Joon 1:29 - ŊWÀʼ NYÙY

²⁹ Yì rán kibvəə́shí, Joon yén Jesus, a wù wiyì, e nèn a dìn e wíri jii, «Vèn yén wír wo wù mán vinyo ve wír veé ndzə adzə̀me jáyí. Wù dzə̀ moo wan njiì wo Nyùy seé, e taŋrí wíri shó.

Joon 1:29 Referans Kwoze

Aysaya 53:7

Vé‑eè nyavrì e wun, wáy vileémé e wun wùn, a bó wù yòʼ‑oò ló a ghay kinyo. Wù‑uù dzə̀ moo wan njiì wo á li ji á du, e see, e kfə̀n a dzə moo njiì wo á lóo kom wuy, la wù yòʼ a toŋ. Kù dzə̀ mo wù yòʼ‑oò ló a ghay sa kinyo.

1 Joon 2:2

Nyùy laysìn ajay vesən a dzə̀ bìʼ Jesus Kristu və̀n wo wù‑uù kpuun ji wun fíʼ taŋrí vèsən. A bó wù yòʼ‑oò kpù bìʼ ajay vesən cáʼcáʼ gheéy. Wù‑uù kpù bìʼ ajay wìr dzə̀m.

1 Joon 3:5

Vèn kì ji Jesus‑eè wìy é nsay fèn a ji wun laar vinyo ve bi ví ve wíri yii. A bó wun woo Jesus yòʼ yii yii vinyo ve bi ví gheéy.

1 Pita 1:19

Wù‑uù tìn a dzə̀ e mensə́ me Kristu mè, a dzə̀ kifá kigháʼán, bìʼ fo Kristu dzəə̀n kfə́, a bó wù yòʼ kér jay wùmòʼ gheéy. Wù nén a dzə moo wan njiì woo là shilóm, wo á seé, e taŋrí wíri shó.

2 Korin 5:21

Mo vèsən‑eè kér lòn, Nyùy nèn bàʼtí vinyo vesən ve bi ví, e siìr a dzə̀ e Kristu kitu. Kristu, a bó wù yòʼ kér jay wo dzəə̀n və́ə gheéy. A wù‑uù yii bèy, ji vèsən táti vèsən à Kristu, é vèsən wáa dzə sa là jay moo wun woo Nyùy.

1 Pita 2:24

Wúnwun woo Jesus‑eè lo siìr vinyo vesən ve bi ví a dzə̀ e wùn kitu, e kpù shó e kintam. A wù‑uù kpú bèy, ji vèsən fiʼ kpù sá fo mbìv vinyò ve bi ví, e nèn a dzə, a yiì a dzə̀ vinyo ve ru ví. A dzə̀ vileémé və́ vin ve ví yiìn ne, vèsən bónén fo vèsə́n yàsí.

Hibru 1:3

Wù dzə̀ ji kikúv ke wun woo Nyùy, a dzə kinyo kidzə̀m ji Nyùy, njaʼkìr réŋréŋ moo Nyùy. A dzə̀ wun wo wù kér ndzə e dzə̀m e wùn kiwo, súŋnin, bo yì wáa ker vitaáví, a lìm mo yì limè. Nén a dzə wun wo wù‑uù manen vinyo ve wìr veé ndzə ji á fíʼ ran fo áwuné ajay. Wù màysì, e nèn kòʼ é yuv, e dzə̀ʼə̀m e Nyùy woo Taà Vitu ghaŋ.

Aysaya 53:11

Wù wíy yen ŋgeʼ, yì mayì, lóo yen vijuŋ ve yì wìyìn shó, kiiy nsàv, é shilív sə́ shí neem é nsay. Nyùy Tàr suuy jii, «Rúrú, ŋgaà wom lìm wíy yiì, aá mayir ajay wìr anín, bìʼ fo wun wo wù yòʼ kér jay wíy bèʼèy ajay wìr anín.

