Joon 1:51 - ŊWÀʼ NYÙY

⁵¹ Wù nèn kfə̀n sùúy sho jii, «Vèn wáa kiíy rúrú ji vèn wíy yen, a yúví mvə́ʼə́m, a nshèelav se Nyùy si sə́y, kfə̀n kóʼó, aá wiy, e yen a dzə̀ ŋgaà wo yírí dzəə̀n Wanwìr.»

Joon 1:51 Referans Kwoze

Kèʼlo 28:12

Njèm nèn shì wun, wù yén, a kiráŋ ki ló fó nsay, e kòʼ, e tàŋ yúv, a nsheèlav se Nyùy si kóʼ, kfə̀n sə́y e ntuŋ se kiraŋ fèy.

Lim Aŋgàa Ntum 7:56

Tefan nèn sàsìn jii, «Vèn leéy, e yèn, m yén yúv e rə́, a ŋgaà wo yírí dzəə̀n *Wanwìr tíy e Nyùy koy yìyí.»

Ŋwàʼ Luk 22:43

Wù bùnrì bèy, nshìylav Nyùy sə́ʼə́y fó yuv, a tavír wun.

Ŋwàʼ Luk 2:13

Áwune lòo sìn, e yèn, a nshìylav Nyùy rə̀y sì fó wùn à símóʼ sí é ŋkfə̀n, a sí suyrì Nyùy, yov jii:

Maak 14:62

Jesus bìnèr jii, «Dzə̀ mo woo shó. A ghán sí wíy gheén, é vèn yén ŋgaà wo yírí dzəə̀n *Wanwìr və̀n, a wù sí dzə́ e Nyùy woo Ŋgaà Vitaàví koy yìyí. Aá kfə̀n wíy yen, a wù wiy e mvə̀m mbàʼ.»

Maak 1:10

Jesus lòo fəə fo ndzəv, e kù nèn yèn, a shúu yuví mvə́ʼə́m, Kiyoy ke Nyùy ki sə́ʼə́y fó fo e njà kibìŋ, e tìím e wùn kitu.

Matio 3:16

e wày wun e ndzəv. Kù mo Jesus fəə́ fo ndzəv, shúu yuví mvə̀ʼə̀m, wù yén, a Kiyoy ke Nyùy ki sə́ʼəy fo fo e njà kibìŋ. Kí wìy, e dzə̀ʼə̀m e wùn kitu.

Esiker 1:1

Yì‑iì dzə̀ é kishiíy kee tàn, e ŋwee woo kweè, a m sí du kiyá mtaár, shúu yuví mvə̀ʼə̀m, m yén Nyùy e njà kinjeenjèm. Kù‑uù yèn mo woo taà cù Esiker woo wan Busi kinyo kìn, a m dzə̀ é ŋgoo wìr veé Juda ve vé‑eè koorin fó Jerusalem, e dù sho e Babilon, e lèm e ghaa ndzəv yee Kebar. Ghán sin si‑iì dzə̀, a Fòn Jehoyiacin dzə́ʼə́m ne e kwaʼ nsàm viyá vitàn. Nyùy Tàr nèn lò, a suŋnín e mò, vitaáví və́ ví nəə́ e mǒ wùn, m yú.

Lim Aŋgàa Ntum 10:11

Wù yén, a shúu yuví mvə́ʼə́m, kifá ki wáa səʼə́y fo fo, a kí dzə̀ moo kintsə̀m ké ndzə̀y kikuʼùn, aá ghár buú sikweè.

Ŋwàʼ Luk 3:21

Yì‑iì dzə̀, é bo á wìy a koo Joon, wù wáy wíri é ndzəv é kishiíy kímóʼ kí, á mày, Jesus nèn wìy, wù wáy sá wun. Wù fəə́, e lòo bùnrì, shúu yuví mvə̀ʼə̀m,

Matio 4:11

Satan nèn màʼtì Jesus, e lò. Nshèelav se Nyùy si siíy, e wìy, a leéy fo wun.

Ŋgaà Yen 19:11

M kfən yèn kinyo kímóʼ kí, a shúu yuví tíy e rə́, a nyàmŋkoʼ tíy fo e fə́vír. A wìr dzə́ e kitu wo, aá yoŋ yír ji Suuyrú, kfə̀n yoŋ ji Làkìloʼ. A dzə̀ jii, jay yòʼ yii dzə́ e wùn kinyò ke wù yii, kìn wù tínen a dzə̀ nsaʼ, kìn wù maʼ a dzə̀ rə́r.

Ŋgaà Yen 4:1

Mo vinyo ve m yenen viy vi shaàn, m nèn kfə̀n yèn kímóʼ kí, a shúu yuví tíy e rə́. M kfən yù jí ye yì kì súŋnin e mò fó mbìy mo á tòŋ a dzə̀ sóŋ rə̀y, a yì suuy jii, «Kóʼtí fó mentsə̀m, é m din wò vinyo ve ví kér fó wìy koóy e ghan sé bàm sí.»

