Jeremia 2:13 - ŊWÀʼ NYÙY

¹³ Wír vémé jày ne vinyo e mò vibaà. Áwune bìn ne ndzə̀m e mò, mo woo ntòŋ ndzə̀v ye yì fó dzəʼə̀m. Áwune fèr ne a dzə̀ vév vee visə̀m, e lì ndzə́v, e wày shó, visə̀m, a ví káʼkír ne.»

Jeremia 2:13 Referans Kwoze

Joon 4:14

Yii bèy, a bó kilòŋ kí yòʼ dzəə́ wìy yum wír wo wù nó mendzə́v a dzə̀ me foon mo. Mee shooy mè wíy a dzə e ŋgaàŋ wùn ji ntoò ndzə̀v ye yì fəə́ ghán sidzə̀m, fó wun dzəʼə̀m yee là may.»

Joon 7:37

Wìy lòo dzə e kishiíy ke vé‑eè sí maar kiŋkàʼ kìy, a dzə̀ kishiíy ke kuʼùn kí fó kiŋkàʼ foo fèy, Jesus nànèn e wírí ntìntìn, e jàŋ kitávín jii, «A kilòŋ kí yúm wír, wù wìy, e yèn mo, e rəə̀r kilòŋ kfə́.

Jeremia 17:13

Éè Nyùy Tàr, wò woo fo kwaʼtì Israyi tíyí, wír ve á méŋ wòo wíy woomé. Wír ve á bin ndzə̀m e wòo wíy a dzə moo kinyo ke á saŋen é kibvə̀r, bìʼ fo á meŋen ne Nyùy Tàr, wun wo dzəə̀n ntoò ndzə̀v ye yì fəər mendzə́v me mè fó dzəʼə̀m.

Ŋgaà Yen 21:6

Wù kfən sùúy e mò jii, «Nsìysì wom ghèén ne lán e dzə̀m. Dzə̀ mo *Alfa wùn *Omega, a dzə̀ jii, Keʼ wùn à Kinjòʼsì kí. M wíy a fo mendzə́v me dzəə̀n dzəʼə̀m yee là may e wìr wo kilòŋ kí yúm e dzə̀m, a mè fəə́ fo mǒ dàn ghán sidzə̀m, aá nó kisáŋ,

Nsùyrì Nyùy 36:9

Dzəʼə̀m wìr dzə̀me kù lo a dzə̀ fo wò. Rán yée yii, a vèr yén sa rán e věr dzə̀ʼə̀m.

Ŋgaà Yen 22:1

Nshìylav Nyùy rə̀y nèn dìn mo ndzə́v ye wìr nó, wù wàa ker dzəʼə̀m yee là may. A yí rán ji rèéŋ moo kileèy, fəə́ fo sar kàvàʼ wo dzəə̀n wo Nyùy wùn Wàn Njiì və,

Aysaya 55:2

Yiì ka, é bo vèn wáa tòn mbàm e vifa, a bó ví yòʼ kúr bvəm? Vèn ghàn é le, e bóo ndzə̀ʼnìn, e kav mbàm, e lì, a yun vifá sho, a bó yòʼ dzə̀ ví sə̀ ven? Vèn yuúrí kinyo ke m suuy ki, é m din fo a dzə̀ vèn kòóy vifá ve yi ve juŋ vi. Vifá ve yi, a vèn ló yi, e yu búʼ.

Ŋgaà Yen 22:17

Kiyoy ke Nyùy wùn jìn wun woo Jesus nèn sàyín jii, «Ku wìy wìyìn.» Wìr dzə̀m wo wù yú kinyo kìn kú a binsí sa jii, «Ku wìy wìyìn.» Kí nén a dzə jii, wír ve á yúm kilòŋ adzə̀me ku wìy, e nò mendzə́v me mè fó dzəʼə̀m yee là may. Wìr wo wù koŋ fó no e dzə̀m, kù yíi a no kisáŋ.

Jeremia 4:22

Wír vémé dzə̀ viyúŋ, aá yòʼ kì mo. Áwune dzə̀ vinjìŋ ve won, aá yòʼ kì vinyo. Áwune dzə̀ anjàn yiì ye bií, aá dzə̀ anjìʼ yiì ye juŋe.

