Jeem 4:8 - ŊWÀʼ NYÙY

⁸ Vèn wáa koʼtí e Nyùy ghaŋ, é Nyùy wáa koʼtí sa e věn ghaŋ. Ven ve á buʼtì vinyo, vèn fəə́r wó yéné fó fo. Ven ve á tíy vèn à Nyùy melív mebaà, vèn fəə́r kwaʼtì ye bií fo věn meliv.

Jeem 4:8 Referans Kwoze

Nsùyrì Nyùy 145:18

Nyùy Tàr dzə̀ kibáʼtín fóo sə wír ve á mbaa wun. Wír feyì ve á mbaa wun shilív shimòʼón.

Hibru 10:22

vèsən ku nèn wày shilív e wun wùn, a beè a dzə̀ wun, a koʼtí e Nyùy si shilív shimòʼón. A dzə̀ vèsən wàa koʼtí bèy, bìʼ fo Jesus suùn ne melív mèsən, mè rán, a bó mè yòʼ dzəə́ sáʼ vèsən fó kinyò kímóʼ kí gheéy. Wù kfən sù wún wósən e mendzə́v me dzəə̀n me juŋ mè.

Malakay 3:7

Vèn kù‑uù sí ŋwáy sáʼ yém, e kèʼ fo atàr véné ghan, tén fó a yunín nsər sém. Vèn kfə́n é bàm e mǒ wùn, é m binkir, e lèéy ven. Suuy mo woo Nyùy Tàr woo Taà Mànjòŋ. Yii bèy, vèn ló kén, a dzər jii, ‹Vèr yíi ghan e le, e bóo kfən fo wò wùn?›

Sekariya 1:3

Á bèy, ku yòŋ e wír véné ji mo woo Nyùy Tàr woo Taà Mànjòŋ suuy aáwune á jii, ‹Vèn wáa koʼtí e mǒ ghaŋ, é m wáa koʼtí sa e věn ghaŋ.› Suuy a mo woo Nyùy Tàr woo Taà Mànjòŋ.

2 Wòŋ 15:2

Wù fəə́, e dù, e yèn Fòn Asa, e sùúy sho jii, «Wò woo Fòn Asa, e lì wír veé Juda, à veé Benjamine, vèn yuúrí kinyo ke m yoŋ ki. Nyùy kù yíi a dzə vèn áwune, a vèn fèn yéʼti e wun wùn. A vèn lò, a tàʼ wun, wù dìn kitú kfə́ e vèn. Vèn bin ndzə̀m e wun, wù bìn sá e vèn.

Jeremia 4:14

Éè Jerusalem, vèn su vinyo ve bi ví fo věn meliv, e fíʼ lùŋ. Vèn wíy keerí kwaʼtì ye bií ben, e wìy dù, e meé e le?

1 Joon 3:3

Kí nén a dzə jii, wìr wo wù leey fó mbìy, shiy Jesus, yii baamè vinyo ve bi ví, ji wun fíʼ a dzə là njò, réŋréŋ mo Jesus dzəə̀n.

Nsùyrì Nyùy 51:10

Éè Nyùy, fíyír shilív shém shí, é shí wáa dzə là shilóm, é m wáa yunín wò.

Hibru 7:19

Ntò se cù se Mooser‑iì wìyìn shó si yòʼ dzə̀ sí yiì, wìr ràn fo Nyùy. Yii bèy, a Nyùy fò ne vèsən dzə́ə ye fíy lèn ye vèsən wáa tiír vifií shó, a yì bòŋ feyì, e shaà ye mvə, bìʼ fo vèsən sí shaa sho, kóʼti e Nyùy si.

2 Korin 7:1

Ŋkar sem, mo Nyùy kàʼàn vèsən é kinyò fèn, vèsən ku nèn a nyeŋ vinyo ve ví kóʼoy fo Nyùy vidzə̀m, kìn dzə̀ ke wìr kwaʼtì fo wùn shiliv, kìn dzə̀ ke wù yii yiìn. Vèsən ku fò vitú vesən a dzə̀ e Nyùy ŋkuuŋkùŋ, a ghvəm wun, a yu a dzə̀ fó fo.

