1 Juan 5:20 - La'aqtaqa Ñim Lo'onatac 'Enauacna 2013

²⁰ Nataqa'en saỹatenaq da So Llalec Ñim Lo'onatac 'Enauacna, Somaye anac da qomi' ỹanema da qaraỹaanec da yaqto' sauattonaqta Ñim Lo'onatac 'Enauacna maye 'eesa. Qataq ña'araqtaua'a som Llalec Jesucristo; Somaye nacheso som ỹataqta 'eesa Lo'onatac 'Enauacna maye chegoqo'ot da nca'alaxa chochaq tatec.

Nuevo Testamento Toba Sur

²⁰ Nataq'en qomi' saÿajnaq da so llalec ñi Dios, somayi anac da qomi' ÿanema da qadauattonaxanaxac, da yaqto' sauattonaqta ñim ÿoqta 'eesa Dios. Qaq ñi'adaqtau'a som llalec Jesucristo som ÿataqta 'eesa. Qaq 'eso som qadta'a Dios, qataq nachiso som chigoqo'ot da nca'alaxa mayi chochaq tateec.

Nuevo Testamento Toba Sombrero Negro

²⁰ Nach'e ena'am jayatenaq queda'me ñe'me Lec'oĝot joñe'me Dios joote naequena, qama'le qo'mi yanema da'me qadetadenataĝanaĝac qaedi yataqachiñe jatetonaq joñe'me Dios jo'ne eja. Nataq'aen 'noota qom 'ñañaĝataĝala't da'me qolaqatalegue ñe'me jo'ne yataqata eja, naq'aeta da'me qolaqatalegue Lec'oĝot Jesucristo. Naqaeñe mach'e Dios yataqata eja, jo'ne qo'mi yanema da'me qat'oyaĝac jo'ne yataqatelegue.

1 Juan 5:20 Referans Kwoze

Juan 17:3

Qaq de'era achaalataxac maye chochaq tatec, damaye nachera da naigui da 'am qaỹauatton, 'am maye 'Aro'onatac 'Enauacna, maye nache'amta qataq 'am 'eesa, qataq nam 'Arca'aguishec maye 'anamaxa ana 'alhua co'ollaxa.

Lucas 24:45

Huaña, nache itaua'n soomaye da ỹaỹate'n naua naiguilo naua ñiyigui'she maye nanettralec ana nere maye huetalec na la'aqtacpi Ñim Lo'onatac 'Enauacna.

Juan 14:9

Nache So Jesús 'enapego' somaye, 'eeta': –Felipe, Aỹem mashe huo'oi soua vi'iye da qami' soota'agueta, ¿qalaq ñaq saxanoxo' da Aỹem 'auauatton? Cha'aye ca Aỹem ila'a, camaye nataqa'en ila'a Ñim Ita'a, qaq ¿ta'ainco' ye Aỹem 'auỹaxaatacot da qami' sachaxanalo Ñim Ita'a?

1 Timoteo 3:16

Qaq saishet da qaiqoleguet de'era 'eesa lataxac da qara'amqaanataxanaxac, cha'aye ỹataqta lta'araic da naigui llo'oxoyec: So Cristo nachaxan co'ollaxa, qalaxaye ỹacona da lataxac ca yo'oqchigui shiỹaxaua; qaq So Saqcha'a Na'añaxac ỹa'axat da saqca ca lasouaxashet Somaye, qaq ỹauaachigui Somaye 'enauac na chegaqasheguem lamaxashecpi Ñim Lo'onatac 'Enauacna. Qataq qaỹa'axatem 'enauac na ỹotta'a't shiỹaxauapi, qaq na shiỹaxauapi maye huetalec ana 'alhua ỹa'amaqten Somaye. Ime, qaq qaỹaueegue da piguem, nache Ñim Lo'onatac 'Enauacna ỹataqta nlaxatchigui da 'enec Somaye.

Isaías 44:6

Ñim Nataxala', maye Lta'a qataq lca'alaxaqui so Israel, Ñim Nataxala' maye Qaica ca Ỹaqalanapec, 'eeta': «Aỹem nachaỹem sa'auchiguiñi qataq sepa'atec, qaica ca lỹa atamnaxala'.

