Joon 14:27 - ŊWÀʼ NYÙY

²⁷ M sí du, a m wíy yiì, é melív men mè siíy a dzə nyaáŋ. Nyaáŋ və̀n dzə̀ wo fó mo, a bó yòʼ dzə̀ moo wo wù lo a dzə̀ fó ndzə fèn. Kí nén a dzə jii, lá vèn yòʼ sìíy, a rə̀m a ntéŋ, é melív men mè wáa buʼ.

Joon 14:27 Referans Kwoze

Filipi 4:7

Vèn lóo yiì bèy, é Nyùy nèn a yiì, é melív men mè wáa dzə nyaáŋ, é wùn à vifií vén ví ku nèn a tiy a dzə̀ e Jesus Kristu wùn. A bó yòʼ dzə̀ wìr kìíy móo fìʼ nyaáŋ wo Nyùy fó və̀n gheéy.

Joon 16:33

M sùúy ne vinyo e vèn, é vèn fíʼ a tiy e mǒ wùn, é melív men mè wáa dzə nyaáŋ. Vèn dzə́ e ndzə fèn lèn, a ŋgeʼ si kooy ven sinín. Yii bèy, vèn wáa wàrkìr, bìʼ fo m ghaʼan ne vitaáví vé ndzə rə̀n.»

Aysaya 41:10

Lá vèn yòʼ a fàn, m dzə̀ vèsən. Lá kindzə́m kí yòʼ a gwàr ven, m dzə̀ Nyùy won. M kù wíy a fo ven vitaáví, a sə ven. M wíy a kìŋsìn ven e vitaáví vém ve ghaʼán ví.

2 Tesalonika 3:16

M nén a shàʼtì ven adzə̀m, a lon jii, wun woo Taàtá wòsən Jesus wo wù fó nyaáŋ kú a yiì, é melív men mè wáa dzə a nyaáŋ, a fə̀m kooy ka. A m kfə̀n lón ji wù kú a dzə a vèn áwune ghán sidzə̀m.

Kolosia 3:15

Vèn lóo sìysì kinyo, melív men mè kù a yu a dzə̀ fo Kristu, é vinyo vén ví fíʼ a dù ji nyaáŋ. A dzə̀ mo Nyùy‑iì liìn ven, e tàtí amòʼón ji á wáa dzə a ji nyaáŋ. Vèn ku nèn a beèrì wun woo Nyùy ghán sidzə̀m.

2 Timoti 1:7

Kú a kuumé ji Kiyoy ke Nyùy bùʼùn vèsən shó ki yòʼ yii, a melív mèsən mè yaʼ yàʼàn. Kí távir tàvírín, kfə̀n yii, a vèsən koŋ wíri, kiiy mo dzə̀ vèsən wàa tiír kiwuú késən, a fìʼ.

Ŋwàʼ woó Rom 15:13

M nén a lon jii, Nyùy wo vèsən shiy ji wù wíy lùŋèr vèsən və̀n ku yiì, é vèn maysi, e wày shilív e Jesus Kristu wùn, é kishéʼrì ki rún e věn meliv, é mè wáa dzə nyaáŋ. Vèn lóo yiì bèy, é Kiyoy ke Ranén kí kfə́n a tavír melív men, é vèn wáa dzə, a leéy a dzə̀ fó mbìy, a shìy ŋkàʼme Nyùy, é wù luŋer ven.

Kintaŋ 6:26

Nyùy Tàr kú a leéy ven, a ŋwàŋkìr, a fo ven nyaáŋ.›

Ŋwàʼ woó Rom 8:6

Wìr wo wù tiir vifií é kinyò ke koŋ mensə́ dzə̀ ji ŋgaàŋ kpù ne fo Nyùy mbìv. Yii bèy, wìr wo wù tiir kfə́ vifií é kinyò ke koŋ Kiyoy ke Nyùy nén a dzə e tin fo Nyùy mbìv, wùn Nyùy wáa dzə ji nyaáŋ.

Jeremia 1:8

Lá à yòʼ a fàn áwune. M yíi a dzə wòsò, a kìŋsìn wò. Suuy mo woo Nyùy Tàr.»

Galatia 1:3

Tàr wòsən Nyùy wùn Taàtá wòsən Jesus Kristu kú a kòŋ ven, a leéy fo vèn, e kfə̀n a yiì, é melív men mè wáa dzə nyaáŋ.

