Yòvdìy 1:1 - ŊWÀʼ NYÙY

¹ Á ku yèn búʼú, Jerusalem sí tíy là wír, kirə́ʼ, a wìr‑iì dzə̀ fó nyanyày. Fóo sí sóm moo wiiy ŋkfə, kirə́ʼ, a vitúm vidzə̀m vi‑iì ghvə́mé. Ŋkàlaʼ, a yì‑iì dzə̀ féyì ji yaà, e ŋkà se laʼ sí mvəm, lèn wáa dzə, a yì sí reŋ a dzə̀ vikwàn.

Yòvdìy 1:1 Referans Kwoze

Aysaya 3:26

Wír veé Jerusaleme wíy a toŋnín, a dìy. Á wíy a dìy, a sesín e kibvə̀r mo ŋkàlaʼ yev kfənen ne e vifə̀m.

Esra 4:20

Á kfən yèn sá ji afon ve tavkíné‑eè sì á e Jerusalem, a vé‑eè sùm á mbìv wòŋ ye á liysin ne Yufret fo shùy yii nəə e dzə̀m, e nèn a saʼ, a baʼtí mbàm se maʼàn sí wùn à nsùʼ, à nshwìí, vifá vìn vi wáa gòʼ a dzə̀ aáwune.

1 Afòn 4:21

Fòn Solomon‑eè sáʼ vitúm vidzə̀m vee kèʼ fó ndzəv yee Yufret, e dù mèé e nsay Filistia, e kfə̀n dù mèé e bìíy yeé ŋguùŋè Ejiv. Vitúm vi‑iì wiy, fó nshwì e Fòn Solomon, e kù a fo bèy, e dù, e meé mo wù‑uù dzə̀ʼə̀mèn, e wìy lày.

Aysaya 54:4

«Lá à yòʼ a fàn, wìr yòʼ kfə̀n dzəə́ wìy yiì kinyo ke à wáa woomé. Lá mbvəərì yòʼ fəə̀ e věn mvəm, bìʼ fo wìr yòʼ dzəə̀n shó wo wù wíy yiì, áà wáa woomé. À wíy làysìn vinyo ve nshoórmé ve wò‑oò yii, aà dzə̀ə́ wánlè ŋgòn. À wíy làysìn shéʼ ye vé‑eè shéʼ wò, aà dzə̀ é kwaʼ kimfəə, shéʼé, kù moo ji à sì wiiy ŋkfə woo là ŋgaà benben.

Tsəfaniya 2:15

Á mo kí wíy koóy ŋkàlaʼ ye yì kóʼor wún rə̀n, kwaʼ kwàʼàn ji bó yòʼ dzə̀ kifá ki sə̀ʼ á wun, yoŋ ji ŋkàlaʼ yìmòʼ yòʼ dzə̀ á moo wun e kitu ke nsay. Ŋkàlaʼ yee shoon wíy dù e vifə̀m. Yì wíy dù e kinshaàrì. Nyám se kwaʼ si wíy a shiíy fo. Wìr dzə̀m wo wù shaa fo, kù wíy a shwemkír shwemkín, a shwemkír, a shèŋ kitú.

Yòvdìy 5:16

Nsiì wo vèr‑iì bínsi lày ne, lòné shóv ver, bìʼ ajay vér.

Aysaya 22:2

Kiyor ki kù sí kóʼ virə́ʼ vidzə̀m, a ŋkàlaʼ dzə̀m kù sí biŋrì bìŋrìn, a mvə̀mlaʼ e dzə̀m kù sí shéʼri rə́r se á bòyìn fó fo. Yii bèy, a bó wír vén ve á yén ji á kpù é shùu rərí yoʼ kpù yé rər, a bó áwune yoʼ kpù a dzə̀ yé nyùy rə̀r.

2 Afòn 23:35

Fòn Jehoyiakim ku nèn a fo kisha ke mbàm ke fəvír kí wùn à ke baar kí e Farao mo Farao‑oò saʼan, a wù‑uù kooy mbàm sìn a dzə̀ fó mbàm se wù‑uù yòŋèn, wíri wáa màʼ. Wù‑uù wày nsər ji wìr mòʼón mòʼón woo wun wòŋ kù kér fó a màʼ a mbàm mo á yenen, a vitaáví vé ŋgaàŋ vi dzə̀, aá fíʼ, a fo nshwì e Farao Neko.

Ŋgaà Yen 18:7

Mo wù‑uù kóʼnin, yí kitú kfə́, á kù yíi sə̀r sa wun réŋréŋ bey, é wù wáa ŋeèy, a ser e kibvə̀r. Wù‑uù sévti jii, ‹M yéʼ e kàvàʼ, a sáʼ mo woŋ. M yòʼ dzə̀ wiíy ŋkfə. M yòʼ wíy a ser e vifù é ghan símóʼ sí ji m diy kpú lum.›

Esiker 26:16

Afon adzə̀m ve á dzəə̀n é shuù se ndzəví wíy səʼə́y fo akàvàʼ, e shoʼtí ndzə̀y sév sé vifòn, e shoʼóy bvə́rì. Á wíy sesín fo nsay, a dzə fan fan, a leéy ven, a jaáy.

