Joon 10:28 - ŊWÀʼ NYÙY

²⁸ a m fó dzəʼə̀m yee là may aáwune. A bó yòʼ dzə̀ áwune dzəə nə̀ə́ e lòn, a bó yòʼ dzə̀ wìr faàsì áwune fo mǒ kiwo gheéy.

Joon 10:28 Referans Kwoze

Joon 6:37

A wír ve Tàr wor foon ji vém adzə̀me kù wíy a tàʼ mo, a wìy, a yen, a bó m yòʼ wíy jùm wo mòʼón gheéy.

Hibru 7:25

Wù nèn a dzə mo dzə̀ wù lùŋèr wír ve á bee wun, e bó a koʼtí e Nyùy si. A wù luŋèr áwune ŋkuuŋkùŋ, bìʼ fo wù dzəə̀n shó ghán sidzə̀m, tíy e Nyùy si, lón bìʼ áwune.

Ŋwàʼ woó Rom 8:29

Wù‑uù sìysì jii, wír ve wù‑uù yiìn ne kìíy ji wun wíy lì adzə̀me wíy a bìnkìr, a dzə moo Wán və, é wun woo Kristu nèn kòóy afə́r anín, a dzə ji wo mbìy.

Joon 18:9

A wù suuy bèy ji kinyo ke wù kì suuyin kí fiʼ ghèén. A wù kì sùúy e Nyùy jii, «M yoʼ lày wír e mòʼón fo ve wò‑oò foon e mòó.»

Filipi 1:6

A m kì kijuŋ jii, Nyùy wo wù‑uù kèʼèn lim rə́ ye juŋe e věn meliv kù wíy a yiì, é vèn wáa dzə wír və́ ŋkuuŋkùŋ, e màysì e kishiíy ke Jesus Kristu wíy kfən, e maàr kinyo kee shooy.

Aysaya 54:17

Aá fə̀m fèr vifá ve rər é le, e ghìʼ ven shó, bo bó yòʼ dzə̀ á tòn ven. Wìr wíy tiír ven é kibàʼ ke nsaʼ, é vèn ku sò wun soón. Vèn wíy yu fó a yiì vinyo vìn, bìʼ fo dzəə̀n vitsə́ʼ ve m lèmèn áàŋgàa lìm vémé, a kfə̀n dzə̀ dzə́ə ye m din ji vé lìm vémé tíy sho réŋ. Suuy mo woo Nyùy Tàr.»

1 Joon 2:25

Vèn wáa kuumé ji yì‑iì kàʼ Wan Nyùy və̀n ji wun wíy fo vèsən dzəʼə̀m yee là may.

Joon 4:14

Yii bèy, a bó kilòŋ kí yòʼ dzəə́ wìy yum wír wo wù nó mendzə́v a dzə̀ me foon mo. Mee shooy mè wíy a dzə e ŋgaàŋ wùn ji ntoò ndzə̀v ye yì fəə́ ghán sidzə̀m, fó wun dzəʼə̀m yee là may.»

Ŋwàʼ woó Rom 8:1

Kí nén a dzə jii, wìr wo wù tatin wùn Jesus Kristu bòy ne a fo lǒn vinyò ve bi ví.

Ŋwàʼ Jud 1:24

M nén a way ven a dzə̀ e Nyùy kiwo. Dzə̀ wun wo dzə̀ wù wàa tom ven fo vèn gbu, a yiì, é vèn wìy a tiy e wùn si là shilóm, a yen rán rə́ ye ghaʼáné, a sheʼrí.

Joon 17:2

Wò‑oò tàtí ne wír adzə̀m ji á wáa yu a dzə̀ fo mò woo Wán, é m wáa fo dzəʼə̀m yee là may a dzə̀ e vee shooy ve à shoʼon, e fò ji vémé.

Joon 5:24

«Vèn wáa kiíy rúrú jii, wìr wo wù yú kinyo ke suuy mo, wáy shilív e ŋgaà wo wù tumen mó wùn, sí kér dzəʼə̀m yee là may. Ŋgaàŋ yòʼ dzəə́ wìy nəə́ e nsaʼ. Wù bòy ne fo kpu, e nə̀ə́ e dzə̀ʼə̀m yee là may.

1 Joon 2:19

A wír vìne kù fəə́kir a dzə̀ fo vèsə́n mvəm. A bó yòʼ‑oò dzə̀ wír vee vèsə́n mvəm. A yì‑iì dzə̀ vee vèsə́n ŋgoo rú, bo bó á yoʼ kfə̀n fəə̀kír. Mo á fəəkin, kí nen dìn kiránén ji bó á yòʼ‑oò lo tàtí a vèsən.