Galatia 5:22

Á bèy, a vinyo ve Kiyoy ke Ranén kí bánri wíri, aá yii vi dzə̀ jii, á koŋ Nyùy, kfə̀n koŋnìnè, kér kishéʼrì aáwuné meliv, dzə́ dzəʼə̀m yee nyaáŋ, kér wir dzə̀m ji weè, shám wíri, yii a dzə̀ kinyo ke dzəə̀n ke ru kí, lóo suúy kinyo, á wàa yiì a dzə̀ kíwun.

Nsùyrì Nyùy 29:11

Kù távir Nyùy Tàr wír və́. Kù səəvì Nyùy Tàr wír və́ e nyaáŋ.

Ŋwàʼ woó Rom 5:1

Mo Nyùy liìn ne vèsən ji wír vee là jay, bìʼ fo vèsən wayin shilív e wun wùn, vèsən áwune nen suùsín, a dzə kijuŋ, a kù yiì Tàr wòsən Jesus Kristu.

Joon 14:1

Jesus kfə́n a suúy e wón və́ lìme jii, «Lá vèn yòʼ a rə̀m, é melív men mè wáa buʼ. Vèn kú a way shilív a dzə̀ e Nyùy wùn, e kfə̀n a way sa e mǒ wùn.

Aysaya 9:6

Kí dzə̀ jii, vèsən kòóy ne wán. Á fò ne vèsən wán lumèn. Wù wíy a saʼ vifon. Á wíy a yòŋ wun jii, Ŋgaà Ntir wo ghaʼán, Nyùy wo kuʼùn, Tàr wo wù gòʼòn kàŋ mòʼón, Wan Fòn woo Ŋgaà Nyaáŋ.

Nsùyrì Nyùy 112:7

Wù yòʼ yii fan fóo yu sáʼka wo bi. Shilív sə́ shí tíy kitávín, a wù yéʼti a dzə̀ e Nyùy Tǎr wùn.

Ŋwàʼ woó Rom 5:10

Kí kfə́n a dzə jii, vèsən‑eè dzə́, yii vinyo ve bi ví, ban Nyùy bánen. Mo wù‑uù yiìn, Wan və kpú, e màn vinyo vee shooy, vèsən wáa dzə ŋkar sə́ lèn, bo dzə̀ vèsən wàa kiíy sa jii, mo Wan və fəən ne fo kpu, a wù kù yíi a dzə sho, bo wù kù wíy yiì sa, é vèsən luŋ, a dzə a vèsən à Nyùy.

Joon 20:21

Wù nèn kfə̀n sùúy aáwune jii, «Nyaáŋ kú a dzə e věn mvəm. M sí túm ven lèn mo Tàr wor‑iì tumen sá mo.»

Nsùyrì Nyùy 56:11

tiir vifií a dzə̀ e wun wùn, e làa yòʼ a fàn. A dzə̀ wìr msòŋ yiì ka e mò?

Nsùyrì Nyùy 91:5

À yòʼ yíi a fàn vifá ve ví ghíʼ wíri vitsə́ʼ, a bó à yòʼ yíi a fàn mvən se sí shaasìn e shùy,

Kolosia 1:20

e fíʼ lì vifá veé ndzə vidzə̀m, é ví kfə́n fo wun woo Nyùy, kìn dzə̀ veé yuv, kìn veé nsay. Wù nèn yiì, Wan və wìy, e cùtì mensə́ mvə, e kpù é kintam, wù mán vinyo veé ndzə, wùn à vifá vidzə̀m vi kfən bòŋnìn.

Ŋwàʼ woó Rom 1:7

M nén a saŋ ŋwàʼ və̀n fo vèn adzə̀m ve á dzəə̀n é Rom, ve Nyùy shavin ne ji və́ vee wír, e wày e wùn shiliv. M wáa shàʼtì ven, a lon jii, Nyùy woo Tàr wòsən wùn Taàtá wòsən Jesus Kristu kú a kòŋ ven, a leéy fo vèn, a yiì, é melív men mè wáa dzə nyaáŋ.

Aysaya 54:13

Mómò woo Nyùy Tàr, m wíy yeʼéy wír ve á dzə́ e wò ŋkàlaʼ adzə̀m. Áwune wíy a dzə dzə́ yee nyaáŋ, a ker kifá kidzə̀m ke á kér shií shó.

Nsùyrì Nyùy 85:10

é vinyo ve Nyùy wùn à wír və́ ví nèn shèmsín, shémsinè, é wù wáa kòŋ áwune, aá wáa tiy e wun wùn. Á kù wíy a yiì vinyo ve ru ví, é wù wáa fo áwune nyaáŋ.