Yòvdìy 4:1

Á ku lèéy, e yèn, nyàŋ koò ne e kishà ke mbàm ke baar kí, kisha kee wúntí kíwun ki bùŋ ne sə́nín. Tíy seé lav cù si sí néŋnin e ghaŋ se dzəə, tíy, a dzə̀ see jeéy sí.

Yòvdìy 2:10

Kfə́m sé wìr seé Sion si sèsín ne fo nsay, áwune sèsín ne, a dzə kisə́sə kisə́sə. Áwune fə̀vrì ne kitú e kibvər ki, e màʼ vinsàʼ ve ndzə̀y é wùn. Ké wónlě ŋgòn veé Jerusalem, á jòór ne a dzə̀ vitú e nsay.

Yòvdìy 2:1

Á ku yèn búʼú, mo Nyùy Tàr shwiiyin ne kilòŋ, e màʼ ŋgeʼ e Sion kitu, vitsə́ʼ ví súm ŋgònjuù rə. Wù bàʼ ne vikuʼùy vé Isray fo yuv, ví wáa neŋ a dzə̀ é nsay. Wù shwìíy ne kilòŋ, e màʼày ŋgày cù rə yeé Jerusalem.

Jeremia 50:23

Á leéy, e yèn, mo á bvəʼtin ne Babilon, woŋ wo yì‑ii dzəə̀n ji ŋgòʼ, a dzə̀ áwune ve vé‑eè laar vitúm veé kitu ke nsay. Lèn və̀n, vitúm vi leey mo fóo siìn é vifə̀m, a wúné beéme áwune.

Jeremia 40:9

Gedalia woo wan Ahikam, a tàr à tàr wov dzə̀ Shafan nèn sùŋnín aáwune wùn à e wír véví, e kàn yír Nyùy, e sùúy jii, «Lá vèn yòʼ a fàn fó a lìm fo wír veé Babilone. Vèn wáa dzə e nsay fèn, a lìm fo fòn woó Babilon, é kinyo kén kidzə̀m ki wáa ghan kijuŋ.

Jeremia 9:11

Nyùy Tàr suuy jii, «M yíi yiì, é Jerusalem kfə́n é vikfər vikfər, e dù ji kirə́ʼ kee fo kuúrá yii shiiyì. M yíi yiì, é ŋkà se laʼ seé Juda si kfə́n ji vifə̀m. Kirə́ʼ ke bó wìr yòʼ yii dzə́ fo.»

Aysaya 52:7

Feyì feyì, dzə̀ kinyo ke juŋ ki fóo yen ŋgaà ntum, a wù wiy fo agwan, wiy, fiʼtì ji vinyo vidzə̀m vi sì á e mboʼ. Ŋgaà ntum, a wù wiy e ntum nyaáŋ, wiy e sáʼka wo juŋ, naarì ji Nyùy lùŋèr a ne wír və́, suuy e wír veé Sione jii, kù sí sáʼ Nyùy won ji Fon.

Aysaya 52:2

Wìr veé Jerusalem, vèn lo é yuv fó kibvə̀r. Vèn ŋáʼáy, e dzə̀ʼə̀m e věn kàvàʼ. Ven vee wír veé Sion ve vé‑eè koorin, vèn shóʼtí fáŋ see kisha se vé‑eè wayin e věn kilòŋ sí.

Aysaya 14:12

«Á jaʼ wò bèn, a wò‑oò lì kitú ké ji sàŋ tsə̀n. Ku yèn búʼú mo à gbuùn ne fo yuv, wò wo wò‑oò dzəə̀n ji kintoshùy. À gbù fo kàvàʼ moo kicí ke á bàʼàn, kí gbú é nsay ji rìŋ, wò wo wò‑oò ton vitúm, baʼtì sáʼ yév.

Nsùyrì Nyùy 122:4

Dzə̀ fo rám seé Isray si yii kóʼó, rám sé wìr Nyùy Tàr, kóʼ ji á wáa wùʼsì yír Nyùy Tàr, réŋréŋ mo wù‑uù foon sáʼ e Isray.

Nehemia 9:37

Nyanyày ŋkav wo wù fəə́ fo nsay fèn sí du a dzə̀ áàfon ve à lèmèn ji á wáa saʼ ver bìʼ liì wor wo bií. Aáwune sí yii e vèr à nyám sér sí a dzə̀ mo á kòŋèn, a vèr dzə̀ lèn e ŋgeʼ ye tavín.

Nehemia 5:4

Aámóʼó kù kfə̀n suuy sa jii, «Vèr‑ii sí foo mbàm fóon, e bó a fo nsùʼ woó ntoʼ, woo bìʼ kwáʼ sér wùn à súm sé vitiír vé vayin si.

