Joon 6:57 - ŊWÀʼ NYÙY

⁵⁷ M dzə́, a kù yii vitaáví vé Tàr wor wo wù tumen mo, bo m wáa dzə, wun woo Tàr wor wo wù kù dzə́ a dzə̀ fo wùn vitaaví. Dzə̀ réŋréŋ sá mo vém vee vitaáví ví yii, bo wìr wo wù yí wún wóm wáa dzə.

Joon 6:57 Referans Kwoze

Galatia 2:20

Mo Kristu‑uù kpuun é kintam, sì yém yee kpú. M dzə́ lèn bèn, a bó yòʼ dzəə́ dzə́ mo gheéy, sí dzə́ Kristu e mǒ wùn. A dzə́ ye m dzə́ rə̀n, m dzə́ a dzə̀ bìʼ fo m wáy shilív e wun woo Wan Nyùy wùn, wo wù kòŋèn mo, e lì kitú kfə́, e tàŋrí mo shó.

Joon 5:26

A kí dzə̀ bey, bìʼ fo Nyùy Tàr wo kù yii wun, bo wíri wáa lùŋ, foon ne sa vitaáví vee shooy e Wan və.

Joon 17:21

A m lón jii, à ku yiì, aáwune tátí adzə̀m, a dzə ji kitú kimòʼón réŋréŋ mo wò woo Tàr dzəə̀n wòsò, a wòsò dzə̀ ji kitú kimòʼón. Ku yiì, aáwune wáa dzə sa e wòsò mvəm, é wír veé ndzə fène fíʼ biimé ji ntum ye mò‑oò loòn dzə̀ rú á ye.

1 Joon 4:9

Nyùy‑iì lo dìn rú ji wun koŋ a vèsən. Wù‑uù tùm màyshó Wan və é nsay fèn ji wù wiy, e yiì, é vèsən fíʼ a ker dzəʼə̀m yee là may.

Joon 3:17

A bó Nyùy yòʼ tùm Wán və é ndzə fèn ji wù wáy wíri a dzə̀ é lòn. Wù tùm ji wù yii, é wíri luŋ.

1 Tesalonika 1:9

Wìr dzə̀m kù‑uù sí fer mo vèn‑eè keerin ver é ghan se vèr‑iì wìyìn, e ghàn ven, kfə̀n fer mo vèn‑eè màʼtìn anyùy kisaŋe, e bìnkìr, e kfə̀n fo Nyùy wo wù dzəə̀n rú e tin, a yu a dzə̀ fo wun.

2 Korin 13:4

Dzə̀ rú, wù‑uù lo weèy moo wír, á lì wun, e yùyrí e kintam. Yii bèy, a wù dzə́ lèn a dzə̀ bìʼ vitaáví ve dzəə̀n vé Nyùy. Mo vèr à Kristu tatin, vèr nén a weèy sa fo wùn. Yii bèy, a vèr kfə̀n dzə̀ sá bìʼ vitaáví ve dzəə̀n vé Nyùy, a dzə̀ víwun ve dzə̀ vèr neèr e věn nsàn.

1 Korin 15:22

A kí dzə̀ ji wìr dzə̀m kpú, bìʼ á fo dzəə̀n rám Adam, a kù dzə̀ sá mo Nyùy wíy fəə́r wír wo wù tatin wùn Kristu e dzə̀m fo kpu,

Joon 14:19

Bèr shishàr, é la wír veé ndzə fèn vìne yòʼ dzə́ə a yen mo. Yii bèy, a vèn kfə̀n wíy yen. Mo m dzə́ sho ghán sidzə̀m, vèn wíy a dzə sa bìʼ mo.

Joon 14:6

Jesus bìnèr jii, «Dzəə̀ kù dzə̀ mo və̀n, a kinyo ke dzəə̀n ke ru kí kù lo a dzə̀ fo mò, a kù fó mo dzəʼə̀m yee là may. A bó yòʼ dzə̀ wìr shaà, e dù, e yèn Tàr wor, a bó ŋgaàŋ beé a dzə̀ mo.

Matio 16:16

Simon Pita bìnèr jii, «À dzə̀ Mfə̀ə́r woo Wan Nyùy, Nyùy wo wù gòʼòn kàŋ mòʼón.»

Jeremia 10:10

Yii bèy, dzə̀ wò Nyùy Tàr, Nyùy wo ru. Dzə̀ wò Nyùy wo tin, a vifon vé ví wíy shaàrì. Aà shwìíy kilòŋ, kitú ke nsay ki sə̀ʼsì, dòʼshwíiy wò kóʼ, la vitúm vi yòʼ tìím.

Nsùyrì Nyùy 18:46

Nyùy Tàr dzə̀ shó e tin. Dzə̀ wun kirùmèn kém ké nsàm. Á wáa burí wun. Á wáa wùʼsì yír Nyùy woo Ŋgaà Lùŋèr wom,

Hibru 9:14

Mo mensə́ me nyàm mè‑eè kér vitaáví fó naŋsín ŋgaà kifàn, bo me Jesus Kristu mè‑eè yiì kinyo, e shaà kee shooy feyì. Mo wù‑uù foon kitú kfə́, e kpù, a bó wù yòʼ kér njò yìmòʼ ye dzəə̀n ji rə́ə, Kiyoy ke Nyùy ke kí gòʼòn kàŋ mòʼón ki nèn yiì, woo shooy woo ntàŋrí náŋsín melív mèsən lèn, vèsən bóy fó vinyò ve vé‑eè yii, a bó yòʼ dzə̀ ví sə̀ wír wù ghèén fo Nyùy. Vèsən nén a dzə lèn vèsən à Nyùy, a lìm fo fo.

Joon 6:29

Jesus bìnèr jii, «Kinyo ke Nyùy taʼ ji vèn wáa yiì ki kù dzə̀ ji vèn wáy shilív e wìr wo wù tumén wùn.»

Joon 6:38

Mò‑oò lò fó yuv, e wìy e nsay fèn a dzə̀ ji m kú a yiì kinyo a dzə̀ ke sìysìn ŋgaà wo wù tumen mo ji m wáa yiì. A bó m yòʼ wìy ji m wáa yiì kinyo a dzə̀ ke kwaʼ mo.

1 Korin 15:45

Vé‑eè sàŋ é Ŋwàʼ Nyùy jii, «Nyùy‑iì bòm Adam, wo dzəə̀n wir mbìy, e fò kiyoy sho, wù wáa yòy, a dzə e tin.» Yii bèy, ké Jesus Kristu wo dzəə̀n Adam wo wù jòʼsìn bám kí nén a dzə jii, wù dzə̀ kfə́ Kiyoy ke kí yii, bo wíri wáa lùŋ.