Joel 2:11 - ŊWÀʼ NYÙY

¹¹ Kù danèr Nyùy Tàr mànjòŋ və və̀n, du aáwuné mbìy, wámkirì. Vé rər və́ víne dzə̀ nyanyày, aáwune ve á yú jí rə víne dzə̀ antav ve ghaʼtíné. Rúrú, kishiíy ké Nyùy Tàr kí dzə̀ kigháʼán, a kí beéme e ŋàŋ. A dzə̀ bòy la é kishiíy fen.

Joel 2:11 Referans Kwoze

Malakay 3:2

«Wù wíy wìy e kishiíy kee shó, é boy la? Wù wíy sàsìn, e bvəy, é goʼ a tiy la e wun shwin? Wù wíy a dzə moo və́y wo á ton kisha sho, é bo á sheŋri, a dzə moo shuv wo wú fəʼ kijuŋ.

Nahum 1:6

A wù shwìíy kilòŋ, tàm la wùn wun? A dòʼshwíiy və kòʼ, yù la fóo tiím? Dòʼshwíiy və baári moo və́y, wóʼó wàa bvəʼkír, a rèŋ e wun si.

Ŋgaà Yen 18:8

A kishiíy kí kù wiy ke wù wíy nəə́ e lòn wuu baà. Yàsí wíy gbù e wùn wó. Wù kfə̀n wíy a dìy. Wù wíy a tooŋé jíŋ. Á wíy tòn wun e və̀y, é wù shwí, e rèŋ, bìʼ fo Nyùy Tàr, wun woo Nyùy wo wù wíy màʼ ŋgeʼ sho dzə̀, a wù tàv é ŋàŋ.»

Ŋgaà Yen 6:17

Sì kee shó kee kishiíy ke áwune sí shwiiy kilòŋ, e màʼ ŋgeʼ e kitu ke nsay, a bó yòʼ dzə̀ féyì, wìr lùŋ.»

Joel 3:16

Nyùy Tàr wíy a wamkír fo Sion, a tsənsí kisúŋnìn kfə́ fó Jerusalem. Nsay wíy a sə̀ʼ, é yúví wáa yàʼ. Yii bèy, Nyùy Tàr wíy a dzə kikfə́vsì ke wìr və́, a dzə kirə́ʼ ke tavín ke wír veé Israyi laay sho.

Jeremia 30:7

Á virom eèy, kishiíy kin ki wíy a dzə kibiíbí féyì, kishiíy, a kee moo kíwun ki yòʼ dzə̀. Wíy a dzə ghán sé ŋgeʼ ye tavín e kfə́ə Jakoví wùn, yii bèy, aáwune wíy bòy fo fo.»

Nsùyrì Nyùy 46:6

Vitúm vi fan, yaʼà, a sáʼ yéví sí gbu. Nyùy Tàr súŋninè, kitú ke nsay ki yaàné é njà vilù.

Amos 5:20

Bó kishiíy ké Nyùy Tàr kin ki yòʼ kù wíy a dzə ndzə ye sənér, a bó ráne yòʼ wíy a dzə à? Rúrú, kishiíy kin ki wíy a sən ji cùm, a bó ráne yòʼ wíy a dzə.

Joel 1:15

Rúrú, kishiíy ké Nyùy Tàr kí sì fó mentsə̀m. Kishiíy ke wun woo Ŋgaà Vitaàví Vidzə̀m lo, e wìy ji wun laar virə́ʼ.

Jeremia 50:34

Yii bèy, Mfə̀ə́r wov dzə̀ e távín. Yír rəə́ dzə̀ Nyùy Tàr woo Taà Mànjòŋ. Wù kù yíi bìn nsaʼ yev, e yiì, é woŋ wóví wáa neŋ ji dèʼ, là fan. Ké wír veé Babilon, é wù maʼ a dzə̀ ŋgeʼ aáwuné kitu.»

Aysaya 42:13

Nyùy Tàr lo, wù ŋàʼáy moo ntav wo wù du e shùu rər. Wù lo, wù wàa nəə́ e shùu rər, a yu tím. Wù lo, wù yìysí, e bùʼ shirəə́ ji sí wàá tsəə́m, a ghiʼ aŋgaà və́ vibàn, a wù yòʼ mvəʼ sí, yén wír.

Aysaya 13:4

Vèn yuúrí mo kiyor ki kóʼ fo agwan, a kí kóʼ mo ko màŋgòŋ wìr nyanyày, a wù ló fó vitum vinín, e kaàrí, a koʼór kiyor. Dzə̀ Nyùy Tàr woo Taà Mànjòŋ mo wù báʼti vé rər və́. Wù báʼti áwune é mfòn ji á du, e màʼ rə́r.

Kintaŋ 24:23

Balaam kú a tiisí ntum rə, a suúy jii: «Éè mò, a dzə̀ wìy tìím la é ghan se Nyùy wíy yiì vinyo vìn.

Joel 2:31

Shùy wíy ndzəmén, lóo sən sənén, ŋwee lóo bàŋ moo mensə́, é bo kishiíy ké Nyùy Tàr ke ghaʼán kí gheén.

