Matio 1:1 - ŊWÀʼ NYÙY

¹ Kin ki dzə̀ yír sé atǎr rám Jesus Kristu wo dzəə̀n wán woo Fòn Davir ram, a Fòn Davir və̀n‑eè ràm fo Abraham.

Matio 1:1 Referans Kwoze

Kèʼlo 22:18

Mo à yuun jí yem, e lèm, m wíy shaà fo wò ram, e səə̀vì vitúm veé kitu ke nsay vidzə̀m.»

Galatia 3:16

Fo kàʼ ye Nyùy‑iì kàʼàn Abraham, kí nén a dzə jii, wù‑uù kàʼ a dzə̀ wùn wan wo wù‑uù wíy fəə fo Abraham ram. A bó á yòʼ‑oò lo sàŋ ji Nyùy‑iì kàʼ Abraham wùn à wón vee wùn ramé adzə̀m. Vé‑eè sàŋ ji wù‑uù kàʼ a dzə̀ Abraham wùn wan woo wùn ram e mòʼón, a wan woo shooy dzə̀ *Mfə̀ə́r wo dzəə̀n Kristu.

Ŋwàʼ woó Rom 1:3

A dzə̀ sáʼka woo kùm Wán və wo wù‑uù liìn mbom wìr, á dzəə́ wun e Fòn Davir ram.

Ŋgaà Yen 22:16

«Tùm mo woo Jesus nshìylav yem ji yì wiy, e fìʼtì vinyo vìn e wír vémé ji á fiʼti e vintatì vi. Dzə̀ mo wo dzəə̀n Rám Fòn Davir, kfə́n a dzə mo Sàŋ wo wù lo, ndzə nèn ràn.»

Nsùyrì Nyùy 132:11

Wò‑oò yiì ŋkàʼmé vèn Davir, e sə̀ntì. Wò‑oò sə̀ntì féyì, a bó à yòʼ dzəə́ wìy kòr. Wò‑oò yii, suuy jii, «M yíi koʼór wán fo wò mvə̀m wòn ji fon, é wù yí ntaʼ wò.

Jeremia 23:5

«Vèn leéy, e yèn, ghán sí wiyì, se m wíy yiì, é tám woo réŋé fəə́ e Davir ram, é m kóʼór ji fon. Wù wíy a saʼ vifon və́ é dzəə yee réŋ, a tinén vinyo tìítiy, a yiì a dzə̀ vinyo ve ru ví é wòŋ. Suuy mo woo Nyùy Tàr.

Aysaya 11:1

Á bèy, taà saʼ wo fíy wíy fəə fo Jessi woo tàr à Fòn Davir ram, rám, a yí sì moo kicí ke á bàʼàn, ku gòʼ kiŋkfəy ke kinyè. Rúrú, kí wíy tokír, é tám wo fíyi fəə́ fó ghaŋ fóo fèy, a kuy.

Joon 7:42

Á sà yòʼ‑oò sàŋ é Ŋwàʼ Nyùy ji Mfə̀ə́r wíy fəə a dzə̀ fo Fòn Davir ram, a wù wíy lò a dzə̀ fó Betlehem fo láʼ à Daviri‑iì dzəə̀n á?

Kèʼlo 12:3

M wíy a səə̀vì wír ve á ghvə́m wò, a shov wír ve á roʼ wò. M wíy shaà fo wò, e səə̀vì rám yeé kitu ke nsay e dzə̀m.»

Lim Aŋgàa Ntum 2:30

Wù‑uù dzə̀ *ŋgaà ntum Nyùy, a wù‑uù kìíy ne ŋkàʼmé wo Nyùy‑iì kàʼàn wun sho, e kfə̀n lìʼ ji wun wíy fo kàvàʼ və e wan woo wùn ram.

