Maak 7:21 - ŊWÀʼ NYÙY

²¹ Vinyo ve bi ve wìr yii vidzə̀m vi kù yii lo a dzə̀ fo ŋgaàŋ shiliv. Wìr lo, wù nèn a kwàʼtì a dzə̀ vinyo ve bi ví, a jàŋ kinjàŋ, a ghan viŋkar, a shoŋ vishóŋ, a yuyrí wír, a lì wiiy wìr.

Maak 7:21 Referans Kwoze

Jeremia 17:9

«A dzə̀ kìíy la mo shilív shé wìr shi dzəə̀n? Kifá ki yòʼ dzə̀ shó ke kí kér kimboʼtì moo wun. Yàsí və tàv féyì fo á fer.

Matio 15:19

Kí kù yii lo a dzə̀ fó shiliv, bo wìr wáa kwàʼtì vinyo ve bi ví, lo, wù yùyrí wír, lo, wù lì wiiy wìr, e kfə̀n a jàŋ kinjàŋ, a ghan viŋkar. Wù lo, wù wàa shoŋ vishóŋ, e kfə̀n a toy wír e kinyò kisáŋ, a suʼ kinsuʼ.

Lim Aŋgàa Ntum 8:22

Ku bìnèr shilív shé shi fó kwàʼtì ye bi ye à kér rə̀n, a lon fo Nyùy Tàr ji wù laysin kinyo ke bi ke à kì taʼ, e yiì kìn.

Esiker 38:10

«Wíy lòo dzə e kishiíy fóo fèy, é vinyo vi nəə́ e wò vifii, áà wáa baʼtí kwaʼtì se bi sí. Suuy mo woo Nyùy Tàr woo Taà Ndzə.

Matio 9:4

Jesus kiíy kinyo ke áwune kwaʼtì, e dzə̀r jii, «Vèn kér kwaʼtì ye bií e věn meliv bìʼ ka?

Jeremia 4:14

Éè Jerusalem, vèn su vinyo ve bi ví fo věn meliv, e fíʼ lùŋ. Vèn wíy keerí kwaʼtì ye bií ben, e wìy dù, e meé e le?

Jeem 2:4

A vèn lò, a yiì bèy, bo bó vèn yòʼ jáy feyì à? Bo vèn sí yén ji wìr wùmòʼ dzə̀ á jeéy e věn mvəm, taʼ a dzə̀ koóy.

Ŋgàn 4:23

Kìm kitú ké ki fó yiì ye bií, ku kìm, bìʼ fo yíi wìri kù lo a dzə̀ fó kinyò ke wù kwàʼtìn.

Ŋwàʼ Luk 16:15

Jesus nèn a suúy aáwune jii, «Kù dzə̀ ven vin ve á laarì sí wíri, din wún ji wír ve juŋe, a kù kì Nyùy melív men. Vèn wáa kiíy jii, vinyo ve wíri búri ji ví mèé e vinyò vi dzə̀ ve ví kóʼoy fo Nyùy kóʼóyín.»

Aysaya 59:7

Wír vìne kù sí yár jíŋ ji á yii kinyo ke bi kí, waʼrì gheéy, á yùy wír là njò. Á kù dzəʼə̀m, bá antaŋ a dzə̀ vé yìi kisaŋe, nəə e kirə̀ʼ, bo kí fòy ne, e kfə̀n é vifə̀m.

Nsùyrì Nyùy 53:3

Áwune adzə̀me kù jày ne dzə́ə, kù sì vé kiŋkùvrìi adzə̀m, wìr wo juŋ yòʼ kfə̀n dzə̀ə́ gheéy, fə̀m e mòʼón.

Nsùyrì Nyùy 14:3

Áwune adzə̀me kù jày ne dzə́ə, kù sì vé kiŋkùvrìi adzə̀m, wìr wo juŋ yòʼ kfə̀n dzə̀ə́ gheéy, fə̀m e mòʼón.

Ŋwàʼ woó Rom 7:8

Mo nsər sí sháʼnin kinsiimè kìn, mensə́ mem me mè koŋ a dzə̀ vinyo ve bi ví mè nén a ŋaʼár shilív shém, m wáa siimé vifá vinín. Kí nén a dzə jii, bó yòʼ dzə̀ mensə́ mem mè ŋàʼár shilív shém ji shí yii kinyo, a bó mè yén fó nsər ji dzə̀ á kinyo ke bi kí.

Lim Aŋgàa Ntum 5:4

À fiìnè súm a dzə̀ wó, a mbàm si dzə̀ sé. Yií ka, bo à yii kinyo kee ben? À yén ké ji à bóʼti wír, aà bóʼti a dzə̀ Nyùy.»

Ŋgàn 15:25

Nyùy Tàr saʼtì lav wìr wo wù ŋaʼà, kiŋsìn kéŋ wiíy ŋkfə kíŋsin.

