Joon 17:11 - ŊWÀʼ NYÙY

¹¹ Wáa dzə lèn, a m sí maʼtì ndzə rə̀n, a kfən fo wò wùn, aáwune yíi siíy kév, e gòʼ sho. Tàr, kù jòʼsì wò ji Nyùy. Kú a shìy áwune mo yír yée dzəə̀n, a dzə̀ yíwun yee yír ye wò‑oò foon sá e mò. Kú a shìy áwune, aá tátí a dzə ji kitú kimòʼón mo wòsò dzəə̀n sá ji kitú kimòʼón.

Joon 17:11 Referans Kwoze

Matio 6:9

Vèn lóo bùnrì, vèn wàa suúy jii: « ‹Tàr wor woó yuv, ku yiì, é wíri wáa ghvəm yír yé,

Ŋgàn 18:10

Nyùy Tàr dzə̀ kirə́ʼ ké kilìr ke tavín kí, wìr wo wù yú Nyùy, léʼ tó fo, wù bòy.

Hibru 9:24

A bó Kristu yòʼ‑oò dù, a yiì və́ə woo ntàŋrí é kirə̀ʼ ke naŋsin wír ji ké Nyùy ke kù dzəə̀n vimfìʼìr ve kirə̀ʼ ké Nyùy ke ru kí. Wù yii və́ə a dzə̀ é yuv, fo wù dzə́ lèn e Nyùy si, lón fo vèsən.

Efesor 4:4

Vèn wáa kuumé ji kintatì ke wìr Nyùy ki kù jòʼsì kitú kimòʼón, a dzə̀ ji wún Kristu. Kiyoy ke Ranén kí jóʼsí sá kimòʼón, a kù dzə̀ sá mo vèsən adzə̀m shiy kifá kimòʼón, a dzə̀ vijuŋ ve Nyùy‑iì liìn vèsən ji á wìy nə̀ə́ sho.

Filipi 2:9

Bìʼ kee shooy, Nyùy kóʼór wun, wù wáa dzə vitú ve ntaʼ, e bùʼ e yír ye yí shaàn yír sidzə̀m,

Joon 17:25

Éè Tàr, kù yii yii wò kinyo kee réŋ, a bó wír veé ndzə fène yòʼ kì wò. Yii bèy, a mò‑oò kìíy ne wò, a wír vém víne kìíy ne rú ji mò‑oò lò ntum a dzə̀ ye.

Joon 13:1

Kishiíy ke á kì bvəə́shi, a yi *Ŋkǎʼ Yáʼayshaà ki nèn ghèén, a Jesus kiíy ne ji sì á ghán se wun sí yìi màʼtì ndzə rə̀n, e kfən fo Tàr wóv wùn. Mo wù kù‑uù sí koŋ wír ve yiì dzəə̀n və́ é ndzə fèn, wù ku nèn a kòŋ bèy, e dù, e mày.

Hibru 1:3

Wù dzə̀ ji kikúv ke wun woo Nyùy, a dzə kinyo kidzə̀m ji Nyùy, njaʼkìr réŋréŋ moo Nyùy. A dzə̀ wun wo wù kér ndzə e dzə̀m e wùn kiwo, súŋnin, bo yì wáa ker vitaáví, a lìm mo yì limè. Nén a dzə wun wo wù‑uù manen vinyo ve wìr veé ndzə ji á fíʼ ran fo áwuné ajay. Wù màysì, e nèn kòʼ é yuv, e dzə̀ʼə̀m e Nyùy woo Taà Vitu ghaŋ.

Joon 16:33

M sùúy ne vinyo e vèn, é vèn fíʼ a tiy e mǒ wùn, é melív men mè wáa dzə nyaáŋ. Vèn dzə́ e ndzə fèn lèn, a ŋgeʼ si kooy ven sinín. Yii bèy, vèn wáa wàrkìr, bìʼ fo m ghaʼan ne vitaáví vé ndzə rə̀n.»

Joon 14:20

Vèn wíy yen mo é kishiíy fóo fèy, é vèn nèn kìíy rú ji dzə̀ vèr Tàr wor, a vèr wun dzə̀ ji kitú kimòʼón, e kfə̀n kiíy jii, kù dzə̀ vèsən, a m dzə̀ e věn meliv.

Ŋwàʼ Jud 1:1

Ŋwàʼ və̀ne sàŋ mo woo Jud wo dzəə̀n ŋgaà lìm Jesus Kristu. A dzə̀ mo woo Jud wo dzəə̀n fər Jeem. A m sàŋ a dzə̀ fo vèn ve Nyùy woo Tàr wòsən‑eè kòŋèn, e lì ji wír və́, e wày e Jesus Kristu kiwo.

1 Joon 5:19

Vèsən kì sá ji vèsən dzə̀ á wón Nyùy, yii bèy, a wír ve dzəə̀n veé ndzə fèn adzə̀me dzə̀ kév e ŋgaà vinyò ve bi ví və̀y kiwo.