1 Korin 1:3

Vèr nén a shàʼtì ven, a lon jii, Tàr wòsən Nyùy wùn Taàtá wòsən Jesus Kristu kú a leéy fo vèn, a yiì, é melív men mè wáa dzə a nyaáŋ.

Nsùyrì Nyùy 56:3

M lóo dzə, lóo fàn, m kù a tiír vifií a dzə̀ e wò wùn.

Joon 20:19

Yiì lòo dzə e ŋkuùr, a kù dzə̀ə́ kishiíy ké mbìy ki fó ŋgàm foo fèy, wón lìm Jesuse báʼtí é lav yìmòʼ, e fìn shúu lav, bìʼ fo vé‑eè fan vé wòŋe. Jesus nèn bvə̀y, e tìím aáwuné mvəm, e shàʼtì jii, «Nyaáŋ kú a dzə e věn mvəm.»

2 Tesalonika 1:2

A vèr lón ji Tàr wòsən Nyùy wùn Taàtá wòsən Jesus Kristu kú a kòŋ a ven, a leéy fo vèn, a yiì, é melív men mè wáa dzə nyaáŋ.

Lim Aŋgàa Ntum 10:36

Vèn kù‑uù lo yù sá ntum ye Nyùy‑iì tsənsin fo wír veé Israyi ye yì dzəə̀n ji Jesus Kristu‑uù wìy ji wíri fiʼ kòóy nyaáŋ wùn à Nyùy. A Jesus Kristu və̀n dzə̀ Tàr à wíri adzə̀m.

Ŋwàʼ Luk 2:14

«Á wáa burí Nyùy wo wù dzəə̀n é ntoò yùv. Wù fò ne nyaáŋ é nsay fo wír ve wù koŋe adzə̀m.»

Ŋwàʼ Luk 1:79

moo shúy ye yì tó kijàvndzə, yì fò rán e wír ve á kì dzəə̀n é ndzə vitsə̀ʼə́, e nèn lùŋèr vèsən ve á siìn é shùu kpu, e dànèr e dzəə ye yì kér dzəʼə̀m yee nyaáŋ.»

Hibru 13:20

Nyùy wo wù yii, a melív mèsən mè dzə́ nyaáŋ kú a leéy fo vèn. Dzə̀ wun wo wù‑uù fəərin Taàtá wòsən Jesus fo kpu, wù wáa dzə lèn ji Nshìy Njiì wo Kuʼùn, a leéy fo wír Nyùyi adzə̀m. Yì‑iì cùtì wun mensə́ mvə, e bóo way wíri e Nyùy mvə̀m *mensàŋ me bó yòʼ dzə̀ mè wìy mày.

Lim Aŋgàa Ntum 18:9

Wìy lòo dzə vitsə́ʼ vímóʼ ví, vinjeenjèm vi wìy fo Por, wù yú, a Taàtá Jesus suúy e wun jii, «Lá à yòʼ a fàn. Kú a fìʼtì a dzə̀ kinyo kém kí, lá à yòʼ màʼtì.

Matio 10:26

«Kí nén a dzə jii, lá vèn yòʼ a fàn a wíri. Vèn kú a tiisí a dzə̀ ntum yen, a kiíy ji vinyo ve vé‑eè sətin vidzə̀m vi kér fó wìy yensín, é wíri kiíy ve ví‑iì dzəə̀n é kilìr vidzə̀m.

Aysaya 55:12

Rúrú, vèn wíy a lò fo kwaʼ vikwàn é Babilon e kishéʼrì ki. Nyùy wíy a dànèr ven ji nyaáŋ, a kìŋsìn ven. Vèn wíy lòo nəə́ woŋ, áàgwane wáa sèv sèvìn moo wír, a fuŋ yòv, é vicí ví wáa sheʼrí, a kwaʼ wó.

Nsùyrì Nyùy 27:1

Nyùy Tàr dzə̀ kikaʼày kém, a luŋèr wun mo. A dzə̀ m wàa fàn la? Nyùy Tàr dzə̀ kóy wóm wo tavíné. A dzə̀ m kfə̀n a fàn ka?

