Nehemia 1:11 - ŊWÀʼ NYÙY

¹¹ Éè Nyùy Tàr, ku yuùrí bunrì ŋgaà lìm wòo. Ku yuùrí bunrì aŋgàa lìm vée, áwune ve á tiir vifií vév ji á kú a ghvəm a dzə̀ yír yé. Fó ŋgaà lìm wò vishí ve juŋ vi lán, e fíʼ yiì, é fòn wáa ker shilív she juŋ shi vèr wun.» Yì‑iì dzə̀ é ghan fen, a wáy mo bóm fòn.

Nehemia 1:11 Referans Kwoze

Nehemia 1:6

Ku mvə̀ʼ vituʼùr vé vi. Ku lèéy mo, a yuurí tóŋ ye ŋgaà lìm wò tóŋ e shùy, tóŋ vitsə́ʼə́, bìʼ aŋgàa lìm vé vee wír veé Isray. M tuúne ajay ve vèr à wír veé Israyi jayin e wò. Vèr à rám atàr vérí jày ne.

Nehemia 2:8

A dzə̀ á kfə̀n fò sá wúmóʼó wo m du shó, e fò e Asav, wun wo wù leey kóv woó ntoʼ, ji wù yiì fò á vicí ve m wáa fèr shuu se lav ye yì téʼtin lav cù, à sé kày ye yí kaári ŋkàlaʼa shó. Wù fó sáa ve m baʼri lav yee fo m yíi a shiíy. Mo Nyùy wom‑eè tíy e mǒ kitu, fòn ku nèn yiì kinyo kidzə̀m ke mò‑oò lonen.

Nehemia 2:1

Wáa dzə e kishiíy kímóʼ kí é ŋwee woo Nisan, a Fòn Artakerkes sí sáʼ ji kiyá mbaà, á wìy e meluʼ mè, e fò shó. M nèn lì, e wàyrí wun sho, a m yii bèy, sə́nri, a bó fòn yòʼ‑oò yiì ne yèn, a m wiy e wun si, sə́nri.

Hibru 13:18

Kér kí dzə̀, a bó melív mer mè yòʼ sáʼ ver fo věr lìm gheéy. A dzə̀ mo vèr taʼ ji kí ku wìy a dzə bèy, a vèr fə̀m yii a dzə̀ ka. Vèn ku nèn a bùnrì ji Nyùy wáa sə ver.

Ŋgàn 21:1

Shilív shé fòn shi dzə̀ e Nyùy Tǎr kiwo, a wù danèr moo ndzə́v ye wù yii, a yí léŋ du fo wù koŋè.

Nsùyrì Nyùy 130:2

Nyùy Tàr, yuúrí kinyo kém kí. Ku mvə̀ʼ vituʼùr vé vi, mvə̀ʼə, e yù tóŋ yémé.

Esra 7:6

Esra wáa dzə, a dzə̀ ŋgaà dùŋrì, a wù kì Ŋwàʼ Nsər Mooser kijuŋ, ŋwàʼ wo wú kér nsər se Nyùy Tàr woo Nyùy wìr veé Isray‑iì foon. Wìy lòo dzə e kiya ke kí‑iì meen ji saàmbà mo Fòn Artakerkes‑iì saʼan ne vifon və́, Esra nèn lò fo Babilon a dù e Jerusalem. Mo Nyùy Tàr woo Nyùy və‑əə̀ leey fo wun, fòn nèn biìmé kinyo kidzə̀m ke wù‑uù dzə́rí. Wír veé Isray ámóʼó ve vé‑eè duùn wùn áwune é Jerusaleme‑eè dzə̀ jii, wír vee viy wùn aàtàá cùu, à wír veé ram Levìi, à vé yòvi, à wír ve á yii leey lav cùu, e lì ve á yii lim e lav Nyùy.

Nsùyrì Nyùy 86:6

Éè Nyùy Tàr, yuúrí bunrì yémé, e yù tóŋ ye m tíy ji à sə́ moó.

