Joon 8:24 - ŊWÀʼ NYÙY

²⁴ Mo m kì suuyin ne e vèn ji vèn wíy kpukír vèn à njò yen, a vèn dzə̀ là fó biimé jii, ‹Dzə̀ mo wo dzəə̀n mo›, bo vèn kù wíy kpu vèn à njò yen.»

Joon 8:24 Referans Kwoze

Joon 3:36

Wìr wo wù wáy shilív e Wàn Nyùy wùn sí kér dzəʼə̀m yee là may. Wìr wo bó wù yòʼ yú kinyo kfə́ yòʼ wíy a ker dzəʼə̀m yee shooy gheéy. Lǒn Nyùyi kù gòʼ ne e ŋgaàŋ kitu ghán sidzə̀m.

Joon 3:18

Wír wo wù wáy shilív e Wàn Nyùy wùn bòy ne fo lòn. Wìr wo wù tén fó way lì ne lòn, bìʼ fo wù leeyin wír wo dzəə̀n Wan Nyùy ntéŋ, a bó wùmòʼ yòʼ kfə̀n dzə̀.

Maak 16:16

Wìr wo wù biimen, á kfən wày wun e ndzəv wíy lùŋ. Wìr wo wù tenen fó biimé wíy gbù nsaʼ.

Hibru 12:25

Vèn wáa yen rì fó ŋway kinyo ke Nyùy wo wù súŋnin e vèn ŋwáyín. Vèn kì sá ji wù‑uù lo màʼ ŋgeʼ e wír ve vé‑eè ŋwáy kinyo ke ŋgaà wo wù‑uù lèmèn é nsay fèn ji wù wáa tir wíri. Mo kí dzəə̀n ben, bo bó wìr wo wù ŋwáy kfə́ a dzə̀ kinyo ke wun woo Nyùy súŋnin fo yuv yòʼ wíy bòy fo ŋgeʼ gheéy.

Ŋgàn 8:36

Yii bèy, wìr tén fóo tàʼ mo, bo wù kfə́r a dzə̀ kitú kfə́. Wìr wo wù ban mo kù taʼ a dzə̀ kpú.

Joon 13:19

M nén a suúy kinyo kìn e vèn lèn bèn, é bo kí yiì a koóy. Kí yií kooyì, é vèn fiʼ biìmé ji dzə̀ rú mo wo dzəə̀n mo.

Joon 4:26

Jesus nèn sùúy sho jii, «Dzə̀ mo woo shó və̀n, mo wo m súŋnin e wò.»

Hibru 2:3

Mo kí dzəə̀n ben, vèsən kfən lò, a meŋ kiŋgaʼnìn ke kinyò ke yiìn Wan Nyùy ji vèsən fiʼ lùŋ, bo dzə̀ vèsən yèe, e bóo bòy fo ŋgeʼ? Kù‑uù tòmbìy, a fìʼtì wun woo Taàtá wòsən Jesus Kristu kinyo kìn, é bo wír ve vé‑eè yuuné wáa fìʼtì, é vèsən wáa kiíy sa mo kí dzəə̀n.

Joon 8:21

Wù yiì lò, e kfə̀n a suúy jii, «M sí du, a vèn wíy siíy, a tàʼ mo, e kpu vèn à njò yen. A bó yòʼ dzə̀ vèn wìy fo m du.»

Lim Aŋgàa Ntum 4:12

A wíri kù luŋ a dzə̀ fo Jesus və̀n cáʼcáʼ, bìʼ fo wìr wùmòʼ yòʼ kfə̀n dzəə̀n shó e ndzə fèn wo Nyùy‑iì lèmèn ji vèsən wíy lùŋ fo fo.»

Maak 13:6

Wíri wíy a fəə anín, a teʼ mo é si, a suúy ji áwune dzə̀ *Mfə̀ə́r woo shó, e boʼtí wír anín, aá jáy dzə́ə.

Ŋwàʼ Luk 21:8

Wù bìnèr jii, «Vèn wáa yen fo wìr wìy bòʼtí ven, é vèn jáy dzə́ə. Wíri wíy fəə anín, a teʼ mo é si, a suúy ji áwune dzə̀ Mfə̀ə́r woo shó, a ghán sí ghèén ne. Á wíy lóo suúy bèy, vèn wàa yen fó yuurí kinyo kév.

Ŋwàʼ Fəə 3:14

Nyùy suúy e Mooser jii, «Yír yémé dzə̀ ji DZƏ̀ MO WO DZƏƏ̀N MO. À yíi suúy e wír veé Israyi ji tùm á DZƏ̀ MO wò fo áwuné wùn.»

Matio 24:5

Wíri wíy wìy anín, e lì mo, e teʼ e si, a suúy jii, áwune dzə̀ *Mfə̀ə́r woo shó, e boʼtí wír anín, aá jáy dzə́ə.

Joon 8:25

Á nèn dzə̀r shó jii, «Dzə̀ wò la woo shoon?» Jesus bìnèr jii, «M dzə̀ ŋgaàŋ wo mò‑oò sí suuy e vèn, e kèʼ fo kèʼ.

Joon 8:28

Jesus nèn kfə̀n sùúy aáwune jii, «Vèn wíy koʼór ŋgaà wo yírí dzəə̀n *Wanwìr və̀n e kici, é vèn nèn kìíy jii, ‹Dzə̀ mo wo dzəə̀n mo›, e kfə̀n kiíy ji bó m yòʼ yii vinyo a dzə̀ á fo mǒ vitaaví. M suuy vinyo a dzə̀ ve Tàr wor‑iì dìnèn e mò.

Joon 8:58

Jesus bìnèr jii, «Vèn wáa kiíy rúrú jii, bo á wáa dzəə́ Abraham, a m sì.»