1 Pedro 1:3 - La'aqtaqa Ñim Lo'onatac 'Enauacna 2013

³ Ỹataqta sho'oxorenaq Ñim Lo'onatac 'Enauacna maye Lta'a So Qarataxala' Jesucristo, cha'aye chegoqchigui co'ollaq nca'aleeguesop da nleuaxa Somaye da Ñimaye naralaxat imauec da qanachaalataxac. Na'aictaxa da saishet da saxaguet da Ñim Lo'onatac 'Enauacna qomi' ỹauoteque, qalaxaye chegoqchigui da lta'araic lsoxoyec Ñimaye, nache naralaxat da qarataxac qataq qomi' ỹanema da 'itchiguiñi qarca'alaxa,

Nuevo Testamento Toba Sur

³ Ÿataqta shi'oxodenaq qome ñi qadta'a Dios ñim lta'a so qadataxala' Jesucristo. Cha'ayi ñimayi ÿachigoxotchigui dam lta'adaic lchoxonnataxanaxa da qaltaq qomi' nañaxa't naq'en, ÿachigoxotchigui so Jesucristo co'ollaq nca'aleeguesop naq'en da nleuaxa. Qaq 'eda da chochaq tateec naq'en da qanaquitaxac,

Nuevo Testamento Toba Sombrero Negro

³ 'Ñonaĝataĝaye joñe'me Qadet'a Dios jo'ne Let'a joñe'me mach'e Qadejaliaĝanec Jesucristo, qa'a naqaeñe jo'ne yataqachiñe choĝodenataĝanaĝaic, qama'le qo'mi yanema da'me qat'oyaĝac jo'ne dalaĝaic. Chane'eja male 'uo da'me qadeuataqataĝanaĝac jo'ne ja yitaĝa ta'le pal, yajouaĝat da'me joote 'niyelaĝajeguem joñe'me Jesucristo ca'li chiyaqauelo ga'me napa'lpi.

1 Pedro 1:3 Referans Kwoze

1 Pedro 1:23

Qaq Ñim Lo'onatac 'Enauacna naralaxat da qarataxaqui, 'eeta'am da ỹe'eguelaxalec da nañiguiñi ñi 'oonolec da qoñiita. Qalaxaye de'era qarañoxoqui saishet da chegoqchiguilo caua yo'oqchiguilo qarta'alli' maye taỹa'alo da imereuo. Nachaqrata da huo'o da qana'achec, cha'aye de'era chegoqchigui da la'aqtaxanaxac Ñim Lo'onatac 'Enauacna. Qaq de'era na'aqtaxanaxac ỹachaxan da nca'alaxa maye qaica ca ishet da ilaxachigui.

1 Juan 5:4

Qaq ỹoqta 'eesa da 'enauac nam llalaqpi Ñim Lo'onatac 'Enauacna, namayepi nauec nam qauemsat maye huetalec ana 'alhua, qataq 'enauac nam pi'iỹa'a So Jesucristo, namayepi dauegaxan.

Romanos 15:13

Qataq huo'o da iỹaxanaxac Ñim Lo'onatac 'Enauacna maye qomi' ỹanema da qanaquitaxac, da Ñimaye qami' nlaxatchiguilo qome da qaramaicỹaxaqui. Qataq qami' ỹanema da qarlagaxayiqui maye chegaqaigui da qarpi'iỹaxaqui Ñimaye. Qataq chegoqchigui da la'añaxac So Saqcha'a Na'añaxac Qui'itta da nquictasheguem da qanaquitaxaqui.

Efesios 1:7

Chegoqchigui da l-leuaxa So Cristo co'ollaq qaiuaxaneguet so npe'enaxaqui, da Ñim Lo'onatac 'Enauacna ỹapalaxat 'enauac nam qarasouaxashetpi qataq qomi' isoueeguesopa namayepi. Qaq de'era ỹo'ot souaxat da chochaq huañi lsoxoyec Ñimaye. Ỹachegoxotchigui dam lta'araic laỹaanec qataq lauattonaxanaxac,

2 Corintios 1:3

¡Sanaqtacot da qana'achecỹaxac Ñim Lo'onatac 'Enauacna maye Lta'a So Qarataxala' Jesucristo! Cha'aye Ñimaye ỹataqta soxoraic qataq huotaxanaqtaqaic qataq nache 'eetai' da qomi' itauaata'ape.

