxashetpi. Ime, nache Somaye ñe'eguelaxa qome ana 'alhua, qalaxaye saishet da naỹa da qaltaq ileualec na qarasouaxashetpi, nachaqrata da anac da 'enauac qomi' nca'alaxatre'c, qomi' maye seuataqtaique ca lviraxac.

Hebreos 4:11

Qaq ỹoqo'oye qomi' ỹataqta ña'añaxataq da salaxasoxoguet Ñim Lo'onatac 'Enauacna, yaqto' que'eca na'a'q senoxonaxaua'a ca lma' maye nmataqa' Ñimaye. Saishet qome da qolaxague da lataxac som saishet da ỹa'amaqten da no'on na'axaỹaxac.

Hebreos 4:9

Qalaxaye qomi' ñaq seuataqtaique que'eca na'a'q, qomi' maye qomi' lalamaqa'ate Ñim Lo'onatac 'Enauacna da saconaxaguet ca qanmataxac maye qomi' ỹachaxanapeguema Ñimaye.

Hebreos 4:1

Qaq ỹoqo'oye nagui da ñaq huo'o da qomi' qaỹachaxanapecoto da ishet da senoxonaxaua'a ca nmataxac Ñim Lo'onatac 'Enauacna, nache ỹataqta ñetelaqañi qome. Ten, qom huo'o ca 'oonolec da qoñiita da saishet da huenoxoneua'a de'era mataxac maye ỹachaxanapec Ñimaye.

2 Timoteo 2:12

da ña'añaxataxaguet na qanque'eenaxaguesat, nache ñeuanaqaua'a da lo'onataxanaxac Somaye. Qaq da shenaqtega da sa sauattonaq, nache Somaye nataqa'en 'enapec da sa qomi' ỹauatto'n.

Colosenses 1:16

Qataq chegoqchigui Somaye co'ollaq Ñim Lo'onatac 'Enauacna ỹo'ot 'enauac nam hueto'ot na piguem qataq nam huetalec ana 'alhua, 'enauac nam ishet da qaila'a, qataq nam saishet da qaila'a, qataq na saqcha'a na'añaxacpi maye damaxasoxonapec qataq nam huo'o da la'añaxac. Ñim Lo'onatac 'Enauacna chegoqchigui naqa'en So Cristo 'enauac nam ỹo'ot. Qaq So Cristo, nache 'enauac maiche lalamaxatpi.

Efesios 1:2

Seỹaxaatacot Ñim Qarta'a maye Lo'onatac 'Enauacna qataq So Qarataxala' Jesucristo da ỹataqta qami' ỹauoteque qataq qami' ỹanema da nlagaxayec.

Hechos 1:11

Qaq se'esoua ỹale't 'ena'apo': «Qami' Galilea lashe', ¿ta'ainco' ye qauloito'ot na piguem? Se'eso Jesús maye qami' nallegoqtoiguilo, taigue da piguem, Somaye qome qaltaq ñe'eguelaq. Qaq que'eca lle'eguelaxasoxoc, nache 'eeta'am qome de'era llecỹaxac maye qauauañiichigui.»

Juan 1:51

Nataqa'en 'enapeco' So Jesús: –Ỹataqta 'eesa de'era, qami' sa'axatema nagui, da qami' qauloỹa'a qome na piguem qom nauatoigui, qataq na lamaxashecpi Ñim Lo'onatac 'Enauacna naỹaña Aỹem Shiỹaxaua Llalec qaltaq ỹe'eguelaxasheguem.

Juan 1:3

Qaq Ñim Lo'onatac 'Enauacna co'ollaq ỹo'ottacna, nache ỹachegoxotchigui So Na'aqtac 'enauac nam ỹo'otpi. Qaq 'enauac nam huo'o, qaica ca saq chegoqchigui So Na'aqtac.

Lucas 16:25

Qalaxaye so Abraham ỹasategueto' somaye, 'eeta': «'Am ỹalec, 'auennate co'ollaq ña qanca'alliitauec, qaq 'am 'auaỹamaqchiguiñi, qaq ñi Lázaro qalaq qauem da llecỹaxac. Qaq ñimaye nagui hueta'a ne'ena qalaq huo'o da lamaicỹaxac, qaq 'am qalaq 'anmeneguet da huo'o da 'anque'eenaxac.

