Joel 2:23 - ŊWÀʼ NYÙY

²³ Éè wìr veé Sion, vèn wáa sheʼrí. Vèn wáa yu vijuŋ ve vinyò ve Nyùy Tàr woo Nyùy won yiìn e vèn ví. Wù yiì ne, wuú mbìyi gbú, e fíʼ dìn ji wun yù ne tóŋ yén. Wù sə̀ʼə́r ne wuú mbìyi, e sə̀ʼə́r yé bàmé, yí ku lò ben e mbòŋén, kù mo yí‑iì rə́si ló.

Joel 2:23 Referans Kwoze

Filipi 4:4

A m suuy e vèn adzə̀m jii, vèn wáa sheʼrí dzəʼə̀m ye vèn kér vèn à Tàr wòsən Jesus ghán sidzə̀m. A m suuy, kfə̀n lo li jii, vèn wáa sheʼrí.

Cù 26:4

bo m wíy a fo ven wuú é ghan se juŋ si, é nsay nèn a fəə́r vifá ve yi, é vicí ví wáa koóm.

Hosea 6:3

Vèsən ku wày vifií a dzə̀ e Nyùy Tǎr wùn, e mùm kitávín ji vèsən kiíy wun kijuujùŋ. Rúrú, wù kù yíi wìy fo vèsən moo shúy ye yì tó kijàvndzə, a wù yòʼ‑óò ndzəy. Wù yíi rəə̀r vèsən moo wuú ye yí loon, nsay rə́, e kù rəə̀r moo wuú mbìyi yeé kimgbù ke wuu.»

Remrí 11:14

A vèn yiì bèy, bo wù wíy a tsənsí wuú é ghan se yí dzəə̀n ji yí wáa dzə, yé mbìyi, à yé bàmé, é vèn fíʼ a ker vifá ve yi, a ker meluʼ, a ker meŋgvə́r.

Aysaya 41:16

Vèn wíy buʼ, e fetí, é shwéri li kibvər, é kinsəm ki kú a taʼár, a dù sho. Á bèy, é vèn nèn a sheʼrí mo woo Nyùy Tàr, a tuy shwín bìʼ mo woo Ŋgaà wo Ranén woó Isray.

Nsùyrì Nyùy 149:2

Isray kú a sàvnìn, bìʼ Ŋgaà Mbom və, é wón veé Sione wáa sheʼrí, bìʼ Fon wov.

Filipi 3:1

Afə̀r vem, m lóo màysì, e nèn a tir ven ji vèn wáa sheʼrí a dzəʼə̀m ye vèn kér vèn à Tàr wòsən Jesus. M nen kfə̀n a suúy kinyo kímóʼ kí, a dzə̀ ke mò‑oò saŋen ne fo vèn. A bó yòʼ dzə̀ m wàa dor fó a remrí kinyo kee shooy, bìʼ fo kí yíi a shìy ven fo vèn tó é kinyò.

Sekariya 10:1

Vèn lón wuú fo Nyùy Tàr, a lon ye yí náŋsin vifá ve ví siìn é sum. Dzə̀ wun wo wù yii fəər mbàʼ se wuu. Dzə̀ wun wo wù fó wíri wuú, yii, a vifá ve wìr dzə̀m vi teʼ e kwaʼ.

Nsùyrì Nyùy 28:7

Nyùy Tàr dzə̀ vitaáví vém, a dzə ŋkeè wom rə̀r, a m yoy, tiir a dzə̀ é wùn wó. Wù sə̀ ne mo, e yiì, m wáa sheʼrí, a m yíi a yòv luŋ, a beèrì wun.

Aysaya 30:23

Á bèy, é Nyùy Tàr tsə́nsí sá wuú, é ŋgoòy se vifa se vèn wayin sí fəə́, é vifá ve nsay fəər vi faŋkir, e kfə̀n a dzə nyanyày. Wíy lòo dzə e ghan fóo fèy, é nyám sén sí wáa bun bunén é mvə̀m yi.

Remrí 32:2

La yéʼéy yémé kù síri a rə̀sìn moo wuú á, é jí sém sí wáa sə̀v moo ŋweʼ a? Sí kú a fə̀fə̀ mo wuú yii fəfə̀ e viŋgà ve bór vi, a ŋwàʼrì mo yí yii ŋwaʼrì e vikwiíy.

Remrí 28:12

Wù wíy mvə̀ʼ shúu yuv, e fo ven wuú é ghan se juŋ si. Wù wíy səə̀vì lim sén sidzə̀m. Vèn wíy a foòr vitúm vinín mbàm, yii bèy, a bó vèn yòʼ wíy dù mfoòmé fo kímóʼ kí wùn.

Filipi 3:3

Dzə̀ vèsən vin ve Nyùy naŋsin ne rú ji wír və́. Vèsən ghvə́m wun woo Nyùy, a bánri Kiyoy kfə́ vèsən. A vèsən sumrì wún bìʼ fo á dzəə̀n wír Jesus Kristu, a bó vèsən yòʼ wáy vifií é vinyò ve á yii ji bìʼ liì wòŋ gheéy.

Sekariya 10:7

Rúrú, wír veé ram Efrayime wíy a dzə antav e shùu rər, a yu vijuŋ mo wìr nó meluʼ, wúné wàa bòŋ. Wón véví wíy yen, a kòŋ, a sheʼrí kinyo ke Nyùy Tàr yiìn.

Jeremia 5:24

Áwune yòʼ lo, á yòŋ e vitú vév ví jii, ‹Vèsən wáa fàn Nyùy Tàr woo Nyùy wòsən. Nyùy, wo wù fó wuú é ghan see shó, fó yé kiŋgway, fó yé vishevtì. Wun wo wù yii, aá káv vifá e ghan see shó.›

Nsùyrì Nyùy 104:34

Nyùy Tàr ku yiì, é kwaʼtì yémé wáa dzə e juŋ fo wun, bìʼ fo vijuŋ vém ví lo, a kù dzə̀ fo wun.

