Jeremia 10:10 - ŊWÀʼ NYÙY

¹⁰ Yii bèy, dzə̀ wò Nyùy Tàr, Nyùy wo ru. Dzə̀ wò Nyùy wo tin, a vifon vé ví wíy shaàrì. Aà shwìíy kilòŋ, kitú ke nsay ki sə̀ʼsì, dòʼshwíiy wò kóʼ, la vitúm vi yòʼ tìím.

Jeremia 10:10 Referans Kwoze

Remrí 32:4

Nyùy Tàr dzə̀ Kilán, a lim rəə́ dzə̀ là kiloʼ. Dzə́ə sə́ sidzə̀m si kér suuyrú. Dzə̀ Nyùy, a yii rəə́ yii dzə́ yee tìítiy, dzə́ là jay. Yii rəə́ dzə̀, a kù dzə̀ ye ruú, e kfə̀n a dzə yee réŋé.

Aysaya 57:15

Wun woo Taà Vitu, wo viwìr və́ ví yòʼ kér mfìʼ, a wù kù dzə̀ shó ghán sidzə̀m, e dù, e jòʼsì, a yír rəə́ dzə̀ Ŋgaà wo Ranén, wù suuy jii, «M kù yii dzə́ kém é ntoò yùv, e mǒ kirə̀ʼ ke ranén kí, a m kfə̀n dzə́ sa vèr à wír ve á diy bìʼ ajay vév, néŋ e mǒ sii. M yiì bèy ji áwune fíʼ a ker fo á tiir vifií.

Nsùyrì Nyùy 76:7

À dzə̀ rú féyì, a wìr dzə̀m fan wò fánen. A dòʼshwiiy wò ŋàʼáy, a dzə̀ kòʼtí la e wò si?

Nahum 1:6

A wù shwìíy kilòŋ, tàm la wùn wun? A dòʼshwíiy və kòʼ, yù la fóo tiím? Dòʼshwíiy və baári moo və́y, wóʼó wàa bvəʼkír, a rèŋ e wun si.

Nsùyrì Nyùy 42:2

M yár jiŋ Nyùy wo wù dzəə̀n e tin. M wíy dù e wun lav e ghàn ka? M wíy a sùyrì wun fo e ghàn ka?

Nsùyrì Nyùy 100:5

Rúrú, Nyùy Tàr dzə̀ e juŋ. Koŋ ye wù koŋ wír vəə́ yòʼ wíy mày, a wù kù wíy a dzə vèsən áwune, e dù, e jòʼsì.

Ŋgaà Yen 20:11

M nèn yèn lúm kàvàʼ wùmòʼ, a wù fə́r fərín, e lòo leéy, e yèn, a wìr dzə́ sho. Mo wù yénsin fo, nsay wùn à yúví nèn nyèŋ fó si wo, e lày, la wìr yòʼ dzə́ə a yen.

Nsùyrì Nyùy 31:5

Nyùy Tàr, Nyùy woo ŋgaà suuyrú, m sí wáy kiyoy kém e wò kiwo, a m kì ji à wíy bòyìr mo.

Nsùyrì Nyùy 10:16

Rúrú, Nyùy Tàr dzə̀ fon viyá viyá là may. Wír ve á ghvə́m anyùy kisaŋe kù wíy lò fo wun nsay.

Nsùyrì Nyùy 18:7

Nsay nèn a sə̀ʼsì, a kar, sár se agwan si wáa sə̀ʼsì sa. Virə́ʼ ví wáa kar, bìʼ fo Nyùy‑iì shwiiy kilòŋ.

1 Joon 5:20

Wàn Nyùy‑iì lo wìy e nsay fèn, e mvə̀ʼ vifií vesən, vèsən wáa kiíy Nyùy woo rú, a vèsən sí dzə́ kintatì vèsən à Nyùy woo rú və̀n, bìʼ fo vèsən à Wan və Jesus Kristu suusin ne. A dzə̀ wun wo dzəə̀n Nyùy woo rú. A dzəʼə̀m yee là mayi dzə̀ a dzə̀ e wùn kiwo.

