Jeem 4:4 - ŊWÀʼ NYÙY

⁴ Vèn màʼày ne Nyùy, e kfə̀n moo wiíy wo wù ghán viŋkar. Bó vèn yòʼ kì jii, a wìr koò viŋkar wùn à vinyo veé ndzə fèn vi, bo wù sí ban Nyùy bánen a? Kí nén a dzə jii, wìr wo wù koŋ, a dzə ŋkar vinyò veé ndzə fèn, ŋgaàŋ lì ne kitú kfə́ á ji ŋgaà vibàn Nyùy.

Jeem 4:4 Referans Kwoze

Ŋwàʼ woó Rom 8:7

A dzə̀ mo dzə̀ kí kù a dzə, bìʼ fo wìr lóo tiír vifií a dzə̀ é vinyò ve koŋ mensə́ mvə, bo wù sí tún ké Nyùy. A bó yòʼ dzə̀ wù kfə̀n a kòŋ ji wun yú nsər Nyùy. A wù fə̀m kì koŋ fó yu, bo dzə̀ la wù yòʼ yù.

Galatia 1:10

Mo m suuy bèn, vèn yén sa ji bó m yòʼ suuy kinyo a ji wún wìri fíʼ a bòŋ. M suuy kém ji kí wáa bòŋ a dzə̀ á Nyùy. A m lò, a tàʼ ji m wáa sheʼér a dzə̀ wíri, bo bó m yòʼ dzə̀ rú ŋgaà lìm Jesus Kristu.

Joon 15:19

A vèn kì dzə̀ wír veé ndzə fèn, bo wír veé ndzə fène koŋ ven ji vév vee wír. Yii bèy, a bó vèn yòʼ dzə̀ wír veé ndzə fèn. Mò‑oò shòʼ ne ven, e fə̀ə́r fo fo, wír veé ndzə fène nén a bàn ven.

Matio 6:24

«Bó yòʼ dzə̀ wìr wàa lìm atàr abaà. A wù lò, a lìm bèy, bo wù yíi a bàn wùmòʼ, a kòŋ wùmòʼ, a yu kinyo ke wùmòʼ woo wír, a kay wùmòʼ. Bó yòʼ dzə̀ vèn wàa lìm fo Nyùy, e kfə̀n a lìm fo mbàm si.

Joon 17:14

M tiìsí ne jí sé aáwune, wír veé ndzə fène nén a bàn áwune, bìʼ fo áwune yòʼ dzəə̀n wír veé ndzə fèn, réŋréŋ mo bó m yòʼ dzəə̀n sá wír woó ndzə fèn.

Jeem 1:27

Wìr wo Nyùy yén ji wù yú rú kinyo kfə́ shilív shimòʼón, a bó wù yòʼ kér jay wùmòʼ, dzə̀ wo wù leey fo wón tsə̀ə́ wùn à vikǐy ŋkfəə, sə́ áwune. Kfə́n a dzə wír wo wù kim kitú kfə́, fo vinyo veé ndzə fèn vi bívír wun.

Ŋwàʼ woó Rom 5:10

Kí kfə́n a dzə jii, vèsən‑eè dzə́, yii vinyo ve bi ví, ban Nyùy bánen. Mo wù‑uù yiìn, Wan və kpú, e màn vinyo vee shooy, vèsən wáa dzə ŋkar sə́ lèn, bo dzə̀ vèsən wàa kiíy sa jii, mo Wan və fəən ne fo kpu, a wù kù yíi a dzə sho, bo wù kù wíy yiì sa, é vèsən luŋ, a dzə a vèsən à Nyùy.

Matio 16:4

Wìr woó ndzə yee lèn méŋ Nyùy, yii vinyo ve bi ví é ŋgeʼ, kfə̀n taʼ kisəəm a dzə̀ ké gha? Bó yòʼ dzə̀ m dìn. Vèn li kisəəm a dzə̀ ké Jona.» Jesus suúy bey, e nèn màʼtì áwune, a dù.

