Nehemia 10:37 - ŊWÀʼ NYÙY

³⁷ «Vèr káv vifá ve yi, lóo jò, é vèr li jó mbìyi, a wìy sho e vitàv veé lav Nyùy, a fo aàtàá cùu, e kfə̀n a wìy sa e vifá ve mbìy vi ve á fer e báŋ se sí koom e vici sí, à meluʼ mè, à meŋgvə́r mè. «Vèr wíy a toʼtí vifá ve á káv fo nsay fèn vidzə̀m kirə́ʼ e ghvə̀m, a fo kee kimòʼón ki e wír veé ram Levìi, mo dzəə̀n áwune ve á yii báʼti nsùʼ və̀n ntèʼ sidzə̀m fo á lim súm.

Nehemia 10:37 Referans Kwoze

Cù 23:17

Vèn lóo wìykìr fo věn virə̀ʼ vé dzə, kfə́ə e mòʼón mòʼóne lì ntuʼ se kiban sibaà sibaà ji cu ye nanèné, e wìy cù Nyùy Tàr shó ji cu vifa ve yi ve ví biyin fó mbìy. Aá kù fer ntuʼ mòʼón mòʼón e meŋkfəŋ me kpuún mè akilu abaà e nyaà shó.

Kintaŋ 18:21

«Ké wìr veé ram Levi ki dzə̀ kév jii, fo kifa kidzə̀m ke wír veé Israyi kéŋé, m fò ne kintóʼ kimòʼón fo vee ghvə̀m vi aáwune ji vév vee vitsə́ʼ. Dzə̀ vilaʼày vév vé lìm ye áwune lim e *kibàn ké ntàsín.

Nehemia 13:9

M nèn fò sáʼ, á *kfə́mrí vitáv vee shooy, e siìr vifá veé lav Nyùy fo, wùn à cu vifa ve yii, à kiláy kee *frankinsen ki.

Nehemia 13:5

e fò kitáv ke kuʼùn kí, wù wáa shiíy sho. A kù dzə̀ kitáv fo vé‑eè yii lem cu vifa ve yi wùn à kiláy kee *frankinsen ki, à vifá ve ker vi, à vifá ve á fìʼìn kirə́ʼ e ghvə̀m, e shòʼ kee kimòʼón ki, e wìy sho, a yì‑iì dzə̀ sáŋ wùn à meluʼ mè, à meŋgvə́r mè, a dzə̀ vifá ve Nyùy‑iì yòŋèn ji á wáa fo e wír veé ram Levi wùn à e vé yòvi, à e wír ve vé‑eè leey kayi. Á kfə̀n‑eè lem sa mbìv vifa ye yì‑iì du aàtàá cùu fó.

Remrí 26:2

vèn kù a lì vifá vee káv mbìyi, ve vèn lìmèn é nsay ye Nyùy Tàr woo Nyùy won fó e vèn, a way e ŋkaà, a dù sho e kirə̀ʼ ke Nyùy Tàr woo Nyùy won wíy shoʼ ji á wáa ghvəm wun fo.

Remrí 18:4

Vèn kfə̀n wíy a fo ŋgòn se vifa ve á kavin wùn à meluʼ me mbìy mè, à meŋgvə́r me mbìy mè, a wúy njiì yee kóm mbìyi aáwune.

Malakay 3:10

«Vèn wiy e nsùʼ wo a kì dzə̀ vèn wìy shó e dzə̀m, e lèm e mǒ kitàv. Nsùʼ woo ji á jav kifá ke á keŋen kirə́ʼ e ghvə̀m, e fò kee kimòʼón e Nyùy. Vèn wiy shó, é viyíkìr vi fíʼ a dzə e mǒ lav. Mo woo Nyùy Tàr woo Taà Mànjòŋ suuy jii, ‹Vèn ku mùm mo, e wìy e nsùʼ və̀n, e yèn mo m lo, e mvə̀ʼ shúu yuv, e cuùrì kisəəvì, é kí kuʼ, é vèn búŋ vitáv vé a lèm sho.