Ŋgaà Yen 6:1

Mo vé‑eè fìnèrìn ŋwàʼ wo Wàn Njiì‑iì səən vəy e kiláy kí kirə́ʼ saàmbà, m nèn yèn, a wù báy kirə́ʼ kee kimòʼón. Fo vifa vee vikweè ve ví dzəə̀n é ghaa kàvàʼ, kímóʼ kí nèn yòŋ jii, «Wìyi.» A jì rə wámkir moo kishèv.

Ŋgaà Yen 12:11

Yii bèy, aáwune ghàʼ ne wun, bìʼ fo vé‑eè tíy kév a dzə̀ é mensə me Wàn Njiì Nyùy, fiʼtì a dzə̀ kinyo ke Nyùy, e kfə̀n biìmé kpú bìʼ kinyo kee shooy.

Galatia 3:13

Yii bèy, mo nsər yiìn, vèsən nəə́ é lòn, vèsən wàa kiíy jii, Jesus Kristu fə̀ə́r ne vèsən fó lòn fóo fèy. Wù‑uù lì lòn wósən woo shooy, e siìr e wùn kitu. A dzə̀ mo vé‑eè saŋen é Ŋwàʼ Nyùy jii, «Á keerì wír e kici, bo lǒn Nyùyi sì é kitu wo.»

Joon 1:36

Jesus nèn a shaà, wù kfən sùúy jii, «Vèn yén wír wo wù dzəə̀n moo wan njiì wo Nyùy seé, e taŋrí wíri shó.»

Ŋgaà Yen 7:17

bìʼ fo Wàn Njiì wo wù dzə́ e shùu kàvàʼ wíy a shìy áwune, a dànèr áwune moo njiì, a dù sho fo adàn ve á fəər mendzə́v me mè fó dzəʼə̀m yee là mayi dzəə̀n. A Nyùy wíy sòr mensíy medzə̀m fo wír vìné si.»

Lim Aŋgàa Ntum 8:32

A kinyo ke wù‑uù yoŋ fo ŋwàʼ fèy ki dzə̀ jii: «Wù‑uù dzə̀ moo njiì wo á li, e dù, e see. Kfə̀n a dzə moo wan njiì wo á lóo kom wuy, la wù yòʼ a toŋ. Kù dzə̀ mo wù yòʼ‑oò ló a ghay sa kinyo.

Ŋgaà Yen 17:14

Á wíy lò, aá nèn bàʼtí rə́r, a màʼ Wan Njiì Nyùy sho. Yii bèy, é Wan Njiì Nyùy wùn à wír vəə́ só áwune, bìʼ fo dzəə̀n wun woo Tàr fo atàrí adzə̀m, kfə́n a dzə wun Fon fo afone adzə̀m. A wír vìne dzə̀ ve wù liìn ji və́, á wáy shilív e wun wùn, a tiy a dzə̀ wùn áwune.

Ŋgaà Yen 15:3

a kùm, a yòv luŋ Mooser woo *ŋgaà ntum Nyùy, e kfə̀n a yòv wó Wàn Njiì Nyùy. Aá yov jii: «Éè Nyùy Tàr, wò woo Nyùy woo Ŋgaà Vitaàví Vidzə̀m, vinyo ve à yii vi dzə̀ féyì, a wíri leey, kér gháʼ. À dzə̀ Fon wo wù sáʼ vitúm vidzə̀m, a sáʼ yée du tìítiy, là kiloʼ.

Ŋgaà Yen 14:1

M kfən lòo leéy, e yèn Wan Njiì Nyùy, a wù tíy e kitu ke Gwan *Sion wùn à wíri nsə̀kì nshòv sikweè e mkweè e wiì (144,000), a dzə̀ ve vé‑eè saŋen yír wun woo Wan Njiì wùn à yé Tàr woví aáwuné yírvishi.

