Jeem 5:11 - ŊWÀʼ NYÙY

¹¹ Vèsən kì ji áwune sí yú vijuŋ a dzə̀ á vé Nyùy, bìʼ fo á kù‑uù tíy a dzə̀ e Nyùy wùn, e dù, e jòʼsì. Vèn kfən yù sá mo ŋgeʼ si‑iì kooy Jov, a wù kù tíy a dzə̀ e Nyùy wùn. A vèn kì mo Nyùy‑iì yiìn. Wù‑uù bìnèr ŋgeʼ sə́ siy ji vijuŋ, bìʼ fo wù yii shám wíri, rə́r mendzən fo áwune.

Jeem 5:11 Referans Kwoze

Jeem 1:12

Wír wo dzə̀ wù wàa sheʼrí dzə̀ wo wù tosin é mvə̀m ŋgeʼ, e làa yòʼ gbù fo kinyò kímóʼ kí, e to e jay. Mo kinyo ki mùmèn wun, wù só, wù wíy a ker vinə́ŋsí, a dzə̀ dzəʼə̀m yee là may ye Nyùy kàʼàn wír ve á koŋ wun sho.

Ŋwàʼ Fəə 34:6

Nyùy Tàr shaà e Mooser mbìy, e yòŋ jii, «Mo woo Yahweh, mo woo Yahweh, Nyùy wo wù rə́r mendzən me wíri, shám áwune, a bó m yòʼ táv shwiiy kilòŋ. M din koŋ yém ye wiyí e wíri, kfə̀n yii kinyo ke m kàʼàn áwune shó.

Matio 10:22

Wìr dzə̀m wíy a bàn ven, bìʼ fo vèn dzəə̀n wír vém. Yii bèy, vèn wáa kuumé jii, wìr wo wù wíy tiím kitávín, e dù, e jòʼsì waà wíy lùŋ.

2 Pita 2:9

Vinyo vìn vi nén a dìn mo dzə̀ Nyùy fə̀ə́r wír ve á yú kinyo kfə́ fó ndzə ye bi ye yì gháʼ áwune rə̀n, e kfə̀n a dìn mo wù lóvti e wír ve bií, shiy kishiíy ké nsaʼ,

Nsùyrì Nyùy 86:15

Yii bèy Nyùy Tàr, à dzə̀ ké, aà yii shám wíri shámén, kér mendzən, lo ji weè e dòʼshwiíy, din koŋ yé ye ghaʼáné e wír vée, tíy e wò ŋkàʼmé.

Ŋwàʼ Jov 2:10

Yii bèy, Jov ku bìnèr e yeè lav və jii, «À suuy kinyo a dzə̀ ke a kì dzə̀ sùúy kiyúŋ ké wiíy. A dzə̀ wòsò kù a səəsí a dzə̀ kinyo ke juŋ ki fo Nyùy, e làa yòʼ səəsí ŋgeʼ à?» Mo vinyo vìn vi‑iì kooyin Jov, bó Jov yòʼ‑oò lo jày, a sày Nyùy.

1 Pita 1:13

Vèn ku nèn wày vifií, a dzə kibáʼtín fó a yiì moo wír Nyùy. A kí dzə̀ jii, vèn tiír á vifíi vén a dzə̀ é vijùŋ ve Nyùy wíy bùʼ ven shó e ghan se Jesus Kristu wíy wìy.

Ŋwàʼ Luk 6:36

«Vèn wáa rər mendzən me wìr réŋréŋ mo Tàr won rə́rí.

Yòvdìy 3:22

Koŋ ye Nyùy Tàr koŋ wír vəə́ yòʼ wíy mày, a wù kù wíy a sham áwune, e dù, e jòʼsì.

Nsùyrì Nyùy 103:8

Nyùy Tàr kér mendzən, kfə̀n shám wíri, lo ji weè e dòʼshwiíy, din koŋ rə́ ye ghaʼáné e wíri.