2 Tesalonika 1:7

Fo vèsən, wíy lòo dzə e kishiíy ke Taàtá wòsən Jesus wíy sàsìn, e bvəy fo yuv wùn à nshèelav sə́ se kuʼkìn sí, é Nyùy nèn fə̀ə́r vèsən fəə́rín fó ŋgeʼ foo fèy.

Ŋwàʼ Luk 2:9

Nshìylav Nyùy Tàr nèn sàsìn, e bvə̀y aáwuné si, rán Nyùyi bán fo áwune‑eè dzəə̀n, áwune wáa fàn.

Hibru 1:14

Ké nshèelav se Nyùy ki nén a dzə ji ka? Áwune dzə̀ kév viyoy ve ví lim fo Nyùy, a wù túm áwune, aá ghán, sə́ wír ve á kù‑uù wíy lùŋ.

1 Timoti 3:16

A dzə̀ vèsən wàa binsí ji kinyo ke toʼon Nyùy, é bo vèsən kiíy mo dzə̀ á ghvə̀m wun kìn kí dzə̀ rú kinəə́nén. A kí dzə̀ jii: Kristu‑uù wìy, e lì mbom wìr, Kiyoy ke Ranén kí bínsí wun, nshèelav se Nyùy si kfən yèn wun. Á wáa fìʼtì woŋ sidzə̀m mo wù dzəə̀n, wíri wáa way shilív é wùn wó virə́ʼ vidzə̀m. Nyùy kfən lì wun, e kòʼór e wùn ghaŋ.

Joon 10:1

Jesus kfən sùúy jii, «Vèn wáa kiíy rúrú jii, wìr wo wù shaa shúu kày njiì, du, kóʼ a dzə̀ fó bàm, ŋgaàŋ dzə̀ shóŋ, a wù wiy a dzə̀ kimfaàsì.

Ŋwàʼ Luk 22:69

Yii bèy, kèʼ fo lèn, Nyùy woo Ŋgaà Vitaàví Vidzə̀m sí yiì dzə̀ʼə̀r ŋgaà wo yírí dzəə̀n *Wanwìr və̀n e wùn koy yìyí.»

Matio 25:31

Jesus kfən sùúy jii, «Ŋgaà wo yírí dzəə̀n *Wanwìr wíy lòo kfən, a wù sí kér vikuʼùy və́ veé yuv, a sí wiy wùn à nshèelav se Nyùy si sidzə̀m, é wù nèn kòʼ é kàvàʼ wo Nyùy dzə̀ʼə̀rìn wun sho.

Ŋwàʼ Jud 1:14

Enok wo wù‑uù ràmèn fo Adam ji lav saàmbà‑aà ló a suŋnín kùm wír vìn, a taŋ mo Nyùy wíy lovtí aáwune. Wù‑uù suuy jii, «Vèn yén, Nyùy wíy wìy wùn à nshèelav sə́ sí, ansə̀kì ansə̀kì,

2 Tesalonika 1:9

Aáwune nèn nə̀ə́ e ŋgeʼ yee là may e kishiíy fóo fèy, a bó yòʼ dzə̀ áwune shòv Taàtá Jesus e si e ghan se wù wíy a saʼ vifon və́, a ker vikuʼùy ve ghaʼán ví.

Joon 14:12

A m suuy e vèn rúrú jii, wìr wo wù wáy shilív e mǒ wùn, dzə̀ wù wàa yiì sa vinyo ve m yii vìn. A wù kù wíy a yiì, e shaà bèy, bìʼ fo m du fo Tàr wór wùn.

Joon 6:47

A m suuy e vèn rúrú jii, wìr wo wù wáy shilív e mǒ wùn sí kér dzəʼə̀m yee là may.

Ŋwàʼ Luk 24:4

e nèn jàáy, a tiy fo. Á lòo sìn, a wíri tíy aáwuné ghaŋ abaà, aá máʼ ndzə̀y, a sí bán, njaʼkìrì.

Matio 26:24

A m suuy jii, ŋgaà wo yírí dzəə̀n Wanwìr və̀n sí yìi dù mo Ŋwàʼ Nyùyi suuyì. Yii bèy, a lòné dzə̀ wó wìr woo shó wo wù yíi fo mo áàŋgaà vém vibàné ji á yúyrí. Kí bòŋ ji bo bó á yòʼ‑oò lo dzə̀ə́ ŋgaàŋ.»

Joon 21:18

A m suuy e wò rúrú jii, «Wò‑oò dzə́ wánlè nsùm, wóvti ndzə̀y sé, à wàa dù fo à kòŋèn. Yii bèy, à wíy dzə̀n, áà wáa ràmsì kóy, é wìr wo sən wáa kur, a lì wò, a dù sho fo bó à yòʼ koŋè.»

Joon 8:51

«Vèn wáa kiíy rúrú jii, a wìr yú kinyo kém, yii mo kí dzəə̀n, la ŋgaàŋ yòʼ dzəə wìy kpù.»

Joon 6:32

Jesus bìnèr jii, «Vèn wáa kiíy rúrú ji bó yòʼ‑oò fó Mooser ven vifá ve yi ve ví‑iì lo fo yuv. Kù dzə̀ Tàr wor wo wù fó ven vifá ve yi ve dzəə̀n rú veé yuv.