Ŋgaà Yen 7:14

M bìnèr jii, «Tàr, bó m yòʼ kì. Kù kì wò.» Wù nèn a naàrì jii, «Wír vee shoone dzə̀ á ve vé‑eè dzəə̀n é ghan sé ŋgeʼ ye tavín, e bóo bòy fo fo. Aá sù ne vikúm vév e mensə́ me Wàn Njiì mè, ví wáa ran, a fər.

1 Pita 3:18

Kù dzə̀ mo Kristu‑uù yenen ŋgeʼ bèy, e kpù fo wírí vinyò ve bi ví vidzə̀m kàŋ mòʼón. Wun woo là jay, wù kpú fo vé jayi, e màn ajay vee shooy adzə̀m ji wun fíʼ siìr vèsən fo Nyùy. Vé‑eè yùyrí wún və́, a wù kér wún a dzə̀ woó nsay. Wù fəə́ fó kpu, a ker a dzə̀ wo wú‑uù loòn fo Nyùy.

Ŋgaà Yen 19:9

Nshìylav Nyùy rə̀y nèn kfə̀n sùúy e mò jii, «Sáŋ kinyo ke m yíi a suúy kìn ki é ŋwàʼ. Bòŋ ké wìr ve á biin áwune ji áwune wiy, e yì vijín vé Wàn Njiì Nyùy.» Wù kfən sùúy e mò jii, vinyo vìn vi dzə̀ á jí se Nyùy feyì feyì.

Ŋgaà Yen 14:10

ŋgaàŋ kù wíy no meluʼ me Nyùy me bi mè. A dzə̀ ŋgeʼ ye tavín ye Nyùy wíy way e wùn bàr, a ŋgaàŋ kù kér fó jiiyí e dzə̀m. Ŋgaàŋ wíy a rəsí, a saŋrí e və̀y wo wú shwí, baári moo mekàŋ, a Wàn Njiì Nyùy wùn à nshèelav sə́ sí leeyì.

Ŋgaà Yen 13:8

Kù dzə̀ mo wír veé kitu ke nsay adzə̀me wíy a ghvəm nyám yee shooy ji Nyùy, a yu fo fo. A kù wíy a ghvəm wír adzə̀m ve bó á yòʼ‑oò lo sàŋ yír sév é ŋwàʼ Wàn Njiì wo vé‑eè yuyrin. A ŋwàʼ və̀ne dzə̀ wo vé‑eè saŋen yír sé wìr ve á kù‑uù wíy lùŋ sho, é bo ndzə wìy a kèʼ.

Joon 3:16

«Nyùy kòŋ ne wír veé ndzə adzə̀m e ŋàŋ, e fò màyshó Wan və ji wìr dzə̀m wo wù wáy shilív é wùn wó luŋ, a ker dzəʼə̀m yee là may, e làa yòʼ nəə́ e ŋgeʼ yee là may.

Ŋgaà Yen 19:7

Á wáa sheʼrí, a sàvnìn, a koʼór yír rə́. Ghán sí ghèén ne se Wàn Njiì Nyùy yíi koóy wiíy və, a jìn bàʼtí ne, a shìy shìyìn.

Ŋgaà Yen 14:4

Mo áwune ghvə́m a dzə̀ Wan Njiì Nyùy, á nén a dzə là shilóm moo wánlè lùmèn wo bó yòʼ dzə̀ wù kùm wiíy, kù dzə́, shiy a dzə̀ və́ə. Áwune ku nèn a jùmrì a dzə̀ wun woo Wan Njiì Nyùy, wùn áwune wáa dù fo wù du. A Nyùy‑iì shòʼtí ne áwune, e fə̀ə́r fo wìr msǒŋ mvəm, wáa dzə wír mbìyi ve kér wun woo Nyùy wùn Wan və wo á yoŋ ji Wan Njiì.

Ŋgaà Yen 5:8

Mo wù səən, vifá vee vikweè vìy wùn à kfə́m see nshòv sikweè e mbaà siy si nèn a gbù e si wo. A wìr mòʼón mòʼón kér lúŋ ye vé‑eè fèrìn e *kisha ke mbàm ki, kfə̀n kér kighín ke á fèrìn sá e kisha kee shooy ki. Kiláy kí wáa dzə sho kirúnén, a kí din bunrì ye wír Nyùyi bunrì fo wun.