Malakay 3:8

Binèr yémé dzə̀ jii, ‹A dzə̀ kí kòóy ji wìr msòŋ shwiv Nyùy Tàr á?› Rúrú, vèn shwiv mo. Vèn shwiv bèy, kfə̀n dzə́r jii, ‹Vèr shwiv wò e dzəə rəné?› Vèn shwiv mo e nsùʼ woo kintóʼ kee kimòʼón fo vee ghvə̀m vi, shwiv mo é cù se vèn yii.

2 Wòŋ 31:6

Wír veé Isray ve vé‑eè dzə́ e ntèʼ seé Juda, à wír veé Juda vee fóo nèn a wìy sa e nsùʼ anàʼ wùn à wo bvəy, e lì sa nsùʼ vifa vee jeéy ví, nsùʼ vifa ve vé‑eè lèmèn ne ji vé Nyùy Tàr woo Nyùy wov. Á bèy, vifá vi nèn a fum e vikfər vikfər.

Ŋwàʼ woó Rom 11:16

Vèn kì sá jii, a wìr bèʼ kibán, e màʼ Nyùy sho, bo kíŋ kibane kù dzə̀ yé Nyùy e dzə̀m. A wìr bìy kicí ji kicí ké Nyùy, kí kúy, bo kù kér Nyùy gháŋ, a kér wun tám si.

Remrí 14:22

Mooser kú a yòŋ e wír veé Israyi jii, «Wíy lóo dzə e kitu ke kiya kidzə̀m, vèn kù a jàv vifá vee káv fó sum, kirə́ʼ e ghvə̀m, a shoʼ kee kimòʼón ki, a lèm jeéy ji ké Nyùy.

Nehemia 13:10

M kfən lò, e yèn ji á yòʼ‑oò dzəə́ fó a mbìv vifa ye yì‑iì dzəə̀n ji ye wìr veé ram Levi. Kí nen yiì, wír veé ram Levi wùn à vé yòv ve vé‑eè lim e lav cùu kfə́nkír aáwuné sum sí.

Nehemia 13:12

Wír veé Judàa nèn kfə̀n kèʼ, a wìy e nsùʼ e vitàv veé lav cù, nsùʼ wo vé‑eè fiʼ vifá kirə́ʼ e ghvə̀m, á wìy e kee kimòʼón ki, kìn dzə̀ sáŋ, kìn meluʼ, kìn meŋgvə́r.

Ŋwàʼ Fəə 13:2

«Fó kifá kidzə̀m ke dzəə̀n dzə́ə mbìyi kee lumèn ki ji kinshoʼ kém. Wìr woó Isray dzəə wan mbìy, a dzə̀ lumèn, bo dzə̀ wóom. Nyàm dzəə wan mbìy woo lumèn, bo kù dzə̀ sá wóom.»

Ŋwàʼ Fəə 13:12

vèn nèn a fo wun kifá kidzə̀m ke dzəə̀n dzə́ə mbìyi, kee lumèn. Wón nyàm vee vilum adzə̀m ve dzəə̀n dzə́ə mbìyi kù sì və́.

Kintaŋ 18:15

«Kifá kidzə̀m ke á fó e mò ji dzə̀ dzə́ə mbìyi kí yíi a dzə kén, kìn dzə̀ nyám, kìn wír. Kí nén a dzə jii, vèn wíy a tin wón wìr vee dzə́ə mbìyi, a tin sa wón nyàm ye yì kér kifàn ve dzəə̀n dzə́ə mbìyi.

Kintaŋ 18:18

Jáv se nyàm sìn si wíy a dzə sén, réŋréŋ mo vèn yii kér shúu shiliv wo á nanè, kfə̀n kér kibiy ke yìy kí fó nyàm se cù.