Nsùyrì Nyùy 14:1

Wír ve á ŋwáy Nyùyi yoŋ fo shiliv jii, «Nyùy yòʼ dzə̀.» Á yoŋ bèy, kuvrì kiŋkùvrì, buʼtì vinyo ve ghaʼtín ví, fə̀m wír e mòʼón wo wù yii yii ye juŋe yòʼ dzə̀.

Ŋwàʼ Jov 25:4

A dzə̀ wìr msòŋ ghàn é le, e bó a dzə là jay e Nyùy si? Wír fo wìr, é bo wù wáa dzə là shilóm.

Ŋwàʼ Jov 14:4

A dzə̀ fə̀ə́r la kifá kee là *kifàn fo ké kifàn kí mvəm? Bó wìr yòʼ dzə̀ shó.

Kèʼlo 8:21

Kirəm ke cù ki rə́ʼtín, e ghèén Nyùy Tàr, wù suúy fo wun bvə̀m jii, «Bó m yòʼ dzəə́ wìy màʼ ŋgeʼ e kitu ke nsay bìʼ wir msòŋ. Kwaʼtì wìr msòŋ e dzə̀me kù sì yé kisaŋe, e kèʼ fo meterí. Bó m yòʼ dzəə́ wìy laàr kifá ke ŋeʼèn kí fó kitu ke nsay mo mò‑oò laàrìn.»

Kèʼlo 6:5

Nyùy Tàr lòo leéy, e yèn, a liì kisaŋ wìr msòŋ gháʼ ne e kitu ke nsay, a wù kù sí kér a dzə̀ kwaʼtì kisaŋe e wun shiliv ghán sidzə̀m,

Ŋwàʼ woó Rom 7:5

Yì‑iì dzə̀ fó mbìy, a vèsən kù yii a dzə̀ mo mensə́ mèsən mè limè, a bó mè yòʼ‑oò koŋ, a yu fo nsər ye yì‑iì kér vèsən. Yì din jay, yì nèn màysì, e ŋàʼár mensə́ mèsən, vèsən wàa yiì vinyo ve ví wáa way vèsən wáyín é kpu yee ŋkuuŋkùŋ.

Nsùyrì Nyùy 53:1

Wír ve á ŋwáy Nyùyi yoŋ fo shiliv jii, «Nyùy yòʼ dzə̀.» Á yoŋ bèy, kuvrì kiŋkùvrì, buʼtì vinyo ve ghaʼán ví, fə̀m wír e mòʼón wo wù yii yii ye juŋe yòʼ dzə̀.

Titur 3:3

Kú a kuumé ji vèsən‑eè ló a yiì saa kiyúŋ, a tav kitú, a jay vinyo. Vèsən‑eè fiìnè vitú vesən ji á wáa yiì mo á koó, a yi a dzə̀ kitú. Vèsən kù‑uù rə́si dzə́, kér a dzə̀ melív me bi mè, siíme kinsiimè, a vèsən à wíri bannìnè.

Nsùyrì Nyùy 119:36

Yìi, é shilív shém shí wáa lùm e vinyò ve à foon, é la m yòʼ a jùm a dzə̀ káv woó nsay.

Aysaya 59:13

Vèr tàv ne kitú, e mèŋ wò woo Nyùy Tàr. Vèr bìn ne ndzə̀m e wò woo Nyùy wor. Vèr nə̀ʼsì ne wír ámóʼó, e ŋwày kinyo ké. Vèr kù sí baʼrì a dzə̀ kimboʼtì e věr meliv, fəər a dzə̀ kíwun fo shuù.

Jeremia 16:12

Kén kí nen kfə̀n fòy fòyìn, e shaà ké atàr vén. Vèn leéy, e yèn mo á ŋwayin ne mo wir dzə̀m, wìr wáa yiì a dzə̀ kinyo ke kisaŋ ki ke shilív sə́ shí koŋè.

Maak 7:20

Wù kfən siì sùúy jii, «Kinyo ke kí yii fəə́ fo wìr shuù ki dzə̀ ke kí bívir ŋgaàŋ.

Maak 7:22

Kfə́n lo, wù wàa siimé kinsiimè, a ker shilív she bi shí, a boʼtí kimboʼtì, a yiì liì kisaŋ, a ghèʼ kighèʼ, a suʼ kinsuʼ, a koʼór wún, a yiì kiyúŋsì.

Kolosia 3:5

Vèn ku nèn lì vitú vén ji á kpù ne a fo mbìv vinyò ve mensə́ men mè taʼ vidzə̀m. Lá vèn yòʼ a jàŋ kinjàŋ, a ghan viŋkar, a shii vinyo vee bey, kìn dzə̀ liì kisaŋ woo ka. Lá vèn yòʼ a way vifií é vinyò ve ví kér lóm, é la wìr yòʼ a tàʼ kifàʼ. Wìr wo wù taʼ kifàʼ lì ne vifá ve wù koŋ vee shooy ji Nyùy və.