Jeremia 10:12 - ŊWÀʼ NYÙY

¹² Kù‑uù bòm Nyùy kitú ke nsay e vitaáví və́ ví, e bàʼrì ndzə e vifií və́ ví, e nèn fèr yúv mo kiìn wun, wú kfə́vsí.

Jeremia 10:12 Referans Kwoze

Ŋwàʼ Jov 9:8

Kù‑uù bòm wun yúv, e sàŋrì fo, e sə̀r rìbà ndzə̀v fo wù wáa tsəynín.

Kèʼlo 1:1

Yì‑iì dzə̀ fó mbìy, Nyùy‑iì bòm yúv wùn à nsay.

Ŋgàn 3:19

Nyùy Tàr‑iì bòm kitú ke nsay a dzə̀ e vifií və́ ví, e tàm yúv e kiíy rəə́.

Aysaya 40:22

Dzə̀ Nyùy Tàr wo wù màʼàn kàvàʼ və é ntoò yùv. Wù maʼ sí fo fo, lóo leéy wír veé nsay, á wàa dzə aŋeérín moo vintàn. Wù lo, wù sàŋrì yúv mo wìr sàŋrì ndzə̀y, e sàŋrì, kù mo wìr tàm kibàn kée beè sho.

Kolosia 1:16

A kí dzə̀ jii, Nyùy‑iì wày á vitaáví vidzə̀m a dzə̀ e wùn kiwo, wù bóm vifá vidzə̀m. Wù bóm veé yuv, e bòm veé nsay, kìn dzə̀ vifá ve á yéné, kìn dzə̀ ve bó á yòʼ yéné. Ku kfə̀n bòm wun vifá ve ví kér vitaáví é ndzə vidzə̀m, kìn dzə̀ nshèelav se Nyùy, kìn dzə̀ *anyùy ve á ghán e shwer. A Nyùy‑iì fò vitaáví, wù bóm vifá vidzə̀m bèy ji ví wáa yu a dzə̀ á fo fo.

Joon 1:3

a Nyùy‑iì wày vitaáví a dzə̀ e wùn kiwo, wù yiì, vifá vidzə̀m vi wáa dzə. A bó kifá kímóʼ kí yòʼ dzə̀ shó ke kí dzəə̀n, a bó yòʼ‑oò yiì wun, é bo kí keʼ, a dzə.

Nsùyrì Nyùy 24:2

Yì‑iì bòm wun nsay, e wày kinsə̀ŋ e rìbà ndzə̀v, nsay wáa taa e kitu ke ndzəv.

Sekariya 12:1

Rə̀n dzə̀ ntum yeé shií, a dzə̀ ntum Nyùy Tàr, a yì kum wír veé Isray adzə̀m. Kù dzə̀ jí Nyùy Tàr wo wù‑uù sàŋrìn yúv, e tùúy kitú ke nsay fo, e bòm wír, e wày kiyoy e wùn wó.

Jeremia 32:17

«Àshè, Nyùy Tàr woo Taà Ndzə, dzə̀ wò wo wò‑oò bomen yúv wùn à nsay e vitaáví vé ve ghaʼán ví, wò wo à dzəə̀n e gháʼtín. Kinyo ke a dzə̀ kí ghàʼ wò ki yòʼ dzə̀.

Jeremia 10:13

Wù baʼ jí fo shuù, ndzə́v yeé yuví wàa dzə̀mkìr. Wù lo, wù wìy e mbàʼ fo buu se ndzə. Wù lo, wù yiì, wuú wàa lo, a bàvkìr, lo, wù fə̀ə́r shwér fo wùn virə̀ʼ vé lèm.

Aysaya 49:8

Nyùy Tàr kfə́n a suúy e wìr və lìm jii, «Mò‑oò ji ji m wáa sə wíri, a m kì yù ne tóŋ yé, e shàm wò. Mò‑oò lóo lùŋèr wíri, e nèn kù sə̀ wò. M lèm ne wò ji kilaa ke *mensàŋ me vèr à wíri, aà wíy siìr wíri aáwuné nsay, é wíri kfə́n é nsay ye yì‑iì dzəə̀n yéev féyì feyì, é bo yì kfə́n é vifə̀m.

Aysaya 48:13

Yì‑iì wày mo kinsə̀ŋ ke nsay e wó yémé, e sàŋrì yúv e kiwó kém ké yìy kí. M tooy vifá vìn, ví nànèn é yuv ghàn mòʼón.

Aysaya 45:18

Jí sìn si dzə̀ sé Nyùy Tàr. Dzə̀ wun Nyùy wo wù‑uù bomen yúv wùn à nsay. Wù‑uù lì ghán, e bònen nàvtì feyì ji ví fiʼ wìy shìíy. Wù yòʼ‑oò lo bòm nsay ji yì wáa tiy kisáŋ. Wù‑uù bòm ji wíri fíʼ a dzə sho. Kù dzə̀ wun wo wù yoŋ jii, «Dzə̀ mo Nyùy Tàr, a bó Nyùy wùmòʼ yòʼ kfə̀n dzə̀, e shaà mo.

Aysaya 45:12

Yì‑iì bòm mo nsay, e bòm wíri, e lèm ji á wáa dzə sho. Yì‑iì bòm mo yúv, e bòm vifá vee fó, e lèm fo.

Aysaya 44:24

Nyùy Tàr wo wù‑uù tinen ven, wun feyì wo wù‑uù bomen ven, e nàŋsín e bvə̀m, wù suuy jii, «Dzə̀ mo Nyùy Tàr wo m bomen kifá kidzə̀m. Kù‑uù bòm mo yúv, e sàŋrì fo, e bòm nsay, yì wáa neŋ ji moòr. Dzə̀ la wo mò‑oò yii vinyo vìn, a wù dzə̀ fó?