Hosea 3:1

Nyùy Tàr kfən lò, e sùŋnín e mò, a suúy jii, «Kfən dù, e dìn koŋ yée e yeè lav wò. Abaày, wiíy, a taà lav və kóŋ ben, wù gháʼ e gháne, e dù, e yèn lumèn wo sən. Kú a kòŋ wun réŋréŋ mo m kù dzəə́ koŋ wír veé Isray, fə̀m mo áwune loòn ne, a ghvəm anyùy ámóʼó, a kòŋ fó a cù áwune.»

Joon 7:7

Bó yòʼ dzə̀ wíri wàa bàn ven. A dzə̀ á wàa bàn a dzə̀ mo, bìʼ fo m tóʼti vinyo vév ve bi ví.

Nsùyrì Nyùy 73:27

Rúrú, wír ve á méŋ wòo kù wíy lày. À kù wíy laàr wír ve á bóʼti wò adzə̀m.

Ŋwàʼ Luk 19:27

Á bèy lèn, fo aŋgaà vém vibàn ve vé‑eè tén fo m wáa saʼ áwune, vèn wiy shó lèn, e yùyrí e mǒ si.› »

Matio 12:39

Jesus bìnèr jii, «Wìr woó ndzə yee lèn dzə̀ wir kisaŋ. Á méŋ Nyùy méŋén, kfə̀n dzə́r kisəəm ji ké gha? Bó yòʼ dzə̀ féyì, m dìn. Kisəəm kév kí kù dzə̀ ké Jona woo *ŋgaà ntum Nyùy.

Nsùyrì Nyùy 21:8

Nyàr, fòn yíi koo a aŋgaà və́ vibàn e wóo, e koo wír ve á ron wúu rə́ adzə̀m.

Jeremia 9:2

Kì yée fó a dzə ji kirə́ʼ kí dzə̀ é woʼ, kirə́ʼ kee fo a dzə̀ vé ghane wàa shiíy, bo m kì màʼtì wír vér, e lò fo áwuné ghaŋ. Áwune dzə̀ vé kinjàŋe adzə̀m, ŋgoo wìr ve á buʼtì vinyo.

Aysaya 57:3

«Yii bèy, ven vee wón aŋgàa səm, ven vee rám vé kinjàŋ wùn aàsàkìi, vèn kóʼtí fen, e yuùrí kinyo ke m yoŋ ki.

Nsùyrì Nyùy 50:18

Vèn yén shóŋ, á kfə̀n ji ŋkar sə́, shém ŋgoo wír ve á li vikìy wíri.

Jeremia 2:2

«Dù, a tiisí, é wìr dzə̀m woó Jerusalem wáa yu ji mo woo Nyùy Tàr suuy a jii: « ‹Isray, m kuúme mo wò‑oò wayin shilív e mǒ wùn, aà dzə̀ə́ ji wánlè ŋgòn. Wò‑oò koŋ mo é ghan se wòsò‑oò tatin vijín. Wò‑oò jumrì mo é kirə̀ʼ ké woʼ kí, nsay, a bó kifá ki yòʼ kúy sho.

Kèʼlo 3:15

M yíi màʼ vibàn e vèn wiíy nsàn, e kfə̀n màʼ e rám yée, à yé wiíyi. Wìr woo wun ram wíy bvə́ʼ kitú ké, áà wìy tè wun fo nsən kiwuù.»

Esiker 16:32

Jwè, wò woo wiiy visàkì, à diy vilum, shaa lum wò ji ka?

1 Korin 1:20

Wìr wo dzə̀ wù kfə̀n a dìn vifií bèé lèn? Kìn dzə̀ ji ŋgaàŋ duŋrì ŋwàʼ, kìn dzə̀ ji wù kì mbìʼ woó ndzə yee lèn. Nyùy dìn ne ji vifií vé wìr veé ndzə fèn vìn vi dzə̀ á kiyúŋsì.

1 Korin 1:21

A bó wun woo Nyùy wo wù kiìn vinyo vidzə̀m yòʼ‑oò lo biìmé ji dzə̀ wíri kìíy wun a dzə̀ fo áwuné vifii. Wù‑uù sìysì ji wun luŋer a dzə̀ á wír ve á biimen kinyo ke vèr fiʼtì, aá shéʼ sheʼén ji vinjeenjèm kìn.