Joshua 3:10 - ŊWÀʼ NYÙY

¹⁰ Á wìy, wù wáa suúy aáwune jii, «Vèn yuúrí kinyo ke kí yíi yiì, é vèn kiíy ji Nyùy wo tin dzə̀ á vèn áwune, a wù kù yíi jùm vitúm fo nsay mo vèn nəə. Wù yíi jùm wír veé Kanan wùn à veé Hiti, à veé Hivi, à veé Perisi, à veé Girgashi, à veé Amori, à veé Jebusi.

Joshua 3:10 Referans Kwoze

Remrí 7:1

Mooser shaà fo mbìy, a suúy jii, «Nyùy Tàr woo Nyùy won wíy lì ven, e dù sho e nsay ye vèn du, e nəə́ sho ji vèn yov, é wù tsəʼ vitúm fo fo vinín fo věn mbìy, a kù dzə̀ mo vèn wíy a nəə́, a dù. Wù wíy tsə̀ʼ wír veé Hit wùn à veé Girgashi, à veé Amori, à veé Kanane, à veé Perisi, à veé Hivi, à veé Jebusi. Dzə̀ vitúm saàmbà, a ví kùʼkìr, e kfə̀n tàvkír, e shaà ven.

Ŋwàʼ Fəə 33:2

M yíi tsənsí nshìylav yem, é yì wáa dù fo věn mbìy, é m jum wír veé Kanan wùn à veé Amori, à veé Hiti, à veé Perisi, à veé Hivi, à veé Jebusi, e fə̀ə́r fo wòŋ Kanan.

Hibru 10:31

Vèn wáa kiíy jii, a dzə̀ wìr kù a yàʼ, wúné wàa beemé, fó tiím e Nyùy wo wù gòʼòn kàŋ mòʼón si, é wù tínén nsaʼ ŋgaàŋ.

1 Samuel 17:26

Davir dzə́r e wír ve vé‑eè tíy e wun ghaŋe jii, «A wìr lòo dzə e yùyrí wír woó Filistia və̀n, e tsə̀ʼ nshoórmé fo wír veé Israyí kitu, á fò ka e ŋgaàŋ? Kiŋgà ké méŋnyùy keé Filistia kìn ki dzə̀ la, bó a dzə ji wun shoór vé rə́r Nyùy wo wù dzəə̀n shó e tin.»

Jeremia 10:10

Yii bèy, dzə̀ wò Nyùy Tàr, Nyùy wo ru. Dzə̀ wò Nyùy wo tin, a vifon vé ví wíy shaàrì. Aà shwìíy kilòŋ, kitú ke nsay ki sə̀ʼsì, dòʼshwíiy wò kóʼ, la vitúm vi yòʼ tìím.

2 Afòn 19:4

Mfòómé woó Assiriya kì wìy, a kuùrì Nyùy wo wù dzəə̀n shó, kuùrì bèn mo tàr wov woo fon kì tsənsin ji wù wàá wiy, e kuùrì. M lón ji Nyùy Tàr woo Nyùy wò ku yuùrí a liy sìn, e nyèr áwune. Á bèy, á bùnrì fo kibér ke wìr ke kí dzə̀ə́ shó ki.»

Joshua 22:31

Á bèy, Finehas woo wan taà cù Eleasar nèn sùúy aáwune jii, «Vèr kìíy ne lán və̀n ji Nyùy Tàr dzə̀ vèsən áwune, bìʼ fo vèn yoʼ tàv kitú, e yiì jay e Nyùy. Vèn sə̀ ne wír veé Isray lèn fo Nyùy Tàr maʼ ŋgeʼ aáwuné kitu.»