Esra 1:1

Yì‑iì dzə̀ é kiya ke vé‑eè koʼorin Sayrus ji fon woó Persia, Nyùy Tàr nèn yiì, kinyo ke wù‑uù yòŋèn, e shaà fo *ŋgaà ntum və woo Jeremia ki gheén. Nyùy Tàr‑iì kùm shilív shé Sayrus, wù fó sáʼ, yí ghánén woŋ və́ e dzə̀m, e kfə̀n sàŋ sá aŋwàʼ, á ghánén.

Kèʼlo 40:21

e nèn siìr nshìylav fàáy ye yì‑iì leey fo bóme e wun kiliŋ ke lìm fo wù‑uù dzəə̀n, wù kfə́n a fo bóm e fòn.

Kèʼlo 40:23

Yii bèy, la nshìylav fàáy ye yì‑iì leey fo bóme yòʼ dzəə kuùmé Joosev, e nèn kù làysìn wun láysin.

Kèʼlo 41:9

Nshìylav fàáy ye yì‑iì leey bóm nèn bùn Farao jii, «Nyàr, m kuùmé a ne jay wom.»

Kèʼlo 32:11

M tóŋ e wò ji bòyìr mo fo fər wom Esav wo m fan ji a tàm é ghan símóʼ sí, é wù wiy, e laàr vèr à vikìy, à wóné.

Ŋgàn 1:29

Áwune tèn ne fó a yeʼéy, e kiíy, á tèn ne fó a yunín Nyùy Tàr.

Kèʼlo 43:14

Nyùy woo Ŋgaà Vitaàví Vidzə̀m shám mendzən men, e yiì, é wìr woo shooy siir fə́r won və̀y wùn Benjamin e bàm. A kí‑iì dzə̀ ji m wíy lày wón vém, e jòʼsì là wán, kí kù a dzə rì bèy.»

Kèʼlo 32:28

Wù suúy shó jii, «Yír yée yòʼ kfə̀n dzəə́ yiì a dzə ji Jakov. Á yíi a yòŋ wò lèn ji Isray, bìʼ fo à fùnèn Nyùy, e kfə̀n fùnèn wíri, e kù sò.»

Kèʼlo 40:2

Fòn shwiíy kilòŋ wùn áwune,

Kèʼlo 24:42

«M wíy, e mèé e ndzəv lán, e bùnrì jii, ‹Éè Nyùy Tàr, Nyùy woo wo tàr wor lìm Abraham, ku yiì, é ghán ye m wìyìn fen rə̀ne boŋ.

Kèʼlo 40:1

Mo Joosev dzəə̀n é sháŋ bey, vishiíy ví lòo tumsín, nshìylav fàáy yee kitú fo se sí yii jav bóm yeé ntoʼ wùn à nshìylav fàáy yee kitú fo se sí yii fer vifá ve yi veé ntoʼ nèn lò jày kinyo e tàr wov woo fon woó Ejiv.

2 Wòŋ 6:40

«Á bèy, Nyùy wom, kú a leéy ver, a yu bunrì ye á yíi a bùnrì e kirə̀ʼ féne.»

Nsùyrì Nyùy 61:5

Rúrú, Nyùy, à yù ne kilìʼ kém. À fò ne mo vitsə́ʼ vé wìr ve á yúnin wò.

Nsùyrì Nyùy 106:46

Wù yiì, wír ve vé‑eè koon áwuneé wáa rər mendzən mev.

Jeremia 42:12

M yíi sham ven, e yiì, é wù wáa ker mendzən, e màʼtì ven e yéen yee nsay.›

Malakay 3:16

Á bèy, wír ve á yúnin Nyùy Tàr, ghvə́m yír rəə́ nén a kfə̀ynìn kùm vinyo vìn. Á lòo kfə̀ynìn, Nyùy Tàr fó vituʼùr, a yuurí, e kù nèn yiì, á sáŋ ŋwàʼ wo á wíy a kuumé áwune shó, áwune ve á ghvə́m wun, li yír rə́ é shií.