1 Juan 5:1

Da sa'amaqtenaq So Jesús da nacheso So Lca'aguishec Ñim Lo'onatac 'Enauacna, nache 'eesa da qomi' llalaqpi Ñimaye. Cha'aye da sauotaxac Ñim Nta'a, nache iuen nataqa'en da sauotaxac na llalaqpi Ñimaye.

Juan 20:28

Nache so Tomás 'enapeco': –¡'Am Ỹataxala' qataq 'am Ita'a maye 'Aro'onatac 'Enauacna!

Apocalipsis 3:7

Nataqa'en 'auauo'o aca 'ere, nache 'auamaxa ñi namaxashec maye ilotague' nam ỹa'amaqten So Jesús maye netaña ye nỹecpi ye Filadelfia. Qoneta': «Aỹem maye ỹoqta 'eesa da Aỹem Llalec Ñim Lo'onatac 'Enauacna qataq selo'ogue da lo'onataxanaxac co'ollaxa so nta'a David. Da ivita da sauatoigui ca lasom, nache qaica ca ishet da ỹapogui, qaq da sapogui qalaq qaica ca ỹe'eguelaxalec da ỹauatoigui. Qaq nagui ñaq 'ana'axaỹaxana dam 'am sa'axatem:

1 Juan 4:16

Qaq ỹoqo'oye saỹatenaq qataq sa'amaqtenaq da Ñim Lo'onatac 'Enauacna qomi' lauotaqa'ate. Ñimaye ỹataqta huotaxanaqtaqaic, ỹoqo'oye camachaqca ca ỹauotec ca lqaỹa, nache camaye ỹataqta 'itchiguiñi da na'attaua'a Ñim Lo'onatac 'Enauacna.

Romanos 9:5

Namayepi chegoxoguet soua hua'au' qarta'al, qataq Som ỹale maye Lca'aguishec Ñim Lo'onatac 'Enauacna nataqa'en chegoxoguet soomaye. Somaye ilo'ogue 'enauacna, qataq nacheso so Lo'onatac 'Enauacna ¡Da ño'oxonnataguec Ñimaye ỹataqta chochaq tatec! Aja', nache 'eetec de'era.

Juan 10:30

Aỹem, qataq Ñim Ita'a, 'oonolec da qarataxac.

Isaías 9:6

Cha'aye ñiguiñi qome ca nogotolec, Ñim Lo'onatac 'Enauacna qomi' ỹanema ca 'oonolec llalec, qaq camaye qoỹanagui qome da la'añaxac da nta'a, qataq qoỹanagui qome ne'enaua ne'enaqa'ate: Qaỹa'aalaque naua lqataxaco, Lo'onatac 'Enauacna maye 'añaxaic, Nta'a maye chochaq tatec, qataq Chegoqchigui da nlagaxayec.

1 Juan 4:2

Qami' ishet da qauauattoñi ca shiỹaxaua da netanguit So Saqcha'a La'añaxac Ñim Lo'onatac 'Enauacna, da camaye ỹa'amaqten da So Jesucristo naỹa ana 'alhua qataq da ỹoqta 'eesa ỹale.

1 Juan 2:6

Qataq ca 'eetega da nauochaxaua Ñim Lo'onatac 'Enauacna, nache camaye iuen da nateeteguet da lataxac co'ollaxa So Jesús.

Hebreos 1:8

Qalaxaye da detaxaỹa So Llalec, qalaq 'eeta': «Da 'aro'onataxanaxac chochaq tatec, qaica ca loga't, qataq 'auo'onataxana da 'ara'añaxac da 'aupagaqchiichigui da 'eesa lataxac.

Tito 2:13

Nataqa'en qomi' ỹapaxagueneque da qolaqtot da qarhuataxanaxac da seuataqta'aguet que'eca na'a'q maye qomi' qaỹachaxanapeguema, da ñe'eguelaq da nactaigui da llo'oxoyec So Qarataxala' Jesucristo maye Qarta'a, qataq Qarca'alaxaqui.

