Joon 15:11 - ŊWÀʼ NYÙY

¹¹ M sùúy ne vinyo vìn e vèn ben, é kishéʼrì ke kí dzəə̀n e mǒ shiliv kí fíʼ a dzə sa e věn meliv, é vèn maysi rú, a ker kishéʼrì.

Joon 15:11 Referans Kwoze

Ŋwàʼ woó Rom 15:13

M nén a lon jii, Nyùy wo vèsən shiy ji wù wíy lùŋèr vèsən və̀n ku yiì, é vèn maysi, e wày shilív e Jesus Kristu wùn, é kishéʼrì ki rún e věn meliv, é mè wáa dzə nyaáŋ. Vèn lóo yiì bèy, é Kiyoy ke Ranén kí kfə́n a tavír melív men, é vèn wáa dzə, a leéy a dzə̀ fó mbìy, a shìy ŋkàʼme Nyùy, é wù luŋer ven.

Joon 17:13

«Mo m sí kfə́n fo wò wùn lèn, m nén a lon vinyo vìn vidzə̀m, a m dzə̀ə́ e ndzə fèn, é kishéʼrì ke m yii kér e mǒ shiliv kí maysi, e rùn sá aáwuné meliv.

Joon 16:24

Kèʼ mo vèsən‑eè dzəə̀n, e meé lèn, vèn yòʼ‑oò yiì ne lòn kifá fo Nyùy e mǒ yir. M nén a suúy e vèn lèn jii, vèn wáa lon rì bèy, é Nyùy wàá fó, é kishéʼrì ki nèn màysì, e rùn e věn meliv.

1 Joon 1:4

M nén a saŋ vinyo vìn fo vèn lèn ji vèn tátí sá bèy, é vèsən wáa sheʼrí a ghán sidzə̀m.

1 Pita 1:8

Lèn və̀n, mo bó vèn yóʼ ne fə̀m yèn Kristu, vèn sí koŋ wun. Vèn kfə́n a way sa shilív é wùn wó, a bó á yòʼ yéné. Vèn nén a dzə, a ker kishéʼrì ke kuʼùn kí, a bó móo fìʼ yòʼ dzə̀,

2 Joon 1:12

Vinyo vi dzə̀ vinín ve kì dzə̀ m sùúy e vèn. Yii bèy, a bó m yòʼ sáŋ a dzə̀ é ŋwàʼ fèn. M leey ji kintóʼ ki fəə́sín, é m wiy, e ghàn á ven. Vèsən lóo dzə fo si, é bo m fer vinyo vee shooy e vèn vidzə̀m. Vèn yú, é vèsən nèn màysì, a sheʼrí.

Joon 16:33

M sùúy ne vinyo e vèn, é vèn fíʼ a tiy e mǒ wùn, é melív men mè wáa dzə nyaáŋ. Vèn dzə́ e ndzə fèn lèn, a ŋgeʼ si kooy ven sinín. Yii bèy, vèn wáa wàrkìr, bìʼ fo m ghaʼan ne vitaáví vé ndzə rə̀n.»

2 Korin 1:24

Vèr kì ji vèn wày shilív e Nyùy wùn kitávín, a bó vèr yòʼ taʼ ji á wiy, a kàn ven kánen é kinyò kímóʼ kí gheéy. Ke vèr koŋ ki dzə̀ jii, a vèr wìy, vèr yiì kinyo a dzə̀ á ke vèn maysi, a sheʼrí sheʼrín.