Jeremia 2:11

Kitúm ki‑ii yií ne kùvsín anyùy və́ á? Fə̀m mo bó yòʼ dzəə̀n rú anyùy, vé‑ee yií ne kùvsín a? Yii bèy, wír vémé màʼày ne mo wo m kóʼor áwune, e dù, a ghvəm a dzə̀ mebvə̀m, kifá, a bó yòʼ dzə̀ kí sə̀ áwune.

2 Pita 2:17

Vee shoon vee aŋgàa yeʼéyi dzə̀ moo ntòŋ sé ndzəv se sí yumkin ne, a bó yòʼ dzə̀ wìr lùŋ fó fo, e kfə̀n a dzə moo wuú ye yí kóʼkir, shwéri jùm. A Nyùy lèm ne kirə́ʼ fo wù wíy màʼ áwune, aá wáa neŋ fo e ŋòròʼ.

Jeremia 2:17

Yeè mbàʼ, bó yòʼ wìy wò e kinyo kìn ki e wò kitu à? Kí dzə̀ bìʼ méŋ ye wò‑oò meŋen Nyùy Tàr. Nyùy Tàr woo Nyùy wò, wo wù‑uù tsəə́ne wò.

Jeremia 1:16

M yíi way wír vém é ŋgeʼ, bìʼ kitú ke áwune tavin, e bìn ndzə̀m e mò, a tòn kiláy, a cù a dzə̀ anyùy sho, a ghvəm vifá ve áwune fèrìn e wó yéví.

Ŋgaà Tàrvìnyò 2:26

Nyùy yii fó vifií, fó kiíy wùn à vijuŋ vi e wìr wo wù yú wun. Yii bèy, lóo dzə wír wo wù ŋwáy wun, Nyùy nèn fò kfə́ ji wù wáa gisín, a baʼtí bùʼ, é ku yiì yòv wír wo wù yú Nyùy. Kin ki kù dzə̀ sá lím kisaŋe, a dzə̀ moo wír wo wù mum ji wun bám shwér.

Jeremia 15:6

Vèn mèŋ ne mo, e bìn ndzə̀m e mò. M wíy màʼ kiwó kém, e ghar ven shó, e laàr. M dòr ne, yòʼ dzə̀ m dzə́ə a ker mendzən fo vèn. Kù suuy mo woo Nyùy Tàr.

Aysaya 63:8

Wúnwun‑eè ló a suúy jii, «Rúrú, wír veé Israyi dzə̀ wír vém. Wón vém féyì, a bó á yòʼ wíy boʼtí mo.» Á bèy, wù ku nèn lì áwune é wùn, a dzə Mfə̀ə́r wov.

Aysaya 5:13

Bìʼ bey, á yíi koorí wír vém, e dù sho e kwaʼ nsàm, aá koóri áwune, bìʼ fo á yòʼ gwarìr lím Nyùy Tàr. Jìŋ yíi a kom vitó ve kfə́m sé wìr sév komén, é wír ve áwune sáʼáa wáa kpu kilòŋ ke yumén kí.

Aysaya 1:3

Nyàm yee mbòŋ kì wír wo wù kér wun, a kimbèʼbìy kí kì wír wo wù yiir wun. Yii bèy, a wír veé Israyi yòʼ kì fo á binè. Bó wír vémé yòʼ kiiy kinyo ke m yii aáwune.»

Ŋgaà Tàrvìnyò 2:11

Yii bèy, m ló, e sə̀ʼə́m, e lèéy lim se mò‑oò lìmèn e wó yémé sidzə̀m, e lèéy vitaáví ve mò‑oò wayin shó, e yèn ji kù dzə̀ á kifá kisáŋ. Kù dzə̀ ntàʼtìn kisaŋ moo wír wo wù mum ji wun bám shwér, a bó ndzə̀né yòʼ dzə̀ é kinyò ke wìr katìr, yii e sar shùy.

Ŋgaà Tàrvìnyò 1:2

Ŋgaà Tàrvìnyò‑oò yòŋ ji ke a dzə̀ wìr wàa suúy ki dzə̀ á jii: «Kisáŋ fo kisáŋ ki, kinyo kidzə̀m ki kù dzə̀ kisáŋ.»

