Joon 3:17 - ŊWÀʼ NYÙY

¹⁷ A bó Nyùy yòʼ tùm Wán və é ndzə fèn ji wù wáy wíri a dzə̀ é lòn. Wù tùm ji wù yii, é wíri luŋ.

Joon 3:17 Referans Kwoze

1 Joon 4:14

A ver vee aŋgàa ntume‑eè lo yèn sá Wán və wo wù‑uù tumen é nsay fèn ji wù wiy, e tìn wíri fó lòn.

Ŋwàʼ Luk 19:10

a ŋgaà wo yírí dzəə̀n *Wanwìr wìy fó tàʼ wír ve vé‑eè làykìn ne, e lùŋèr.»

Joon 6:57

M dzə́, a kù yii vitaáví vé Tàr wor wo wù tumen mo, bo m wáa dzə, wun woo Tàr wor wo wù kù dzə́ a dzə̀ fo wùn vitaaví. Dzə̀ réŋréŋ sá mo vém vee vitaáví ví yii, bo wìr wo wù yí wún wóm wáa dzə.

Joon 6:40

A Tàr wor sìysì ne ji wìr dzə̀m wo wù wiy, yén Wán və, wáy shilív é wùn wó wáa ker dzəʼə̀m yee là may. A kí dzə̀ jii, m wíy fəə́r ŋgaàŋ fo kpu e ghan sé bàm sí.»

Joon 6:29

Jesus bìnèr jii, «Kinyo ke Nyùy taʼ ji vèn wáa yiì ki kù dzə̀ ji vèn wáy shilív e wìr wo wù tumén wùn.»

Joon 20:21

Wù nèn kfə̀n sùúy aáwune jii, «Nyaáŋ kú a dzə e věn mvəm. M sí túm ven lèn mo Tàr wor‑iì tumen sá mo.»

1 Joon 2:2

Nyùy laysìn ajay vesən a dzə̀ bìʼ Jesus Kristu və̀n wo wù‑uù kpuun ji wun fíʼ taŋrí vèsən. A bó wù yòʼ‑oò kpù bìʼ ajay vesən cáʼcáʼ gheéy. Wù‑uù kpù bìʼ ajay wìr dzə̀m.

Joon 17:3

A dzəʼə̀m yee là may rə̀ne dzə̀ jii, wìr kiíy wò, wo kù jòʼsìn wò Nyùy wo rù, e kfə̀n kìíy sa mo woo Jesus Kristu wo wò‑oò tumen é ndzə fèn.

Joon 11:42

A m kì jii, à kù yii yuúri kinyo kém ghán sidzə̀m. M nén a suúy kin a dzə̀ bìʼ wír ve á tíy fo ghaŋ vìn, aá fíʼ yìi biimé ji tùm rú wò woo Nyùy mo.»

Joon 7:29

Kù kì mo ŋgaàŋ, bìʼ fo m loòn fo ŋgaàŋ wùn, a tùm ŋgaàŋ mo.»

Joon 5:45

Lá vèn yòʼ a kwàʼtì ji m suuy bèn ji m fíʼ lì ajay vén, a bi Tàr wor shó. Wìr wo wù sí bí ajay vén vee shooy dzə̀ Mooser wo vèn wayin vifií é wùn wó.

Sekariya 9:9

Éè wìr veé Sion, vèn wáa sheʼrí e mbòómbòŋ. Éè wìr veé Jerusalem, vèn wáa ndzəʼ. Vèn yén mo fòn won wiyì, wiy e sáʼ yee tìítiyi, séŋ nsiì, e kù yòʼ lì kitú kfə́ shishàr, e kòʼ a dzə̀ kimbèʼbìy, kimbèʼbìy, a dzə̀ kee wán.

Joon 8:42

Jesus bìnèr jii, «A Nyùy kì dzə̀ rú Tàr won, bo vèn ku lò a kòŋ mo, bìʼ fo m dzəə̀n fen, a m lò a dzə̀ fo Nyùy. A bó m yòʼ‑oò wìy fo mǒ kitu. Yì‑iì tùm Nyùy mo.

Joon 1:29

Yì rán kibvəə́shí, Joon yén Jesus, a wù wiyì, e nèn a dìn e wíri jii, «Vèn yén wír wo wù mán vinyo ve wír veé ndzə adzə̀me jáyí. Wù dzə̀ moo wan njiì wo Nyùy seé, e taŋrí wíri shó.