Hechos 20:28

Qaq ỹoqo'oye ñi 'oonolec da qoñiita ỹataqta ntel-la't, qataq nataqa'en qarchilliỹa'a 'enauac na 'amqaanataxanaxaicpi maye qami' ipataxagueta So Saqcha'a Na'añaxac Qui'itta da yaqto' qauloỹeegue. Namayepi maiche lalamaxatpi Ñim Lo'onatac 'Enauacna, lsheenaxanaxatpi, lasheue co'ollaxa soua ltago'q so maiche Llalec.

Juan 17:14

Qaq Aỹem sanema naamaye da 'ara'aqtac, qaq ỹoqo'oye nam huetalec ana 'alhua ỹataqta nquiỹalo, cha'aye naamaye mashe saishet da 'eeta'am da lataxac na shiỹaxauapi ana 'alhua, 'eeta'am da 'eetec Aỹem da saishet da sheeta'am namayepi.

Apocalipsis 19:11

Ime, nache sela'a na piguem da nauatoigui, nache sela'a so caaỹo lapagaxaic. Qaq som netalec le'enaxat «Ipacchiguilo naua la'aqtaqa» qataq «'Eesa», cha'aye somaye ỹataqta ỹaỹamaqchiguiñi da lo'onataxanaxac da nta'a huo'otaq da taỹa ca alaataxac.

Apocalipsis 15:3

Nache somayepi ỹo'ootac som lo'onec so Moisés da qaỹo'oxoren So Qagueta Llalec maye 'eeta': «'Am Qarataxala' maye 'Aro'onatac 'Enauacna, qataq qaica ca 'auqalanapec, 'enauac nam 'auo'otpi ỹataqta lta'araicpi, qataq huo'o da llo'oxoyec. 'Am maye 'am Lataxala' 'enauac nam huetalec ana 'alhua, 'enauac na 'auo'otpi ỹataqta ỹaỹamaqchiguiñi, qataq nalochiguiñi.

Apocalipsis 6:10

Nache somayepi ỹataqta na'axannec da la'aqtac, 'eeta': «'Am maye 'Aro'onatac 'Enauacna, qataq qaica ca 'auqalanapec qataq ỹataqta 'am qui'itta qataq nache 'eetai' da 'am 'eesa. ¿Chaq lagui da 'auauo'o ca 'arvi' da 'avi'enaxata'aguet nam qomi' ỹalaua't co'ollaxa? Qataq ¿Chaq lagui da 'auo'ot ca nhuaxanaguec namayepi?»

Apocalipsis 3:14

'Auauo'o nataqa'en aca 'ere, ime nache 'auamaxa ñi namaxashec maye ilotague' nam ỹa'amaqten So Jesús maye netaña ye nỹecpi ye Laodicea. Qoneta': ¡Aỹem maye ỹe'enaxat da 'Eesa! Qaq ỹe'enaxat de'era, cha'aye sapaxaguenataxaateguec da 'eesa na'aqtaguec Ñim Lo'onatac 'Enauacna, qaq saishet da satenataxaatac. Qataq chegoqchigui Aỹem da Ñim Lo'onatacna ỹo'ot 'enauacna. Ñaq 'ana'axaỹaxana dam 'am sa'axatem:

1 Juan 4:14

Qomi' ỹataqta sauanaqchigui da Ñim Nta'a namaxalec ana 'alhua So Llalec, da yaqto' nca'alaxatec 'enauac nam huetalec anamaye, qaq damaye sa'axataqtac saishet da huo'o ca sho'oqtaique.

Filipenses 3:9

qataq yaqto' aỹem qaila'a da ña'attaua'a So Cristo. Qaq saishet da chegoqchigui da no'on ỹataxac souaxat da salaxaguet na namaxasoxonaxacpi, nacherata da no'on nataxac maye ỹanem Ñim Lo'onatac 'Enauacna cam ỹa'amaqten So Cristo, dam no'on nataxac maye chegoqchigui da npi'iỹaxac.