Ŋgaà Yen 2:10

Vèn wáa kiíy ji ŋgeʼ símóʼ sí kù dzəə́ yiì a koóy a ven. Yii bèy, sí lóo koóy, lá vèn yòʼ a fàn. Satan sí yiì a mùm ven, aá wáa koorí wír ámóʼó fo věn mvəm, a way e sháŋ. A vèn wíy yen ŋgeʼ see shooy bèy, e meé kishiíy e ghvə̀m. M nén a tir ven jii, vèn kú a yu a dzə̀ fo mò, a fə̀m dzə̀ kpú, é m wìy nə̀ŋsí ven e dzəʼə̀m yee là mayi.

Ŋgaà Yen 1:4

Mo woo Joon nén a saŋ ŋwàʼ və̀n fo vèn vee vintatì vee saàmbà ve ví dzəə̀n é wòŋ woo Asia, a shàʼtì ven, a lon jii, Nyùy wo kiyoy kee saàmbàwìr ki tíy e wun shùu kàvàʼ kú a leéy fo vèn, a yiì, é melív men mè wáa dzə nyaáŋ. Dzə̀ wun woo Nyùy wo wù‑uù siìn, a wù dzə̀ lèn, a wù kù wíy a dzə.

Hibru 7:2

Wù səə̀vì bèy, Abraham nèn jàv vifá ve wù kì kuuyin fó shùu rər viy kirə́ʼ e ghvə̀m, e fò kee kimòʼón ki shó, a yír sé taà cù və̀n si din vinyo vibaà. Ké mbìy ki dzə̀ jii, wù dzə̀ fon yiì ye réŋé mo nsàv yìr rə́ yee Melkisedek‑iì dzəə̀n. Vee vibaà jii, wù kfə̀n dzə̀ sáa fon nyaáŋ, bìʼ fo wù dzəə̀n Fon woó Salem, a nsàv Salem dzə̀ ji nyaáŋ.

Joon 20:26

Ŋgàm kúm, a wón lìm Jesuse kfə̀n kì bàʼtí, a dzə e lav, a Tomar dzə̀ sá fo, a shuu se lav si dzə̀ sifinrìn. Yii bèy, Jesus ku sàsìn, e bvə̀y é lav, e tìím aáwuné nsàn, e shàʼtì jii, «Nyaáŋ kú a dzə e věn mvəm.»

Esiker 2:6

«Fo wò wàn wìr msòŋ, lá à yòʼ fàn áwune wún wóo. Lá à yòʼ fàn kinyo ke áwune suuyì. Fə̀m mo kimbìn wùn à vitiír vé njoŋ vi gìmèn wò, aà dzə́ e kitu ke aŋgám, lá à yòʼ fàn kinyo ke áwune suuyì, kìn ji à weey bìʼ dzə́ə ye á leey wò sho. Áwune kù dzə̀ antavkìtu.

Nsùyrì Nyùy 28:3

Lá à yòʼ tàtí mo, e sə̀ŋ ji m kpú vèr à wír ve á méŋ wòo. Áwune dzə̀ aŋgàa yiì ye bií. Á kér kiláyláy ke juŋ ki, bin, kér kwaʼtì ye bií é meliv.

Daniel 4:1

Fòn Nebukadnessar‑iì lò, e tsə̀nsí kisúŋnìn e wír vee wùn sar saʼa adzə̀m, kìn dzə̀ veé kitum kiné kí, kìn veé wòŋ vəneé, kìn á súŋnin a dzə̀ lám gha, a kí‑iì dzə̀ jii: «Nyaáŋ wo wù dzəə̀n e věn mvəm kú a kuy kuyín.

Ŋgàn 3:25

Aá sàsìn, a bemér wò, bo à yòʼ yíi a fàn. Wír ve á méŋ Nyùyi wáa ghiʼ wò e ŋgeʼ si, bo à yòʼ yíi a yàʼ.

Ŋgaà Yen 21:8

Yii bèy, ké wìr ámóʼó kí kù jòʼsì ne kimbiirìn ke və̀y fo və́yí bo, baári moo mekàŋ, a dzə̀ kpú yee akàŋ abaà. A kù dzə̀ áwune adzə̀m ve bó á yòʼ‑oò lo kùr shilív, a tiy e mǒ kinyò, e làa yòʼ a way shilív e mǒ wùn, tíy a dzə̀ é vinyò ve kisaŋ vi. Kìn dzə̀ wír wo wù yúyri wír, kìn ŋgaà kinjàŋ, kìn wo viŋkar, kìn wo wù sénin sə́m, kìn wo wù ghvə́m vifá vímóʼ ví ji Nyùy, e lì aŋgàa kimboʼtì adzə̀m.»