Joon 17:8

Mò‑oò lo tiìsí vinyo ve wò‑oò tumen mo shó aáwune vidzə̀m, áwune biímé, e nèn kìíy rú ji m lò a dzə̀ fo wò, a yiì tùm wò mo.

Joon 10:36

m wáa dzə kém wír wo Tàr wor Nyùy‑iì shoʼon, e tùm é ndzə fèn, vèn kfə́n a suúy ji m táŋ kilíŋ ke Nyùy, bìʼ fo m suuy ji m dzə̀ Wan Nyùy moó le?

Joon 5:36

«Kinyo kímóʼ kí nén a dzə sho, ke kí din mo m dzəə̀n, a kí shaà ké Joon. A kí dzə̀ jii, Tàr wor fò ne lim ye m wáa lìm. Vinyo ve m yii vìn vi nén a dìn ji tùm rú á Tàr wor mo.

Joon 17:21

A m lón jii, à ku yiì, aáwune tátí adzə̀m, a dzə ji kitú kimòʼón réŋréŋ mo wò woo Tàr dzəə̀n wòsò, a wòsò dzə̀ ji kitú kimòʼón. Ku yiì, aáwune wáa dzə sa e wòsò mvəm, é wír veé ndzə fène fíʼ biimé ji ntum ye mò‑oò loòn dzə̀ rú á ye.

Joon 5:38

Vinyo və́ ví yòʼ tíy e věn meliv, bìʼ fo vèn yòʼ wáy shilív e ŋgaà wo wù tumén wùn.

Matio 1:23

«Wánlè ŋgòn wùmòʼ wíy tiím bvəm, a bó wù yóʼ ne kìíy lumèn, e dzəə́ wán lumèn, aá wíy a yòŋ ji Emmanuel.» A nsàv yìr rən dzə̀ jii, «Nyùy sì vèsən áwune.»

Matio 18:10

«Vèn wáa yen fó a kay wír fo wón ve terí víne. Vèn wáa kiíy jii, nshèelav se Nyùy se sí leey fo áwune sí meéri e Tàr wor wo wù dzəə̀n é yúv si ghán sidzə̀m. [

Ŋwàʼ Luk 9:56

e nèn lò, wùn áwune wáa dù e ntèʼ ye sən.

Joon 3:34

bìʼ fo wìr wo Nyùy tumen və̀n súŋnin a dzə̀ jí se dzəə̀n sé Nyùy, mo wù‑uù foon Kiyoy kfə́ shó là mfìʼ.

Joon 6:38

Mò‑oò lò fó yuv, e wìy e nsay fèn a dzə̀ ji m kú a yiì kinyo a dzə̀ ke sìysìn ŋgaà wo wù tumen mo ji m wáa yiì. A bó m yòʼ wìy ji m wáa yiì kinyo a dzə̀ ke kwaʼ mo.

Joon 8:11

Wù bìnèr jii, «Taàtá, wìr yoʼ sùúy.» Jesus nèn sùúy jii, «A bó yòʼ dzə̀ sá, m sùúy. Ku yòʼ a dù. À du, lá à yòʼ dzə́ə a bùʼtì vinyo.»]

Joon 17:18

Mo wò‑oò tumen mo é ndzə fèn, m tùm ne sa áwune fo wír veé ndzəə.

Joon 17:23

Mo wòsò dzəə̀n kintatì, vèr áwune lóo dzə sa kintatì, aáwune nèn màysì, e tàtí ŋkuuŋkùŋ, a dzə ji kitú kimòʼón, é wír veé ndzə fène yén ji ntum ye mò‑oò loòn dzə̀ rú ye, e kfə̀n yèn sá ji à koŋ wír vìn réŋréŋ mo à koŋ mo.

Joon 17:25

Éè Tàr, kù yii yii wò kinyo kee réŋ, a bó wír veé ndzə fène yòʼ kì wò. Yii bèy, a mò‑oò kìíy ne wò, a wír vém víne kìíy ne rú ji mò‑oò lò ntum a dzə̀ ye.

Matio 18:11

A ŋgaà wo yírí dzəə̀n Wanwìr və̀n wìy ji wun tàʼ wír ve vé‑eè làykìn ne, e lùŋèr.]