2 Corintios 4:6

Co'ollaq Ñim Lo'onatac 'Enauacna ỹo'ot ana 'alhua, nache da la'aqtac, 'eeta': «Huo'o qome aca icoỹarelec na napalaxa.» Qaq co'ollaq qomi' ỹaỹaanaxanaxaneque da no'on na'axaỹaxac, nache nataqa'en icoỹaroigui da qantoonaxac, yaqto' chegoqchigui So Cristo da sauattonaq da la'amaqchec Ñimaye.

Juan 15:4

Qaq qami' da qoquiito'ot da Aỹem qana'ayeetaua'a, nache Aỹem nataqa'en shecto'ot da qami' ña'atta'agueta. Cha'aye acam lcoue, saishet da maiche huo'o ana ala da saishet da ỹoqta na'attaua'a acam lamo. Qaq nache 'eetec nataqa'en da saishet da maiche huo'o ca alaỹaxac da qoñiita, da huo'otaq saishet da Aỹem qana'ayeetaua'a.

Juan 14:23

Nache So Jesús 'enapeco': –Ca Aỹem ỹauotec, camaye nataqa'en ỹalaxaguet cam shenapec, nache Ñim Lo'onatac 'Enauacna maye Ita'a ỹauotec camaye. Nache Ñimaye qataq Aỹem ñanaguenaq da souaqta'aguet camaye.

Juan 14:20

Nache que'eca na'a'q qami' qauaỹachiñi da Ñim Ita'a qataq Aỹem 'oonolec da qarataxac. Qataq nataqa'en qami' qataq Aỹem 'oonolec da qarataxac.

Juan 14:6

Nache So Jesús 'enapega somaye, 'eeta': –Aỹem Nachaỹem nqa'aic, qataq Nachaỹem 'eesa lataxac, qataq Nachaỹem nca'alaxa. Qaica ca lỹa ñegueuo da qainoxoneua'a Ñim Ita'a, Nachaqaỹemta.

Juan 1:18

Qaica ca ishet da nma'ai' da ila'a Ñim Lo'onatac 'Enauacna, qalaxaye so 'oonolec Llalec maye ỹataqta neto'ot Ñimaye, Somaye nacheso so qomi' ỹauattonaxanaxaneque Ñimaye.

Lucas 21:15

Cha'aye Aỹem qome qami' sanema caua qara'aqtaqalli' qataq ca qaraỹaañiqui, da yaqto' saishet da huo'o ca qami' dataỹa'agueta da qami' ncotaỹapegueto.

Mateo 13:11

Nache So Jesús 'enapeco': Aỹem qami' sa'aqtaxaatema dam saqcha'a lataxac da lo'onataxanaxac Ñim Lo'onatac 'Enauacna, qalaxaye na shiỹaxauapi qalaq saishet da saỹaanaxanaxanec.

Jeremías 10:10

Ñim Nataxala' nacheñi Ñim 'eesa Atamnaxala', Ñim Lo'onatac 'Enauacna maye nca'altauec. Ñim Nta'a maye chochaq tatec. Da dalemata nache cholaxan ana 'alhua, qaq nam ỹotta'a't shiỹaxauapi sa ỹañoxot da dataỹa'aguet Ñimaye.

Isaías 54:5

Cha'aye Ñim 'am lo'onata co'ollaxa ñimaye ỹauo'o 'am lhua. Qaq da le'enaxat 'eeta', Nataxala' maye Qaica ca Ỹaqalanapec, Ñim 'arca'alaxaqui nacheñi Ñim Qui'itta Natamnaxala' na Israel le'ecpi, nacheñi Ñim Lo'onata 'enauac ana 'alhua.

1 Juan 2:24

Qaq ỹoqo'oye saishet da qaỹa'axañiiñi da qauo'ocheetac nam qami' qaỹapaxagueneque co'ollaq cheta'ague da qaua'amaqchiñi So Cristo. Da qoquiito'ot da qauo'ocheetac damaye, nache qami' nache 'eetai' da qana'ayeetaua'a Som Ñalec qataq Ñim Nta'a,

Efesios 3:18

Qaq da qoñiitec de'era, nache qami' qataq 'enauac na laỹepi 'amqaanataxanaxaicpi ishet da qauaỹaañita ye lcachiguiñi qataq ye locta qataq da lalogaxa qataq ye lshecchiguiñi da lauotaxanaqtaic So Cristo.