Kintaŋ 14:18

à yòʼ yii táv shwiiy kilòŋ, à yii din koŋ yé ye wiyí e wír vée. À yii laysìn vinyo ve wíri buʼtì, kfə̀n laysìn shóʼór ye á shóʼor nsər sé. Yii bèy, a bó yòʼ dzə̀ à màʼtì á ŋgaà jay, é wù boy. À yii fó ŋgeʼlàʼ e wóné bìʼ jay atàr vév, kfə̀n fó e wón woné, à wón wón woné.

Hibru 10:39

Mo Nyùy fə̀m suuy bèy, bó vèsən yòʼ dzə̀ wír ve á tsəʼtì wún é bàm, e wìy nəə́ e kpu yee ŋkuuŋkùŋ, e lày. Vèsən dzə̀ késən, aá wày a dzə̀ shilív e Nyùy wùn, a kiíy ji wù wíy lùŋèr a vèsən.

Hibru 3:14

Kifá ke Kristu kér kidzə̀m ki sì sá késən, a vèsən fèn tíy a dzə̀ é kinyò ke vèsən‑eè wayin shilív shó fo mbìy, e dù, e jòʼsì.

Efesor 2:4

Yii bèy, Nyùy kú a kòŋ vèsən é ŋàáŋàŋ, a rər mendzən fo vèsən ghán sidzə̀m.

Mayka 7:18

Éè Nyùy Tàr, Nyùy woo moo wò dzə̀ vəné? Nyùy wo wù laysìn vinyo ve bi ve wíri yii. À laysìn ajay wìr vé ve á berkin, áwune vee wír vé ntayi. À yoʼ gòʼ, a shwiíy kilòŋ ŋkuuŋkùŋ. À kù yú vijuŋ a dzə̀ vé kòŋ ye à kér fo wír vée.

1 Wòŋ 21:13

Fòn Davir suúy e Gad jii, «M sì é ŋgeʼ ye tavín. Nyùy Tàr yii shám mendzən feyì. Bòŋ é wù yii ke wú‑úù yii e mò, e shaà ke yii wír.»

Hibru 3:6

Kristu nèn wìy wìy, a lìm kfə́ e Nyùy lav foo fèy shilív shimòʼón moo wán woo ŋgaà lav, a lav dzə̀ vèsən vin. Dzə̀ rú vèsən, a vèsən bèn ghár shilív, tiir vifií a dzə̀ é ŋkàʼmé wo Nyùy‑iì kàʼàn vèsən shó, e dù, e mày.

Efesor 1:6

A wù‑uù wíy lì vèsən bey ji wíri wáa burí wun fo mbùʼmé wo ghaʼán wo wù‑uù wíy bùʼ vèsən shó kisáŋ və̀n, bìʼ fo vèsən tatin vèsən à Wan və wo wù koŋ e ŋàŋ.

Ŋwàʼ woó Rom 2:4

A dzə̀ é ghanmóʼ, à wàa kwàʼtì ké jii, mo Nyùy kfəmen, a leéy wíri ji nyaáŋ, a rər mendzən mev, bo bó wù yòʼ wíy màʼ a ŋgeʼ e wò. Aà kwaʼtì bèy, à kù yòʼ a kuumé jii, Nyùy yii lèn bèy a dzə̀ cáʼ ji à fiʼ yèn jay wò, e bìnèr shilív shé.

Ŋwàʼ Luk 1:50

Wù rə́r mendzən me wìr ve á ghvə́m wun. Wù rə́r me atàr, kfə̀n rə́r me wòn vév.

Jona 4:2

Wù nèn a bùnrì, a suúy e Nyùy Tàr jii, «Éè Nyùy Tàr, kí kúvsín fó kinyò ke mò‑oò suuyin, a m dzə̀ə́ fo laʼ a? Á kinyè ké kinyò ke kí‑iì yiìn, é bo m túmnín, a leʼ, a dù e Tarshish. Mò‑oò kì jii, à dzə̀ Nyùy wo wù rə́r mendzən me wíri, shám áwune, a bó à yòʼ táv shwiiy kilòŋ. À yòʼ yii yar fó dìn koŋ yé ye wiyí e wíri. À yòʼ yii koŋ, a màʼ ŋgeʼ e wìr kitu.»

