Jeremia 11:12 - ŊWÀʼ NYÙY

¹² Ŋgeʼ si lóo ghaʼ, wír veé ŋkà se laʼ seé Juda wùn à veé Jerusaleme lóo dù, lóo toŋ aànyùy ve áwune rə́si cu e kiláy kií, é la á yòʼ fə̀m sə̀ áwune.›

Jeremia 11:12 Referans Kwoze

Jeremia 2:28

Anyùy vén ve vèn bomené bèé? Vèn kú a leéy a dzə̀ áwune, a vé‑éè sə́ ven fó ŋgeʼ, aá sə́. Òó mbaà Juda, anyùy véné dzə̀ nyanyày, aá dzə̀ é mentey mo ŋkà se laʼ sén sí dzəə̀n.

Remrí 32:37

Á bèy, é Nyùy Tàr nèn a ghay e Isray jii, «Anyùy véné bèé lèn? Kilán ke vèn‑eè yéʼti sho ji kí kiŋsìn ven kí bèé?

Aysaya 45:20

«Ven vee vitúm veé kitu ke nsay, vèn bánén. Wìr dzə̀m wo wù bòyìn fó rər se sí tònèn woŋ, vèn báʼtí. Á ku kòʼtí e mǒ mentsə̀m, e neèr vinyo, aá tar. Wír ve á béʼ mebvə̀me yòʼ kì kifá ke á yii, áwune ve á ghvə́m mebvə̀m, a bó yòʼ dzə̀ mè sə̀ áwune.

2 Wòŋ 28:22

Yì‑iì dzə̀, a vinyo ve Fòn Ahas vi fóy ne fóyin, Fòn Ahas və̀n ku shaà fo mbìy, a bùʼtì vinyo ve ví wáa tinsín Nyùy Tàr, e shaà mo wù‑uù buʼtì fo mbìy.

Atǎr Nsaʼ 10:14

Ŋgeʼ si lóo dzə̀r ven, vèn dù, a toŋ aànyùy ve vèn ghvə́mée, aá wáa bòyìr ven.»

Remrí 32:38

Kí áwune‑eè rə́si yí vidzə̀ vé cù yén, nó cu yén melùʼ. La áwune si lò lèn, e sə̀ ven á? La áwune si wìy, a kìŋsìn ven á?

Jeremia 44:8

Vèn fer anyùy e wó yéné é nsay Ejiv fèn fo vèn wìyìn, a dzə, ton kiláy, cu sho, ŋáʼar dòʼshwíiy wom ji ka? Vèn taʼ ji á yiì laàr ven, é vitúm veé kitu ke nsay vi li yír yén ji liy, a jàʼ ven jáʼan a?

Aysaya 46:7

Vé beʼe shúr shibvə̀m shìn, neer e mbèʼ, á nèn dù, e tùúy. Á du, tiir fo á kì naŋsin ne, la shí yòʼ kfə̀n wàʼ fo fo, wìr wàa wìy, a mbaà aàgháʼka vəə́, a bó yòʼ dzə̀ shí bìnèr, a bó yòʼ dzə̀ shí yù, e sə̀ wun.»

Jeremia 18:15

Yii bèy, a wír vémé ŋwày ne mo. Á sí ton kiláy, cu anyùy kisaŋe shó. Anyùyi yií, áwune wáa bàyrìn e dzəə ye á kì ghán sho, dzə́ə, ye dzəə̀n kimvə́mvə ké dzəə, e nèn lò, e bìn a dzə̀ é dzəə ye toʼrìn, dzə́ə, aá yoʼ nàŋsín, yì táʼám.