Matio 1:18

Kinyo kìn ki din mo kí‑iì ghanen, é bo á dzəə́ Jesus Kristu. A dzə̀ jii, yìy à Jesus‑eè dzə̀ wánlè wiíy wùmòʼ, aá yoŋ ji Maria, a vé‑eè juùr ne e wìr wùmòʼ wo á yoŋ ji Joosev. Bo wù wáa way Maria e lav, á nèn yèn ji wù kì sì á e bvə́me, a kù‑uù yiì Kiyoy ke Ranén kí, bo wù tiím bvəm rə̀n.

Aysaya 53:8

Vé‑eè koò wun, e lì, a dù sho ji á du, e yuyrí, la wìr wóo bìn kinyo kfə́ réŋ yòʼ a dzə. Kfə̀n wíy a yòŋ la rám rə́, a vé‑eè tìn ne dzəʼə̀m rə́. Vé‑eè yùyrí wun, a kù‑uù dzə̀ bìʼ ajay vesən.

Ŋwàʼ woó Rom 9:5

aá ràm a dzə̀ fo wír ve vé‑eè súŋnin wùn à Nyùyi. Jesus Kristu woo *Mfə̀ə́r wìy wìy, e lì mbom wìr, á dzəə́ wun a dzə̀ aáwuné ram, a dzə̀ wun wo Nyùy lèmèn lèn ji vitú ve saʼ. Á ku nèn a burí Nyùy ghán sidzə̀m. Amen.

Ŋwàʼ woó Rom 4:13

Kímóʼ kí nen kfə̀n a dzə jii, Nyùy‑iì lo kàʼ Abraham wùn à rám rəə́ ji áwune wíy yòv a ndzə. A bó wù yòʼ‑oò kaʼ bèy, bìʼ fo Abraham‑eè gheenen fo wun ji wù kì lem nsər. Wù‑uù kaʼ a dzə̀ bìʼ fo Abraham‑eè wayin shilív e wun wùn, wù lì wun líin ji wír woo là jay.

Matio 15:22

Wiíy wùmòʼ wáa dzə fo, a dzə̀ wir kitum kee Kanan. Wù nèn wìy, e yèn Jesus, a toŋ jii, «Tàr woo Wan Fòn Davir, ku shàm mendzən mem mè. M kér wán, a nyùy wùmòʼ jívir wun e ŋàŋ.»

Matio 9:27

Jesus lò fo taà laʼ və̀y lav, e lòo dù, amfìr ámóʼó wáa jùmrì fo bàm abaà, a jàŋ kitávín jii, «Wàn Fòn Davir, ku shàm mendzən mer mè.»

Jeremia 33:26

bo m wíy meŋ rú rám Jakov wùn à yé Davir woo ŋgaà lìm wom, e làa yòʼ wìy shoʼ wír fo wun ram ji wù wáa saʼ a rám Abraham wùn à Aysi, à Jakov. M wíy siìr vijuŋ vév fó, a sham áwune.»

Kèʼlo 2:4

Kin ki dzə̀ kimfèr mo yúv wùn à nsay‑iì dzəə̀n é ghan se Nyùy-iì bomen. A kí dzə̀ jii, Nyùy, wun woo Nyùy Tàr‑iì fèr nsay, e fèr yúv,

Matio 3:16

e wày wun e ndzəv. Kù mo Jesus fəə́ fo ndzəv, shúu yuví mvə̀ʼə̀m, wù yén, a Kiyoy ke Nyùy ki sə́ʼəy fo fo e njà kibìŋ. Kí wìy, e dzə̀ʼə̀m e wùn kitu.

Sekariya 12:8

Wíy lòo dzə e kishiíy fóo fèy, é mo woo Nyùy Tàr wáa kìŋsìn wír veé Jerusalem e shùu rər, é njoó wo wù dzəə̀n aáwuné mvəm táv réŋréŋ moo Davir, é wír vee rám Daviri wáa màʼ fo mbìy moo nshìylav Nyùy Tàr, a màʼ moo Nyùy kitú kfə́.