Marcos 14:62

Nache So Jesús ỹasateguet somaye 'enapeco': –Aja', Nachaỹem. Qaq qami' qauloỹa'aguet qome Aỹem Shiỹaxaua Llalec, da ñanac da sootalec ca lo'oc na piguem, ñanactaigui da la'añaxac qataq da 'enec Ñim Lo'onatac 'Enauacna maye qaica ca ỹaqalanapec.

Marcos 8:38

Da qaualliquiitaigui ne'ena shiỹaxauapi maye 'etaxaloxoicpi qataq saishet da ỹaconeguet Ñim Lo'onatac 'Enauacna, nache saishet da Aỹem qaua'aquiiteguelec qataq naua ỹa'aqtaqa. Qaq da Aỹem qaua'aquiilec, nache nataqa'en Aỹem Shiỹaxaua Llalec qami' sa'agueleguete qom ñe'eguelaq da ñanactaigui da la'añaxac Ñim Ita'a qataq na lamaxashecpi.»

Mateo 26:64

Nache So Jesús 'enapeco': –Aja', nachera dam 'anasaxauec. Ñaq 'ana'axaỹaxana dam ỹa'aqtac nagui. Da mashe saqaỹapeque ca na'a'q da qami' Aỹem qauloỹa'aguet Aỹem Shiỹaxaua Llalec da sootalec ca lo'oc na piguem da ñanactaigui da na'añaxac qataq da namaxasoxonaxac maye Aỹem ỹami' Ñim Lo'onatac 'Enauacna maye qaica ca ỹaqalanapec.

Éxodo 3:2

Qaq huaña, nache Ñim Lo'onatac 'Enauacna nachaxana so Moisés, huetaigui so le'eraxa so norec maye huetaigui asotai' qo'oipaqole maye huo'o ana le. Nache so Moisés ichemaxata asomaye. Huaña, nache nanoma da 'ettaigui asomaye qalaxaye saishet da ỹavic.

Éxodo 19:18

Nache aso qasoxonaxa Sinaí nchisheguem co'ollaxa na lmala'q, cha'aye Ñim Nataxala' co'ollaq huenotec, nache nactaigui so norec. Qaq so lmala'q 'eeta'am na lmala'q ana nqatelaxanaxaqui, nache asa'aso qasoxonaxa ỹataqta 'enauac da cholaxan.

Isaías 66:15

Cha'aye Ñim Nataxala' qom anac qalaq nactaigui ca norec, aca nnaigonapi qalaq 'eeta'am qome ana daua'ache, huaña nache icorec na le'eraxa da layeloxo, qataq nalaqaasheguem na le'eraxa da lhuaxanaxanaxac.

Ezequiel 1:13

Qaq da lataxa'c se'esoua maye huo'o da lca'alaqa', qalaq 'eeta'am ana poqo da 'ettaigui, huo'otaq aca ncoỹaraxanaqte da deratapigui', qaq so norec qalaq ỹataqta chauec na le'eraxa, qataq nache chegoqtapoigui na nqashelgaxa.

Daniel 7:9

Qaq so ñaq semeteetac somaye, nache qaỹauo'o aso so'onaxaquipi, nache huo'o so 'oonolec ỹa'axaiquiolec nso'ooñi. Qaq soua alogo somaye ỹataqta ỹapaga'q 'eeta'am ana aloñi, qaq na laue qalaq 'eeta'am na qui'itta qagueta laue. Qaq na le'eraxa asom nso'onaxaqui, qataq soua lasaxannal asomaye, qalaq 'eeta'am na le'eraxa na norec,

Mateo 16:28

Qaq ỹataqta 'eesa de'era qami' sa'aqtaxanema, da huo'o qome ca 'oonolec da qoñiita maye ỹalectauo nagui cam saishet qome da ileu, qom saxanaxa da ilogui da selo'ogue 'enauacna.»

Mateo 25:41

Ime, nache shenapega na qauem da lataxac, sheeta': «¡Aỹem qoquiỹa'ai! Cha'aye Ñim Lo'onatac 'Enauacna 'oonolec da iqataxaatapigui' qauem maye qami' taleguete. Qanqo'oñiuga yem chochaq tatec norec maye iqataxaatai' Ñim Lo'onatac 'Enauacna, da yaqto' ỹasaxangui so pa'aguenataxanaxaic qataq nam lamaxashecpi.