Esiker 18:31

Vèn maʼay vinyo ve bi ví ve vèn bùʼtìn vidzə̀m, e tìnsín mo shó. Vèn wáa ker shilív she fíy shi, a ker kiyoy ke sən kí. Vèn koŋ kpú ji ká wìr veé Isray?

Nsùyrì Nyùy 73:28

Fo kém kí, kù ghèén ji m wáa dzə vèr Nyùy. Nyùy Tàr sì kirə́ʼ kém ké kilìr, Nyùy, a dzə̀ wun woo Taà Ndzə, a m yíi a fìʼtì lim se wù yii sidzə̀m.

1 Wòŋ 28:9

«Wówò Solomon woo wán wom, kiíy Nyùy wo tàr won ghvə́mé. Á ghvəm vèn à shilív shé shi shidzə̀m, à kwaʼtì yée e dzə̀m, bìʼ fo Nyùy Tàr yii tar melív medzə̀m, a wù kfə̀n yii kiiy kwaʼtì e dzə̀m ye yí dzəə̀n e wìr vifii. Aà yiì a tàʼ wun, áà wáa yen. Yii bèy, à maʼay wun, bo wù yíi bìn ndzə̀m e wò, e màʼày wò ŋkuuŋkùŋ.

1 Pita 3:21

Kinyo kee shooy ki wáa dzə kisəəm ké ndzəv ye á wáy wír sho lèn, wù ràn fo wun vinyò ve bi ví. A bó á yòʼ wáy bèy ji á su a dzə̀ lóm fo ŋgaàŋ wùn. Dzə̀ kisəəm ke kí din ji ŋgaàŋ lón fo Nyùy a ji wù ku sù shilív sə́, é shí rán. A wù bòy fo wùn ajay a dzə̀ bìʼ Jesus Kristu wo wù‑uù fəən fó kpu,

Ŋwàʼ Jov 17:9

Yii bèy, wìr wo wù yúnin Nyùy kù yòʼ wíy a tiy a dzə̀ e wun mbòv, é wo wù yòʼ wáy kiwó e kinyò ke bi kí wáa kuy kuyín e wun liì.

Matio 12:33

«Á yii kiiy kicí ke dzə á yì a dzə̀ fó kifa ke kí koom sho. Kí koom kifá ke juŋ ki, la kí yòʼ dzəə kòóm ke bi kí. Kí koóm ke bi kí, la kí yòʼ dzəə kòóm ke juŋ ki.

1 Timoti 2:8

Ke m koŋ feyì ki nén a dzə jii, vintatì vidzə̀m vi lóo dzə̀ʼə̀m, vilum ámóʼó kù a dzə ve dzə̀ á wàa fo bunrì. A dzə̀ kù a dzə vilum ve bó á yòʼ wáyri wó e vinyò ve bi ví, e bóo kfə̀n a nàn wó yee shooy ji á bunrì. Ku kfə̀n a dzə sa wír ve bó yòʼ dzə̀ á wàa shwiíy kilòŋ, a taŋnín wùn à wíri.

Aysaya 29:13

Nyùy Tàr woo Tàr wor suuy jii, «Wír vìne wiy ji á cu mo, a kù dzə̀ fó shuù, áwune ghvə́m mo a dzə̀ e shúu. Yii bèy, a melív mev mè dzə̀ a dzə̀ fó səné. Áwune cu mo kisáŋ, bìʼ fo á jumrì nsər a dzə̀ se bomen wír, a yeʼéy.

Nsùyrì Nyùy 24:4

Kù dzə̀ wàa dzə wír woo là njò, wo bó shilív shí yòʼ sáʼ wun fo kinyò, a bó wù yòʼ ghvə́m anyùy kisaŋe, a bó wù yòʼ kan yìr Nyùy kisáŋ.

1 Pita 1:22

Mo vèn kù sí tíy a dzə̀ e Nyùy kinyò ke ru kí, vèn nén a ker melív me juŋ mè lèn, me dzə̀ vèn wàa kòŋ afə́r vén ve vèn áwune tíy e kinyò fèn kijuŋ. Vèn ku nèn a kòŋnìn bèy shilív shidzə̀m,

Nsùyrì Nyùy 18:20

Nyùy Tàr laámé mo, bìʼ fo m yúnin wun, e laàmé feyì, bìʼ fo bó m yòʼ kér jay.