Aysaya 42:5

Nyùy Tàr kù dzə̀ wun wo wù‑uù bomen yúv, e sàŋrì moo kibàn ke tamén kí. Wù‑uù nàŋsín, e bòm nsay wùn à kifá kidzə̀m ke kí dzəə̀n shó ki. Kù yii wun, é bo wìr dzə̀m wáa ŋèʼ, a kù fó wun vitaáví e kifá kidzə̀m keé kitú ke nsay ki. Wun woo Nyùy Tàr wo kù jòʼsìn wun ji Nyùy nén a suúy e ŋgaà və lìm jii,

Nsùyrì Nyùy 104:24

Rúrú, Nyùy Tàr, lim yée kùʼ e ŋàŋén. Wò‑oò bòm vifá vidzə̀m, a dzə̀ mo vifií vé vi dzəə̀n vishoón. Kitú ke nsay ki kù rún e vifá ve wò‑oò bomen ví.

Nsùyrì Nyùy 33:6

Nyùy‑iì sùŋnín suŋnín, yúví nèn a dzə e bómén, e yòŋ yòŋèn fó shuù, vifá veé yuv ví nèn a dzə.

Ŋgàn 30:4

Yì‑iì kòʼ ne la é yuv, e dù sə̀y? Yì‑iì bàʼtí ne la shwér, e kfə̀vtí e wun mvə̀m kiwo? Yì‑iì kùr ne la wuú é mbàʼ mo wìr kùr kifá e ndzə̀y? Yì‑iì tùúy ne la vitóŋtóŋ vé ndzə? Yír ŋgaàŋe dzə̀ ji la, yé wan ji la? Suúy e mò, aà fèn kì.

Nsùyrì Nyùy 119:90

Kinyo ke wò‑oò suuyin kí kù wíy a tiy fo, a tiy fo, fo ŋgwàʼ se sí kóʼ si sidzə̀m, aà tùúy ne kitú ke nsay, kí wáa tiy ji ŋkǐŋ.

Nsùyrì Nyùy 78:69

Wù‑uù bòm lav ye á cu wun sho fo, yì kóʼ é yuv moo kirùmèn, a tiy kitávín moo nsay ye wù‑uù bomen, yì wáa dzə ŋkuuŋkùŋ.

Ŋwàʼ Jov 26:7

Wù‑uù sàŋrì yúv é kitu ke kirə̀ʼ, a fóo dzə̀ kisáŋ, e tìír kitú ke nsay e kirə̀ʼ, a kifá ki yòʼ tómé.

Nsùyrì Nyùy 104:2

rán yée súm sá wò bèy. Wò‑oò bòm yúv, e nàsì moo kibàn ke tamén kí,

Nsùyrì Nyùy 93:1

Nyùy Tàr sáʼ vifon. Wù maʼ ndzə̀y, a kù dzə̀ vikuʼùy və́, kúr se kurín sí, a kù dzə̀ vitaáví və́ vé saʼ. Wù tùúy ne kitú ke nsay, a bó yòʼ dzə̀ kifá ki sə̀ʼ.

Kèʼlo 2:5

a bó kikwiíy, kìn kifá kímóʼ kí yóʼ ne fəə̀ é kwaʼ, bìʼ fo wù yòʼ‑oò ló ne yiì ji wuú wàá ló é kitu ke nsay, a bó wìr wo dzə̀ wù wàa lìm nsay yòʼ fə̀m sì sá.

Ŋwàʼ Jov 37:18

A dzə̀ à sə̀ Nyùy, e sàŋrì yúv, wú vèmèn, a shwinín kisha ke á shèŋrìn, kí wáa bàvkìr a?

Aysaya 37:16

«Éè Nyùy Tàr woo Taà Mànjòŋ, Nyùy wìr veé Isray, wò wo a dzə́ e kàvàʼ e *vifá veé yuv ve ví kér vav si ví nsàn. Kù dzə̀ wò Nyùy vèn mòʼón wo à sáʼ vitúm veé kitu ke nsay vidzə̀m. Kù‑uù bòm wò yúv wùn à nsay.

Jeremia 10:16

Nyùy wo Jakov cu yòʼ dzə̀ moo vifá vee shooy. Dzə̀ wun wo wù‑uù bomen vifá vidzə̀m, e nèn shàv Isray ji və́ vee wír. Yír rəə́ dzə̀ Nyùy Tàr woo Taà Mànjòŋ.

Jeremia 27:5

‹Kù dzə̀ mo wo mò‑oò bomen kitú ke nsay e vitaáví vém ve wiy ví, mo və̀n, wo m dzəə̀n e gháʼán, e bòm wir dzə̀m, à nyám se sí dzəə̀n shó si. A dzə̀ kù kìíy mo wír wo m fó sho.

1 Wòŋ 16:26

Anyùy ve vitúm vi cúu dzə̀ mebvə̀m. Yii bèy, a Nyùy Tàr dzə̀ kfə́, a yì‑iì bòm wun yúv.

Nsùyrì Nyùy 65:7

Yii wò, a ndzə́v ye yí yorìi kpúrinè. Kù yii wò, bo yí kpúrín, a tiy ji nyaáŋ. Kù sər wò vitúm, bo ví wáa yàr melaà.

Jeremia 14:22

A dzə̀ anyùy kisaŋ veé vitum vìn, á sə̀ʼə́r wuú á? A dzə̀ mbàʼ, yì joʼsi ji mbàʼ, yì wìy e wuú á? Aày, kù jòʼsì wò, éè Nyùy Tàr woo Nyùy wor. Vèr kù tiir vifií vér a dzə̀ e wò wùn, bìʼ fo kù yii yii wò vinyo vìn vidzə̀m.