Jeem 4:4

Vèn màʼày ne Nyùy, e kfə̀n moo wiíy wo wù ghán viŋkar. Bó vèn yòʼ kì jii, a wìr koò viŋkar wùn à vinyo veé ndzə fèn vi, bo wù sí ban Nyùy bánen a? Kí nén a dzə jii, wìr wo wù koŋ, a dzə ŋkar vinyò veé ndzə fèn, ŋgaàŋ lì ne kitú kfə́ á ji ŋgaà vibàn Nyùy.

Lim Aŋgàa Ntum 3:21

A wù kù wíy a dzə e yuv, e meé e ghan se Nyùy wíy naŋsín vinyo vidzə̀m, é ví kfə́n vifíy mo aŋgàa ntum və́ vee fó ŋgùʼú‑uù tiísi mo wù‑uù suuyì.

Joon 13:3

Jesus wáa dzə, a wù kì kijuŋ ji Tàr wov wày ne vinyo vidzə̀m a dzə̀ e wùn kiwo, a wun‑eè lò fo Nyùy, a wun sí kfə́n a dzə̀ fó,

Aysaya 64:2

Mo və́yí koó e vidaànè, wú wàa ghàŋèn, lóo shwi e sar mendzə̀v, mè tòʼ, bo dzə̀ réŋréŋ mo à ló səy, é vitum vi wáa yàʼ, a fàn wò. Ku wìy, e yiì, áàŋgaà vé vibàné kiíy nsàv ye yír yée dùnìn.

Nsùyrì Nyùy 79:9

Éè Nyùy woo ŋgaà lùŋèr wor, sə́ ver. Ku sə̀ ver, aá wáa burí vikuʼùy vé. Bòyìr ver, e màn ajay vérí, aá wáa ghvəm yír yé.

Ŋgaà Yen 4:8

Vifá vee vikweè vìn vi kér vav ntuùfú ntuùfú, kér sí mbìv sidzə̀m, a ví dzə́, yov e shùy, yov vitsə́ʼ ghán sidzə̀m, e làa yòʼ a siʼím. A ví yov jii: «Nyùy Tàr, wun woo Nyùy woo Ŋgaà Vitaàví Vidzə̀m dzə̀ e ránén. Wù dzə̀ e ránén, wù dzə̀ e ránén. Dzə̀ wun wo wù‑uù siìn, a wù dzə̀ lèn, a wù kù wíy a dzə.»

1 Pita 1:5

Kù wíy a dzə vijuŋ vén, ven ve á wáy shilív e Kristu wùn, a vitaáví vé Nyùy vi shiy ven, e meé e ghan se wù wíy fəə́r dzəʼə̀m yee là may rə̀n e ghan sé bàm sí.

Galatia 3:28

A bó wìr wùmòʼ yòʼ dzə̀ə́ jeéy ji woó Juda kìn wir kitum. A bó wùmòʼ yòʼ dzə̀ə́ ji kwàn, bo wùmòʼ wáa dzə ji wan wòŋ. A bó á yòʼ fə̀m dzəə́ leey wùmòʼ ji lumèn kìn wiíy. Áwune tàtí ne adzə̀m wùn à Jesus Kristu, e nèn a dzə kifá kimòʼón.

1 Korin 1:10

Afə̀r vem, m nén a lòn feyì e Tàr wòsən Jesus Kristu yir jii, vèn ku tàtí, a dzə a shuu e mòʼón, e làa yòʼ jàvsìn, a dzə jeéy jeéy. Vèn kú a sìysì kinyo kén amòʼón, a tiy a dzə̀ e kíwun ki.

Ŋwàʼ woó Rom 12:5

Kù dzə̀ sá réŋréŋ mo vèsən loòn wír anín jeéy jeéy, vèsən à Jesus Kristu tátí, a dzə ji wún e mòʼón, a wìr tóm wír, a wìr tóm wír.

Ŋwàʼ woó Rom 9:17

A dzə̀ mo vé‑eè saŋen é Ŋwàʼ Nyùy ji Nyùy‑iì sùúy e Farao a jii, «M kòʼór wò ji Fon woó Ejiv bèn ji m shaa fo wò e dìn mo vitaáví vém ví dzəə̀n, aá samer yír yém kitú ke nsay kidzə̀m.»

Joon 16:28

Mo mò‑oò loòn fo Tàr wor, e bóo wìy e ndzə fèn, m kfə̀n sí lo fo ndzə fèn, e kfən fo Tàr wór wùn.»

Joon 7:33

Jesus nèn a suúy e wíri jii, «M dzəə́ yìi ndzə̀ytì vèsən fen shishàr, e nèn a kfən fo ŋgaà wo wù‑uù tumen mó wùn,

Matio 10:16

«Vèn wáa kiíy jii, m tsə̀nsí ven é kwaʼ bèn, a vèn du moo njiì wo wù du, e nəə́ e nyám se bi sí wo. Kí nén a dzə jii, vèn lóo ghan, á wàa fiír moo yó si, e kfə̀n a ghan ji weè moo vibìŋ, e làa yòʼ a ŋaʼrí.

