Ŋgàn 28:4 - ŊWÀʼ NYÙY

⁴ Wír ve á ŋwáy nsəri búri a kù dzə̀ wír ve á méŋ Nyùy, a wír ve á yú nsəri sháʼnin kinyo kév.

Ŋgàn 28:4 Referans Kwoze

Ŋwàʼ woó Rom 1:32

Aá yii bèy, aá kì jii, Nyùy‑iì tìnén ne a ji dzə̀ á kù yùy wír ve á yii bèy. Yii bèy, aáwune kù yii, kfə̀n sheŋrì ámóʼó vee wír ve á yii sa bèy.

Efesor 5:11

Lá vèn yòʼ wày kiwó e vinyò ve wír ve á ghán e ndzə vitsə̀ʼə́ yii. Vèn wáa fo áwune a dzə̀ rán, aá wáa yen ji vinyo vee shooy vi dzə̀ á joonè.

Matio 14:4

Joon wáa shaʼnín jii, nsər yoʼ biìmé a ji wù wáa ker wiiy fər və.

Matio 3:7

Wù lòo yen, a wír veé mbìv *Farasi wùn à veé mbìv *Sadusìi wiy sa ji wù wáy áwune é ndzəv, wù yòŋ aáwune jii, «Abúv vìn, tìr la ven, bo vèn wáa wìy, a kwàʼ ji dzə̀ vèn bòy fó ŋgeʼ ye Nyùy wíy màʼ e věn kitu?

Nsùyrì Nyùy 49:18

Wù lóo dzə, a wù dzə̀ə́ e tin, wù wàa taŋ kitú kfə́ ji wun yú a vijuŋ. Á wàa burí wun ji vinyo və́ ví du a feyì.

1 Afòn 18:18

Elija bìnèr jii, «Yòʼ fó mo Isray ŋgeʼ. Kù fó vèn à lav tàr won Isray ŋgeʼ. Vèn màʼày ne nsər se Nyùy Tàr, a ghvəm a dzə̀ nyùy woo *Baal.

Ŋwàʼ Jud 1:3

Ŋkàr sem, mò‑oò ló a kwàʼ feyì ji m sáŋ ŋwàʼ fo vèn kùm vinyo ve Jesus Kristu‑uù yiìn, e tìn vèsən fó lòn, á lùŋ. M nèn yèn ji kinyo keé shií kí dzə̀ á ji m sáŋ ŋwàʼ fo vèn cér, a tir ven ji vèn wáa giìmè a kinyo ke Kristu ke Nyùy‑iì wayin ne e vèsən vee wír vəə́ kiwo. Wù kù‑uù fò a dzə̀ kinyo kee shoon kimòʼón, a bó kímóʼ kí yòʼ dzəə́ wìy a dzə.

1 Joon 4:5

Áwune dzə̀ kév, a dzə̀ wír veé ndzə fèn. Á nén a fìʼtì sa vinyo a dzə̀ veé ndzə fèn, wír veé ndzə fène wáa yuurí.

Lim Aŋgàa Ntum 15:2

Wùn à Por à Banabar rə́sí bìʼ sho, e bvəə̀rí. Kí gháʼ, á nèn sìysì jii, Por wùn à Banabar, à wír ámóʼó du é Jerusalem, e yèn aŋgàa ntum Jesus wùn aàtǎr vintatìi, aá tar á kinyo kee shooy.

Nsùyrì Nyùy 10:3

Wír ve á méŋ Nyùyi saa wún ji kév kí kù dzə̀ á ke mensə́ mev mè taʼà. Á búri vé bòŋáyimoó, ŋwáy Nyùy Tàr ŋwáyín.

1 Afòn 18:21

Elija nèn kòʼtí e wírí mentsə̀m, e dzə̀r jii, «Vèn wíy tùʼtìn e kwaʼtìi e baà ben, e dù meé e le? A Nyùy Tàr dzə̀ Nyùy, vèn wàa jùmrì wun, wáa dzə a dzə̀ Baal, vèn wàa jùmrì rì Baal.» Wíri ku gòʼ gòʼòn kisə́sə.

1 Tesalonika 2:2

Vèn kì sá mo wíri‑iì nəʼsì ver, kfə̀n shoor ver é Filipi, a Nyùy kù távir melív mer, vèr ku yòʼ wìy, a fìʼtì sáʼka və wo juŋ e vèn, a wíri fə̀m‑eè kinèn e le.

Lim Aŋgàa Ntum 19:9

Ámóʼó wáa yu, a nyaŋ nyaŋén, e làa yòʼ a biimé, e nèn a nyàysì dzə́ə yee kùm Jesus rə̀n e wírí mvəm. Por nèn lì wír ve vé‑eè biimen, wùn áwune dù lèn a dzə e Tiranur lav ŋwàʼ, a suŋnín fo vishiíy vidzə̀m.

Lim Aŋgàa Ntum 12:22

Á nèn lò, a buʼ a dzə̀ rəə́ jii, «Súŋnin Nyùy, bó yòʼ súŋnin wír.»

Matio 3:15

Jesus bìnèr jii, «Wòsò ku yiì ke kí dzəə̀n ji á yii lèn, e fíʼ yiì kinyo ke Nyùy taʼ kidzə̀m, é kí wáa dzə réŋréŋ.» Wù suúy bey, Joon nèn biìmé,

Jeremia 5:30

«Kinyo ke tavín kí kòóy ne e wòŋàn, a kí beéme feyì.

Nehemia 13:28

Joyiada woo wan Eliashiv woo taà cù wo kuʼùn‑eè kér wán woo lumèn, a wù kér wiíy a dzə̀ wan Sanballat woo wír woó Horon, m nèn jùm Joyiada júmen.

Nehemia 13:15

Wáa dzə e ghan fen, m yén wíri é Juda, aá kám meluʼ e kishiíy ké bam, wiy e vifá ve yi vi, kúr e vimbèʼbìy, wiy sa e meluʼ mè wùn à báŋ se *vayin si, à *fig, à kfəə́ se vifa si sidzə̀m, aá béʼ, wiy sho e Jerusalem e kishiíy ké bam. M kàntì áwune ji á wáa yen a vifá vee fiìnè é kishiíy ké bam.