1 Joon 5:11

A kisəəm ke Nyùy‑iì dìnèn e Wan və́ kitu kìn ki dzə̀ dzəʼə̀m yee là may ye wù‑uù foon e vèsən, a yí lo a dzə̀ fo Wan və.

Ŋwàʼ Jud 1:21

Vèn wáy vifií vén ví cáʼ ji vèn kú a yu a dzə̀ á fo Nyùy, é wù maysi, a kòŋ ven. Vèn wáa shìy ji nyaáŋ, é Taàtá wòsən Jesus Kristu wìy kfə̀n, e shàm ven, e lì, e wày é dzə̀ʼə̀m yee là may.

1 Pita 1:5

Kù wíy a dzə vijuŋ vén, ven ve á wáy shilív e Kristu wùn, a vitaáví vé Nyùy vi shiy ven, e meé e ghan se wù wíy fəə́r dzəʼə̀m yee là may rə̀n e ghan sé bàm sí.

Nsùyrì Nyùy 37:28

Nyùy Tàr yii koŋ kinyo kee là kiloʼ. Wù yòʼ wíy màʼày wír ve á tíy e wun kinyò. Wù kù wíy a kìŋsìn áwune kíŋsin, e dù, e jòʼsì. Ké wìr ve á méŋ wun, á wíy laàr laàrìn fó wòŋ.

Remrí 33:3

Rúrú, Nyùy Tàr koŋ wír və́. Wù kiŋsìn wír və́ adzə̀m, áwune vee wír vee jeéyí. Bìʼ bey, áwune nén a tsəm e wun si, wìr wáa yuurí ntir se wù fó.

Aysaya 45:17

Yii bèy, Nyùy Tàr wíy lùŋèr ven vee wír veé Isray, a luŋèr ye wù wíy lùŋèr vené kù wíy a tiy fo, e dù, e jòʼsì. E wìy dù, e mày, vèn yòʼ wíy a woomé, a bó vèn yòʼ wíy a tùʼtìn.

Joon 11:25

Jesus bìnèr jii, «Dzə̀ mo wo m fəər wíri fó kpu, fó áwune dzəʼə̀m yee là may. Wìr wo wù wáy shilív e mǒ wùn, a wù fə̀m kpù, bo wù wíy lùŋ, a dzə sho,

Jeremia 31:3

Nyùy Tàr‑iì dìn kitú kfə́ e vèr é yàŋgùʼ, e yòŋ jii: «Koŋ ye m koŋ vené yòʼ wíy mày, m kù wíy a kòŋ ven ghán sidzə̀m.

Ŋwàʼ Jud 1:1

Ŋwàʼ və̀ne sàŋ mo woo Jud wo dzəə̀n ŋgaà lìm Jesus Kristu. A dzə̀ mo woo Jud wo dzəə̀n fər Jeem. A m sàŋ a dzə̀ fo vèn ve Nyùy woo Tàr wòsən‑eè kòŋèn, e lì ji wír və́, e wày e Jesus Kristu kiwo.

Ŋgàn 24:16

A wìr wo wù yú Nyùy fə̀m gbù, e dù meé e le, bo wù kù yíi nànèn, a wír ve á méŋ Nyùyi dzə̀ kév, a ŋgeʼ yíi màʼ áwune máʼan.

2 Tesalonika 2:13

Yii bèy, afə̀r ver, vèn dzə̀ kén, a dzə̀ vèr kù a beèrì Nyùy bìʼ ven ghán sidzə̀m, ven ve Taàtá wòsən Jesus kòŋèn é ŋàŋ. Vèr beerì wun woo Nyùy, bìʼ fo wù‑uù shoʼon ne ven fó kèʼ ji vèn wìy lùŋ. A vèn lùŋ a dzə̀ mo Kiyoy kfə́ kí‑iì shavin ven ji vee jeéy, vèn kfən yù kinyo ke Nyùy ke ru kí, e wày shilív shó.

Joon 3:36

Wìr wo wù wáy shilív e Wàn Nyùy wùn sí kér dzəʼə̀m yee là may. Wìr wo bó wù yòʼ yú kinyo kfə́ yòʼ wíy a ker dzəʼə̀m yee shooy gheéy. Lǒn Nyùyi kù gòʼ ne e ŋgaàŋ kitu ghán sidzə̀m.