Jeremia 25:30

«Jeremia, ku yìysí vinyo vìn vi vidzə̀m, ji á mo kí wíy koóy a áwune. Suúy aáwune jii: « ‹Nyùy Tàr yíi a nyàmkìr fo ntoò yùv. Jì rə yíi a dzə̀mkìr fo wun kirə̀ʼ ké dzə ke ranén kí. Wù yíi a wamrí wír və́ kitávín, é kiléŋléŋ kí wáa koʼ moo ké wìr ve á nyeŋ báŋ se *vayin, a wìr dzə̀m woó kitu ke nsay yíi yuʼnín wun.

Amos 5:18

Lòné dzə̀ wó wìr wo wù diy ji kishiíy ké Nyùy Tàr kí wiy cér. Kinyo ke juŋ ke kishiíy kin ki wíy yiì e vèn kí dzə̀ ka? Kù wíy a dzə ndzə ye sənér, a bó ráne yòʼ wíy a dzə.

Amos 1:2

Amos wáa fìʼtì ntum rə, a suúy jii: «Nyùy Tàr wámkir e Sion, tsə́nsi kisúŋnìn fo Jerusalem, a kwáʼ nàʼa yúmé, a jíyí yúm, sə́ʼsi fo Gwan Karmel.»

Joel 2:25

Nyùy Tàr suuy jii: «M wíy siìr vifá ve vèn‑eè làyìn é ghan se ŋguùmé sí‑iì ndzəəyin vifá vén. M wíy siìr vidzə̀m, e kèʼ fo vifa ve sé mbìy si‑iì laàrìn, e dù, e meé e ve sé bàm sí‑iì ndzəəyin. Kù‑uù tsə̀nsí mo mànjòŋ wom wo ghaʼán və̀n, é bo wù nəə́ ven.

Esiker 22:14

A kù yòʼ dzə̀ vèn wìy a ker mentàsìn mée tàkà sho e ghan se vèsən wíy tam a? Suuy mo woo Nyùy Tàr, a m kér fóo wìy yiì.

Aysaya 7:18

«Nyàr, á yuúrí á kijuŋ. Wíy lòo dzə e ghan fóo fèy, é Nyùy Tàr toóy vé rər veé Ejiv, aá wáa wìy, a kò a moo merə́rəʼ me mè loòn fó ŋguùŋè ndzə̀v yee Naay. Wù kù wíy toóy saa vé rər veé Assiriya, aá wáa wìy, a kò a moo yúu.

1 Tesalonika 4:16

Kinyo ke kí wíy a dzə ki dzə̀ jii, Taàtá Jesus wíy lòo wìy fo yuv, é wù wáa fuŋ kitávín, é taà nshìylav Nyùy kfə́n a fuŋ sa, aá wáa toŋ sóŋ Nyùy. Á fúŋ bèy, áàŋgàa biimé ve vé‑eè kpukiné nèn tòmbìy fəə̀,

Joel 1:6

Mànjòŋ ŋguùmé mèʼèm ne, e wìy, e sùm nsay yèsən. Sí tàvkír e ŋàŋ, a sóŋé kù dzə̀ ji yé bvərə̀ʼ, njím moo viŋkoònyàm ve kiyìy ké bvərə̀ʼ.

Joel 2:1

Vèn tóŋ sóŋé é Sion. Vèn búʼ shirəə́ shi e mǒ gwan wo ranén. Wìr dzə̀m wo wù dzə́ e nsay Juda wáa yàʼ, bìʼ fo kishiíy ké Nyùy Tàr kí sí wiyì, a kí sí méʼ fo mentsə̀m.

Joel 2:2

Dzə̀ kishiíy, a kí sə́n, beéme. Kishiíy, a dzə̀ ndzə vitsə̀ʼ, a mbàʼ si súm. Dzə̀ vé rər ve á meʼèm, wiy moo ŋguùmé, e sə agwan moo mbàʼ. Vé rər ve á tavin béne yòʼ‑oò ghàn ne bàʼtí, a bó á yòʼ kfə̀n wíy a dzə.

Joel 3:14

Yímóy, wíri bàʼtí ne ansə̀kì ansə̀kì, aá sì é kiwoóy kee fo Nyùy Tàr kwaŋrì vinyo. Dzə̀ fó, fo kishiíy ké Nyùy Tàr kí yíi sàsìn, e bvəy.

Obadia 1:15

«Kishiíy ké Nyùy Tàr kí sì fó mentsə̀m, dzə̀ kishiíy ke m tínen nsaʼ vitum vidzə̀m. Edom, kinyo ke vèn yiìn kí dzə̀ kíwun ke á yíi yiì sa e vèn. Yii yéné yíi bìnkìr e věn kitu.

Nsùyrì Nyùy 18:14

Wù tsə́nsí mvən sə́, e tàʼár aŋgaà və́ vibàn. Wù túm kishèv, kí njáʼám, e bvə̀ə́r áwune.

Nsùyrì Nyùy 68:18

Wù‑uù kóʼ Gwan Sion, tsəə́ne wír ve wù koorin fó kwaʼ rər. Kóʼ bèy, sə́ nshwì fo wíri, wír ve vé‑eè tsə́y kóy wùn áwune. Nyùy Tàr, wun woo Nyùy kù wíy a dzə a dzə̀ fó.