Tsəfaniya 3:8 - ŊWÀʼ NYÙY

⁸ Mo woo Nyùy Tàr nén a suúy jii: «Vèn kú a shìy kishiíy kiy, kishiíy, ke m wíy nànèn, e roòmè vitúm. M wày ne wayín ji m báʼtí á vitum, e bàʼtí afon, e nyè dòʼshwíiy wom wo tavín aáwuné kitu. Dòʼshwiíy wo wù baári e mǒ shiliv, wù yíi tòn kitú ke nsay kidzə̀m.

Tsəfaniya 3:8 Referans Kwoze

Joel 3:2

Siirì, é m báʼtí vitúm vee aŋgàa vibǎn wìr vém é Kiwoóy ké Jehoshafat. Dzə̀ fó, fo m wíy way áwune é kibàʼ ke nsaʼ, e saʼ áwune bìʼ kinyo ke á yiìn e wír vém veé Israyi, kitúm, ke mò‑oò shavin ji wír vém vee jeéyí. Áwune jùm ne wír veé Isray, á táʼrí, e dùkìr e vitum ve sən ví, e jàv nsay yev ye dzəə̀n yéem féyì feyì.

Tsəfaniya 1:18

Wíy lòo dzə e kishiíy kin ke Nyùy Tàr maʼ ŋgeʼ e wírí kitu, a wìr fə̀m kér káv e le, bo yòʼ dzə̀ wú tìn ŋgaàŋ. Nyùy Tàr wíy shwiíy kilòŋ, e tòn kitú ke nsay e və́yí. Wù wíy sàsìn, e laàr wir dzə̀m wo wù dzəə̀n é kitu ke nsay.

Mayka 7:7

Yii bèy, fo kém kí, m kù yíi a beè a dzə̀ Nyùy, a shìy a dzə̀ wun wo wù luŋèr mo. Wun woo Nyùy wo m suyrì kù yíi yu tóŋ yém.

Nsùyrì Nyùy 27:14

Éè wan ŋkfə wìr, ku tìír rì vifií ví a dzə̀ e Nyùy Tǎr wùn. Tiím kitávín, e kùr shilív shí. Eènó, ku tìír vifií ví a dzə̀ e Nyùy Tǎr wùn.

2 Pita 3:10

A kishiíy ke Kristu wíy a kfən kìn ki wíy sàsìn, e bvəy moo shóŋ. Kí wíy gheén, aá yú mo yúví bayin ji mbǎŋ, e nèn tàʼrí, e lày, é vifá ve á bomen ndzə sho vi yaáné, e mày. Nsay wùn à vifá ve ví dzəə̀n shó vidzə̀m vi wíy shwi, e bvəʼə́y.

Ŋgaà Yen 16:14

Vibáy vìn vi dzə̀ vé anyùy, a ví ghán kitú ke nsay kidzə̀m, báʼti afon ji á fíʼ wìy fəə̀, a màʼ rə́r é kishiíy ke Nyùy woo Ŋgaà Vitaàví Vidzə̀m wíy fəə, a nə̀r kóy.

Matio 25:32

Wù kóʼ sho, é vitúm vidzə̀m vi nèn bàʼtí e wùn si, é wù javsin áwune mbìv sibaà réŋréŋ mo nshìy yii javsìn njiì və fo bvə́y se loŋ sí mvəm.

Habakuk 2:3

Ghán se ntum rə̀n yíi fəəsín si yóʼ ne ghèén. Yii bèy, yì kù sí nyoorì ji yì fəə́sín, a bó yòʼ dzə̀ yì shaà fó ghaŋ. A yì fə̀m ndzəyì, à kù a shìy, bo yì kù‑úù fəə́sín, yì yòʼ‑óò ndzəy.

Hosea 12:6

Á bèy, ven vee rám Jakov, vèn kfə́n é bàm e Nyùy wón wùn. Vèn kú a kòŋnìn, é wìr wáa yiì kinyo e wùmòʼ là kiloʼ, é wìr kú a dzə, a kìʼ a dzə̀ Nyùy mo wù lo, e wìy, e sə wun.

Aysaya 30:18

Ké Nyùy Tàr, wù diy kfə́ féyì ji wun kú a yiì vinyo ve juŋ vi e vèn, diy feyì ji wun kú a sham ven. Nyùy Tàr kù dzə̀ Nyùy wo wù lo, wù tìír vinyo və́ vidzə̀m, ví wàa ghan tìítiy. Bòŋ ké wìr dzə̀m wo wù yoy, tiir a dzə̀ é wùn wó.

Yòv Viŋgér 8:6

Kii wò tàr à wíri, ku wày mo e wò shiliv moo kifin, e wày moo mbàm se nsoʼ see wáy é koy. Mo kpúu kér vitaáví é ŋàŋ, bo dzə̀ sá mo kikoŋnìn kesò ki dzəə̀n, a bó jìŋ ye yì yár ŋgaà ŋkòŋmé bìʼ wùmòʼ yòʼ fó sa shiŋkfəŋ, réŋréŋ mo woŋ aŋkfəə yòʼ fó sa e wìr msòŋ. Rúrú, koŋ ye tàr à wíri koŋ mo shóo baári moo kiliímé ke və̀y, baári, koóme virə́ʼ moo və́y wo wú ghàmsìn.