Remrí 31:17

Kí lóo dzə bèy, bo dòʼshwíiy wom lo, e koʼ, é m maʼay áwune, e rə̀ʼ sí fo áwuné wùn é kishiíy fóo fèy. Kí lóo dzə bèy, aáwune saʼkir, é lòn wùn à ŋgeʼ si nəə́ áwune, ye á wáa kànkìr. Á wíy a kànkìr, a yòŋ jii, ‹Bó lòn və́ne yòʼ gbù e vèsə́n kitu bèn, bìʼ fo Nyùy wòsən yòʼ kfə̀n dzə̀ə́ e vèsə́n mvəm a?›

Ŋwàʼ Fəə 3:8

Á bèy, m nen sə̀y ji m boyir á áwune fo wír veé Ejiví wo, e fəə́r fo nsay foo fèy, e dù sho e nsay ye juŋ, nsay ye vín nàʼ wùn à vilu vi tsəətìn sho. A dzə̀ nsay ye wír veé Kanan wùn à veé Hiti, à veé Amori, à veé Perisi, à veé Hivi, à veé Jebusi dzə́ sho.

1 Tesalonika 1:9

Wìr dzə̀m kù‑uù sí fer mo vèn‑eè keerin ver é ghan se vèr‑iì wìyìn, e ghàn ven, kfə̀n fer mo vèn‑eè màʼtìn anyùy kisaŋe, e bìnkìr, e kfə̀n fo Nyùy wo wù dzəə̀n rú e tin, a yu a dzə̀ fo wun.

Hosea 1:10

«Yii bèy, wír veé Israyi dzəə́ wìy kùʼ, a dzə moo síy seé rìbà ndzə̀v, a bó á yòʼ wíy yu fó taŋ. A kí dzə̀ jii, e kirə̀ʼ fo vé‑eè yoŋ áwune ji ‹Vèn yòʼ dzə̀ə́ wír vém›, dzə̀ fo á wíy a yòŋ áwune ji ‹Wón Nyùy wo wù gòʼòn kàŋ mòʼón.›

Nsùyrì Nyùy 9:16

Nyùy Tàr yiì ne, á kiíy mo wù dzəə̀n. Wù tìnén nsaʼ, e yiì, wír ve á méŋ wune ku lì e kitam ke koʼorin áwune.

Remrí 5:26

Bó kí yòʼ‑oò yiì ne kòóy ji wìr fo wìr yú, a Nyùy wo wù dzəə̀n shó e tin súŋnin fo mvə̀m və̀y mo vèr yuun, ŋgaàŋ góʼ e tin.›

Matio 16:16

Simon Pita bìnèr jii, «À dzə̀ Mfə̀ə́r woo Wan Nyùy, Nyùy wo wù gòʼòn kàŋ mòʼón.»

Aysaya 7:14

Mo á tenen ne fóo lon kisəəm fo Nyùy Tàr, bo wúnwun woo Nyùy Tàr lo, e dìn a kisəəm aáwune. Á yuúrí á kijuŋ, wánlè ŋgòn woo shó wíy tiím a bvəm, e dzəə́ wán lumèn, dzəə, é wù shu á yír ji Immanuel.

1 Afòn 22:28

Mikayia suúy jii, «A fòn lòo dzə, e dù, e kfə̀n é bàm kijuŋ, là kinyo, bo bó Nyùy Tàr yòʼ‑oò lò sùŋnín rú e mo.» Mikayia wáa dzə̀sì, a suúy jii, «Wìr dzə̀m səəm kinyo ke m suuy ki.»

Joshua 21:45

Nyùy Tàr‑iì lo yiì vinyo vidzə̀m ve wù‑uù kàʼàn wír veé Isray sho.

Ŋwàʼ Fəə 17:7

Wù nèn shù yír kirə̀ʼ kee shoon ji Massaa, bìʼ fo wír veé Israyi‑iì mum Nyùy Tàr fó, gháy jii, «Nyùy Tàr dzə̀ vèr áwune moo ŋgáŋ á?» Wù kfən shù sa yímóʼó ji Meriba, bìʼ fo áwune‑eè taʼ melaà fo.