Joel 2:13

Lá vèn yòʼ a sàtì a dzə̀ ndzə̀y ji vèn fíʼ a dìn mo vèn dzə́ e nsòv. Vèn su a dzə̀ melív men mè, e kfə̀n é bàm e Nyùy Tàr woo Nyùy wón wùn. Wù rə́r mendzən me wíri, shám áwune. Wù yòʼ yii táv shwiiy kilòŋ. Wù yòʼ yii yar fó a dìn koŋ ye wù kér fo wír vəə́. Wù yòʼ yii koŋ, e màʼ ŋgeʼ e wìr kitu.

Aysaya 63:9

Vé‑eè lóo yen ŋgeʼ, a fə̀m dzə̀ rəné, wù kù a yen sa, e bóo lò, e tum nshìylav ye yì‑iì dzəə̀n e wun mentsə̀m, é yì fəə́r áwune fó fo. Kèʼ mo áwune‑eè kèʼèn, a dzə ji kitúm, wù kú a kòŋ áwune, a sham. Wù‑uù bòyìr áwune fo aŋgaà vév vibàné wo, kù mo wàn ghán, dórí, kitàr kí jàjàŋ.

Aysaya 63:7

M yíi a suŋnín kùm koŋ Nyùy Tàr ye wù kér fo wír vəə́, a yí yòʼ yii mayì, a remrí vinyo ve wù yii ve dzə̀ á wàa burí wun fo fo. M yíi a naàrì vinyo vìn, a shaà fo vinyò ve Nyùy Tàr yiìn e vèsən, nyanyày vinyò ve juŋ ve wù yiìn e wír veé Israyi réŋréŋ mo shammèndzə̀n və yii dzə́. M yíi a naàrì vinyo vìn, a shaà fo kòŋ ye wù yii koŋ wír və́ é ŋàŋ, tíy wùn áwune.

Ŋgaà Tàrvìnyò 7:8

Kimaysì ké kinyò ki bòŋ, e shaà keʼ, a lòweè bòŋ, e shaà kiŋkoʼòrwùn.

Nsùyrì Nyùy 119:132

Bìnkìr, e lèéy mo, e shàm mo, mo à yii yii e wír ve á koŋ yír yée.

Nsùyrì Nyùy 116:5

Nyùy Tàr dzə̀ ŋgaà shammèndzə̀n, kér wíri kijuŋ, rə́r mendzən mev.

Nsùyrì Nyùy 103:13

Mo kitàr kí yii géŋsin e wón vəə́, bo dzə̀ sá réŋréŋ mo Nyùy Tàr géŋsin e wír ve á ghvə́m wune.

Nsùyrì Nyùy 94:12

Éè Nyùy Tàr, bòŋ ké wìr wo à sərì, sər ŋgaàŋ, li nsər yè, tír wun sho.

Nsùyrì Nyùy 86:5

Rúrú, Nyùy Tàr, à dzə̀ e juŋ. À yòʼ yar fó a làysìn ajay wíri. À yòʼ yar fó a dìn koŋ yé e wír ve á bunrì wòo.

Nsùyrì Nyùy 78:38

Yii bèy, e yé ŋgaà mendzə̀ne, wù ku làysìn vinyo vév ve bi ví, e làa yòʼ laàr áwune. Mo dòʼshwiíy kù kív wun, a wù kfə́men à fó à fó, wù kú a sə̀r dòʼshwíiy və sə́rin, fóo laàr áwune adzə̀m.

Nsùyrì Nyùy 37:37

Wáy síi e wìr woo là nsem wùn. Wáy e wìr wo wù yii vinyo və́ tìítiy wùn. Wìr wo wù koŋ nyaáŋ dzə̀ wo wù wíy a ker rám.