2 Timoti 1:12

M nén a yen ŋgeʼ e sháŋ lèn a dzə̀ bìʼ lim yee shooy. A bó yòʼ dzə̀ m wàa fàn ji yí lày ne a kisáŋ, bìʼ fo m kiìn mo wun woo Kristu wo m wayin shilív é wùn wó dzəə̀n. M kì féyì ji dzə̀ wù kù wìy a leéy a fo kinyò ke Nyùy wayin e mǒ kiwo, é kí wáa dù fo mbìy, e meé e kishiíy kee shó ke wù wíy kfən.

Ŋwàʼ woó Rom 5:21

Kidzə̀m ki nén a dzə jii, mo kinyo ke bi kí yiìn ne, a wíri kù kér fó a kpu, dzə̀ sá mo Nyùy koŋ wíri lèn, li áwune ji wír vee là jay, aá nəə e dzə̀ʼə̀m yee là may. A wù li a dzə̀ wír ve á wáy shilív e Tàr wòsən Jesus Kristu wùn.

Ŋwàʼ Jov 17:9

Yii bèy, wìr wo wù yúnin Nyùy kù yòʼ wíy a tiy a dzə̀ e wun mbòv, é wo wù yòʼ wáy kiwó e kinyò ke bi kí wáa kuy kuyín e wun liì.

1 Timoti 1:16

Jesus Kristu nèn shàm mo woo fon aŋgàa vinyò ve bi ví və̀n ji wun fíʼ dìn a mo wun yii kfə́men ji weè, shiyì, é wíri fíʼ a yen, a way shilív sá e wun wùn, e wìy nəə́ e dzə̀ʼə̀m yee là may.

Ŋwàʼ woó Rom 6:23

Vinyo vìn vidzə̀m vi nén a dzə jii, vilaʼày vé vinyò ve bi ví kù dzə̀ á kpú yee ŋkuuŋkùŋ. A ke Nyùy buʼ wír sho búʼun ji fómo woo kisáŋ ki dzə̀ dzəʼə̀m yee là may, ye ŋgaàŋ kooyin bìʼ fo wù tatin wùn Tàr wòsən Jesus Kristu.

Ŋwàʼ woó Rom 5:17

Mo jay wo wìr mòʼón‑eè jayin yiìn ne, kpúu raár wir dzə̀m, bo kinyo ke wùmòʼ woo wír wo dzəə̀n Jesus Kristu yiìn kí yii kinyo e shaà kee shooy feyì. Kí yii ji wír ve Nyùy buʼ e mbùʼmé nyanyày kisáŋ, li liìn ji wír vee là jay adzə̀me wáa dzə, a yu a dzə̀ fo Jesus Kristu, a ghaʼ vinyo ve bi ví.

Ŋwàʼ woó Rom 5:2

Ku kfə̀n yiì wun, vèsən wáa dzə lèn, a koʼtí e Nyùy wo wù‑uù bùʼùn vèsə́n si, a leéy a dzə̀ fó mbìy, a sheʼrí ghán se vèsən à Nyùy wíy a dzə, é wù yii, é vèsən wáa dzə moo wun.

Lim Aŋgàa Ntum 7:59

Á wáa tsəmrí, wù wáa bùnrì jii, «Tàr wor Jesus, ku lì kiyoy kém kí é yuv.»

Joon 14:19

Bèr shishàr, é la wír veé ndzə fèn vìne yòʼ dzə́ə a yen mo. Yii bèy, a vèn kfə̀n wíy yen. Mo m dzə́ sho ghán sidzə̀m, vèn wíy a dzə sa bìʼ mo.

Joon 6:47

A m suuy e vèn rúrú jii, wìr wo wù wáy shilív e mǒ wùn sí kér dzəʼə̀m yee là may.

Joon 6:27

Lá vèn yòʼ a way vifií é vifa ve yi ve wìr yí, bo wù kù dzəə́ wìy kpu. Vèn wáa way vifií a dzə̀ é vifa ve yi ve ví fó dzəʼə̀m yee là may. Kù fó ŋgaà wo yírí dzəə̀n *Wanwìr vee shooy vee vifá ve yi, bìʼ fo Nyùy Tàr wayin kisəə́y ké lìm yee shooy a dzə̀ e wùn kiwo.»

Jeremia 32:40

M wíy gwàr *mensaŋ vèr áwune, a dzə̀ me mè kù wíy a tiy fo ghán sidzə̀m. Bó m yòʼ dzəə́ wìy yàr fó a yiì kijuŋ aáwune. M wíy yiì, é melív mev mè wáa tiy e mǒ wùn, aá wáa ghvəm mo, e làa yòʼ dzə́ə wìy bìn ndzə̀m e mò.