Hibru 10:31

Vèn wáa kiíy jii, a dzə̀ wìr kù a yàʼ, wúné wàa beemé, fó tiím e Nyùy wo wù gòʼòn kàŋ mòʼón si, é wù tínén nsaʼ ŋgaàŋ.

1 Timoti 1:17

Á kú a kwa Nyùy wo dzəə̀n Fon wo wù sáʼ ghán sidzə̀m, Nyùy, wo bó yòʼ dzə̀ wù kpù, a bó yòʼ dzə̀ wìr yèn sí rə́. Kù jòʼsì wun wo dzəə̀n rú Nyùy. Á kú a wùʼsì yír rə́ viyá viyá là may. Amen.

1 Tesalonika 1:9

Wìr dzə̀m kù‑uù sí fer mo vèn‑eè keerin ver é ghan se vèr‑iì wìyìn, e ghàn ven, kfə̀n fer mo vèn‑eè màʼtìn anyùy kisaŋe, e bìnkìr, e kfə̀n fo Nyùy wo wù dzəə̀n rú e tin, a yu a dzə̀ fo wun.

Lim Aŋgàa Ntum 14:15

«Wír vìn, vèn yii kin a dzə̀ ka? Vèr kù dzə̀ kér cáʼ ji wíri réŋréŋ moo ven. A vèr wìy fèn ji á fiʼti ven sáʼka Nyùy wo juŋ, é vèn fiʼ màʼtì anyùy kisaŋ vìn, e kfə̀n fo Nyùy wo wù dzəə̀n e tin. A dzə̀ Nyùy woo shooy wo wù‑uù bomen yúv wùn à nsay, à ndzə́ví, à vifá ve ví dzəə̀n shó vi vidzə̀m.

Malakay 3:2

«Wù wíy wìy e kishiíy kee shó, é boy la? Wù wíy sàsìn, e bvəy, é goʼ a tiy la e wun shwin? Wù wíy a dzə moo və́y wo á ton kisha sho, é bo á sheŋri, a dzə moo shuv wo wú fəʼ kijuŋ.

Habakuk 3:6

Nyùy lóo ghan, tiimè, nsay sə̀ʼ. Wù maʼ sí, leey vitúm, ví wàa yàʼ, virùmèn vi wàa kèrkìr, agwane wàa keèsì, a kfən e mboʼ. Á kù‑uù sì fó yàŋgùʼ, a dzə́ə sé wun woo Nyùy si kù wíy a dzə, e dù, e jòʼsì.

Mayka 1:4

Agwane yíi yaané e wun si mo kiláy kí yaàné e və̀y. Á yíi a leŋ, a səy, a sən viwoóy moo ndzə́v ye yí léŋ, sə́y fo gwan.

Nsùyrì Nyùy 146:6

wun woo Nyùy wo wù‑uù bomen yúv wùn à nsay, e kfə̀n bòm rìbà ndzə̀v, à vifá ve ví dzəə̀n shó vi vidzə̀m. Nyùy Tàr kù yii tíy e wun jì ghán sidzə̀m,

Nsùyrì Nyùy 145:13

Vifon vé vi dzə̀ vifon, a bó yòʼ dzə̀ ví mày, a sáʼ yée kù wíy a tiy fo e ŋgwàʼ sí ŋgwàʼ si, là may. Nyùy Tàr kù yii tíy e wun jì, a vinyo ve wù yii vidzə̀m vi kù din mo wù dzəə̀n e juŋ.

Nsùyrì Nyùy 114:7

Kitú ke nsay, á yàʼ e Nyùy Tǎr si. Á yàʼ e Nyùy Tàr wo Jakov‑iì ghvə́mé si,

Nsùyrì Nyùy 104:32

Wù leey kitú ke nsay leéyín, kí wàa sə̀ʼsì, kum agwan, á wàa cu və́y, a fam kindzə́ʼ.

Nsùyrì Nyùy 97:4

Kishèv kfə́ kí wàa ŋwàŋ, fóo wàa ran, kitú ke nsay ki wàa yen, a yàʼ.