Ŋgàn 20:22

Lá à yòʼ a sevtí ji m kù yíi siìr ŋkfə́tír, màʼtì, é tóm Nyùy Tàr ghay wó.

Nsùyrì Nyùy 123:2

Mo wánlè lìm kù yii kiʼ kifá a dzə̀ fo tàr wov lìm, a woo wiíy kiʼ fo yè wov lìm, bo vèr kù kiʼ sa a dzə̀ wò Nyùy Tàr. Vèr kiʼ wò, Nyùy wor, e meé mo à wíy sham ver.

Nsùyrì Nyùy 62:5

Mo‑óò kfə́mén, a yuurí a dzə̀ Nyùy. Vifií vém ví kù tíy a dzə̀ e wun wùn cáʼ.

Nsùyrì Nyùy 62:1

M kfə́men, yuúri a dzə̀ Nyùy. Kù dzə̀ wun cáʼ ŋgaà lùŋèr wom.

Nsùyrì Nyùy 37:34

Kú a dzə, a yuurí Nyùy Tàr, a ghan a dzə̀ e wun mbòv. Wù yíi koʼór wò kóʼórín, áà wáa dzə e wòŋ. À kù wíy a dzə e wòŋ wo wù‑uù kàʼàn ven shó, aà wíy yen mo wù laar wír ve á méŋ wun fo wòŋ.

Nsùyrì Nyùy 37:7

Dzə̀ʼə̀m ji nyaáŋ e Nyùy Tǎr si, a yuurí a dzə̀ wun. Lá à yòʼ a yu ntéŋ bìʼ wír wo vinyo və́ ví du kijuŋ, wír wo wù rə́si bá menàŋ, a vinyo və́ ví gháné.

Nsùyrì Nyùy 12:5

Nyùy Tàr suúy kfə́ jii, «Mo‑óò lo lèn, é vèn yén. Mo vèn nyavrì e vé kitàne, a vé ŋgeʼe ŋéyti sóŋ, m yíi kaáy, a kìŋsìn áwune mo á diyì.»

Ŋgaà Yen 16:1

M nèn yù, a jì yìmòʼ súŋnin fo lav Nyùy fèy, yoŋ nshèelav se Nyùy see saàmbà sìy kitávín jii, «Vèn du, e cuùrì lǒn Nyùy wo wú dzəə̀n e věn vighin vee saàmbàa é kitu ke nsay.»

Nsùyrì Nyùy 79:5

Éè Nyùy Tàr, à wíy shwiíy kilòŋ, e dù, e meé e le? À kù wíy a shwiíy kilòŋ, e dù, e jòʼsì à? À kù wíy a leéy ver e sí ye baarí a?

Nsùyrì Nyùy 79:6

Ku dìn dòʼshwiiy wò e vitúm ve ví méŋ wò vi. Dìn dòʼshwiiy wò e wír ve á tén fó a sùyrì wòo.

Aysaya 14:26

Á kinyo ke Nyùy Tàr wayin ji wun yíi yiì e kitú ke nsay ki kidzə̀m. Dzə̀ ŋkùm ye wù kamen, a taamé vitúm vidzə̀m sho.

Jeremia 10:25

Dìn dòʼshwiiy wò e vitúm ve ví yòʼ ghvə́m wò vi, ku dìn e wír ve á tenen fó a cù wòo. Áwune bvə̀ʼə́y ne rám Jakov, e laàr ŋkuuŋkùŋ, woŋ wóví dú é vifə̀m.»

Hagay 2:22

a m yíi sə sáʼ fo vitúm vi. M sí lo, e màyìr vitaáví vé saʼ se vitum, e bàʼtì *viténtén vév vé rər, à wír ve á ghán shoo. M yíi bàʼtì nyám sév sé ŋkoʼ, é vé koʼo gbukir fó kitu wo, é wìr wáa yuyrí wùmòʼ, aá wáa yuyrí sa nyám se ŋkoʼ sév.

Aysaya 34:2

Kí dzə̀ jii, Nyùy Tàr shwìíy ne kilòŋ bìʼ vitúm vidzə̀m, a wù kù lo, e dìn dòʼshwíiy və e vé rər véví kitu. Wù wày ne ji wun kù kér fó yìi laàr áwune, a wù fò ne áwune ji á kù kér fó seerí.

Aysaya 63:6

Mò‑oò shwìíy kilòŋ, e nyèŋrì vitúm vee aŋgaà vém vibàn. Rúrú, mò‑oò màʼ ŋgeʼ aáwuné kitu, vifií vév ví lày, kù moo ji á nò noón, m sə́ʼsí áwune, mensə́ mè leém, e nə̀ə́ e nsay.»