Tsəfaniya 2:9 - ŊWÀʼ NYÙY

⁹ Rúrú, mo woo Nyùy Tàr woo Taà Mànjòŋ, mo woo Nyùy wìr veé Isray wo m dzəə̀n e tin, m lìʼ ne feyì ji m wíy laàr Moav, é wù kfə́n moo Sodom, e laàr Ammon, é wù kfə́n moo Gomorra. Nsay yee fó wíy a dzə bií sé shiŋgwaŋ. Yì wíy bir, e lày kisáŋ, yòʼ dzə̀ kifá ki kùy fó, e shaà là kiv. Kibér ke wìr vém kí wíy faàsì vifá vév, wír ve á wíy ber e Judàa wíy yòv nsay yev. Suuy mo woo Nyùy Tàr.»

Tsəfaniya 2:9 Referans Kwoze

Aysaya 11:14

Wír veé Efrayim wùn à veé Judàa wíy suusín, e ghiʼ wír veé Filistia e rə́r sí, áwune ve á dzə́ e sar se agwan, e mbìv yee fo shùy yii nəə, e kfə̀n kuúy vifá ve wìr ve á dzə́ e mbìv ye shùy yii tó fo fo. Á wíy boŋ wír veé Edom wùn à veé Moavi, a dzə̀ e kiŋkoòvì ki, é wír veé Ammone wáa neŋ a dzə̀ aáwuné sar saʼ.

Remrí 29:23

Və́y wo wú shwí, baári moo mekàŋ wùn à shiŋgwáŋ shií wíy tòn nsay yen é dzəə ye bó yòʼ dzə̀ kifá ki kùy shó. Kifá ki yòʼ wíy tèʼ fo, a fə̀m dzə̀ kikwiíy, bo kí yòʼ wíy a dzə fo. Nsay yen wíy a dzə moo ŋkà se laʼ see Sodom wùn Gomorra, a dzə moo Admaa wùn Tsəboyiim, fo dòʼshwiiy Nyùy Tàr‑iì koʼon, e shaàsìn, wù laàr.

Aysaya 25:10

Rúrú, Nyùy Tàr kù wíy a kìŋsìn Gwan Sion. Yii bèy, wù wíy sèn wír veé Moav, e nyèŋrì áwune e wuú, kù mo á nyèŋ viŋgà ve á kuʼun é bii.

Jeremia 50:40

M wíy lovtí e ŋkàlaʼ Babilon, réŋréŋ mo mò‑oò lovtin e Sodom wùn Gomorra, e lòvtí e ntèʼ see áwuné ghaŋ si. Bó wìr yòʼ kfə̀n wíy a kùm fo fə̀m e mòʼón feyì, a bó yòʼ dzə̀ wìr wàa dù ji wun du, a dzə fo. Suuy mo woo Nyùy Tàr.

Jeremia 48:1

Ntum yee kùm wír veé Moav rə̀ne. Nyùy Tàr woo Taà Mànjòŋ, wun woo Nyùy wìr veé Isray suuy jii: «Lòné dzə̀ wó wìr veé Nebo, á sí lo, e bvəʼə́y fó. Á lo, e tòn Kiriatayim, é wír vee fóo wáa woomé. Á yíi bvəʼə́y kikum ke ŋkàlaʼ, e shoór fó.

Aysaya 49:18

Vèn nan síi, e lèéy virə́ʼ ví, é vèn yén mo wón véné baʼtin ne, a kfən fo laʼ. Mo woo Nyùy Tàr suuy jii, mo m dzəə̀n shó, ŋkàlaʼ rə̀n wíy a yu vijuŋ ve won ve á kfənen, kù moo jín, wo wù wayrin vifá ve sùsù e wùn, a sheʼrí.

Ŋwàʼ woó Rom 14:11

A dzə̀ kinyo ke vé‑eè saŋen jii: «Nyùy Tàr suuy jii, ‹Mo m dzəə̀n shó, wìr dzə̀m kù wíy tsəm e mǒ si, a binsí mo woo Nyùy e shuu wóví.› »

Tsəfaniya 3:13

Wír ve á wíy ber e Israyi yòʼ dzəə́ wìy a yiì kinyo ke bi kí. Áwune yòʼ dzəə́ wìy a boʼtí kimboʼtì, aá yòʼ dzəə́ wìy a suŋnín lám kisaŋe. Á wíy a dzə e vijùŋ, a yikír, a meèmè. Fan yímóʼó yòʼ dzəə́ wìy a dzə aáwuné meliv.»