Amos 9:11

Wíy lòo dzə e kishiíy fó, é m shám wír vém, e nàŋsín lav Davir ye yì‑iì gbuùn ne. M wíy siìr kinsàʼ ke lav kee shooy fo, siirì, é yì wáa dzə mo yì‑iì dzəə̀n fó mbìy,

Kèʼlo 5:1

Rám Adame rə̀ne mo vé‑eè saŋen mo yí‑iì dzəə̀n. A kí dzə̀ jii, Nyùy‑iì bòm wír e wun nshwìnín, wù wáa dzə moo wun.

Nsùyrì Nyùy 89:36

Rám rəə́ wíy shaàrì. M wíy a shìy vifon və́, a shìy, e meé mo shùy wíy a ban.

Nsùyrì Nyùy 89:3

Wò‑oò sùúy jii, «M gwàr ne *mensaŋ vèr à wìr wom ntay. M yiì ne kilìʼ vèr Davir woo ŋgaà lìm wom jii,

Matio 1:2

Atǎr rám Jesus ve vé‑eè loòn fo Abraham, e dù, e mèé e Fòn Davir wùné nén a dzə jii, Abraham, Aysi, Jakov wo dzəə̀n tàr à Juda wùn aàfə́r vəə́, Juda, Peres wùn Sera ve yè wov dzəə̀n Tamar, Hesron, Ram, Amminadav, Naashon, Salmon, Boas wo yè wov dzəə̀n Rahav, Obed wo yè wov dzəə̀n Rut, Jessi, e lì Fòn Davir. Á ló fo Fòn Davir, e dù, e mèé e ghan se vé‑eè koorin wír veé Isray, e dù, e lèm e wòŋ Babilon, atǎr ram rəne wáa dzə jii, Davir, Solomon woo wan Davir, a yè wov‑iì dzə̀ wiiy Uria. Atǎr ram ámóʼó kfə́n a dzə jii, Rehoboam, Abija, Asa, Jehoshafat, Joram, Ussiya, Jotam, Ahas, Hesekiya, Manasse, Amon, Josia, e lì Jekonia wo wùn aàfə́r vəə́ dzəə̀n wón Josia. Á ló fó ghan se wír veé Israyi‑iì dzəə̀n é Babilon sìn, e dù, e mèé e ghan se vé‑eè dzəən Jesus, á wáa dzə sa jii, Jekonia, Shealtiel, Serubbabel, Abiyur, Eliakim, Asor, Tsadok, Akim, Eliyur, Eleasar, Matan, Jakov, e lì Joosev wo yì‑iì dzəə̀n lum Maria woo yìy à Jesus, Jesus wo á yoŋ ji Kristu, a dzə̀ ji *Mfə̀ə́r. Rám à Jesus rə̀ne nén a dzə viŋkàŋ vitaár, a kiŋkàŋ kimòʼón ki kér atǎr ram nshòv sikweè e ghvə̀m, nshòv sikweè e ghvə̀m.

Ŋwàʼ Luk 1:33

é wù sáʼ wír ve á ràmèn fo Jakov adzə̀m, e dù, e jòʼsì. A bó sáʼ rəə́ yòʼ wíy mày.»

1 Timoti 2:5

A dzə̀ wù lùŋèr wír adzə̀m, bìʼ fo kù jòʼsìn wun ji Nyùy wùn mòʼón. Tàr Dzəə̀ wáa dzə sa e mòʼón wo wù tíy e Nyùy wùn à wírí nsàn, a dzə̀ Jesus Kristu wo wù‑uù liìn mbom wìr, a dzə réŋréŋ sá ji wír.

2 Timoti 2:8

Kú a kuumé a dzə̀ Jesus Kristu. Dzə̀ wun kitú ke sáʼka Nyùy wo juŋ wo m rə́si fiʼtì. A dzə̀ jii, wù‑uù wìy, e kpù, Nyùy fəə́r wun fo kpu. Dzə̀ wun *Mfə̀ə́r wo wù‑uù loòn fo Fòn Davir ram.