1 Samuel 2:9

Wù kù wíy a géʼsin e dzəʼə̀m wìr ve á yú wune, a wír ve á buʼtì vinyóo wíy lày e wòŋ aŋkfə. Bó yòʼ dzə̀ wìr sò ndzə ji vitaáví.

Ŋwàʼ woó Rom 5:9

A wù lì ne vèsən lèn ji wír vee là jay, bìʼ fo Kristu‑uù foon kitú kfə́, e kpù fo vèsən. Vèsən nén a kiíy sa jii, mo Kristu‑uù yiìn kee shooy, bo wù kù wíy tin vèsən sáa fo ŋgeʼ ye Nyùy wíy màʼ e wírí kitu bìʼ vinyo vév ve bi ví.

Joon 6:68

Simon Pita nèn bìnèr jii, «Tàr, vèr kfə̀n du, e yen a dzə̀ la? Kù jòʼsì wò wo à kér jí se sí fó dzəʼə̀m yee là may.

Ŋwàʼ Luk 23:46

Jesus kú a ker e kintam, e yiì lò, e tòŋ kitávín jii, «Tàr wor, m wày kiyoy kém a dzə̀ e wò kiwo.» Wù suúy bey, e nèn shèm.

Jeremia 31:34

Bó wìr yòʼ dzəə́ wìy a yeʼéy wír woo wun ghaŋ, kìn ji fə̀r wáa tir fə́r ji wù kiíy Nyùy Tàr. Áwune wíy kiíy mo wír adzə̀m, à wìr wo kuʼùn, à woo fó tèr. M wíy làysìn ajay vév, e làa yòʼ dzə́ə a kuumé vinyo vév ve bi ví gheéy. Suuy mo woo Nyùy Tàr.»

Ŋgàn 4:18

Liì wìr wo wù yúnin Nyùy dzə̀ moo ndzə ye yì ráné, yì kù a ran, a dù duùn fó mbìy, a kàʼày wíri.

Nsùyrì Nyùy 31:5

Nyùy Tàr, Nyùy woo ŋgaà suuyrú, m sí wáy kiyoy kém e wò kiwo, a m kì ji à wíy bòyìr mo.

Maak 13:22

Vèn wáa kiíy jii, wíri wíy fəə anín, a boʼtí ji áwune dzə̀ Mfə̀ə́r, kìn ji *ŋgaà ntum Nyùy wùmòʼ, a yiì vinyo ji ví fíʼ a dìn vitaáví vé Nyùy, e kfə̀n a yiì viŋgaʼnìn ve vinyò vímóʼ ví ji á fíʼ boʼtí wíri, bo taaka ve Nyùy‑iì shoʼtin ne ji və́, aá jáy dzə́ə.

Aysaya 55:3

Éè wìr vem, vèn yuúrí kijuŋ, vèn wiy, e yèn mo. Vèn wiy fo mǒ wùn, e fíʼ wìy bonén, e shiíy. A vèn yiì bèy, bo m wíy gwàr *mensaŋ vèsən, mensaŋ, a mè wíy a tiy fo, e dù, e jòʼsì. Dzə̀ koŋ ye ruú, a dzə̀ yíwun ye mò‑oò kàʼàn Davir sho, e kfə̀n lìʼ.

Aysaya 27:3

Mo woo Nyùy Tàr, kù dzə̀ mo nshìy woó súm vitiír vən, a wáyri mo mendzə́v shó ghán sidzə̀m. Kù kiŋsìn mo e shùy wùn à vitsə́ʼ, fo wìr nəə́ shó, e ghèʼ.

Jeremia 23:4

M wíy shoʼ anshìy ve á wáa leéy áwune. Áwune yòʼ dzəə́ wìy a fàn, kìn ji á wáa yàʼ, a bó wìr yòʼ dzəə́ wìy lày fo áwuné mvəm. Suuy mo woo Nyùy Tàr.

Joon 10:29

Tàr wor wo wù wayin áwune e mǒ kiwo shaà wir dzə̀m, a bó wìr yòʼ dzə̀ shó wo dzə̀ wù faàsì kifá fo Tàr wór kiwo,

1 Joon 1:2

Á mo Nyùy‑iì yiìn, é bo wíri yén dzəʼə̀m yee là may. Mo vèr yenen wun wo wù fó dzəʼə̀m yee shoon, e nèn a fìʼtì e wíri. Ku nèn a dzə kíwun ke m fer e vèn lèn. A ŋgaà dzə̀ʼə̀m woo shooy‑iì dzə́ a dzə̀ wùn Nyùy woo Tàr wòsən. Ghán sí wìy ghèén, Nyùy dìn wun e vèr.