Joon 17:13 - ŊWÀʼ NYÙY

¹³ «Mo m sí kfə́n fo wò wùn lèn, m nén a lon vinyo vìn vidzə̀m, a m dzə̀ə́ e ndzə fèn, é kishéʼrì ke m yii kér e mǒ shiliv kí maysi, e rùn sá aáwuné meliv.

Joon 17:13 Referans Kwoze

Hibru 12:2

a leéy a dzə̀ fó mbìy fo vèsən du, e jòʼsì, a dzə̀ e Jesus wùn. Dzə̀ wun wo wù yiìn, vèsən wáa way shilív e Nyùy wùn, a kù wíy lì wun vèsən, e way e Nyùy kiwo ŋkuuŋkùŋ. Wù‑uù dzə̀ é nsay fèn, e biìmé ji wun ku yiì mo Nyùy sìysìn, e kpù é kintam moo ŋgaà jay, e làa yòʼ a ci woómé se sí dzəə̀n é kfəə kpu foo fèy. Wù‑uù leey kfə́ a dzə̀ vijuŋ ve ví dzəə̀n fó mbìy. Wù nén a dzə lèn e yuv, a dzə e Nyùy ghaa kàvàʼ, e koy yìyí.

Galatia 5:22

Á bèy, a vinyo ve Kiyoy ke Ranén kí bánri wíri, aá yii vi dzə̀ jii, á koŋ Nyùy, kfə̀n koŋnìnè, kér kishéʼrì aáwuné meliv, dzə́ dzəʼə̀m yee nyaáŋ, kér wir dzə̀m ji weè, shám wíri, yii a dzə̀ kinyo ke dzəə̀n ke ru kí, lóo suúy kinyo, á wàa yiì a dzə̀ kíwun.

Joon 15:11

M sùúy ne vinyo vìn e vèn ben, é kishéʼrì ke kí dzəə̀n e mǒ shiliv kí fíʼ a dzə sa e věn meliv, é vèn maysi rú, a ker kishéʼrì.

Joon 3:29

Wìr wo wù kooy jín dzə̀ lum jìn. Ŋkar rə lóo tiy fo ghaŋ, lóo yu mo wù yoŋrì, wù wàa sheʼrí sheʼrín. M nén a dzə sa moo ŋkar lum jìn, a sheʼrí lèn feyì.

1 Joon 1:4

M nén a saŋ vinyo vìn fo vèn lèn ji vèn tátí sá bèy, é vèsən wáa sheʼrí a ghán sidzə̀m.

Joon 13:3

Jesus wáa dzə, a wù kì kijuŋ ji Tàr wov wày ne vinyo vidzə̀m a dzə̀ e wùn kiwo, a wun‑eè lò fo Nyùy, a wun sí kfə́n a dzə̀ fó,

2 Joon 1:12

Vinyo vi dzə̀ vinín ve kì dzə̀ m sùúy e vèn. Yii bèy, a bó m yòʼ sáŋ a dzə̀ é ŋwàʼ fèn. M leey ji kintóʼ ki fəə́sín, é m wiy, e ghàn á ven. Vèsən lóo dzə fo si, é bo m fer vinyo vee shooy e vèn vidzə̀m. Vèn yú, é vèsən nèn màysì, a sheʼrí.

Ŋwàʼ woó Rom 14:17

A bó wír ve á dzəə̀n e Nyùy mvə̀m saʼa yòʼ dzə̀ ji á wáa nonín, a yinín. Ké saʼ Nyùy ki dzə̀ jii, á wáa yiì kinyo a dzə̀ ke kí gheenen Nyùy, é melív mev mè wáa dzə nyaáŋ, é Kiyoy ke Ranén kí kfə́n a yiì, aá wáa yu vijuŋ.

Joon 16:33

M sùúy ne vinyo e vèn, é vèn fíʼ a tiy e mǒ wùn, é melív men mè wáa dzə nyaáŋ. Vèn dzə́ e ndzə fèn lèn, a ŋgeʼ si kooy ven sinín. Yii bèy, vèn wáa wàrkìr, bìʼ fo m ghaʼan ne vitaáví vé ndzə rə̀n.»

Nsùyrì Nyùy 126:5

Wìr yii wáy kifá e nsay e mensíy mè e si, ghínsin káví, wù wàa sheʼrí sheʼrín.

Nsùyrì Nyùy 43:4

Á bèy, éè Nyùy woo Nyùy wom, é m nèn kòʼtí e wò kiy cù, a tiy e wò si, wò wo à yii shéʼer mo, a kùm lúŋ, a burí wò sho.

Nehemia 8:10

A dzə̀ lèn vèn dù, a yikír, a no vifá ve nyomèn ví, a fo vímóʼ ví e wír ve bó á yòʼ kéríi. Dzə̀ kishiíy ké Nyùy Tàr kee jeéy kí. Lá vèn yòʼ dzə́ə a dzə e nsòv. Kishéʼrì ke Nyùy Tàr kí ku tàvír ven.»

Lim Aŋgàa Ntum 13:52

Aŋgàa biimé vìyi ku sìíy, a dzə, Kiyoy ke Ranén kí wáa run aáwuné meliv, á wáa ker kishéʼrì ke kuʼùn kí.

Joon 7:33

Jesus nèn a suúy e wíri jii, «M dzəə́ yìi ndzə̀ytì vèsən fen shishàr, e nèn a kfən fo ŋgaà wo wù‑uù tumen mó wùn,

Joon 17:11

Wáa dzə lèn, a m sí maʼtì ndzə rə̀n, a kfən fo wò wùn, aáwune yíi siíy kév, e gòʼ sho. Tàr, kù jòʼsì wò ji Nyùy. Kú a shìy áwune mo yír yée dzəə̀n, a dzə̀ yíwun yee yír ye wò‑oò foon sá e mò. Kú a shìy áwune, aá tátí a dzə ji kitú kimòʼón mo wòsò dzəə̀n sá ji kitú kimòʼón.