Jeremia 21:12 - ŊWÀʼ NYÙY

¹² Nyùy Tàr suuy jii: « ‹Ven vee rám Davir, vèn wáa tinén vinyo vi tìítiy ghán sidzə̀m. Vèn wáa sə wír wo á bóʼó fo ŋgaà mbóʼmé wo. Kí búŋ fó bèy, bo liì won kisaŋ yíi yiì, é dòʼshwíiy wom kóʼ, a wù yíi a baarí moo və́y, là ŋgaà ndzə̀mér.

Jeremia 21:12 Referans Kwoze

Aysaya 1:17

e yèʼéy yii a dzə̀ ye juŋe. Vèn ku wày ŋàŋ, a yiì vinyo a dzə̀ vee tìítiy. Vèn yén wír wo wù nyavrì e wíri, vèn kàntì ŋgaàŋ. Vèn ku kìŋsìn gháy wón tsə̀ə́, e tòm vinyo ve vikǐy ŋkfəə.

Jeremia 4:4

Ven vee wír veé Juda wùn à ve á dzə́ e Jerusaleme, vèn kú a tiy a dzə̀ e mǒ *mensàŋ me m gwàrìn vèsən. Vèn su melív men mè, é mè wáa tiy e mò woo Nyùy Tǎr wùn. Là bey, bo dòʼshwíiy wom yíi koʼ moo və́y, a dzə̀ bìʼ vinyo vén ve bi ví, lóo tòn ven, é la wìr wóo ndzəmér yòʼ a dzə.»

Aysaya 1:31

Fə̀m wír vén ve kuʼkìné, á kù wíy a dzə ji vidaànè ve və̀y, é fer yéví kfə́n ji sáy se və̀y. Nyùy Tàr wíy tatí ŋgaà fèr wùn à fer rəə́, e tòn, a bó wìr wo wù wíy ndzəmér yòʼ wíy a dzə.

Tsəfaniya 3:5

Nyùy Tàr kù dzə́ kfə́ aáwuné mvəm, yii vinyo a dzə̀ vee tìítiy, a wù yòʼ yii ve bi ví. Wù yii vinyo e wír vəə́ kishiíy kidzə̀m, là kiloʼ. Wù yòʼ shóʼor kímóʼ kee kishiíy, aàŋgàa yiì ye bií kù buʼtì vinyo, là woómé.

Nahum 1:6

A wù shwìíy kilòŋ, tàm la wùn wun? A dòʼshwíiy və kòʼ, yù la fóo tiím? Dòʼshwíiy və baári moo və́y, wóʼó wàa bvəʼkír, a rèŋ e wun si.

Jeremia 36:7

À yoŋ bèy, tam aáwune wáa buʼ wó e Nyùy Tàr, é wìr wáa bìn ndzə̀m e wun liì kisaŋ, bìʼ fo dòʼshwiiy Nyùy Tàr wo wù koʼon wùn à ŋgeʼ ye wù baʼtin ne a kìʼ áwune shó, dzəə̀n e gháʼán.»

Jeremia 17:4

Vèn wíy màʼtì vitsə́ʼ ve mò‑oò foon e vèn, e dù, a rèŋ a dzə̀ vikwàn aàŋgaà vén vibàné sar e wòŋ wo vèn yòʼ kiìn. A dzə̀ bìʼ fo vèn ŋaʼarin dòʼshwíiy wom, wù kóʼ, a baarí moo və́y, e làa yòʼ a ndzəmén.»

Jeremia 7:20

Á bèy, mo woo Nyùy Tàr woo Taà Ndzə nén a yòŋ jii, dòʼshwíiy wom yíi koʼ bìʼ kirə́ʼ kin, é m maʼ ŋgeʼ e wìr msǒŋ kitu, e màʼ e nyám si, e màʼ e vicí vee fó vi, e màʼ e vifá ve ví kúy e nsay foo fèy vi. Dòʼshwíiy wom wíy a shwi moo və́y wo bó yòʼ dzə̀ wú ndzə̀mén.»

Jeremia 5:28

Áwune fàŋkìr ne, a beʼ virə́ʼ. Yii yév kisaŋe tònén ne. Áwune yòʼ bin nsaʼ wàn tsə̀, fó sho, a bó á yòʼ kiŋsìn gháy ŋgaà kitàn.

Ŋwàʼ woó Rom 13:4

Lèm Nyùy ŋgaà saʼ ji wù wáa leéy a fo wíri, aá wáa dzə kijuŋ. Yii bèy, a wìr lò, a yiì kinyo ke bi kí, bo dzə̀ wù kù a fàn ŋgaà nsər, bìʼ fo dzə̀ wù wày wun e ŋgeʼ. A wù yii lim yee shooy, a dzə̀ mo Nyùy sìysìn ji wù wáa yiì.

Ŋwàʼ Luk 1:69

Wù lèm ne wír wo ghaʼán wo wù wíy lùŋèr vèr, a wù lò fo Fòn Davir woo ŋgaà lìm və́ ram,

Esiker 22:31

Á bèy, m kù wíy màʼ dòʼshwíiy wom aáwuné kitu, é wù laar áwune moo və́y. M yíi siìr lǒn vinyò ve áwune bùʼtìn vidzə̀m aáwuné kitu. Suuy mo woo Nyùy Tàr woo Taà Ndzə.»

