Joon 1:14 - ŊWÀʼ NYÙY

¹⁴ Á mo Jínyùy‑iì wìyìn, e lì mbom wìr, a dzə wùn à wíri, a kòŋ áwune féyì, a dìn rú mo Nyùy dzəə̀n, vèr wáa yen vikuʼùy və́. A kù dzə̀ vikuʼùy vé Tàr wov, bìʼ fo kù jòʼsìn wun wo dzəə̀n Wan Nyùy.

Joon 1:14 Referans Kwoze

1 Joon 4:9

Nyùy‑iì lo dìn rú ji wun koŋ a vèsən. Wù‑uù tùm màyshó Wan və é nsay fèn ji wù wiy, e yiì, é vèsən fíʼ a ker dzəʼə̀m yee là may.

1 Timoti 3:16

A dzə̀ vèsən wàa binsí ji kinyo ke toʼon Nyùy, é bo vèsən kiíy mo dzə̀ á ghvə̀m wun kìn kí dzə̀ rú kinəə́nén. A kí dzə̀ jii: Kristu‑uù wìy, e lì mbom wìr, Kiyoy ke Ranén kí bínsí wun, nshèelav se Nyùy si kfən yèn wun. Á wáa fìʼtì woŋ sidzə̀m mo wù dzəə̀n, wíri wáa way shilív é wùn wó virə́ʼ vidzə̀m. Nyùy kfən lì wun, e kòʼór e wùn ghaŋ.

Joon 1:1

Yì‑iì dzə̀, é bo ndzə wìy a kèʼ, a Jínyùy‑iì sì. Wù‑uù dzə̀ wùn Nyùy, a wù dzə̀ sá ji Nyùy.

Galatia 4:4

Ghán sí nèn wìy ghèén se Nyùy‑iì sìysìn ji wun wíy yiì kinyo ke wù‑uù kàʼàn. Wù túm Wán və é ndzə fèn, wù wìy, wiíy wùmòʼ dzəə́ wun, wù wáa dzə sa, a yu a dzə̀ fó nsər réŋréŋ mo vèsən‑eè yú.

Aysaya 40:5

Á bèy, é wíri nèn yèn vitaáví vé Nyùy Tàr. Wìr dzə̀m wíy yen, a ŋgaàŋ fə̀m soò fèé. Á mo Nyùy Tàr suuyin ji kí wíy a dzə.»

Hibru 1:3

Wù dzə̀ ji kikúv ke wun woo Nyùy, a dzə kinyo kidzə̀m ji Nyùy, njaʼkìr réŋréŋ moo Nyùy. A dzə̀ wun wo wù kér ndzə e dzə̀m e wùn kiwo, súŋnin, bo yì wáa ker vitaáví, a lìm mo yì limè. Nén a dzə wun wo wù‑uù manen vinyo ve wìr veé ndzə ji á fíʼ ran fo áwuné ajay. Wù màysì, e nèn kòʼ é yuv, e dzə̀ʼə̀m e Nyùy woo Taà Vitu ghaŋ.

Joon 6:51

Dzə̀ mo vifá ve yi ve ví loòn fó yuv, ve ví fó dzəʼə̀m yee là may. A wìr yì vifá ve yi vìn, bo ŋgaàŋ shaarì. A vifá ve yi vìn vi dzə̀ wún wóm, wo m fó ji wír veé ndzə adzə̀me fíʼ wìy lùŋ fo fo.»

Kolosia 1:19

A yì‑iì sìysì Nyùy bèy, bìʼ fo wù‑uù taʼ ji Wan və kú a dzə réŋréŋ vinyo vidzə̀m ji wun,

1 Korin 15:47

Adam woo wir mbìy‑iì lò kfə́ fó nsay fèn, a Nyùy‑iì bòm a dzə̀ e kibvər ki. Kristu wo wù wìyìn fó bàm nèn lò kfə́ a dzə̀ fó wòŋ woó yuv.