Galatia 6:16

Wír ve á tíy e kinyò fèn adzə̀me dzə̀ ve Nyùy yén ji wír veé Isray vee rú. A m lón ji wù kú a sham áwune, a yiì, é melív mev mè wáa neŋ ji nyaáŋ.

Ŋwàʼ Luk 10:5

Vèn du, nəə e lav ye á nəən shó, vèn tòmbìy shàʼtì jii, ‹Nyaáŋ wáa dzə e lav fèn.›

Sekariya 6:13

Kù dzə̀ wun wo wù wíy bàʼrì lav cù Nyùy Tàr. Wù wíy a dzə fon, a dzə e wun kàvàʼ, a saʼ vifon və́. Taà cù wíy a dzə e və́ə woo kàvàʼ e wun ghaŋ, é wùn wun wáa lìm kintatì.

Aysaya 57:19

M wíy fo nyaáŋ e wìr dzə̀m, à vee kwaʼdáa, à vee fó mentsə̀mé. Rúrú, m wíy fèr áwune.» Kù suuy wun woo Nyùy Tàr.

Nsùyrì Nyùy 72:7

Yii ye juŋe ku tèʼ e wun ghan, é nyaáŋ wáa dzə, e dù, e jòʼsì.

Kolosia 1:2

A vèr sàŋ a dzə̀ fo vèn vee wír Nyùy ve á dzəə̀n é ntèʼ yee Kolosia. Dzə̀ ven ve vèsən tatin ji afə́r é kinyò ke Jesus Kristu, vèn wáa tiy sho kitávín. A m lón ji Nyùy woo Tàr wòsən kú a kòŋ ven, a leéy fo vèn, a yiì, é meliv men mè wáa dzə nyaáŋ.

Ŋwàʼ Luk 12:4

«Ŋkar sem, m nén a suúy e vèn jii, lá vèn yòʼ a fàn wír. A dzə̀ á kù yùyrí ven a dzə̀ fó wùn cáʼcáʼ, a bó yòʼ dzə̀ á kfə̀n yiì kinyo kímóʼ kí.

Aysaya 41:14

Rúrú, rám Jakov, fə̀m mo vèn dzəə̀n là kitar moo kiŋgoóŋgoŋ, ven vee wír veé Isray, lá vèn yòʼ a fàn. Mómò, m wíy a sə ven. Suuy mo woo Nyùy Tàr woo Mfə̀ə́r won, mo woo Ŋgaà wo Ranén woó Isray.

Daniel 6:25

Kee shooy ki shaà, Fòn Darius nèn sàŋ ŋwàʼ fo wìr dzə̀m, kìn dzə̀ wir kitum kìka, kìn woó wòŋ vəné, kìn wù súŋnin a dzə̀ lám gha. Wù sáŋ jii: Nyaáŋ wo wù dzəə̀n e věn mvəm kú a kuy kuyín.

Aysaya 12:2

Rúrú, Nyùy dzə̀ ŋgaà wo wù luŋèr mo. M yíi a yeʼtí a dzə̀ e wun wùn, e làa yòʼ a fàn kifá. Feyì feyì, dzə̀ wun woo Nyùy Tàr wo wù távir mo, a kù dzə̀ wun wo m yov, suyrì. Wù dìn ne rú ji wun dzə̀ á ŋgaà wo wù luŋèr mo.»

Nsùyrì Nyùy 11:1

M lir a dzə̀ e Nyùy Tǎr wùn, a dzə̀ vèn ghàn é le, e bó a suúy e mò jii, «Féŋ é njà shinə̀n, e kòʼ áàgwan.

Ŋwàʼ Jov 34:29

A Nyùy fə̀m dzə́, e làa yòʼ a ghay, a dzə̀ roòmè la wun? A wù bìn ndzə̀m e wíri, a dzə̀ yèn la wun? Yii bèy, kù kér wun wír, a kù kér wun kitúm,

Yòvdìy 3:17

Wù yiì ne, dzəʼə̀m yémé buú nyaáŋ, m láysín mo vijuŋ vi yii dzə́.

Nsùyrì Nyùy 72:2

Ku yiì, é wù wáa saʼ wír vé e dzəə ye juŋ, a tinén nsaʼ aghéʼncey é nsànloŋ.

2 Wòŋ 20:30

Á bèy, woŋ Jehoshafati nèn a ker nyaáŋ, bìʼ fo Nyùy və‑əə̀ foon wun rəsìn mbìv sidzə̀m.