Nsùyrì Nyùy 93:2

Nyùy Tàr, sáʼ yée kù‑uù sì, e kèʼ fo yàŋgùʼ. À kù‑uù sì, e kèʼ fo kèʼ.

Nsùyrì Nyùy 90:11

Kìíy ne la mo vitaáví vé kilòŋ ke kí shwiiy wò vi dzəə̀n? Kìíy ne la mo dzə̀ dòʼshwiiy wò yiì, wìr wàa fàn, a yàʼ?

Nsùyrì Nyùy 84:2

Rúrú, m yár jíŋ feyì yé a dzə e Nyùy Tǎr lav, a m yov shilív shidzə̀m, búri Nyùy, wun woo Nyùy wo wù dzəə̀n e tin.

Nsùyrì Nyùy 77:18

Kishèv ke wò‑oò tsənsin kí wáa wamkír fo yuv, a njàʼàm, a kàʼày kitú ke nsay kidzə̀m, a nsay səʼsì, yaʼà, mo fan wír kifá.

Ŋwàʼ Jov 9:6

Wù lo, wù yiì, kitú ke nsay ki wàa sə̀ʼsì, a sə̀ʼsì, à vitóm vi shó.

2 Wòŋ 15:3

Ghán símóʼ sí‑iì dàrnìn se Isray yòʼ‑oò ló a cù Nyùy wo ru. Taà cù woo ji wun yéʼéy áwune yòʼ‑oò dzə̀. Bìʼ bey, la áwune yòʼ dzə́ə a jùmrì nsər Nyùy.

1 Afòn 18:39

Wìr dzə̀m yén kinyo kìn, e gbù fo nsay e medà, a rəəmé jii, «Nyùy Tàr dzə̀ Nyùy, Nyùy Tàr dzə̀ Nyùy.»

1 Samuel 17:36

M yùyrí ne abvərə̀ʼ, e yùyrí nyám yee bear, a kù dzə̀ sá réŋréŋ mo m yíi lovtí e kiŋgà ké méŋnyùy keé Filistia kìn ki, ke kí taʼ mànjòŋ Nyùy ntéŋ, Nyùy wo wù dzəə̀n shó e tin.

1 Samuel 17:26

Davir dzə́r e wír ve vé‑eè tíy e wun ghaŋe jii, «A wìr lòo dzə e yùyrí wír woó Filistia və̀n, e tsə̀ʼ nshoórmé fo wír veé Israyí kitu, á fò ka e ŋgaàŋ? Kiŋgà ké méŋnyùy keé Filistia kìn ki dzə̀ la, bó a dzə ji wun shoór vé rə́r Nyùy wo wù dzəə̀n shó e tin.»

Atǎr Nsaʼ 5:4

«Àwáa, Nyùy Tàr, yì‑iì dzə̀ é ghan se wò‑oò loòn fó Seir, ghán se wò‑oò lév, fəə́ fo nsay Edom, kitú ke nsay ki‑iì sə̀ʼsì, wuú wáa lo fo yuv, mendzə́v mè wáa cuùrìn fo mbàʼ.

Remrí 5:26

Bó kí yòʼ‑oò yiì ne kòóy ji wìr fo wìr yú, a Nyùy wo wù dzəə̀n shó e tin súŋnin fo mvə̀m və̀y mo vèr yuun, ŋgaàŋ góʼ e tin.›

1 Timoti 6:17

M nén kfə̀n a suúy e wò jii, à kú a tir wír ve á kér bùʼ a dzə̀ woó ndzə fèn a ji lá á yòʼ a koʼór wún, a tiír vifií a dzə̀ é bùʼ foo fèy, bìʼ fo bó yòʼ dzə̀ á kìíy ghán se wù mayì. Áwune wáa tiír vifií a dzə̀ e Nyùy wùn. Fó wun vifá vidzə̀m, a wù fó nyanyày feyì ji vèsən wáa yu vijuŋ fo fo.