Ŋgaà Yen 1:5

A m kfə̀n lón fo Jesus Kristu wo kù yii din wun kinyo ke dzəə̀n ke ru kí e vèsən. Dzə̀ wun wir mbìy wo wù‑uù kèʼèn, e fəə̀ fó kpu, a kér wun afon ve á sáʼ nsay adzə̀m. Vèsən kú a burí wun wo wù kòŋèn vèsən, e cùtì mensə́ mvə, vèsən bóy fo vèsə́n lǒn vinyò ve bi ví.

Ŋgaà Yen 21:9

Nshìylav Nyùy yìmòʼ nèn wìy, e yèn mo, a dzə̀ yìmòʼ fo see saàmbà sìy se sí kì kér kighín ké lòn kee saàmbà, a dzə̀ lòn wo wú jòʼsìn bám. Wù wìy, e sùúy e mò jii, «Wìyi, é m din wò jín wo dzəə̀n wiíy Wàn Njiì Nyùy.»

Ŋgaà Yen 6:16

a fuŋ agwan wùn à vilán vi jii, «Vèn ku keèsì e věr vitu, e kìŋ ver fo ŋgaà wo wù dzə́ e kàvàʼ yén ver, é vèr fíʼ bòy fo ŋgeʼ ye Wàn Njiì sí sə́ti nsay sho rə̀n.

Titur 2:14

Wù‑uù fò kitú kfə́, e kpù fo vèsən, e tìn vèsən fó vinyò ve bi ví vidzə̀m ji wun náŋsín wír ji və́, aá wáa dzə là jay, e tiír vifií ji á wáa yiì a dzə̀ vinyo ve juŋ vi.

Ŋgaà Yen 21:27

A bó yòʼ dzə̀ sá kifá ke kí kér shilóm ki nə̀ə́ é laʼ fèn gheéy. A bó yòʼ dzə̀ sá wír wo wù yii liì kisaŋ, kìn wo wù bóʼti kimboʼtì, wù nə̀ə́ fó. Kù wíy nəə́ wír ve yír sév sí dzəə̀n é ŋwàʼ Wàn Njiì Nyùy wo vé‑eè saŋen yír sé wìr ve á wíy lùŋ sho.

1 Joon 4:10

A dzə̀ vèsən kù lèéy kinyo ke Nyùy mùmèn, e bóo kiíy rú kinyo ke dzəə̀n ji koŋ. Wù‑uù koŋ vèsən, a bó vèsən yòʼ fə̀m sí koŋ wun. Wù nèn tùm Wán və é nsay fèn ji wù wiy, e kpù, e tàŋrí vèsən, é wun fiʼ làysìn ajay vesən.

1 Timoti 2:6

Wù‑uù fò kitú kfə́ ji wun tín wíri adzə̀m fo áwuné lǒn vinyò ve bi ví. Nyùy nèn dìn e ghan fóo fèy ji wun koŋ a ji wìr dzə̀m wìy lùŋ.

1 Korin 15:3

A kinyo ke mò‑oò fìʼtìn e vèn kin ki dzə̀ tím kinyò feyì feyì, a mò‑oò fiʼtì réŋréŋ mo mò‑oò yuun sá. A kí dzə̀ jii, Kristu‑uù kpù ji wun mán á vinyo vesən ve bi ví, a dzə̀ kíwun ke Ŋwàʼ Nyùyi‑iì suuyin ji kí waà wíy koóy.

Matio 20:28

A dzə̀ réŋréŋ sá mo ŋgaà wo yírí dzəə̀n *Wanwìr və̀n yoʼ wìy ji wíri wáa lìm fo wun. Wù wìy ji wù wáa lìm fo wíri, e fo kitú kfə́, e fíʼ tin wír anín fo lòn.»

