Joel 1:13 - ŊWÀʼ NYÙY

¹³ Ven vee atàá cù, vèn maʼ ndzə̀y sé kpu si, a dìy. Ven ve á lim e kiy cù, vèn wáa toŋ, a jeetí. Ven ve á cu Nyùy wom, vèn maʼ ndzə̀y sé kpu si, e dù, a dìy vitsə́ʼ vifur. Vèn wáa dìy, bìʼ fo cú vifa ve yii yòʼ dzə̀ə́, a yé melùʼu sèéy ne. Á yòʼ dzəə́ yii cu e Nyùy wón lav.

Joel 1:13 Referans Kwoze

Jeremia 4:8

Bo dzə̀ ji vèn kúr vinsàʼ ve ndzə̀y ví, a toŋ, a dìy. Nyùy kù dzəə́ shwiiy kilòŋ vèsən áwune é ŋàŋ.

Joel 2:17

Atàá cù, áwune ve á yii cu Nyùy Tàrí ku tìím e ghaa kiy cù, a kìʼ kibuʼ ke kí nəə e lav cù, a dìy, a lon Nyùy Tàr jii, «Éè Nyùy Tàr, ku bàvtí dzəʼə̀m wìr vée. Wír vìne dzə̀ ve à shavin shávín ji vé. Lá à yòʼ yiì, aáwune kfə́n ji kifá ke nshéʼmé ki. Lá à yòʼ màʼtì, é vitúm vi wáa te lám aáwune, a dzər jii, ‹Nyùy won bèé lèn?› »

Esiker 7:18

Á wíy way vifám vé kpu, é wìr dzə̀m kú a ker a dzə̀ kindzə́m. Á wíy kwaày vitú, é wìr dzə̀m wìy a woomé.

Jeremia 9:10

M nèn yòŋ jii, «M yíi a toŋ, a dìy bìʼ agwan, a yòv lúŋ kpu bìʼ vitsəə̀m vé nyàm veé woʼ. Fóo sì e ghá, a bó wìr yòʼ kfə̀n shaa fo, a bó á yòʼ kfə̀n yú tóŋ nyàm. Menə́n wùn à nyám si lèʼkír ne, e lày.»

1 Afòn 21:27

Fòn Ahav yuúrí ntum Elija, e saàsì ndzə̀y sə́, e lò, e màʼ vinsàʼ ve ndzə̀y, e nèn a lèm jíŋ, a shiíy e vinsàʼ ve ndzə̀y ví wùn, a ghan mendzən mendzən.

2 Korin 11:23

A dzə̀ aŋgàa ntum Kristu, bo m dzə̀ wo mbìy, aá fə̀m yén ji m baá baán. M lìm ne kinyo ke Kristu, e shaà wír vìn adzə̀m, e kfə̀n lìm sháŋ fó fo akàŋ anín, e shaà áwune. Á tàm ne mo kàŋ là tóʼ, m méʼ kpú akàŋ anín.

2 Korin 6:4

Vèr ku nèn a yiì vinyo vér vidzə̀m, a dìn ji á lim a dzə̀ á fo Nyùy. Vèr kúr shilív, li vinyo vidzə̀m ji weè, kìn dzə̀ ŋgeʼ, kìn dzə̀ kitan, kìn gháʼ ka.

2 Korin 3:6

Yiì wun woo Nyùy, bo vèr gheén fó a dzə aŋgàa lìm və́ é mvə̀m *mensàŋ me fíy mèn mè. A mè dzə̀ ji á wáa lìm, a yu a dzə̀ fo Kiyoy ke Nyùy ki, e làa yòʼ a lìm ji á mo nsər ye á saŋen suuyì. Dzəə̀ yee fó nsər rə̀n yúyri wír yúyrín, a yee fó Kiyòy yii, a wìr dzə́, lim mo Nyùy koŋè.

1 Korin 9:13

Vèn kì sá ji wír ve á lim e lav cù yeé Jerusalem adzə̀me kù yii yíkir a dzə̀ á fo fo. A wìr wo wíri wiy, cu Nyùy e kiwo wo kér sa ŋkoy fo vifa ve cù foo fèy.

1 Korin 4:1

Vèn kú a yen ver ve á yéʼey ven ji aŋgàa lìm Jesus Kristu ve Nyùy wayin vinyo və́ ve ví‑iì dzəə̀n é kilìr e věr kiwo.