Ŋwàʼ Jov 23:10

Ke m kiìn kí dzə̀ jii, wù kì dzə́ə ye m shoʼon, a ghan sho, a wù yíi tàr kinyo kém, é m fəə́sín moo *kisha ke mbàm ke baar kí.

Ŋwàʼ Jov 1:2

Wù‑uù kér wón vee vilum saàmbà, kér vee vikìy ataár.

Nehemia 9:17

Áwune‑eè tèn fó a yunín wò, e kfə̀n làysìn viŋgaʼnìn ve vinyò ve wò‑oò yiìn aáwuné mvəm. Vé‑eè tàv kitú, e shòʼ kilìmbìy ji kí li áwune, e kfə̀n shó e Ejiv fo vé‑eè reŋ vikwàn. Yii bèy, aà dzə̀ Nyùy wo wù yii laysìn ajay, shám wíri, rə́r mendzən mev. À yòʼ yii shwiiy kilòŋ cér. À yii din ké a dzə̀ koŋ yé ye wiyí. Bìʼ bey, à kù‑uù kfə̀mén, e làa yoʼ bìn ndzə̀m aáwune.

2 Wòŋ 30:9

A vèn lòo dzə, e bìnkìr, e kfə̀n e Nyùy Tǎr wùn, bo wù yíi yiì, é wír ve á koorin afə́r vén, wùn à wón véné shám mendzən mev, e siìr áwune é nsay fèn. Nyùy Tàr woo Nyùy won dzə̀ ŋgaà mendzə̀n, a kfə̀n dzə̀ ŋgaà nshámmé. Bó yòʼ dzə̀ wù bìn ndzə̀m e vèn, a vèn fen kfə̀n é bàm é wùn wó.»

Daniel 9:9

Yii bèy, Nyùy Tàr woo Nyùy wor, à dzə̀ ké, aà kù yii shám wír vé shámén. À lo, à làysìn ajay vér, fə̀m mo vèr tsəyin kóy vèsən.

Nsùyrì Nyùy 145:8

Nyùy Tàr yii shám wíri, kér mendzən, lo ji weè e dòʼshwiíy, din koŋ rə́ ye ghaʼáné e wíri.

Nsùyrì Nyùy 51:1

Éè Nyùy, shám mendzə̀n mem mè. Ku shàm mo, bìʼ fo à yii koŋ wír vé kóŋen. Sə́ʼsí ajay vémé, bìʼ fo à yii shám wíri é ŋàŋ.

Nehemia 9:31

Yii bèy, bìʼ shammèndzə̀n wò wo ghaʼán, à yòʼ‑oò lo laàr áwune, aà yòʼ‑oò lo bìn ndzə̀m aáwune. À dzə̀ Nyùy wo wù yii rə́r mendzən me wíri, kfə̀n shám áwune.

Ŋwàʼ Jov 1:1

Wìr wùmòʼ‑oò dzə̀, aá yoŋ ji Jov, a wù‑uù dzə́ e wòŋ wo á yoŋ ji Us. Wù‑uù dzə̀ là shilóm, tíy a dzə̀ é suuyrú, ghvə́m Nyùy, bin ndzə̀m é kinyò ke bi kí.

Jeem 1:2

Afə̀r vem, ŋgeʼ si lóo koóy ven, vèn kù a lì ji bòŋ a vishí vén, a fə̀m dzə̀ kfə́ə ŋgeʼ yee ka.

1 Pita 3:14

Aá fə̀m lò, a nyàvrì e vèn ji bìʼ fo vèn yii vinyo ve juŋ vi, vèn kù a sheʼrí sheʼrín. Lá vèn yòʼ a fàn wír vee shooy, a leéy kinyo ke á yii e vèn, é melív men mè wáa yàʼ.

Ŋwàʼ Luk 11:10

Vèn wáa kiíy ji wìr wo wù kooy kifá dzə̀ wo wù lóné. A wìr wo wù taʼ kifá waà yíi yen, aá mvəʼ shúu lav, é wìr wo wù kumrì nəə́.