Hechos 3:19

Qaq ỹoqo'oye qaualache' nagui naua qano'onataxacolli', nache qaualaqaiguet Ñim Lo'onatac 'Enauacna, yaqto' Ñimaye ỹapalaxa't naua qarasouaxashe'echilli'. Nache Ñimaye icoua'ai 'enauac nam sa ỹaỹamaxañi maye qauo'ocheetac, nache qami' ỹanema da qara'añaxaqui.

1 Corintios 3:13

Ca lo'onatac ñi 'oonolec, yo'oq qom ivita ca pa'atec na'a'q. Cha'aye qom ivita ca pa'atec na'a'q, nache Ñim Lo'onatac 'Enauacna, ỹe'eguen na lo'onatac ñi 'oonolec. 'Eeta'am da qaỹe'eguenec ca norec ca no'onataxanaxat maye seuenaq da so'onataxanaxa.

1 Ts 3:13

Nataqa'en seỹaxanaqtacot Somaye da qami' ỹanema ca qara'añaxaqui da qaumachiỹo'ot da qarpi'iỹaxaqui Ñim Lo'onatac 'Enauacna, qataq qami' ỹanema da ỹataqta qui'itta da qarquiyaqteỹaxaqui qataq qaica ca qarasouaxashechi. Yaqto' qom ñe'eguelaq Somaye da nnaictague' na qui'itta lamaxashecpi, nache qaica ca ỹauo'o ca qarasouaxashechi da qanachaachiỹot Ñim Lo'onatac 'Enauacna. Aja', nache 'eetec.

Hebreos 10:27

Nachaqrata da qomi' seuataqta'aguet cam qaica ca 'ena'am lchecỹaxac maye nmitaguec 'enauacna, que'eca na'a'q da Ñim Lo'onatac 'Enauacna nmit na ipa'agueetac Ñimaye qataq ỹavigaxat ỹasaxangui ca norec.

Hebreos 12:29

Cha'aye Ñim Lo'onatac 'Enauacna, Ñimaye 'eeta'am ca norec maye ỹataqta cochepchiguiñi naqa'en ca ỹavigaxat.

2 Pedro 3:7

Qalaxaye nataqa'en ỹachegoxotchigui se'eso la'añaxac da Ñim Lo'onatac 'Enauacna ỹan da la'aqtac, da qom ivita que'eca laloqo', nache na piguem qataq ana 'alhua maye huo'oi nagui, naamaye ilaxachiguilo, irolec ca norec. Naamaye qaỹavigaxa't qom ivita que'eca na'a'q da Ñim Lo'onatac 'Enauacna nmit 'enauacna, nache ilaxachigui 'enauac nam ỹo'ottac na qauem.

Judas 1:7

Qataq nache 'eeta'am da huaigui co'ollaxa so shiỹaxauapi maye lma' ye Sodoma qataq Gomorra qataq som nỹecpi maye saqaỹapeque yeemaye. Som hueta'a yemaye ỹataqta ỹaguec da lle'etaxaloxo qataq ỹo'ottac na ỹotta'a't lataxac da quisheguetaxac maye sa qaishetapec. Qaq ỹoqo'oye Ñim Lo'onatac 'Enauacna ỹauo'o da nhuaxanaguec, icorelec so norec maye saishet da 'om da yaqto' ỹo'ot da nque'eenaxac somayepi. Qaq damaye nachera da 'enauac qomi' qaivitaqteetegalo.

Apocalipsis 6:11

Nache Ñim Lo'onatac 'Enauacna ỹanema naua alogo lapagaxaiqa somayepi, nache 'enapega da ñaq cara'ac da deuataxanapec, cha'aye ñaq saxanaxa da imauec da ileu nam ỹa'amaqteetac So Cristo, maye iuen da ileu nataqa'en da 'ena'am somayepi.

Apocalipsis 14:10

nache Ñim Lo'onatac 'Enauacna ỹataqta dalemataỹa camaye qataq ỹataqta lta'araic ca nque'eenaxac naqa'en. Qaq que'eca nhuaxanaguec saishet da isotta, nachaqrata da nque'etaxangui na norec le'eraxa qataq nam quiquiaxaraic maye ỹavictaigui. Qaq nam qui'itta namaxashecpi piguem le'ecpi qataq Ñi Qagueta Llalec ỹauaachigui da nque'eenaxac camaye.