Nsùyrì Nyùy 26:6

Bó m yòʼ yii wáy wó yém é kinyò ke bi kí. Nyùy Tàr, m kù yii rə́si a dzə̀ e wò lav,

Lim Aŋgàa Ntum 15:9

Wù kfən làysìn ajay vév, bìʼ fo áwune‑eè wayin shilív e Jesus wùn, e làa yòʼ a dìn jeéyjeéy fo vèsən à wír vee shooyi gheéy.

Kèʼlo 18:23

Abraham nèn kòʼtí e Nyùy Tǎr ghaŋ, e dzə̀r jii, «À yíi tatí, e laàr wír ve juŋe wùn à ve bií a?

Ŋwàʼ Jov 16:17

Yii bèy, bó m yòʼ fə̀m‑eè lo bùʼ rə́mrə́m kinyò, m kù‑uù bunrì Nyùy shilív shimòʼón.

Matio 15:2

«Wón vé lìme shóʼor liì wòŋ wo atàr vesən vee fó mbìyi‑iì lèmèn bìʼ ka? Áwune yòʼ su wó e dzəə ye dzə̀ wìr sù shó, e bó a yikír.»

Jeremia 4:11

Ghán see shooy si yíi gheén, aá wáa fìʼtì e wír veé Jerusaleme ji Nyùy Tàr yoŋ a jii, «Kinsəm ke biibí kí sí wiyì, kí wiy fo vitu ve agwan veé woʼ, e teè wír vém, a bó kí yòʼ wiy e njà shwer wo wú feési virə́ʼ feesín.

Ŋwàʼ Jov 9:30

A m fə̀m sù wún e mendzə́v me mè rèŋèn fó mentiy mè, e rànér wó yém e kisə̀n ki,

Aysaya 13:15

Vé rərí wíy yen wír, a wù taʼ, e leʼ, aá sovti, e yùyrí. Ghár wír e kiwo, é ŋgaàŋ ku kpù yé mensəə.

Nsùyrì Nyùy 73:13

Fəə́r ye mò‑oò fəərin vinyo ve bi ví fo mǒ shiliví lày kisáŋ, a su ye mò‑oò suùn njò yem, a dzə là shilóme kù lày kisáŋ.

Matio 27:24

Payler lòo yen ji bó dzəə̀ yòʼ dzə̀ə́, a wun lùmtín e kinyò fèn, bo lo, e fəə a melaà, wù nèn sùúy, á wìy e mendzə́v mè. Wù wáa sù wó rə́ shó e màŋgòŋ və̀y si, a ka kitú kfə́ jii, «Nyaa njò yem, bó m yòʼ kì fo wìr və̀n kpu. Ku kìíy ven.»

1 Samuel 14:35

Saul nèn bòm *kíy cù Nyùy Tàr, a yì‑iì dzə̀ wó mbìyi wo wù‑uù bomen.

Nsùyrì Nyùy 119:113

M ban abìnbìnteʼnsə́m, yii bèy, a m koŋ a dzə̀ Nsər yè.

Aysaya 58:2

Áwune lo kév, á kù a meenín e mǒ si mo kishiíy kí dzəə̀n, a laàrì sí ji á koŋ, e yeʼéy vinyo ve m taʼ ji á wáa yiì. Á yii, kù moo ji dzə̀ wír ve á yúnin mo, a bó á yòʼ ŋwáy sáʼ Nyùy wov. Á lón mo ji m ku fò á áwune sáʼ yee là kiloʼ, koŋ feyì ji bo á kì kóʼti e mǒ mentsə̀m.

Jeem 3:17

Kinyo ke kí din ji wìr kér rú vifií ve ví lo a dzə̀ fo Nyùy ki dzə̀ jii, ŋgaàŋ dzə̀ kfə́, a bó wù yòʼ wáy kiwó e kinyò ke bi kí gheéy. Wù kfə́n a dzə wir nyaáŋ, a ker wíri ji weè, a yuurí kinyo ke wìr, a sham wíri ghán sidzə̀m, a yiì vinyo ve juŋ vi é ŋàŋ. A bó wù yòʼ yii vinyo vìn, yuúri kisùúyjii, a bó wù yòʼ din wún.

Yòvdìy 3:57

Mò‑oò tóŋ, mbaa wò, à méʼ mo, e yòŋ ji lá m yòʼ wàa fàn.