Joon 14:17 - ŊWÀʼ NYÙY

¹⁷ a dzə̀ Kiyoy ke Nyùy ke kí din kinyo ke dzəə̀n ke ru kí. A bó wír ve á kiìn vinyo a dzə̀ veé ndzə fène yòʼ dzə̀ á wàa ker Kiyoy kee shooy, bìʼ fo bó á yòʼ yén vinyo ve wù yii, nèn méŋ wun méŋén. Vèn dzə̀ kén, a vèn kì wun, bìʼ fo wù siìn e věn mvəm, a wù wíy a dzə a dzə̀ e věn meliv.

Joon 14:17 Referans Kwoze

Esiker 36:27

M wíy fo kiyoy kém e vèn, e yiì, é vèn wáa yu sáʼ yém, a tiír kiwuú mo yí dzəə̀n, e bó a yiì kinyo ke m tínen kidzə̀m.

Joon 16:13

Wun woo Kiyoy ke Ranén kí wíy wìy, é wù yii, é vèn kiíy vinyo ve dzəə̀n ve ru ví vidzə̀m, bìʼ fo kù yii din wun kinyo ke dzəə̀n ke ru kí. A bó wù yòʼ wíy a suúy kinyo ji suuy wun. Wù kù wíy a tiisí a dzə̀ kinyo ke wù yú, a fèr ven vinyo ve ví dzəə́ wìy a koóy.

1 Joon 2:27

M sáŋ bèn, a m kì ji Kiyoy ke Ranén kí ke Jesus‑eè foon e vèn kí kù dzə̀ə́ e věn meliv, yéʼey ven, a vèn kiiy vinyo vidzə̀m, la shií yòʼ a dzə wo kfə́n a yeʼéy wír ven. A Kiyoy ke Ranén kí yéʼey ven a dzə̀ kinyo ke ru kí, a bó yòʼ dzə̀ kí bòʼtí ven. Bìʼ bey, m nén a tir ven ji vèn kú a yu a dzə̀ á fo fo, a suusín vèn à Jesus Kristu.

Joon 15:26

«Yii bèy, Ŋgaà Sə wo m suuyì wíy wìy, a wù lò a dzə̀ fo Tàr wor, a dzə̀ Kiyoy kfə́ ke kí yii din kinyo ke dzəə̀n ke ru kí. A wíy lon mo fo Tàr wor, e bóo tum fo vèn. Wù wíy wìy, é wù fiʼti e wíri mo m dzəə̀n,

1 Joon 4:6

Mo vèsən dzəə̀n késən wón Nyùy, wìr dzə̀m wo wù kiìn Nyùy nén a yuurí sa vinyo vesən, a bó wìr wo yòʼ dzəə̀n wan Nyùy yòʼ yuúri. Á nén a kiíy wír wo wù kér Kiyoy ke Nyùy ke kí yii suuy a dzə̀ kinyo ke ru kí, e kfə̀n a kiíy wír wo wù jumrì kfə́ a dzə̀ kimboʼtì.

1 Korin 3:16

Mo vèn seʼnìn bèy, bó vèn yòʼ kì ji vèn dzə̀ lav Nyùy, a Kiyoy ke wun woo Nyùy ki shiiy sho à?

1 Korin 2:14

A bó yòʼ dzə̀ wír wo wù buŋen Kiyoy kee shoon fo wùn shiliv, wù wáa kòŋ fó koóy ambùʼmé ve Kiyoy ke Nyùy ki din vìn. Wù lo kfə́, wù nèn a yen ji vinjeenjèm ve vinyò. A bó yòʼ dzə̀ wù kìíy mo á dzəə̀n, bìʼ fo kù yii Kiyoy ke Nyùy, bo wìr wáa kiíy.

1 Korin 6:19

Bó vèn yòʼ kì ji wún wóné dzə̀ lav ye Kiyoy ke Ranén kí shiiy sho à? Fó Nyùy Kiyoy kfə́ kee shoon, a bó yòʼ kér ven vitú vén, kér wun woo Nyùy ven.

2 Timoti 1:14

Kú a kuumé ji wày á Kiyoy ke Ranén kí ke kí dzəə̀n e vèsə́n meliv lim rə̀n e wò kiwo. Ku nèn a leéy fo fo kijuŋ.

Joon 14:16

A m wíy a lon ji Tàr wor ku fò ven wùmòʼ woo Ŋgaà Sə wo vèn áwune wáa dzə ghán sidzə̀m,

Joon 14:23

Jesus bìnèr jii, «A wìr koŋ mo, wù nèn a lèm kinyo kém, é Tàr wor nèn a kòŋ sa ŋgaàŋ, é vèr Tàr wor wiy, é vèr à ŋgaàŋ wáa dzə.

Aysaya 57:15

Wun woo Taà Vitu, wo viwìr və́ ví yòʼ kér mfìʼ, a wù kù dzə̀ shó ghán sidzə̀m, e dù, e jòʼsì, a yír rəə́ dzə̀ Ŋgaà wo Ranén, wù suuy jii, «M kù yii dzə́ kém é ntoò yùv, e mǒ kirə̀ʼ ke ranén kí, a m kfə̀n dzə́ sa vèr à wír ve á diy bìʼ ajay vév, néŋ e mǒ sii. M yiì bèy ji áwune fíʼ a ker fo á tiir vifií.

1 Joon 3:24

Vèn wáa kiíy jii, wìr wo wù yú sáʼ Nyùy dzə̀ á wo wù tíy kfə́ wùn Nyùy, a Nyùy tíy sa wùn ŋgaàŋ. A kinyo ke kí yii, bo vèsən wáa kiíy rú kijuŋ ji Nyùy tíy vèsən áwune kí dzə̀ Kiyoy kfə́ ke Ranén kí ke wù foon e vèsən.