Joon 6:69

Vèr wày ne shilív e wò wùn, e kìíy ji à lò rú fo Nyùy, aà dzə̀ Wan Nyùy.»

Remrí 7:21

Lá vèn yòʼ wìy a fàn áwune. Nyùy Tàr woo Nyùy won dzə̀ e věn mvəm, a wù dzə̀ ŋgaà vitaàví ve wiy ví, a wù kfə̀n beèmé sa e ŋàŋ.

Joshua 3:9

Joshua nèn sùúy e wír veé Israyi jii, «Vèn wiy, e yù jí se Nyùy Tàr woo Nyùy won sí.»

Joshua 9:1

Afon vee lò fó Jordan, a kfənér e mbìv yee fo shùy yii nə́ə nèn yù mo wír veé Israyi tònèn vitúm. Veé agwane yú, veé mboʼ seé ghaa rìbà ndzə̀ví yú, e dù meé e Lebanon. Á yú bey, e nèn tàr shuu, e bàʼtí shúu wóv rər e mòʼón ji á funen á Joshua wùn à wír veé Israyi, aàfon vìne dzə̀ jii, fon woó Hit, woó Amor, woó Kanan, woó Peris, woó Hiv, e bóo lì woó Jebus.

1 Samuel 26:6

Davir wáa dzə fo wùn à Ahimelek woo wír woó Hit, à Abishay woo fər Joav ve yè wòv‑iì dzəə̀n Tsəruyia. Wù nèn dzə̀r aáwune jii, «Yii sə́y vèr la e Saul kilaʼáy, e yèn wun?» Abishay bìnèr jii, «Wòsò sə́y.»

Nsùyrì Nyùy 42:2

M yár jiŋ Nyùy wo wù dzəə̀n e tin. M wíy dù e wun lav e ghàn ka? M wíy a sùyrì wun fo e ghàn ka?

Kèʼlo 15:21

à veé Amor, à veé Kanan, à veé Girgash, e lì veé Jebus.»

Kintaŋ 13:29

Wír veé Amaleki dzə́ e nsay Negev, a veé Hit wùn à veé Jebus, à veé Amori dzə́ kév é wòŋ agwan, a veé Kanane dzə́ e ŋguùŋè rìbà ndzə̀v, e kfə̀n a dzə e ghaŋ se ndzəv yee Jordan.»

Joshua 11:3

Wù kfən bì sá wír veé Kanan adzə̀m, veé mbìv Jordan yeé koy yìyí wùn à yeé koy ŋkoòvì, e bì wír veé Amor, à veé Hiti, à veé Perisi, à veé Jebusi e wòŋ agwan, à veé Hiv vé a kfənér e sar Gwan Hermon e ŋgvən yeé Mispàa.

Joshua 12:8

Virə́ʼ vin vi‑iì tàtí mbìv aŋkoŋ, à mbìv Shefela e sar se agwan, à virə́ʼ veé mbuŋ Jordan veé mbìv yee fo shùy yii nəə, à ŋguùŋè sə́ sí, à virə́ʼ vé woʼ ví, e lì Negev fo mbìv yee tsə́n. Wír ve vé‑eè dzə́ e nsay fène‑eè dzə̀ wír veé Hit wùn à veé Amori, à veé Kanane, à veé Perisi, à veé Hivi, e lì veé Jebus.

Joshua 24:11

Vèn túm Jordan, e wìy e Jeriko, vilum veé Jerikòo taámé ven é vindzə̀ʼ. Vitúm vímóʼ ví kfən taàmé sa ven, aá dzə̀ jii, wír veé Amor wùn à veé Perisi, à veé Kanane, à veé Hiti, à veé Girgashi, à veé Hivi, e lì veé Jebus. M ku yiì, vèn tón áwune adzə̀m.

1 Wòŋ 1:14

Vitúm vímóʼ ví nen kfə̀n ràm sa fo Kanan, a ví dzə̀ jii, wír veé Jebus, veé Amor, veé Girgash,