1 Tesalonika 5:16

Vèn wáa sheʼrí,

Ŋwàʼ Luk 15:32

Yii bèy, a dzə̀ wòsò kù a sheʼrí ké fər wò kìn. Vé‑eè kí ji wù kpù ne, wù wíy, a wù dzə̀ e tin. Wù‑uù lày ne, wòsò kfən yèn lèn.› »

Ŋwàʼ Luk 15:9

Wù yéné, é wù nèn jàŋrì ŋkar sə́ wùn à wír vee wùn gwaaneé jii, ‹Vèn wiy, é vèsən wáa sheʼrí. Mbàm sém sí‑iì lày, m kfən bòŋ.›

Filipi 1:25

Mo kí dzəə̀n rú bey, m nen kìíy feyì ji m dzəə́ wìy dzə̀ʼtì vèsən, a sə ven, é vèn shaa fó mbìy, a way shilív e Jesus Kristu wùn, a ker kishéʼrì.

Efesor 5:18

Lá vèn yòʼ a yu a dzə̀ fó melùʼ me noón mè, bìʼ fo dzə̀ mè kù wày ven a dzə̀ é kinyò ke bi kí. Vèn kú a yu kén a dzə̀ fo Kiyoy ke Ranén kí, é kí rún e věn meliv.

Joon 3:29

Wìr wo wù kooy jín dzə̀ lum jìn. Ŋkar rə lóo tiy fo ghaŋ, lóo yu mo wù yoŋrì, wù wàa sheʼrí sheʼrín. M nén a dzə sa moo ŋkar lum jìn, a sheʼrí lèn feyì.

Ŋwàʼ Luk 15:5

Wù taʼ, yéné, é wù nèn a sheʼrí, e bèʼèy, a dù sho fo laʼ.

Ŋwàʼ Luk 15:23

Vèn kfən dù, e koò wan nàʼ wo faŋèn, e gwàr, é vèsən wáa kfər, a sheʼrí wán və̀n.

Jeremia 32:41

M wíy a ker áwune é shiliv she juŋ shi, a geʼ sho. M wíy tuúy áwune é nsay fèn ŋkuuŋkùŋ, a leéy fo fo shilív shém shidzə̀m, à vitaáví vém ví vidzə̀m.»

Aysaya 53:11

Wù wíy yen ŋgeʼ, yì mayì, lóo yen vijuŋ ve yì wìyìn shó, kiiy nsàv, é shilív sə́ shí neem é nsay. Nyùy Tàr suuy jii, «Rúrú, ŋgaà wom lìm wíy yiì, aá mayir ajay wìr anín, bìʼ fo wun wo wù yòʼ kér jay wíy bèʼèy ajay wìr anín.

Tsəfaniya 3:17

Nyùy Tàr woo Nyùy won dzə̀ e věn mvəm. Wù dzə̀ wir rə̀r wo tavín wo wù luŋèr ven. Wù wíy a sheʼrí ven, wù wíy a kòŋ ven, é melív men mè wáa dzə ji nyaáŋ. Wù wíy a sheʼrí ven, a seŋ, a sàvnìn,

Jeremia 33:9

Ŋkàlaʼ rə̀n wíy a fo mo vijuŋ wùn à kishéʼrì ki, à ghvə́me, é wáa dzə kiŋkoʼòrwùn kém e vitúm ví si. Vitúm vidzə̀m veé kitu ke nsay vi wíy lòo yu vinyo ve juŋ ve m yii e wír vémé, à mo m səəvì ŋkàlaʼ rə̀n, aá wáa fàn, a yàʼ.»

Aysaya 62:4

Wìr yòʼ kfə̀n wíy mvə̀ʼ shuu, e yòŋ ven ji «Ŋkàlaʼ ye á màʼàyìn ne.» Á yòʼ kfə̀n dzəə́ wìy a yòŋ woŋ wón ji «Vifə̀m.» Ké lèn ki, á wíy a yòŋ ven ji «Ŋkàlaʼ ye Nyùy koŋè», a yòŋ woŋ wón ji «Woŋ wo kér Nyùy Tàr.» Á wíy a yòŋ bèy, bìʼ fo Nyùy Tàr sí léŋri ven, kér woŋ wón, kù mo lùmèn keèrí wiíy wo wù wayin é lav.