Ŋgaà Yen 5:6

M ku nèn yèn Wan Njiì mo wù tíy e shùu kàvàʼ, e vifá vee vikweè vìy wùn à kfə́m siy sí nsàn, kiʼ vileémé vileémé, mo á seè, e yiì a dzə̀ cu sho. Wù‑uù kér loŋ saàmbà, kfə̀n kér sí saàmbà. A sí yee shooyi dzə̀ kiyoy kee saàmbàwìr wo dzəə̀n wo Nyùy. A Nyùy túm, a wù ghán kitú ke nsay kidzə̀m.

Hibru 9:28

Kù dzə̀ sá mo Kristu‑uù foon kitú kfə́, e kpù fo wíri kàŋ mòʼón, e nèn bèʼèy njò sé wìr anín, á bòy fo nsaʼ. A wù kfə̀n wíy wìy e ndzə fèn ji akàŋ abaà, a bó wù yòʼ dzəə́ wiy bèy ji wun kwaŋri á njò sé wíri. Wù sí wiy lèn ji wun luŋer á wír adzə̀m ve á shiy ji wù wiy.

Galatia 1:4

A Jesus Kristu və̀n‑eè lo biìmé kinyo ke Nyùy woo Tàr wòsən‑eè sìysìn. Wù‑uù fò kitú kfə́, bìʼ vinyo vesən ve bi ví ji wun fíʼ taŋrí vèsən, aá boy fó ndzə yee lèn ye dzəə̀n ye vinyò ve bi ví.

Lim Aŋgàa Ntum 13:39

Wìr wo wù wáy shilív e Jesus wùn bòy ne fo wùn vinyò ve bi ví, a bó yòʼ dzə̀ *Nsər Mooser yiì, wìr bòy.

Matio 1:21

Wù wíy dzəə́ wán lumèn, áà shu yír ji Jesus, a dzə̀ ji Ŋgaà Lùŋèr. Ku shù bèy, bìʼ fo Jesus wíy tin wír və́ fó lǒn vinyò ve bi ví ve áwune yii.»

Ŋgaà Yen 21:14

A vé‑eè neèr sə́y nshòv sibaà e ghvə̀m, e bóo bom kay yee shooy e kitu wo, e sàŋ yír sé aŋgàa ntum vee nshòv sibaà e ghvə̀m ve dzəə̀n vé Wàn Njiì Nyùy e səy foo fèy.

Hibru 2:17

Á kinyo ke kí‑iì yiìn, é bo wù binkir, a dzə réŋréŋ moo afə́r və́, e fíʼ a dzə ŋgaà wov cù wo kuʼùn, a sham áwune, a lìm fo Nyùy shilív shimòʼón, e taŋrí áwune, é Nyùy laysin ajay vév.

Cù 10:17

«Kì yiì ka la vèn yòʼ yì nyam cù ajay e mbìv yìmòʼ é ghaa *kibàn ké ntàsín mo kì siìn kifá kee jeéy kí féyì feyì, a Nyùy Tàr fó ne e vèn ji vèn fiʼ lì ajay kintatì, e màn e wun woo Nyùy Tǎr si?

Hosea 14:2

Vèn kfə́n é bàm fo Nyùy Tǎr wùn. Vèn báʼtí kisúŋnìn kén, e dù, e lòn wun jii, «Éè Nyùy Tàr, làysìn ajay vérí, ku làysìn ŋkuuŋkùŋ. Ver víne, aá sí búʼ wó, ku səə̀sí ver. Vèr yíi burí wò, é wáa dzə cu ye vèr cu wò sho.

Ŋwàʼ Fəə 28:38

Aaron kù wíy a ker kicí ké tan kin e wun yírvishi, wír veé Israyi lóo cù mo, fə́m jáy kinyo, é la m yòʼ kìv njò yev. Kí kù wíy a dzə e Aaron yírvishi, é mo woo Nyùy Tàr ku sə̀ cu yév e dzə̀m.