1 Juan 3:3

'Enauac nam iuattaique qataq huo'o da lpi'iỹaxac da 'enauac ipacchigui de'era, nache ỹataqta ỹauo'o da na'añaxataxac da ỹo'ot ca ỹaỹamaqchiguiñi, 'eeta'am da 'eetec co'ollaxa So Jesús.

Romanos 12:12

Nagui da ñaq qauacheetaique Ñim Nataxala', nache qauachaxañi da qaramaicỹaxaqui. Qataq da huo'o ca qanque'eenaxaqui souaxat Ñim Nataxala', nache qauauo'oi ca qanhualaxaunaxaqui. Qataq da qanqouagaxauñiitacot Ñim Nataxala', nache qauachaxañi da nache qoquiito'ot da qanqouagaxaunaxaqui.

1 Juan 2:29

Qaq cha'aye qami' mashe sogote da qauaỹaañita da So Jesucristo ỹo'ot 'enauac nam ỹataqta ỹaỹamaxareeta Ñim Lo'onatac 'Enauacna. Qaq ỹoqo'oye nataqa'en iuen da qauaỹaañi da 'enauac nam ỹo'ot ca ỹaỹamaxareeta Ñim Lo'onatac 'Enauacna, nache namayepi ỹataqta llalaqpi Ñimaye.

Efesios 1:3

Sanqot da qana'achecỹaxac Ñim Lo'onatac 'Enauacna Ñim Lta'a So Qarataxala' Jesucristo, cha'aye nagui da ña'araqtaua'a So Cristo, nache Ñimaye qomi' ỹanema na ỹotta'a't lqouagaxanaqtaiguesat maye chegoqo'ot So Saqcha'a Na'añaxac Qui'itta.

Éxodo 34:6

Ime, nache nlectelec so Moisés, na'axanneque naua la'aqtaqa, da detaqtac, 'eeta': «¡Nam Nataxala'! ¡Nam Nataxala'! ¡Nam Lo'onatac 'Enauacna maye soxoraic qataq choxonnataxanaxaic! ¡Namaye qaỹoqchiguinguit da lalemataic, qataq lta'araic da lsoxoyec, qataq ỹataqta 'eesa!

Efesios 3:20

Qaq ỹoqo'oye 'onaxaic nagui da qaỹo'oxoren qome Ñim Lo'onatac 'Enauacna, Ñim 'añaxaic maye ishet da ỹactec naqa'en ca qomi' ỹanema, napacalec cam seỹaxanaqaique, huo'otaq cam tatapigui ye qarhuel, da chegoqchigui naqa'en da la'añaxac maye do'onataxaatapoigui da qanachaalataxac.

Efesios 1:17

Nache seỹaxaatacot Ñim Lo'onatac 'Enauacna maye Lta'a So Qarataxala' Jesucristo, Ñim Nta'a maye ỹo'oxoraic, da yaqto' qami' ỹanema So Saqcha'a La'añaxac da qami' ỹaanaxanaxaiqa naqa'en, qataq da yaqto' ỹataqta qauauattoñiita Ñimaye.

1 Pedro 3:21

Qaq se'eso 'etaxat, nacheso so naigui dam seuenaqtac naxa nagui da so'otaq da achelaxac dam chegoqchigui da Ñim Lo'onatac 'Enauacna qomi' nca'alaxatre'c. Qaq de'era achelaxac maye ỹataqta 'eesa saishet da iỹo da yo'oqchigui qaro'ocỹaxac, nachaqrata da seỹaxanaqot Ñim Lo'onatac 'Enauacna da iỹouec na qarasouaxashetpi, yaqto' saishet da seuennaqtega da huo'o ca qarasouaxashet. Qaq Ñim Lo'onatac 'Enauacna qomi' nca'alaxatre'c, chegoqchigui naqa'en da saxaigui dam qanachelaxac, cha'aye So Jesucristo nca'aleeguesop da nleuaxa, ime, nache taigue da piguem, da nso'ooñi, neta'ague da aloic Ñim Lo'onatac 'Enauacna hueta'a yem ỹataqta ỹo'oxoraq qataq huaña da ilo'ogue 'enauac nam lamaxashecpi Ñim Lo'onatac 'Enauacna qataq 'enauac nam laỹepi maye saqcha'a, maye nataqa'en huo'o da la'añaxac qataq da 'enec.

Salmos 86:15

Qalaxaye 'Am Nataxala', 'Am Atamnaxala', 'am nhualaxaunaxaic qataq 'am choxonnataxanaxaic.