Jeremia 3:3

Kí nen yiì, ŋweʼe tén gbu, e yiì, wuú tén sə́ʼə́y, a bó vishí vé vi yòʼ din ji kinyo ki kooyì. Ví kù dzə̀ ji vé sàkì, là woómé.

Aysaya 61:10

M yíi a sheʼrí Nyùy Tàr é ŋàŋén, shilív shém shí yíi a wùʼsì Nyùy wom. Wù lùŋèr ne mo, e kwàŋrì vinyo vém, e bòyìr mo, wáa dzə mo wù màʼ a dzə̀ kikúm ke fíy ki e mǒ wùn, m wáa dzə moo lum jìn wo wù naŋsin wún, a dzə moo jín wo wù wayrin wún e vifá ve sùsù vi.

Aysaya 30:21

Vèn yíi lòo dù e dzəə, lo ji á bin e koy yìyí, kìn e wó ŋkoòvìi, é ven yú jí rə fó bàm, a yì suuy jii, «Dzəə̀ yee réŋ rə̀ne, vèn bin shó.»

Ŋgàn 16:15

Fòn bvəti vishí, wíri wàa dzə e dzə̀ʼə̀m, a koŋ rəə́ dzə̀ moo mbàʼ wuù.

Nsùyrì Nyùy 32:11

Ven ve á yúnin Nyùy Tàr, vèn wáa sheʼrí, a sàvnìn. Ven ve melív men mè dzəə̀n tìítiy, vèn wáa kwa, a sheʼrí wun.

Ŋwàʼ Jov 33:23

«A vishí və́ ví bòŋ, tam nshìylav Nyùy wàa dzə ye a dzə̀ yì sə̀ wun. Nshìylav Nyùy fo see nsə̀kì si, a yì tíy e wìr wùn Nyùy nsàn, din mo a dzə̀ wìr wàa dzə tìítiy e Nyùy si.

Sekariya 9:9

Éè wìr veé Sion, vèn wáa sheʼrí e mbòómbòŋ. Éè wìr veé Jerusalem, vèn wáa ndzəʼ. Vèn yén mo fòn won wiyì, wiy e sáʼ yee tìítiyi, séŋ nsiì, e kù yòʼ lì kitú kfə́ shishàr, e kòʼ a dzə̀ kimbèʼbìy, kimbèʼbìy, a dzə̀ kee wán.

Amos 4:7

«Kfə̀n‑eè yiì mo, é bo wuú táv é yuv, yí táv, a dzəə́ bér ŋwee e taár, é bo á keʼ, a kav vifá. Mò‑oò yiì, wuú wáa lo e ŋkàlaʼ yìmòʼ, e tìír tiirín, fo yí wáa lo e yìmòʼ. Wuú‑uù ló e virə̀ʼ vímóʼ ví, a vímóʼ ví yúm yumén.

Yòvdìy 4:2

Wónlě nsùm veé Sione‑eè tókir, kù mo tòkír *kisha ke mbàm ke baar kee wúntí kíwun. Lèn wáa dzə, aá sí lóvti sho moo kíŋ yee mbóm, kifá, aá bóm bomén e wóo.

Sekariya 9:13

M fèr ne Juda ji kinte kém, e lì Efrayim ji mvən si. Éè Sion, à dzə̀ nyùy yem rə̀r. M wíy bayír wón vé, aá ghíʼ wír veé Grik e rə́r sí.»

Lim Aŋgàa Ntum 14:17

Yii bèy, wù kú a yiì vinyo ve juŋ vi e wíri, aá fíʼ a kiíy ji wun dzə̀ á sho. Wù fó ven wuú é ghan se gheenén sí, a vifá vi kúyí, a vèn kér vifá ve yi, yí, shéʼri.»

Nsùyrì Nyùy 84:6

Áwune lóo tosín Kiwoóy ké Baka, kiwoóy ke dzəə̀n kirə́ʼ ke yumér kí, áwune kù yèn ji fóo dzə̀ á kirə́ʼ ke ntòŋ sé ndzəv sí fəə́ fo, kirə́ʼ ke wuú mbìyi loon, e sə̀tí fó e kisəəvì kí.

1 Afòn 8:36

à kù yù é yuv, e làysìn ajay aŋgàa lìm vé vee wír veé Isray. Ku làysìn, a yeʼéy áwune mo á wáa ghan e wò mbòv, e nèn tsə̀nsí wuú é nsay ye wò‑oò foon e wír vée ji vitsə́ʼ vév.

Ŋwàʼ Jov 37:13

Nyùy tsə́nsi wuú, yí wàa lo e kitu ke nsay. Wù lo, wù tsə̀nsí yímóʼó ji wun din á koŋ rə́ e wíri, lo, wù yiì, yímóʼó wàa keèsì ji wun maʼ á ŋgeʼ e wíri, a kù kì wun mo wù yii vinyo vìn.

Nsùyrì Nyùy 147:8

Wù lo, wù sə̀tí yúv e mbàʼ, e fə̀ə́r wuú, yí wàa lo e nsay, jíyí wàa kuy aàgwan.

Esiker 34:26

M wíy màʼ kisəəvì aáwuné wùn, e màʼ e virə̀ʼ ve áwune dzə́ sho vidzə̀m, e kaarí gwan wom, e tar, a dzə̀ woo jeéy ji wóom. M wíy tsənsí wuú kù é ghan se yí yii dzə́, é wáa dzə kisəəvì kév.