1 Samuel 12:10

Á wáa toŋ e Nyùy Tàr, a suúy jii, ‹Vèr jày ne, bìʼ fo vèr meŋen ne Nyùy Tàr, a ghvəm a dzə̀ mebvə̀m me *Baal, à mee *Ashtoret. Lèn, ku sə̀ ver fo aŋgàa vibàn vérí wo, é vèr yiì a cù a dzə̀ wò.›

Jeremia 5:31

Aŋgàa ntume sí tiísi a dzə̀ ntum kimboʼtì, aàtàá cùu fó sáʼ a dzə̀ ye yí gheen áwune. Wír vémé nén a kòŋ a dzə̀ kee shoon. Bo kimaysì kév kí wíy a dzə ka?»

Ŋgaà Tàrvìnyò 4:4

M kfən yèn ji wíri lo, á gìsín é lìm, lo, á wày vifií ji á kiíy á kiwó ke lìm ke juŋ ki. Aá kù yii bèy, a dzə̀ bìʼ fo wìr lo, wù wàa tàʼ mbǒv ŋgaà shweèsí və ntéŋ, a lìm ji wun ku shaà wun. Kin ki kù dzə̀ sá kinyo kisáŋ, a dzə̀ moo ji wìr jum shwér ji wun koó.

Jeremia 2:26

«Mo shòŋ yii woóme e ghan se á koon, dzə̀ mo Isray yíi a woomé. Áwune yíi a woomé wùn aàfon véví, aàtǎr ntoʼo, e lì atàá cù vév wùn aàŋgàa ntum Nyùy vév vé kisaŋe.

Ŋgaà Tàrvìnyò 2:21

Wìr lim lim e vifií və́ ví wùn à kiíy rəə́ kijuujùŋ, wù kù màʼtì a dzə̀ e wìr wo bó wù yòʼ‑oò lo ndzə̀ʼnìn sho. Kin ki kù dzə̀ lím kisaŋe, a dzə̀ kinyo ke biibí kí féyì.

Ŋgaà Tàrvìnyò 1:14

M lèéy ne vinyo vidzə̀m ve wíri yii e sar shùy fèn, e yèn rúrú, a dzə̀ kifá kisáŋ feyì. Kù dzə̀ lím kisaŋe réŋréŋ moo wír wo wù mum ji wun bám shwér.

Atǎr Nsaʼ 10:13

Yii bèy, mo vèn ŋwayin mo, a ghvəm a dzə̀ anyùy ámóʼó, bo m yòʼ dzəə́ yìi bòyìr ven.

Mayka 6:3

Éè wìr vem, m jày ka e vèn? M kfə̀n ji kibeʼèy fo vèn a dzə̀ é dzəə yeé le? Vèn fó mo binèr.

Mayka 2:8

Nyùy Tàr nén a bìnèr e vèn vin, a suúy jii: «Vèn lò ne kén, e bìnkìr, e kìʼ wír vém moo aŋgàa vibàn. Wír, aá kfə́n fo kwaʼ rər, kwaʼ ji á bòy ne, vèn ló kén, e ghàr, e kweèy a dzə̀ ndzə̀y fo áwuné wùn.

Jeremia 18:14

Kfə́m‑ee yíi ne bùŋ fó vitu ve agwan veé Lebanon a? Ntòŋ sé ndzəv se sí fəər mendzə́v me rəsìn mè fo agwan sii yií ne yùm á?

Jeremia 5:26

«Wír kisaŋe sì e wír vémé mvəm, aá laay moo wír ve á koó menə́n. Á kóʼor kév vitám, koó a dzə̀ wíri.

Ŋgaà Tàrvìnyò 12:8

Ŋgaà Tàrvìnyò yoŋ ji ke a dzə̀ wìr wàa yòŋ ki dzə̀ jii, «Kisáŋ fo kisáŋ ki, a kidzə̀m ki kù dzə̀ kisáŋ.»