Joon 17:3

A dzəʼə̀m yee là may rə̀ne dzə̀ jii, wìr kiíy wò, wo kù jòʼsìn wò Nyùy wo rù, e kfə̀n kìíy sa mo woo Jesus Kristu wo wò‑oò tumen é ndzə fèn.

Matio 26:63

Jesus ku nèn a tiy, e làa yòʼ a ghay. Taà cù wo kuʼùn və̀y nèn kfə̀n sùúy sho jii, «Ku lìʼ, e kàn yír Nyùy wo wù gòʼòn kàŋ mòʼón. Dzə̀ wò *Mfə̀ə́r woo Wan Nyùy moo ŋgáŋ á?»

Matio 16:16

Simon Pita bìnèr jii, «À dzə̀ Mfə̀ə́r woo Wan Nyùy, Nyùy wo wù gòʼòn kàŋ mòʼón.»

Habakuk 3:10

aàgwane leey wò, yaʼà, a ndzə́ví kúŋ virə́ʼ, a ndzə́v yeé loònsayi yorkìrì, a shwéri tsə́y, kóʼor e yuv.

Joel 2:11

Kù danèr Nyùy Tàr mànjòŋ və və̀n, du aáwuné mbìy, wámkirì. Vé rər və́ víne dzə̀ nyanyày, aáwune ve á yú jí rə víne dzə̀ antav ve ghaʼtíné. Rúrú, kishiíy ké Nyùy Tàr kí dzə̀ kigháʼán, a kí beéme e ŋàŋ. A dzə̀ bòy la é kishiíy fen.

Daniel 7:14

Á fó wun vitaáví vé saʼ, e fò wun vikuʼùy, wù wáa saʼ vifon, é wìr dzə̀m fíʼ a lìm fo wun, kìn dzə̀ wir kitum kìka, kìn woó wòŋ vəné, kìn wù súŋnin a dzə̀ lám gha. Sáʼ rəə́ dzə̀ sáʼ, a yí kù wíy a tiy fo, a bó yòʼ dzə̀ yí wìy mày. Vifon və́ ví dzə̀, a bó yòʼ dzə̀ kifá ki wìy laàr.

Daniel 6:26

Sáʼ ye m fóo dzə̀ jii, «A wìr dzə̀ feé e mǒ wòŋ, bo wù kù kér fó a yunín, a ghvəm Nyùy wo Daniel ghvə́mé. «Dzə̀ wun Nyùy wo wù gòʼòn kàŋ mòʼón, a wù kù dzə̀ ji wun, e dù, e jòʼsì. Vifon və́ ví dzə̀ ve bó yòʼ dzə̀ kifá ki laàr, a sáʼ rəə́ kù wíy a tiy fo, e dù, e jòʼsì.

Daniel 4:34

«Viyá vee saàmbà vìy vi shaà, mo woo Nebukadnessar nán lèn sí, e lèéy yúv, vifií vém ví ku nèn kfə̀n é bàm. M wáa beèrì Taà Vitu, a burí wun, e kfə̀n a ghvəm wun wo wù dzəə̀n shó ghán sidzə̀m. «Sáʼ rəə́ dzə̀ sáʼ, a yí kù wíy a tiy fo, e dù, e jòʼsì. Kù wíy a saʼ wun vifon mo ŋgwàʼ si wíy a koʼ, a fo ghay e símóʼ sí.

Daniel 4:3

«Vinyo ve ví din vitaáví və́ ví shoò é ŋàŋ, a viŋgaʼnìn ve vinyò ve wù yii vi dzə̀ viwiíwíy. Kù dzə̀ wun fon ghán sidzə̀m, e dù, e jòʼsì, a sáʼ rəə́ kù wíy a tiy fo, mo ŋgwàʼ wíy a koʼ, a fo ghay e yìmòʼ.