1 Timoteo 1:14

Ỹoqo'oye aỹem ỹanem da ỹataqta lta'araic lqouagaxanaqtaic, nataqa'en da npi'iỹaxac, nataqa'en da nsoxoyec maye 'enauac qomi' ỹanema souaxat da ña'araqtaua'a So Cristo Jesús.

Efesios 2:4

Qalaxaye Ñim Lo'onatac 'Enauacna ỹataqta lta'araic da lchoxonnataxanaxa qataq da lauoche da shenaqta.

Santiago 1:18

Ñim Lo'onatac 'Enauacna maiche lhuennataxac da ỹauo'oi qomi' llalqa. Qaq ỹoqo'oye qomi' ỹanema da dalaxaic achaalataxac, chegoqchigui de'era no'on na'axaỹaxac maye chegaqaigui da nca'alaxa.

Tito 2:13

Nataqa'en qomi' ỹapaxagueneque da qolaqtot da qarhuataxanaxac da seuataqta'aguet que'eca na'a'q maye qomi' qaỹachaxanapeguema, da ñe'eguelaq da nactaigui da llo'oxoyec So Qarataxala' Jesucristo maye Qarta'a, qataq Qarca'alaxaqui.

1 Corintios 15:20

Qalaxaye ỹataqta 'eesa da ¡So Cristo ỹe'eguelaxalec da nca'alec! Qaq damaye ỹa'axat da nataqa'en taỹa'a da ỹe'eguelaxalec da nca'alec na laỹepi leuaxaicpi.

1 Corintios 13:13

Qaq ỹoqo'oye da npi'iỹaxac qataq da aquitaxac qataq da nsoxoyec ỹataqta qaica ca loga't. Qalaxaye da ỹoqta ỹactec ne'enaua tres, nachera da nsoxoyec.

1 Juan 3:9

Qaica ca llalec Ñim Lo'onatac 'Enauacna da queto'ot da ỹo'ottac na lasouaxashetpi, cha'aye dam achaalataxac maye hueto'ot, chegoqo'ot Ñimaye. Qaq ỹoqo'oye que'eca shiỹaxaua saishet da queto'ot da ỹo'ottac da lle'etaxaloxo, cha'aye ỹataqta llalec Ñim Lo'onatac 'Enauacna.

1 Pedro 2:2

Nachaqrata da qanmichiỹaique 'enauac na no'on maye itauan da saqcha'a qarca'alaqai, 'eeta'am ca nogotolec maye cheta'ague da ñiguiñi da lhuogoxo da nmitta'a na lche' aca late'e. Qaq da nache qoñiitec de'era, nache qami' no'o'n 'amqaanataxanaxaiqa, qaq Ñim Lo'onatac 'Enauacna nache qami' nca'alaxatre'c,

Hebreos 3:6

Qalaxaye So Cristo, som Llalec Ñim Lo'onatac 'Enauacna, Somaye ỹataqta laxaraic qataq itauan nam lalamaxatpi Ñimaye. Qaq qomi' nache qaraỹepi ne'ena lalamaxatpi Ñimaye da qolaqtot da ña'añaxataxac da qarpi'iỹaxac qataq da ñetonaqtapeguec cam nca'alaxa maye saconaxaguet qome.

Colosenses 1:27

Qaq Ñimaye maiche lhuennataxac da ỹaỹaanaxanaxanec de'era 'eetapeguec maye lta'araic qataq huo'o da llo'oxoyec 'enauac na ỹotta'a't shiỹaxauapi ana 'alhua. Qaq damaye 'eeta': Ñim Lo'onatac 'Enauacna naỹa naqa'en ana 'alhua So Cristo da yaqto' qami' hueta'agueta, qataq Somaye ỹataqta 'eesa naqa'en da qanhuañiỹaua'a da la'añaxac qataq da llo'oxoyec Ñim Lo'onatac 'Enauacna.

Romanos 8:24

Ñim Lo'onatac 'Enauacna qomi' nca'alaxatre'c, cha'aye huo'o da qanaquitaxac da ipacchigui de'era. Qalaxaye da qaiuatta'aguet cam mashe qailota'a, nache saishet da aquitaxac, cha'aye ca 'eeteco' da qaiuattaique ca mashe huo'o.