Ŋwàʼ woó Rom 8:3

Nyùy yiì ne kinyo e mǒ wùn, a bó m yoʼ lò, a tùr a dzə̀ fó nsər, m yiì, bìʼ fo mensə́ mem mè yòʼ koŋ kinyo ke nsər suuyì. A kí dzə̀ jii, Nyùy‑iì tùm Wán wo dzəə̀n və́ə, wù wìy, e lì mbom a dzə̀ ye wìr wo wù yii vinyo ve bi ví. Wù‑uù kpù fo wírí ajay, nèn ndzəə̀r vitaáví vé vinyò ve ví lim aáwuné wùn vee shooy.

Aysaya 7:14

Mo á tenen ne fóo lon kisəəm fo Nyùy Tàr, bo wúnwun woo Nyùy Tàr lo, e dìn a kisəəm aáwune. Á yuúrí á kijuŋ, wánlè ŋgòn woo shó wíy tiím a bvəm, e dzəə́ wán lumèn, dzəə, é wù shu á yír ji Immanuel.

Nsùyrì Nyùy 2:7

Fòn suuy kfə́ jii, «M yíi a fìʼtì sáʼ Nyùy Tàr. Wù‑uù sùúy e mò jii, ‹À dzə̀ wán wom, a m sì tàr won lán.

1 Joon 4:14

A ver vee aŋgàa ntume‑eè lo yèn sá Wán və wo wù‑uù tumen é nsay fèn ji wù wiy, e tìn wíri fó lòn.

Kolosia 2:9

Kristu dzə̀ kinyo kidzə̀m ji Nyùy. Mo wù‑uù liìn mbom wìr, vinyo ve Nyùy vi nén a yensín e wun wùn vidzə̀m.

2 Joon 1:7

A m sáŋ bèn, bìʼ fo wír ámóʼó wìyìn ne anín, a ghan virə́ʼ vidzə̀m, a boʼtí wíri bóʼtín, a kìnèn ji bó Jesus yòʼ‑oò lo wìy e nsay fèn, e lì rú á mbom wìr. A wír vee shooyi dzə̀ vé fòn kimboʼtì wo dzəə̀n Ŋgaà Vibàn Kristu.

Aysaya 53:2

Wìr lìm Nyùy‑iì kúy e Nyùy si moo kifá ke kí toon toón, tó bèy, a megháŋ mè kù dzə̀ a dzə̀ é nsay ŋgaŋ. Ké ru kí, wù yòʼ‑oò ló a ker sí ye juŋe, a kìʼ e njà wìr ye vèr wáa ker shií wó a leéy wun. Wù‑uù dzə̀ ben là viwìr, ye bó yòʼ‑oò dzə̀ vèr wàa ker shií ji bo á kì jumrì wun.

Ŋgaà Yen 21:3

M yú, a jì yìmòʼ súŋnin fo lum kàvàʼ kitávín, suuy jii, «Á yén ri lèn, Nyùy sí dzə́ wùn à wíri. Wù wíy a shiíy wùn áwune, aáwune wáa dzə wír və́. Wúnwun woo Nyùy kù sí wìy a dzə wùn áwune.

Hibru 5:5

A dzə̀ réŋréŋ sá mo bó Kristu yòʼ‑oò lo shòʼ kitú kfə́ ji wun wáa ker ntaʼ, a dzə ji taà cù wo kuʼùn. Yì‑iì lèm Nyùy wun mo wù‑uù suuyin kùm wun woo Kristu jii: «À dzə̀ Wán wom, a m sì Tàr won lán.»

Hibru 10:5

Á kinyo ke kí‑iì yiìn, bo Jesus Kristu lóo wìy e ndzə fèn, e sùúy e Nyùy jii: «Bó à yòʼ kér shií é nyàm se á seéri, cu wò sho ji ntàŋrí, kìn é fómo wùmòʼ. À nen nàŋsín a dzə̀ wún wo dzə̀ m lì, e yiì ntàŋrí shó.

Joon 11:40

Jesus bìnèr sho jii, «M yoʼ lò sùúy e wò jii, aà wày a dzə̀ shilív e mǒ wùn, à yiì yèn mo vitaáví vé Nyùy vi dzəə̀n a?»