Jeremia 23:36

Yii bèy, lá kí yòʼ dzəə wìy fəə̀ fo wìr shuù ji ntum ye Nyùy Tàr rəʼəyin wun sho rə̀ne. Bìʼ fo wìr wo wù yoŋ bèy sí fer a dzə̀ kfə́ kee kinyo, nèn bívir jí se mo woo Nyùy wo m dzəə̀n shó e tin, mo woo Nyùy Tàr woo Taà Mànjòŋ, wo m dzəə̀n Nyùy won.

Aysaya 37:17

Éè Nyùy Tàr, mvə̀ʼtì vituʼùr vé vi, e yuùrí. Éè Nyùy Tàr, mvə̀ʼ sí yée, e yèn búʼú. Yuúrí jí se Sennakeriv si, jí se wù tsənsin ji á shur wò sho si, wò woo Nyùy wo à dzəə̀n shó.

Aysaya 37:4

Mfòómé woó Assiriya kì wìy, a kuùrì Nyùy wo wù dzəə̀n shó, kuùrì bèn mo tàr wov woo fon kì tsənsin ji wù wàá wiy, e kuùrì. M lón ji Nyùy Tàr woo Nyùy wò ku yuùrí a liy sìn, e nyèr áwune. Á bèy, á bùnrì fo kibér ke wìr ke kí dzə̀ə́ sho ki.»

Nsùyrì Nyùy 68:11

Nyùy Tàr‑iì tsə̀nsí ntum, vikìy ló ntum rə̀n e ŋkfə̀n, a ghan, a fìʼtì jii,

Kèʼlo 21:33

Abraham siíy lò, e bìy kicí ke á yoŋ ji *tamarisk e Beersheba foo fèy, e cù Nyùy Tàr fó, wun woo Nyùy wo wù gòʼòn kàŋ mòʼón là may.

1 Afòn 8:60

é wìr dzə̀m woó kitu ke nsay wáa kiíy ji kù mày Nyùy Tàr wo dzəə̀n Nyùy, a bó wùmòʼ yòʼ kfə̀n dzə̀.

Nsùyrì Nyùy 29:10

Kù màʼ Nyùy Tàr kàvàʼ e kitu ke mbàʼ. Kù sáʼ Nyùy Tàr vifon ghán sidzə̀m, a bó ví yòʼ wíy mày.

Nsùyrì Nyùy 68:8

nsay nèn a sə̀ʼsì, wuú wáa cuùrì fo yuv. Virə́ʼ ví‑iì sə̀ʼsì e wò si, wò woo Nyùy woó Sinay, wò woo Nyùy wìr veé Isray.

Nsùyrì Nyùy 90:2

À kù‑uù sì Nyùy, é bo agwane wáa dzə. À kù‑uù sì Nyùy, e bóo wìy a bom kitú ke nsay wùn à wóŋe. Aà kù wíy a dzə Nyùy, e dù, e jòʼsì.

Aysaya 40:15

Rúrú, aá lì vitúm, a fìʼsìn Nyùy Tàr shó, bo ví dzə̀ vidzə̀m moo céʼ shindzə̀v she shí yii shém fo ŋkaà. A dzə̀ ji á wáa fìʼsìn, bo vitúm vìn vi dzə̀ là ndzə̀n, moo kibvər ke á fiʼ kifá, a kí gbu e mfìʼ. Vèn leéy, e yèn, Nyùy Tàr leey woŋ wo ndzə́ví kaarin, e tàr, a wú dzə̀ fo wun feyì moo kibvər ke kí kpuun é mbòŋ.

Aysaya 65:16

Á bèy, wìr dzə̀m wo wù wíy a lon kisəəvì é nsay Isray, wù kù wíy a kàn a dzə̀ yír Nyùy wo ru, é wìr wo wù yí kilìʼ, kú a lìʼ, a kàn a dzə̀ yír Nyùy wo ru. Kí wíy a dzə bèy, bìʼ fo m wíy neèr dòʼshwíiy wom, e làysìn vinyo ve bi veé fiirí.»