Romanos 8:11

Ñim Lo'onatac 'Enauacna nca'alaxateeguesop da l-leuaxa So Jesús, qaq Ñimaye nataqa'en nca'alaxatec da qaro'ocỹaxaqui maye mashe ileu, da yaqto' ỹe'eguelaxalec da nca'alec, da So Saqcha'a La'añaxac Ñim Lo'onatac 'Enauacna qami' hueta'agueta. 'Era dam ỹo'ot Ñim Lo'onatac 'Enauacna ỹachegoxotchigui So Saqcha'a La'añaxac maye qami' hueta'agueta.

Juan 1:13

Qaq namayepi nagui ỹataqta llalaqpi Ñim Lo'onatac 'Enauacna, chegoqchigui da maiche lhuennataxa Ñimaye, qaq saishet da nachera da maiche lhuennataxa na shiỹaxauapi.

Jonás 4:2

Ỹoqo'oye natamnot Ñim Nataxala', 'eeta': «¡Aicoue, 'Am Nataxala'! 'Era da sheetega co'ollaq soota'a ye ña'alhua, ỹoqo'oye huac da satauec da saỹa ye Tarsis, cha'aye saỹaten da 'Am maye 'Aro'onatac 'Enauacna, qaỹoqchiguinguit da 'aralemataic, cha'aye 'am soxoraic, choxonnataxanaxaic, huotaxanaqtaqaic, qataq ishet da 'anaralaxat ca 'arhuennataxac da sa 'aupaguelec cam qauem maye 'autaxaỹa da 'auo'ot.

Isaías 26:19

Qalaxaye so 'aralamaxatpi maye ileu, somayepi qaltaq nca'alec qome, so mashe qailareñi qalaq ỹoltaq nca'alec qome, qaq nam do'ochetapi maye huetaigui ana 'alhua qalaq nlouec qome nache ỹa'alaqtagui souaxat da ntonaxac, cha'aye 'am 'anamaxa qome ca 'arcoỹaraxanaxac 'eeta'am 'anqa'en na 'aỹa ye nte'etom, nache nam leuaxaicpi chegoqtoigui qome ana 'alhua da qaltaq nachaañi.

1 Juan 5:18

Saỹatenaq da nam llalaqpi Ñim Lo'onatac 'Enauacna saishet da ỹo'ot ca lasouaxashet, cha'aye So Jesucristo maye Llalec Ñim Lo'onatac 'Enauacna ntela'a namayepi, qaq som pa'aguenataxanaxaic saishet da ishet da huo'o ca ỹo'otec qauem namayepi.

1 Juan 5:1

Da sa'amaqtenaq So Jesús da nacheso So Lca'aguishec Ñim Lo'onatac 'Enauacna, nache 'eesa da qomi' llalaqpi Ñimaye. Cha'aye da sauotaxac Ñim Nta'a, nache iuen nataqa'en da sauotaxac na llalaqpi Ñimaye.

Colosenses 1:23

Qaq ỹoqo'oye qami' iuen da saishet da qaỹa'axañiiuec da qarpi'iỹaxaqui qataq da qanaquitaxaqui, maye qauachegoxochiichigui da no'on na'axaỹaxac maye chegaqaigui da nca'alaxa maye qaua'aqaichigui. Qaq de'era na'aqtac nachera da qaỹa'axattac 'enauaque naua 'aleu' ana 'alhua. Qaq aỹem Pablo nachera da sa'axattac.

Romanos 5:10

Cha'aye co'ollaq ñaq souaqtaigui da sepa'aguenaqtac Ñim Lo'onatac 'Enauacna, nache Ñimaye ỹachegoxotchigui da l-leuaxa So Llalec da ỹauo'o da qarlagaxayec, qaq nache ỹoqta 'itchiguiñi qone' da qomi' nca'alaxatre'c nagui da So Llalec nca'altauec qaq qomi' huo'o da qarlagaxayec da sonaqto'ot Ñimaye.

Romanos 4:25

Ñim Lo'onatac 'Enauacna ỹan So Jesús co'ollaxa da yaqto' qomi' ileualeguete souaxat na qarasouaxashetpi, qataq nca'alaxateeguesop da nleuaxa, da yaqto' ỹapalaxat na qarasouaxashetpi.

Salmos 86:5

Cha'aye 'Am Nataxala', 'am soxoraic qataq choxonnataxanaxaic, qataq lta'araic da 'arauotaxanaqtaic 'enauac na 'am iỹaxaatacot.

Salmos 41:13

¡Ỹataqta qaỹo'oxoren qome Ñim Nataxala', maye Natamnaxala' na Israel le'ecpi, nagui qataq nache 'eetai' qome! ¡Aja', nache 'eetec!