1 Joon 4:4

Wòn vem, vèn dzə̀ kén wón Nyùy, a vèn shaà ne aŋgàa kimboʼtì vìy, bìʼ fo Kiyoy ke Nyùy ke kí dzəə̀n e věn meliv kí shaàn Satan wo wù ghán e ndzə fèn.

Efesor 3:17

A m kfə̀n lón ji vèn ku màysì, e wày shilív e Jesus Kristu wùn, é wù wáa dzə e věn meliv, é vèn áwune nəə́nín, a kòŋnìn, é vèn wáa tiy kitávín moo kicí ke gháŋé nəən é nsay, kìn moo lav ye á bàʼrìn é kinsə̀ŋ ke tavín kí.

Galatia 4:6

Mo wù liìn vèsən ji wón və́, e nèn tùm Kiyoy ke Wan və və̀n, kí wíy, e nə̀ə́ e vèsə́n meliv, a yiì, vèsən wáa yòŋrì Nyùy ji Tàr, Tàr.

2 Korin 13:5

Vèn ku nèn a sayrí vitú vén, a leéy ji vèn sà kù yòʼ tíy réŋréŋ é kinyò ke vèn‑eè biimen á. Bó vèn yòʼ kì ji Jesus Kristu dzə̀ e věn meliv a? Kù mày cáʼ jii, a vèn bùŋ fó wìr və́, bo wù búŋ fo věn meliv.

Kolosia 1:27

A kù dzə̀ mo wù‑uù sìysìn ji wun wíy yiì, é wír vəə́ kiíy á kinyo ke wù‑uù lìtìn kin, kee ji wun wíy bùʼ vitúm vidzə̀m e vijuŋ ve ghaʼán ví. Mo Jesus Kristu siìn e věn meliv, a dzə̀ vèn kìíy ji vèn wíy nəə́ e wun woo Nyùy mvə̀m vijùŋ veé yuv.

Efesor 2:22

Mo vèn à Jesus Kristu tatin ne, Kiyoy ke Ranén kí nen tàtí sa vèn à wír Nyùyi adzə̀m, wáa dzə lav ye wun woo Nyùy shiiy sho.

Matio 10:20

Vèn wáa kiíy jii, jí se sí wíy a fəə fo věn shuù si yòʼ dzə̀ á sén. Tàr won wíy fo ven Kiyoy kfə́, é wáa suŋnín kíwun fo věn shuù.

Ŋgaà Yen 2:17

«Kí nén a dzə jii, vituʼùr ví dzə̀ vibaà, kímóʼ kí tén fó yu, kímóʼ kí waà yù. Vèn yuúrí ri kinyo kìn ke Kiyoy ke Nyùy ki suuy e vintatì vi. Wìr wo wù wíy so vinyo veé ndzə ye bi fen dzə̀ wo m wíy ŋòʼ vifá ve yi ve ví lo a dzə̀ fo Nyùy, e fo sho, aá kù lìtì vee shooy a dzə̀ é yuv. A m kfə̀n wíy fo ŋgaàŋ *síbaŋ ye fəvírí, aá sáŋ yír rə́ ye fíyi shó, a dzə̀ meŋkfə́m me ŋgaàŋ, a bó yòʼ dzə̀ wìr wùmòʼ kìíy. Kù kiiy wun woo ŋgaà síbaŋ.»

Aysaya 59:21

Nyùy Tàr kfə́n a kàʼ aáwune jii, «Fo kém kí, m wíy gwàr *mensaŋ vèsən jii, Kiyoy kém ke kí dzəə̀n e věn meliv kí kù wíy a dzə vèn áwune, e dù, e jòʼsì, é vèn kú a ruvtí jí sém se m yeʼeyin ven shó. Wón véné yòʼ wíy a yàr fó a ruvtí, à wón won véné shó. Á yòʼ wíy a yàr fó a rə̀tì sho, e kèʼ fo lèn, e dù, e jòʼsì.»

Ŋgàn 14:10

Kù kiiy wír mo nyár rəə́ koó, à mo vijuŋ və́ ví koó, a bó yòʼ dzə̀ tókíshwáŋ, wù kìíy.

1 Joon 5:7

Vifá vi nén a dzə vitaár ve ví din ji Jesus‑eè ló a dzə e nsay fèn,

2 Korin 6:16

A bó yòʼ dzə̀ sá, á lì lav Nyùy, e bìnèr ji ye anyùy kisaŋe. A dzə̀ vèsən vin ve dzəə̀n lav wun woo Nyùy réŋréŋ mo wù‑uù suuyin jii: «M wíy a dzə e wír vémé mvəm, a ghan vèr áwune. M wíy a dzə Nyùy wov, aáwune wáa dzə wír vém.»

1 Korin 14:15

Mo kí dzəə̀n ben, bo m yíi yèe le? M yíi lò, é m maʼti, é shilív shém shí wáa bùnrì mo Kiyoy ke Nyùy ki bánri mo. M lo sa, é m bunri fo mǒ vifii. M lo, é m maʼti, é shilív shém shí yov luŋ, yií lo, é m yov sá fo mǒ vifii.

Joon 6:40

A Tàr wor sìysì ne ji wìr dzə̀m wo wù wiy, yén Wán və, wáy shilív é wùn wó wáa ker dzəʼə̀m yee là may. A kí dzə̀ jii, m wíy fəə́r ŋgaàŋ fo kpu e ghan sé bàm sí.»