Yòvdìy 4:11

Kilòŋ ké Nyùy Tàr kí‑iì shwìíy, e tònén, wù dìn dòʼshwíiy və wo tavín. Wù‑uù màʼ və́y é Sion, fóo bò, à kinsə̀ŋ ki shó.

Jeremia 23:19

Vèn leéy, e yèn dòʼshwiiy Nyùy Tàr. Wù kòʼ ne moo kinsəm, a wìy moo kiìkir wo biibí, a wù lo, e shùʼùy e vé yìi kisaŋé kitu.

Jeremia 5:14

Nyùy Tàr, wun woo Taà Mànjòŋ nén a yòŋ jii: «Jeremia, mo wír vìne suuy kin, bo mo‑óò yii, é jí sém sí wáa dzə moo və́y e wò shuù, aáwune wáa dzə meŋkaʼ me və́yí yíi laàr.

Aysaya 7:13

Á bèy, Aysaya bún fon wùn à wón ntoʼo jii, «Feyì à, áwune vee rám Davir, á wàá yuúrí. Áwune sà tànèr wíri, á dór, la kí yòʼ a jivír áwune á? Á sà yíi kfən, a tànèr sa Nyùy wom, a rəʼə́y wun a?

Aysaya 7:2

Fòn Ahas, wun wo dzəə̀n rám Fòn Davir‑iì yù ji kitúm kee Isray ki suùsín a ne wùn à kee Siiria ki, tímé kpú fo wùn à wír vəə́ bvə̀m, á wáa yàʼ, kù mo kar shwér vicí é kòv.

Nsùyrì Nyùy 101:8

M yíi a laàr wír ve á méŋ Nyùy adzə̀m fo mǒ wòŋ. M yíi a laàr áwune mo kishiíy kí dzəə̀n. M kù yíi fəə́r wír ve bií fo Nyùy Tǎr ŋkàlaʼ adzə̀m.

Tsəfaniya 1:18

Wíy lòo dzə e kishiíy kin ke Nyùy Tàr maʼ ŋgeʼ e wírí kitu, a wìr fə̀m kér káv e le, bo yòʼ dzə̀ wú tìn ŋgaàŋ. Nyùy Tàr wíy shwiíy kilòŋ, e tòn kitú ke nsay e və́yí. Wù wíy sàsìn, e laàr wir dzə̀m wo wù dzəə̀n é kitu ke nsay.

Jeremia 23:5

«Vèn leéy, e yèn, ghán sí wiyì, se m wíy yiì, é tám woo réŋé fəə́ e Davir ram, é m kóʼór ji fon. Wù wíy a saʼ vifon və́ é dzəə yee réŋ, a tinén vinyo tìítiy, a yiì a dzə̀ vinyo ve ru ví é wòŋ. Suuy mo woo Nyùy Tàr.

Jeremia 21:5

Mómò kitú kém, mo kí nyarin mo é ŋàŋ, dòʼshwíiy wom kóʼ, m yíi fùnèn ven vitaáví vém vidzə̀m.

Ŋwàʼ Jov 29:17

Mò‑oò kotì sóŋ fo wìr wo wù méŋ Nyùy shuù, boyìr wír wo ŋgaàŋ nəʼsì.

2 Samuel 8:15

Á bèy, Davir wáa saʼ woŋ Isray e dzə̀m, a yiì vinyo e wìr dzə̀m réŋréŋ là kiloʼ.

Remrí 32:22

«Dòʼshwíiy wom wíy baarí ji və́y. Wú wíy tòn kifá kidzə̀m ke kí kúyí, e tòn bèn, e dù, e meé e loònsay. Wú wíy tòn kifá kidzə̀m, a kinsə̀ŋ ke agwan ki wíy bò.

Cù 26:28

bo m yíi shwiíy kilòŋ ke biibí kí, e shwivír ven, e dzə̀sì ŋgeʼ e věn kitu, é sí foy, e shaà sé mbìy si kàŋ saàmbà, kù bey, bìʼ vinyo vén ve bi ví.

Ŋwàʼ Fəə 18:13

Ndzə bvəə́shí, e ràn, Mooser dzə̀ʼə̀m, a tinén nsaʼ se wíri, á wáa tiy, a leéy wun, e kèʼ fo kijàvndzə, e dù, e meé e ŋkuùr.

Jeremia 7:5

« ‹Ké ru kí, a vèn lòo dzə, e kùvsín liì won, e kùvsín yii yén, e làa yòʼ a loʼ rú afə́r vén,

Jeremia 23:2

Á bèy, Nyùy Tàr woo Nyùy wìr veé Isray nén a suúy kùm vilìmbìy ve ví leey wír və́ jii, «Vèn tàʼár ne wír vém, e jùm, á dúkír, e làa yòʼ a leéy fo fo. Vèn leéy, e yèn, m yíi màʼ ŋgeʼ e vèn, a kù dzə̀ bìʼ liì won kisaŋ. Suuy mo woo Nyùy Tàr.

Jeremia 44:22

Mo bó yòʼ‑oò dzə̀ Nyùy Tàr wàa kòmèr liì won kisaŋ wùn à vinyo ve joònè ve vèn yii, nsay yen nèn lày kisáŋ, a dzə kinjúm, e kfə̀n ji kifá ke liy ki, a dzə là wír, kù mo yì dzəə̀n lán və̀n.