Joon 3:5

Jesus bìnèr jii, «Kinyo ke m suuy kìn ki dzə̀ ke ru kí. Aá dzə̀ là fó dzəə́ wír fo mendzə̀v, é Kiyoy ke Nyùy ki kfən dzə̀ə́ ŋgaàŋ, bo bó yòʼ dzə̀ ŋgaàŋ nə̀ə́ e Nyùy mvə̀m saʼ.

Joon 16:20

M suuy e vèn rúrú jii, vèn wíy siíy, a dìy, a sòv vitú, é wír veé ndzə fène wáa sheʼrí kév sheʼrín. Yii bèy, fo bàm, é nsòvkìtu won kfə́n é kisheʼrì.

Joon 13:16

Vèn wáa kiíy rúrú jii, bó wan lìm yòʼ dzə̀ wù shaà tàr wov lìm. A bó yòʼ dzə̀ wír wo á tumen túmén shaà sá wír wo wù tumen wun.

Joon 10:7

Wù nèn a suúy jii, «Vèn wáa kiíy rúrú jii, dzə̀ mo shúu kày wo njiì shaa sho.

Joon 6:53

Jesus suúy jii, «Vèn wáa kiíy rúrú jii, a vèn dzə̀ là fóo yi wún ŋgaà wo yírí dzəə̀n *Wanwìr, e kfə̀n no sa mensə́ mvə, bo bó á yòʼ kér a dzəʼə̀m gheéy shishàr.

Joon 5:27

Wù kfən fò vitaáví shó ji wáa tinén wun woo Wán nsaʼ wìr dzə̀m, bìʼ fo dzəə̀n wun wo yírí dzəə̀n *Wanwìr.

Joon 5:19

Jesus nèn lò, a suúy aáwune jii, «Vèn wáa kiíy rú ji bó yòʼ dzə̀ Wàn Nyùy wàa yiì kinyo ji yii wun, wù kù yii yii kinyo a dzə̀ ke wù yén, a Tàr wov yii. A Tàr yiì ka, bo Wàn kù yii kíwun,

Joon 3:3

Jesus bìnèr jii, «Kú a kiíy rúrú jii, bó yòʼ dzə̀ wìr shòv sáʼ Nyùy e si, a bó á kfən dzə̀ə́ ŋgaàŋ dzəə́n ji wír wo fíy.»

Matio 9:6

A m kù suuy lèn, é vèn yén ji ŋgaà wo yírí dzəə̀n *Wanwìr kér vitaáví é nsay fèn fó làysìn ajay wìr.» Wù nèn sùúy e ndzə́m və̀y jii, «Nànèn é yuv, e lì kifá ke à néŋ sho kìy ki, a dù fo laʼ.»

Matio 8:20

Jesus bìnèr sho jii, «Nyám símóʼ sí kér bíi sév, a menə́n mè kér láʼ sév, yii bèy, a bó ŋgaà wo yírí dzəə̀n *Wanwìr və̀n yòʼ kér fó teʼ kfə́ kee kitú.»

Sekariya 13:7

«Éè nyùy ye á maʼ rə́r shó, ŋáʼáy, e taàmé nshìy wom, ŋáʼáy, e taàmé ŋgaà wom ŋgoo. Suuy mo woo Nyùy Tàr woo Taà Mànjòŋ. Yúyrí nshìy, é njiì bvəə́rí. M wíy màʼ kiwó kém e ve terií kitu, e lovtí aáwune.

Joon 16:23

«Wíy lóo dzə e ghan see shooy, é la vèn yòʼ dzə́ə a dzər kifá a dzə̀ e mò. M suuy ven kinyo ke ru kí jii, vèn wíy lon kifá a dzə̀ fo Tàr wor e mǒ yir, é wù ku nèn fò kíwun.

Joon 13:38

Jesus nèn dzə̀r shó jii, «A dzə̀ à kpù rú fo mò a? Kú a kiíy rúrú jii, bo kiyuú ki yiì a toŋ, aà méŋ ne akàŋ ataár ji bó à yòʼ kì á mo.»

Joon 8:58

Jesus bìnèr jii, «Vèn wáa kiíy rúrú jii, bo á wáa dzəə́ Abraham, a m sì.»

Joon 8:34

Jesus bìnèr jii, «Vèn wáa kiíy rúrú jii, wìr wo wù yii vinyo ve bi ví dzə̀ kwǎn vinyò ve bi ví.

Joon 6:26

Jesus kòr a dzə̀ lám aáwune jii, «M suuy ven kinyo ke ru kí ji bó vèn yòʼ ghán, taʼ mo ben ji bìʼ fo vèn‑ee yenen ji vinyo ve m yii vi din vitaáví vé Nyùy. Vèn wiy a dzə̀ bìʼ fo vèn‑ee yiin kibán, kí‑ii gháʼ ghaʼán.

Joon 1:50

Jesus bìnèr jii, «À biìmé lèn bìʼ fo m toʼon cáʼcáʼ ji m kì kì ji à dzə́ é sar kici a? À wíy yen vinyo ve ghaʼán ví, e shaà kin.»