Jeremia 4:2

Wìr lóo kàʼ kinyo, lóo kàn yír yém, mo woo Nyùy Tàr, wù kù a suúy a dzə̀ suuyrú, a yiì vinyo vee réŋ, là kiloʼ. Á bèy, é vitúm vidzə̀m vi nèn a wìy, a yen mo, é m wáa səə̀vì áwune, aáwune nèn a tuy shwín ji m dzə̀ á wóov.»

Jeremia 4:24

M lèéy agwan, e yèn, aá səʼsì, e yèn, aàŋkoŋe shaasìnè.

Jeremia 50:46

Á wíy tòn ŋkàlaʼ Babilon, é kiléŋléŋ kí səʼsi nsay e dzə̀m. Ŋkěŋ toŋe wíy koʼ fo fo, é vitúm vi yúʼnín.

Jeremia 51:29

Kitú ke nsay ki sí səʼsì, ŋayìr bìʼ nyár ye yí dzəə̀n fó. Kinyo ke Nyùy Tàr sìysìn ji wun yii e Babilon ki kù tíy fo, a wù kù yíi yiì, é fóo du é vifə̀m, é la wìr yòʼ dzə́ə a dzə fo.

Joshua 3:10

Á wìy, wù wáa suúy aáwune jii, «Vèn yuúrí kinyo ke kí yíi yiì, é vèn kiíy ji Nyùy wo tin dzə̀ á vèn áwune, a wù kù yíi jùm vitúm fo nsay mo vèn nəə. Wù yíi jùm wír veé Kanan wùn à veé Hiti, à veé Hivi, à veé Perisi, à veé Girgashi, à veé Amori, à veé Jebusi.

1 Wòŋ 29:11

Feyì, feyì, Nyùy Tàr, à dzə̀ e gháʼtín. À tàv é ŋàŋ, e kfə̀n kùʼ e ŋàŋ. À yii só soón, a vifon vé vi dzə̀ ve wiy ví. Kér wò vifá vidzə̀m veé yuv, à veé nsay vi. Rúrú, Nyùy Tàr, kù sáʼ wò vifon, a kifá kidzə̀m ki kù néŋ a dzə̀ e wò sar.

Nsùyrì Nyùy 9:8

a saʼ kitú ke nsay là kiloʼ, a tinén nsaʼ se wíri é nsànloŋ.

Nsùyrì Nyùy 74:12

Rúrú, Nyùy, kù dzə̀ wò fon wom, e kèʼ fo yàŋgùʼ, wò wo à sə́ ver fo aŋgaà vér vibàné.

Nsùyrì Nyùy 76:8

Wò‑oò tsə̀nsí sáʼ fo yuv, wír veé kitu ke nsayi fán. Á fán, e sə̀tí shuu wóv.

Nsùyrì Nyùy 100:3

Vèn kú a binsí ji Nyùy Tàr dzə̀ á Nyùy. Yì‑iì bòm wun vèsən, a kér wun vèsən. Vèsən nén a dzə wír və́ moo njiì wo wù danèrì.

Aysaya 40:28

Vèn yòʼ‑oò ghàn ne kìíy kinyo à? Vèn yòʼ‑oò ghàn ne yù a? Nyùy Tàr kù dzə̀ wun Nyùy wo wù gòʼòn kàŋ mòʼón là may. Kù‑uù bòm wun kifá kidzə̀m ke kí dzəə̀n shó lèn. Wù yòʼ yii njoó, a bó wù yòʼ yii dórí. Wìr wo dzə̀ wù kìíy mo vifií vé Nyùy Tàr ví dzəə̀n yòʼ dzə̀.

Daniel 6:27

Wù lo, wù fə̀ə́r wír fo kinyò, e bòyìr ŋgaàŋ, a wù din visəəm, yii viŋgaʼnìn ve vinyò e yuv wùn ǎ nsay. Dzə̀ wun wo wù fəərin Daniel fo abvərə̀ʼə́ wo.»

Nahum 1:5

Agwane səʼsì e wun si, aŋkoŋe rèŋ réŋen. Nyùy Tàr bvə́ysinè, kitú ke nsay ki sə̀ʼsì. Kí wàa sə̀ʼsì, wìr dzə̀m wàa yàʼ.