Tsəfaniya 2:14

Kù wíy a shiíy bvə́y si fó, nyám se kwaʼ si wíy a wìy, a ghan, a beè sa fo, Viŋkfə̀y wùn à vighvəŋ vi wíy a nyaʼ e vitom ve lav, lo, é ví wiy, a toŋnín fo shuù se awundu. Viŋaʼ vi wíy a toŋnín e shuù se lav, aá shóʼtí ne mboòmè si, mboòmè see kicí ké *sidar ki.

Tsəfaniya 2:7

Wír veé Juda ve á wíy beri wíy yòv ŋguùŋè rìbà ndzə̀v. Áwune wíy a yiír nyám si fó, ndzə sə́né, aáwune shiíy é lav se wìr veé Ashkelon. Nyùy Tàr woo Nyùy wov wíy kuumé áwune, e siìr vikuʼùy vév fó.

Amos 1:13

Nyùy Tàr suuy jii: «Abaày, wír veé Ammone fìʼ a dzə̀ ka? Áwune jáy vinyo, jáy, tónenè, a m kù‑úù maʼ ŋgeʼ aáwuné kitu. Yìiy, áwune‑eè táŋ bìíy wòŋ, maʼ Gilead e rə́r sí, maʼà, shuʼtì bvəm se vikìy, aá dzə̀kìr e bvə́me.

Jeremia 49:18

Kinyo ke kí wíy koóy Edom ki kù dzə̀ ke kí‑iì kooyin Sodom wùn Gomorra, à ntèʼ se sí dzəə̀n aáwuné ghaŋ si. Bó wìr yòʼ wíy a kùm fo, fə̀m e mòʼón feyì, a bó yòʼ dzə̀ wìr wàa dù ji wun du, a dzə fo. Suuy mo woo Nyùy Tàr.

Jeremia 46:18

Nyùy Tàr woo Taà Mànjòŋ dzə̀ Fon. Wù suuy jii, «Mo m dzəə̀n shó e tin, ŋgaà vibàn yíi nəə́ ven, a wù dzə̀ moo Gwan Tabor, wo wù somen, e shaà agwan, e kfə̀n a dzə̀ moo Gwan Karmel, wo wù jáʼ e kitu ke rìbà ndzə̀v.

Kintaŋ 14:21

Yii bèy, e ké ru kí, mo m dzəə̀n e tin, à mo vikuʼùy vém ví wíy run kitú ke nsay,

Jeremia 49:1

Ntum yee kùm wír veé Ammon rə̀ne. Nyùy Tàr suuy jii: «Dzə̀ ji bó Isray yòʼ kér wón vee vilum à? Dzə̀ ji wù yòʼ kér njìlaʼ à? Nyùy woo *Molek yóv nsay rám Gad bìʼ ka? Wír ve á cu Moleki‑iì wìy, a dzə fo bìʼ ka?

Jeremia 49:33

Hasor wíy dù ji kirə́ʼ ke yii dzə́ kuúrá shó, a dzə ji vifə̀m ŋkuuŋkùŋ. Bó wìr yòʼ wíy a kùm fo, fə̀m e mòʼón feyì, a bó yòʼ dzə̀ wìr wàa dù ji wun du, a dzə fo.»

Amos 2:1

Nyùy Tàr suuy jii: «Abaày, wír veé Moavi fìʼ a dzə̀ ka? Áwune jáy vinyo, jáy, tónenè, a m kù‑úù maʼ ŋgeʼ aáwuné kitu, Yìiy, áwune‑eè tòn vighvə́r vé fòn woó Edom, ví dú é kibvə.

Remrí 29:22

«Ghán símóʼ sí wíy fəə, é ŋgwàʼ sén se sí wíy a koʼ si wáa ghay wún, aá yén a dzə̀ mo Nyùy Tàr màʼàn ŋgeʼ wùn à yàsí e věn nsay, é viŋgwìy vidzə̀m ve ví loòn fó vitum vi wáa ghay sa.

Sekariya 2:13

Wìr msòŋ e dzə̀m wáa dzə kisə́sə e Nyùy Tǎr si. Wù ŋàʼáy ne, a wìy fo wun kirə̀ʼ ke ranén kí, keé yuv.