Matio 5:48

Kidzə̀m ki wáa dzə jii, vèn wáa yiì vinyo vén tìítiy, é ví wáa ran réŋréŋ mo Tàr won wo wù dzə́ e yuv ráné.»

Esiker 20:44

Wír veé Isray, m wíy lòo geʼ e vèn bìʼ yír yém, e làa yòʼ lovtí e vèn mo njiìn won wo bi dzəə̀n, kìn yii yén kisaŋe, é vèn nèn kìíy ji m dzə̀ á Nyùy Tàr.› Suuy mo woo Nyùy Tàr woo Taà Ndzə.»

Esiker 20:22

M nèn kfə̀n rə̀m ntéŋ, e làa yòʼ màʼ kiwó aáwuné kitu ji m kiŋsin yír yém, fo vitúm ve ví‑iì yenen mo m fəər wír veé Isray fo Ejiv vi wáa jàʼ.

Esiker 20:9

Yii bèy, la m yòʼ dzəə yiì, bìʼ fo mò‑oò kiŋsìn yír yém, fo vitúm ve ví kaarin wír veé Isray vi wáa jàʼ. Vé‑eè lo yèn mo mò‑oò liìn wír veé Isray ji wír vém, e fə̀ə́r áwune fó wòŋ woo Ejiv.

Jeremia 14:21

Bìʼ yír yé ye wiyí, lá à yòʼ màʼày ver. Lá à yòʼ ŋwày kirə́ʼ ké ke kàvàʼ, kirə́ʼ ke kàvàʼ wò wo ghaʼtín tíy fo. Kuúmé *mensaŋ me wò‑oò gwàrìn vèsən mè, e làa yòʼ yaʼáy.

Jeremia 14:7

Éè Nyùy Tàr, fə̀m mo vinyo vér ve bi ví koon ne ver, ku sə̀ ver bìʼ yír yé. Vèr bìn ne ndzə̀m e wò akàŋ aneénín. Vèr jày ne e wò.

Aysaya 27:3

Mo woo Nyùy Tàr, kù dzə̀ mo nshìy woó súm vitiír vən, a wáyri mo mendzə́v shó ghán sidzə̀m. Kù kiŋsìn mo e shùy wùn à vitsə́ʼ, fo wìr nəə́ shó, e ghèʼ.

Ŋgaà Yen 19:12

M yén, a wón sii njaʼkìr fo fo, baári moo kiliímé ke və̀y, a wù sóv ntáráʼ e tom e ntáráʼ. Aá sáŋ yír yímóʼó é wùn wó, a bó wìr yòʼ kì nsàv. Kù kì wun nsàv yìr yee shooy.

Ŋgaà Yen 15:4

Wìr woo là fó a fàn wò, a burí vikuʼùy vé dzə̀ la? Kù jòʼsì wò, wo à dzəə̀n e ránén vèn mòʼón. Vitúm vidzə̀m vi kù wíy a wìy, a gbù a dzə̀ e wò si, bìʼ fo á yén vinyo ve à yii vidzə̀m, a ví du tìítiy.»

Ŋwàʼ Jud 1:24

M nén a way ven a dzə̀ e Nyùy kiwo. Dzə̀ wun wo dzə̀ wù wàa tom ven fo vèn gbu, a yiì, é vèn wìy a tiy e wùn si là shilóm, a yen rán rə́ ye ghaʼáné, a sheʼrí.

1 Joon 3:12

A bó kí yoʼ ghèén ji vèsən wáa yiì moo Keen. Wù‑uù dzə̀ kfə́ wan Satan woo ŋgaà vinyò ve bi ví, e nèn lò, e yùyrí wan yè wov. A yì‑iì yiì ka, bo wù wáa yuyrí fə́r və? Wù‑uù yúyri, bìʼ fo wù‑uù yii kfə́ a dzə̀ vinyo ve bi ví, a fər və yii ve juŋ vi.

Joon 17:6

«Mò‑oò ló a dìn mo wò woo Tàr wor dzəə̀n e wír ve wò‑oò shoʼon fo veé ndzə fèn, e fò ji vémé. Kù‑uù kér wò wír vee shoon, e bóo fo ji vém. A vé‑eè lo yù kinyo ké, e kù nèn lèm.

Joon 17:23

Mo wòsò dzəə̀n kintatì, vèr áwune lóo dzə sa kintatì, aáwune nèn màysì, e tàtí ŋkuuŋkùŋ, a dzə ji kitú kimòʼón, é wír veé ndzə fène yén ji ntum ye mò‑oò loòn dzə̀ rú ye, e kfə̀n yèn sá ji à koŋ wír vìn réŋréŋ mo à koŋ mo.