Joon 4:10

Jesus bìnèr jii, «Aà bèn kì fómo wo Nyùy taʼ, e fo wò, e kfə̀n kìíy mo wìr wo wù lón mendzə́v fo wò və̀n dzəə̀n, bo kì yíi lon wò fo ŋgaàŋ, é wù fó wò mendzə́v me mè léŋ ghán sidzə̀m.»

Joon 4:11

Wiíy woo shooy nèn lò kfə́, a dzər jii, «Taàtá, à yíi lì mendzə́v me mè léŋ mee shooy fo feé, a bó à yòʼ kér kifá kée ser sho, a bií kfə̀n shoò é ŋàŋ?

Remrí 31:16

Wù tiím, e yòŋ e Mooser jii, «Yén ri mbà, à sí lo, e dù, e yen atàr vé aàŋkfəə́ wòŋ. À kpú, bo wír vìne sí lo, a jùmrì anyùy vitum veé nsay yee fo á du, e nəə́. Áwune wíy bìn ndzə̀m e mò, e shoʼór *mensaŋ me mò‑oò gwàrìn vèr áwune.

Aysaya 12:3

Wír veé Isray, vèn wíy a sheʼrí boyìr ye Nyùy bòyìrìn ven, a yu vijuŋ feyì moo wír wo kilòŋ kí lòo yum, wù koóy mendzə́v.

Jeremia 14:3

Aŋgàa kav véví tùm ne vé lìm vév ji á tú mendzə́v, á dú fo visə̀m ví dzəə̀n, e dù, làa yoʼ yen mendzə́v, a kfən e vitém vi viyúmér, kfə́n, woóme, méŋ fo á dzəə̀n, nèn litì sí yév.

Jeremia 19:4

Kí dzə̀ bey, bìʼ fo wír vìne meŋen ne mo, e bìvír kirə́ʼ kin. Áwune sí ton kiláy fen, cu anyùy sho, cu bèy, a bó atàr vév wùn aàfon veé Judàa yòʼ fə̀m‑eè lo yì‑iì kìíy anyùy vìn. Aáwune kfə̀n‑eè yiì, mensə́ me wìr vee alànjò mè sə́ fen e dzə̀m.

Esiker 47:1

Wìr və̀y nèn lì mo, e kfə̀n shó e ghaa shùu lav cù. M lòo leéy, e yèn ntòŋ ndzə̀v, a yì fəə́ fo sar kikùr ke shùu lav cù, léŋ, du e mbìv ntoshùy, kù mo lav cù‑uù tíy, kiʼì. M kfən yèn ndzə́v, a yí léŋ, fəə́ fo sar kirəv ké lav cù e mbìv yee tsə́n, léŋ, shaa kíy cù fo mbìv yee tsə́n.

Sekariya 13:1

«Ghán sin si wíy gheén, é ntòŋ ndzə̀v yìmòʼ mvəʼəm, a fəə ji ye wìr vee rám Davir wùn à wír ve á dzə́ e Jerusaleme, aá wáa sù njò yev fó, a ran fo áwuné vinyò ve bi ví, à fo áwuné joònè e dzə̀m.»

2 Afòn 22:17

Áwune màʼày a ne wun, a tòn kiláy, a cù anyùy ámóʼó shó, e kfə̀n a ŋaʼár a dòʼshwíiy və e mebvə̀m me áwune fèrìn e wó yéví mè, a wù baári bìʼ Jerusalem, a wìr wóo ndzəmér yòʼ waà dzə̀.»

Aysaya 1:4

Yìiy, kitúm ke Nyùy sháʼnin kinyo, aá kù yii a dzə̀ kíwun. Wír, aá jáy vinyo e ŋgeʼ, a ví rə́ʼəy áwune rəʼəyín. Wón, aá kù buʼtì vinyo moo atàr vév, táti kifá kidzə̀m, kuvrì kùvrìn. Áwune màʼày ne Nyùy Tàr, a ŋway wun woo Ŋgaà wo Ranén woó Isray ŋwáyín. Á bìn ne ndzə̀m e wun, e lèʼ wun léʼén.

Esiker 14:5

M yii bèy ji m fíʼ bìnèr melív me wìr veé Isray ve á bàyìn wún fo mǒ wùn, a cù mebvə̀m, e siìr áwune e mǒ wùn.›