Joon 3:16

«Nyùy kòŋ ne wír veé ndzə adzə̀m e ŋàŋ, e fò màyshó Wan və ji wìr dzə̀m wo wù wáy shilív é wùn wó luŋ, a ker dzəʼə̀m yee là may, e làa yòʼ nəə́ e ŋgeʼ yee là may.

Joon 2:11

Jesus‑eè yiì kinyo kìn e Kaana woó Galeli foo fèy, a dzə̀ kiŋgaʼnìn ke kinyò ke mbìy ki ke wù‑uù dìnèn, wíri wáa yen vitaáví ve Nyùy foon shó. Mo wón və́ lìme yenen, e nèn màysì, e wày shilív é wùn wó.

Joon 14:6

Jesus bìnèr jii, «Dzəə̀ kù dzə̀ mo və̀n, a kinyo ke dzəə̀n ke ru kí kù lo a dzə̀ fo mò, a kù fó mo dzəʼə̀m yee là may. A bó yòʼ dzə̀ wìr shaà, e dù, e yèn Tàr wor, a bó ŋgaàŋ beé a dzə̀ mo.

Hibru 1:5

bìʼ fo Nyùy yòʼ‑oò yiì ne sùúy e nshìylav rə yìmòʼ mo wù‑uù suuyin e Wan və jii: «À dzə̀ Wán wom, a m sì Tàr won lán.» A bó wù yòʼ‑oò yiì ne sùúy sa e yìmòʼ jii: «M wíy a dzə Tàr won, áà wáa dzə Wán wom.»

Joon 14:9

Jesus yòŋ jii, «Filiv, m rə́si dzə́ vèsən, e kèʼ fo ŋgùʼ, a bó à yòʼ kì mo m dzəə̀n a? Wìr wo wù yenen mo, yèn a dzə̀ Tàr wor. A dzə̀ à kfə̀n a suúy ji m din Tàr wor dínen e vèn é le?

Ŋwàʼ Luk 9:32

Á wáa suŋnín, a Pita wùn à Jeem, à Joon kì sí buúne. Á lòo sàsìn, e yèn mo rán Nyùyi bán fo Jesus wùn, e kfə̀n yèn, a wír vee shooyi tíy e wùn ghaŋ abaà.

Joon 17:22

Vikuʼùy ve wò‑oò bùʼùn mo shó vi dzə̀ sá ve m bùʼùn ne áwune shó, aá wáa dzə ji kitú kimòʼón réŋréŋ mo wòsò dzəə̀n.

Joon 3:18

Wír wo wù wáy shilív e Wàn Nyùy wùn bòy ne fo lòn. Wìr wo wù tén fó way lì ne lòn, bìʼ fo wù leeyin wír wo dzəə̀n Wan Nyùy ntéŋ, a bó wùmòʼ yòʼ kfə̀n dzə̀.

Ŋwàʼ Luk 2:11

Á dzə̀ə́ ne wán e Fòn Davir ntèʼ é kishiíy ké lán ki, a wù wíy lùŋèr ven, bìʼ fo dzəə̀n *Mfə̀ə́r wo Nyùy‑iì kàʼàn, a dzə̀ wun Taà Ndzə.

Nsùyrì Nyùy 45:2

Nyàr, á dzə̀ á wánlè nsùm, aá tò á sí. Á kì á kisúŋnìn feyì feyì. Nyùy bùʼ a ne wun e kisəəvì kee là may ki.

Hibru 2:11

Wùn à Jesus wo wù yii, aá gheen ji wón Nyùyi nén a ker Tàr wov e mòʼón, a dzə̀ Nyùy. Á kinyo ke kí‑iì yiìn, bo Jesus wáa yòŋ áwune ji afə́r və́, e làa yòʼ a dzə̀rkìr.