2 Afòn 23:33

Farao Neko‑oò wày wun e sháŋ é Ribla e nsay yee Hamat, la wù yòʼ kfə̀n a dzə e Jerusalem yée a saʼ vifon. Farao nen kfə̀n yiì, wír veé Judàa wáa fo nshwì, *kisha ke mbàm ke fəvír kí akilu kishóv ghii kweè aànsə̀kìi ataár (3,400), ke baar kí akilu nshòv sikweè e mtaár.

Aysaya 50:5

Nyùy Tàr woo Taà Ndzə mvə̀ʼ ne vituʼùr vém, a m yòʼ‑oò lo tèn fó yunín wun, a bó m yòʼ‑oò lo ŋwày kinyo ke wù‑uù yéʼey mo shó.

2 Wòŋ 9:26

Wù‑uù sáʼ vitúm vidzə̀m vee kèʼ fó ndzəv yee Yufret, e dù, e mèé e nsay Filistia, e kfə̀n dù, e mèé e bìíy Ejiv.

Aysaya 49:21

Á bèy, é wìr mòʼón mòʼón wáa rə̀m bvəm bvəm jii, ‹Kù yòʼ‑oò lo dzə̀ə́ ver wón vin a? Ver, a wóné‑eè kpùkír ne, vèr ku gòʼ, a dìy a dzə̀ kpú. Vèr‑iì dzə̀ é kwaʼ nsàm moo vé sháŋé. Vèr kù‑uù sí dzə́ fo moo wír ve á màʼàyìn ne. Wón víne dzə̀ lèn bèn, a yì‑iì lìy la, é bo á kúykír? Áwune lòkìr a dzə̀ fó feé?› »

Jeremia 31:7

Nyùy Tàr yoŋ jii, «Vèn wáa yòv kitávín, a sheʼrí rám Jakov. Leŋe wáa koʼ mo dzəə̀n wun fon vitum. Ŋkèŋé wáa koʼ, é vèn wáa sùyrì mo, a suúy jii, ‹Éè Nyùy Tàr, ku sə̀ wír vé, kibér ke wìr vé veé Isray.›

Jeremia 42:2

e yèn Jeremia woo *ŋgaà ntum Nyùy, e sùúy sho jii, «Kii wò, ku yiì kinyo ke vèr lón wò sho ki. Ku mbaà Nyùy Tàr woo Nyùy wò ji wù sə́ á ver adzə̀m ve á berin. Vèr‑iì dzə̀ wír agháʼán, a kù bèr ne ve à yén lèn vìn.

Esiker 5:5

Nyùy Tàr woo Taà Ndzə kfən sùúy jii, «Abaày vèné, ku lèéy Jerusalem. M lèm fó e kintìntìn ke wòŋ, a vitúm vi kaárí fó, e tàr.

Cù 26:31

M wíy siìr ŋkà se laʼ sén, é sí kfə́n ji vifə̀m ŋkuuŋkùŋ, e bvəʼə́y virə́ʼ vén vé cù, e làa yòʼ a ker shií e věn cù, ye kirəm ki yii rəm, rəʼtìnè.

Cù 26:33

Fo kén kí, m wíy taʼár ven, é vèn sáŋrí e vitúm vímóʼ ví nsay, é m kfə́n a ròn wúu yén e rə́r sí. Woŋe siiy bèy, é wú nèn dù e vifə̀m, é ŋkà se laʼ sén si kerkir.

Jeremia 44:2

Ntum rə̀n‑eè dzə̀ jii, Nyùy Tàr woo Taà Mànjòŋ, wun woo Nyùy wìr veé Isray suuy a jii, «Vèn yèn ne ŋgeʼ se tavkín sí sidzə̀m se m màʼàn é Jerusalem, e màʼ e ntèʼ seé Juda si sidzə̀m. Vèn leéy, e yèn, fóo sì é vifə̀m, e wìy shem lán, a bó wìr yòʼ dzə́ fo,

Jeremia 44:6

Dòʼshwíiy wom nèn kòʼ, a baarí moo və́y, m máʼ ŋgeʼ e ŋkà se laʼ seé Juda, e kfə̀n màʼ e Jerusalem, yì ghán, e bùʼrì dzə́ə see fó sidzə̀m. Fóo nen kfə̀n ji woŋ kinjúme, e dù e vifə̀m, e wìy shem lán.»

Yòvdìy 1:19

«M bì ne vé viŋkar vém ji á sə́ mo, yii bèy, áwune máʼ mo. Ké atàá cù wùn à kfə́m sé wìr sém kí, áwune‑eè kpùkír é mvə̀m ŋkàlaʼ, aá ghán, taʼ kifá kée yi, kifá kée way e shùu, e fíʼ lùŋ.

Esiker 26:2

Wù súŋnín, e sùúy jii, «Wàn wìr msòŋ, wír veé Tayàa maʼ kinseŋ jii, ‹Eèhee, á lèn, Jerusalem wo yì‑iì dzəə̀n dzəə wày fo vitúm vi vinín bvəə̀rí ne. Lèn və̀n wo wù bvəərin ne, bo wáy wóví sí yìi dù e vèr, é vèr kuʼkir.›