2 Corintios 5:17

Qaq nagui da ña'araqtaua'a So Cristo, nache dalaxaic da qarataxac. Qaq Ñim Lo'onatac 'Enauacna mashe saishet da tatapigui ye lauel so togoshec qarataxac, nachaqrata da naralaxat da qarataxac. Qaq 'enauac de'era maiche chegoqo'ot Ñimaye. Qomi' co'ollaxa ỹataqta ñepa'aguenaqtague' Ñim Lo'onatac 'Enauacna, qalaxaye nagui chegoqchigui So Cristo da qanauochaxaua Ñimaye qataq qomi' ipataxaleguete da sa'aqtaxanaxam 'enauac na shiỹaxauapi da no'on na'axaỹaxac. Qataq chegoqchigui So Cristo da Ñim Lo'onatac 'Enauacna ỹapalaxat na qarasouaxashetpi qataq ỹo'ot da lactapegue' 'enauac na shiỹaxauapi.

1 Corintios 1:30

Qaq Ñimaye nallegoxottela't da qana'ayeetaua'a naqa'en So Cristo Jesús, qataq chegoqchigui naqa'en Somaye da qaraỹaanec. Qataq chegoqchigui naqa'en Somaye da qomi' ỹaỹamaxareete' Ñimaye, qataq da qomi' lalamaqa'ate, qataq da saconaxaguet ca nca'alaxa chochaq tatec.

Juan 17:25

'Am Ita'a, 'am ỹataqta no'on da 'arataxac, qalaxaye nam huetalec ana 'alhua saishet da ỹauatto'n naua ỹaỹamaqchiyiñi 'auo'o't. Aỹem qalaxaye 'am sauatton, qaq naua Aỹem 'anema mashe sogote da ỹaỹate'n da Aỹem 'aramaxashec.

Jeremías 23:6

Qaq qom ñaq do'onataxaatac camaye, nache nca'alec qome na Judá, nataqa'en na Israel qaica qome ca ndaqtaique. Qaq 'era da le'enaxat da qaiỹaxana qome camaye: ‹Ñim Nataxala' nacheñi ñim qarca'alaxaqui.›

Juan 8:42

Nache So Jesús 'enapega somayepi, 'eeta': –Da ỹoqta 'eesactaxa da Qarta'ai Ñim Lo'onatac 'Enauacna, nache qami'ctaxa ỹataqta Aỹem qauauochec. Cha'aye Aỹem nache sachegoqtot Ñimaye. Aỹem saishet da maiche ñallegoxottela't da ñanac, cha'aye Ñim Lo'onatac 'Enauacna maye Aỹem namaq.

1 Juan 2:23

Camachaqca da sa ỹaconeguet Som Ñalec, nache nataqa'en sa ỹaconeguet Ñim Nta'a. Qaq cam ỹaconeguet Som Ñalec, nache nataqa'en ỹaconeguet Ñim Nta'a.

1 Juan 5:5

Cam ỹa'amaqten So Jesús da llalec Ñim Lo'onatac 'Enauacna, nache camaye nauec na lataxacpi ana 'alhua qataq na qauemsat.

1 Juan 5:15

Qaq da qomi' saỹaanaq da Ñim Lo'onatac 'Enauacna hua'axaỹa da qanqouagaxaunaxac, nache nataqa'en saỹatenaq da qomi' ỹanema cam seỹaxanaqaique.

1 Juan 5:18

Saỹatenaq da nam llalaqpi Ñim Lo'onatac 'Enauacna saishet da ỹo'ot ca lasouaxashet, cha'aye So Jesucristo maye Llalec Ñim Lo'onatac 'Enauacna ntela'a namayepi, qaq som pa'aguenataxanaxaic saishet da ishet da huo'o ca ỹo'otec qauem namayepi.