Kintaŋ 18:23

Kù wíy a yiì wír veé ram Levi lim seé kibàn ké ntàsín, a tur lòn woo fó. Kù sì nsər ye yì wíy a tiy fo, mo ŋgwàʼ sén sí wíy a dzə. Áwune yòʼ wíy a ker nsay e wír veé Israyí mvəm ji vitsə́ʼ vév.

Kintaŋ 18:1

Nyùy Tàr nèn sùúy e Aaron jii, «Vèn à wón vée, à wír vee věn kfəə Levi adzə̀me kù wíy a tur lòn woo bìʼ jay wo wù kùmèn kibàn ké Nyùy Tàr. Yii bèy, jay lóo dzə wo wù kùmèn lím atàá cù, bo kù wíy tur vèn à wón vée cáʼ lòn woo shooy.

Kintaŋ 7:27

Wù kfən fò nyám se cù ye tonèné, a sí dzə̀ jii, wan nàʼ woo lumèn e mòʼón wùn à kiyáʼ ki, à wan kiyaʼ woo kiyá,

Aysaya 53:10

Yii bèy, kù‑uù sìysì Nyùy Tàr ji wù yén ŋgeʼ, aá bvə́ʼ wun, é fó ye wù foon kitú kfəə́ fiʼ tàŋrí wíri, a wù kù wíy a dzə sho e tin, a yen wón wùn à wón won vəə́, a ntaŋ Nyùy Tàr kù wíy shaà a dzə̀ fo wun kiwo, e bóo ghan kijuŋ.

Sekariya 13:1

«Ghán sin si wíy gheén, é ntòŋ ndzə̀v yìmòʼ mvəʼəm, a fəə ji ye wìr vee rám Davir wùn à wír ve á dzə́ e Jerusaleme, aá wáa sù njò yev fó, a ran fo áwuné vinyò ve bi ví, à fo áwuné joònè e dzə̀m.»

Joon 1:35

Kfən wìy lòo dzə kibvəə́shí kímóʼ kí, a Joon tíy e kirə̀ʼ wùn à wón və́ lìme abaà,

Joon 1:43

Ndzə kfən bvəə̀shí, e ràn é kishiíy kímóʼ kí, Jesus nèn wày ji wun du a e mbìv wòŋ yee Galeli. Wù lòo dù, e yèn wír wùmòʼ, aá yoŋ ji Filiv, e sùúy sho jii, «Wìyi, é wòsò wáa ghan.»

Joon 2:1

Kishiíy kí shaà, ndzə bvəə́shí, e ràn, á wáa ker vijín é ntèʼ yee Kaana e Galeli foo fèy, yìy à Jesus dù fo,

Joon 4:42

a suúy e wiíy və̀y jii, «Vèr wày shilív e Jesus wùn lèn a dzə̀ bìʼ fo vèr yuun ne kinyo kfə́ e vituʼùr vér ví, bó yòʼ dzə̀ə́ bìʼ kinyo ke à kì fèrìn e vèr cáʼcáʼ. Vèr kìíy ne lèn kijuŋ ji wìr və̀n dzə̀ wo wù wíy lùŋèr kitú ke nsay kidzə̀m.»

Joon 6:51

Dzə̀ mo vifá ve yi ve ví loòn fó yuv, ve ví fó dzəʼə̀m yee là may. A wìr yì vifá ve yi vìn, bo ŋgaàŋ shaarì. A vifá ve yi vìn vi dzə̀ wún wóm, wo m fó ji wír veé ndzə adzə̀me fíʼ wìy lùŋ fo fo.»

Kintaŋ 7:39

Wù kfən fò nyám se cù ye tonèné, a sí dzə̀ jii, wan nàʼ woo lumèn e mòʼón wùn à kiyáʼ ki, à wan kiyaʼ woo kiyá,

Kintaŋ 21:9

Mooser nèn fèr yó e kisha kee *brons ki, e keèrì e kici. Wìr wo yò‑oò teen ne leeyì, wù kù nèn bònén.