Aysaya 61:6

aá kù wíy a yòŋ ven ji atàá cù Nyùy Tàr. Wìr dzə̀m wíy kiíy feyì ji vèn dzə̀ á vé lìm Nyùy Tàr. Vèn wíy yòv bùʼ woó vitum vímóʼ ví nyanyày, a vèn wíy a yu vijuŋ bìʼ bùʼ woo shooy.

2 Samuel 12:16

Davir nèn a lon Nyùy ji wù ku yiì a é wàn wàá bónén. Wù wáa lon bèy, a lèm jíŋ, e yiì neèm fo nsay vitsə́ʼ vifur.

Kintaŋ 29:6

Á ku yiì cu sìn, e bóo lì ye á kù yii yii e kitu ke ŋwee, à ye tonèné, ye á yii kishiíy kidzə̀m, aá táti wùn à yé vifa ve yii, à yé melùʼu réŋréŋ mo kí dzəə̀n ji á wáa yiì. Dzə̀ cu se və́yí bin fo fo, a kirəm kfə́ kí rəʼtìn, boŋ Nyùy Tàr.

Ŋgaà Yen 11:3

Jì yee shooy nèn kfə̀n sùúy jii, wun wíy tsənsí wír və́ abaà ve á wíy a tunér kinyo kfə́. Aá wíy wìy, aá máʼ ndzə̀y sé kpu, é wun wáa shìy áwune, aá tiísí á ntum Nyùy kishiíy kishóv mntuùfú é ghiì baà é nsə̀kì (1,260).

Aysaya 22:12

Yì‑iì dzə̀ é ghan fóo fèy, Nyùy Tàr woo Taà Mànjòŋ, wun woo Taà Ndzə súŋnín, e sùúy jii: «Vèn wáa toŋnín, a dìynìn. Vèn kwaay vitú vi, e màʼ ndzə̀y sé kpu si.»

Esiker 21:12

Wàn wìr msòŋ, á toŋ, a dìy. Nyùy rə̀n dzə̀ ye yì yíi laàr wír vém. Yì yíi laàr vilìmbìy veé Isray vidzə̀m. Á wíy tatí wùn à wír vémé adzə̀m, e laàr. Á bèy, kú a dzə̀vtì vikàkàŋ vé vi.

Hosea 9:5

Kishiíy kén ké ŋkàʼ kí wíy gheén, é vèn yée le? Kishiíy ké ŋkàʼ woo ji á suyri Nyùy Tàr kí wíy gheén, é vèn yée le?

Joel 2:14

Yòʼ kì la, a Nyùy Tàr yíi kuvsín kwaʼtì rə́, e səə̀vì ven, e yiì, é vifá vi kfə́n a kuy e sum. Səəvì, é vèn kfən kòóy vifá vé a cù Nyùy Tàr woo Nyùy won shó, a cù wun e vifá ve yi vi, a cù e meluʼ mè.

Kintaŋ 28:4

Á yíi a yiì cu e wàn kiyaʼ kijàvndzə, a yiì cu e wùmòʼ woo wan kiyaʼ e ŋkuùr,

Kintaŋ 28:7

Cu melùʼ ye á bár e wàn kiyaʼa wíy a dzə lita melùʼ, aá wíy a màʼ e ghaa kiy cù.

Kintaŋ 28:14

«Á lóo yiì cu sìn, á kù a bar sa cu melùʼ fo ghaŋ. Lóo dzə ye á yii e wàn nàʼ woo lumèn, á bàr cu melùʼ sho, alita abaà. Lóo dzə ye á yii e kiyáʼ ki, á bàr lita e kintoʼnìn ki. Lóo dzə ye á yii e wàn kiyaʼ, bo dzə̀ lita e mòʼón. Á ntò se vinyò se cù ye tonèné ye á yii e kitu ke ŋwee, a kí kù wíy a dzə bèy, ŋwee e dzə̀m e kiya.

Esiker 27:31

Á kfə̀n wíy kom vitú ve kpu, e way vifám vé kpu. Á wíy a dìy e wò kitu mendzən mendzən, a dìy, a ŋavrí, a nyár kpú.

Joel 2:12

Yii bèy, Nyùy Tàr kù dzəə́ kér shíi won. Wù suuy e vèn jii: «Vèn kfə́n é bàm e mǒ wùn shilív shén shidzə̀m, a lèm jíŋ, a toŋ, a dìy.»