1 Crónicas 29:20

Qaq co'ollaq ime, nache so David detaxaigui se'eso laỹoota'a't shiỹaxauapi, 'eeta': «Nagui, qavio'oxoreñi Ñim Nataxala' maye Qanatamnaxala'ai». Huaña, nache 'enauac se'eso laỹoota'a't shiỹaxauapi ỹo'oxoren Ñim Nataxala', maye Natamnaxala' soua hua'au' lta'al, nache nqollemñi da ỹa'aldoto naua l-llecte Ñim Nataxala' qataq so nta'a.

1 Reyes 8:15

nache 'eeta': «Ỹataqta qaỹo'oxoren qome Ñim Nataxala' maye Natamnaxala' na Israel le'ecpi, cha'aye ipacchigui da ỹachaxanapecot co'ollaxa so ita'a David, co'ollaq 'eeta':

1 Juan 4:7

Qami' ỹauotaqa'ate ỹalqolqa, iuen da ñi 'oonolec da shenaqta ỹataqta ỹauotec ca lỹa, cha'aye de'era nauotaxanaqtaic chegoqo'ot Ñim Lo'onatac 'Enauacna. Qaq 'enauac nam huo'o da lauotaxanaqtaic, namayepi llalaqpi Ñim Lo'onatac 'Enauacna, qataq ỹauatton Ñimaye.

1 Ts 4:13

Qami' qarqaỹa't, sa saỹamaxarenaq da sa qauaỹaañi ca llecỹaxac na mashe qanmataxanaxanec, yaqto' saishet da huo'o ca daquicota da 'eeta'am ca saxanaxa da da'amqaanataxan maye saqca ca naquitaxac.

Gálatas 6:16

Qaq Ñim Lo'onatac 'Enauacna ỹami' qome da nlagaxayec nam lataxac de'era, qataq ỹachaxana da lchoxonnataxanaxa nam lalamaxatpi Ñimaye.

2 Ts 2:16

Ñim Lo'onatac 'Enauacna maye Qarta'a, Ñimaye soxoraic; ỹoqo'oye qomi' ỹauoteque, nache qomi' ỹanema da chochaq tatec qaramaicỹaxac qataq da ỹataqta 'eesa da ñeca'alaxauec. Ñimaye qataq So Qarataxala' Jesucristo seỹaxanoto,

1 Pedro 1:13

Qaq ỹoqo'oye iuen da ỹataqta qanloitec qataq qauennataxañiitelec ca qauo'oche, yaqto' nache 'eetai' da qauo'ocheetac ca ỹaỹamaqchiguiñi. Qataq ỹataqta imauec da qaua'amaqchiñi Ñim Lo'onatac 'Enauacna da qami' ỹo'oteque ca ỹaỹamaqchiguiñi qom ñe'eguelaq So Jesucristo.

1 Pedro 1:21

Chegoqchigui So Cristo da qami' qaua'amaqchiñi Ñim Lo'onatac 'Enauacna, ñim ỹe'eguelaxalec da nca'alec naqa'en Somaye, nache ỹami' da llo'oxoyec da lo'onataxanaxac. Qaq ỹoqo'oye qami' qauacheeto'ot da qanaquitaxaqui Ñim Lo'onatac 'Enauacna qataq ỹataqta 'itchiguiñi qanqa'eñi da Ñimaye qami' ỹanema cam qami' ỹachaxanapeguema.

1 Pedro 3:5

Cha'aye huo'o so 'alpi so lataxac co'ollaxa de'era, maye ỹa'amaqteetac Ñim Lo'onatac 'Enauacna, ỹoqo'oye ỹataqta ỹalaxaguet ñi lhua añi 'oonole.

1 Pedro 3:15

Nachaqrata da qavio'oxonñiitac So Cristo maye Qarataxala'ai, qataq qami' lhuotte' da qaua'aqtaxañim na shiỹaxauapi da 'eetec da huo'omshe huo'o da qarpi'iỹaxaqui So Cristo qataq dam ỹachaxanapec.

2 Crónicas 31:8

Qaq so Ezequías qataq so nataxala'pi maye ltauapi, co'ollaq ivi' nache ilalec so nogoxoshetpi maye qalapootacpi, nache ỹanot da na'achecỹaxac Ñim Nataxala', qataq talec naqa'en da no'on la'aqtac so nhuo' Israel le'ecpi.