2 Korin 12:9

M lóné, wù kù sùúy ji wun yíi a shìy a mò, a sə mo, lá m yòʼ dzə́ə a shii a kinyo kímóʼ kí, bìʼ fo wìr yii búŋ vitaáví, bo wù yú mo vitaáví vé wun woo Nyùy vi lim e ŋgaàŋ wùn kijuŋ. M nén a sheʼrí ndzə́m wom woo shoon e ŋàŋ, é vitaáví vé Kristu vi ku màysì, a lìm e mǒ wùn.

Kolosia 2:3

Kù mày wun woo Kristu wo dzə̀ wù mvə̀ʼ vifií vé wìr, bo wù yén rán, e kìíy kinyo ke dzəə̀n ke ru kí.

Efesor 3:8

Wù‑uù fò lim yee shoon a dzə̀ e mò və̀n, mo wo m dzəə̀n bám fo wír vəə́ adzə̀m. Wù‑uù tùm mo ji m wáa ghan fo wír ve bó yòʼ dzəə̀n veé Israyi, a fìʼtì a nyanyày vijùŋ wo Nyùy fó e wír ve á tatin wùn à Jesus Kristùu adzə̀m.

Ŋwàʼ woó Rom 9:5

aá ràm a dzə̀ fo wír ve vé‑eè súŋnin wùn à Nyùyi. Jesus Kristu woo *Mfə̀ə́r wìy wìy, e lì mbom wìr, á dzəə́ wun a dzə̀ aáwuné ram, a dzə̀ wun wo Nyùy lèmèn lèn ji vitú ve saʼ. Á ku nèn a burí Nyùy ghán sidzə̀m. Amen.

Ŋwàʼ Luk 2:7

Wù fùm wán və lumèn, e boò e ndzə̀y sí, e neèr a dzə̀ é kikoŋ ke nyám si yii yíkir fo fo, bìʼ fo vé‑eè wìyìn, e bùŋ kirə́ʼ é lav viŋgwìy.

Lim Aŋgàa Ntum 13:33

wù yiì ne lèn, kí gheén a dzə̀ e vèsə́n kiwo, vèsən ve siìn wón wìr vee shooy. A kí ghèén a dzə̀ mo Nyùy‑iì fəərin Jesus fo kpu. Vé‑eè lo sàŋ kinyo kìn e Ŋwàʼ Nsùyrì Nyùy Nyùy, vintsə̀m vibaà ji Nyùy suuy a jii, ‹À dzə̀ Wán wom, a m sì Tàr won lán.›

Nsùyrì Nyùy 85:9

Rúrú, wù yòʼ yíi ndzə̀y fóo lùŋèr wír ve á ghvə́m wun. Wù yíi lùŋèr, aá yén vikuʼùy və́, a ví dzə̀ e vèsə́n nsay,

Esiker 37:27

Kirə́ʼ kém ké dzə ki wíy a dzə aáwuné ntìntìn, é m wáa dzə Nyùy wov, aáwune wáa dzə wír vém.

Joon 8:32

é vèn nèn wìy kìíy kinyo ke dzəə̀n ke ru kí, é kí yii, é vèn boy fó vikwàn.»

Joon 17:24

«Tàr, mo m sí kfə́n fo wò wùn lèn, m koŋ ji wír ve wò‑oò foon e mò víne wáa dzə vèr áwune fo m dzəə̀n, aá fíʼ a yen vikuʼùy ve wò‑oò foon e mò, bìʼ fo wò‑oò sí koŋ mo, é bo ndzə wìy a kèʼ.

Joon 18:37

Payler nèn sùúy sho jii, «Kí bo dzə̀ rú ji à dzə̀ fon wùmòʼ?» Jesus bìnèr jii, «M dzə̀ fon rú mo à suuyì. Dzə̀ kinyo ke vé‑eè dzəən mo shó, a mò‑oò wìy é ndzə fèn ji m fiʼ dìn kinyo ke dzəə̀n ke ru kí e wíri. Wìr dzə̀m wo wù koŋ kinyo ke ru kí, nén a yuurí kinyo kém.»

Ŋgaà Yen 19:13

Wù‑uù màʼ kikúm, a kí kiʼ mensə́ mensə́, aá kfə̀n yoŋ yír rə́ yímóʼó ji Jínyùy.