Jeem 3:6 - ŊWÀʼ NYÙY

⁶ A kiliímé ki kù dzə̀ moo və́y vən. Vinyo ve bi veé ndzə vidzə̀m vi tàtí, a tiy a dzə̀ é kiliimé, e nèn ràm fo fo, e bìvír wún wìr e dzə̀m. Dzəʼə̀m wìri lo, yí bìr e dzə̀m mo ŋgaàŋ shwì a dzə̀ é və̀y. A kù sə̀ʼ kiliímé və́y woo shooy, a kí lì a dzə̀ fo Satan kiy.

Jeem 3:6 Referans Kwoze

Ŋgàn 16:27

Wìr kisaŋ yii bá kfə́ a dzə̀ kinyo ke bi kí, a dzə̀ shuu vəə́ tòn kirə́ʼ.

Maak 7:15

Kifá ke wìr yí, a kí nəə nə̀ə́n é bvə̀m ki yòʼ dzə̀ kí bìvír ŋgaàŋ. Kù bívir kinyo ke kí fəə́ fo wìr shuù. [

Ŋgàn 15:1

Wìr binèr kinyo ji weè, kí wàa ker kimán, binèr ji shwǎŋ, kí ŋàʼár dòʼshwiíy.

Ŋwàʼ Luk 16:24

Wù nèn a jàŋ jii, ‹Taàtá Abraham, ku shàm mendzən mem mè, e tùm Laasaror, é wù wáy wan kiwo e mendzə̀v, e wìy, e rəə̀r kiliímé kém shó. M yén ŋgeʼ ye tavín é mvə̀m və̀y fen.›

Ŋgàn 6:19

tiím yée tiím vinjen ve kisaŋ vi, à mbvəərì wóo màʼ e wírí nsàn.

Nsùyrì Nyùy 140:3

Jí se sí fəə́ fo áwuné kilayláy sí dzə̀ ji ndzəʼ, ndzəʼ, wo dzə̀ wù yùyrí wír mo tè búv.

Nsùyrì Nyùy 64:3

Áwune sáy viliímé vév moo shwàʼ rə̀r. Á maʼ lám wo bií mo wìr màʼ mvən.

3 Joon 1:10

M wíy wìy, yén ven, é m tóʼtí vinyo və́, é wíri yú mo wù súʼ kinsuʼ, bóʼti vinyo ve kisaŋ vi e mǒ bàm. A bó yòʼ mày kee shooy. Wù tèn sá fó a ker afə́r vesən ve á gháné, kfə̀n sháʼnin fo wír ámóʼó wáa səəsí áwune. Á lóo səəsí, wù nèn a jùm áwune fó kintatì.

Jeem 2:7

A kù dzə̀ sá áwune ve á rə́si bívir yír Taàtá won Kristu ye Nyùy shuùn ven shó ji wír və́.

Lim Aŋgàa Ntum 6:13

Wír vìyi kfən wìy e vé kimboʼtì ámóʼó, á wáa toy vinyo e Tefan bàm, a suúy jii, «Bó wìr və̀n yòʼ yii dzə́ là fó kù a kuùrì *lav cù rə̀n wùn à *Nsər Mooser.

Lim Aŋgàa Ntum 5:3

Pita nèn dzə̀r shó jii, «Ananiar, à biìmé, Satan nəə́ e wò shiliv, à wíy, a boʼtí Kiyoy ke Ranén kí ji ka?

Matio 12:24

Wír veé mbìv *Farasi ámóʼó yú mo wíri gháynin bèy, e nèn a toyír ji fó a *Beseber wo dzəə̀n fon anyùy vitaáví e Jesus, bo wù wáa kàntì anyùy, aá wáa màʼtì wíri.

Matio 5:22

M nén a dùŋrì kém jii, a wìr lò, a shwiíy kilòŋ wùn fər və, bo wù kù dzə̀ sá e mvə̀m nsaʼ foo fèy. A kù dzə̀ réŋréŋ mo wìr wo wù kuùn fə́r və kúun kér sa nsaʼ. Wìr maysi, e yòŋ fə́r və ji kiŋgà ké kifa ke Nyùy, bo wù sí bin a dzə̀ é dzəə̀ və̀y.

2 Samuel 19:43

Wír veé Israyi bìnèr e veé Judàa jii, «Vèr kér ghay e Davir mvə̀m vifòn kilíŋ e ghvə̀m. Kér ver Fòn Davir feyì feyì. Vèn kì kày ver ji ka? Lá vèn yòʼ làysìn ji dzə̀ á ver wír mbìyi vée shù ji á siir á fon e bàm.» Á wáa taŋnín bèy, wír veé Judàa wáa nyarkír aáwuné kisuŋnìn, a shaà veé Isray.

Ŋgaà Yen 19:20

Á nèn tàm, wù koó nyám ye beemén rə̀y wùn ŋgaà ntum və wo wù‑uù rə́si ghán fo wùn mbìy, shóʼ virom, bóʼti wíri shó. A wù kù‑uù bóʼti a dzə̀ wír ve vé‑eè kér nsáŋti nyàm ye beemén rə̀y aáwuné wùn, ghvə́m kibámmbó kfə́. Mo á koon áwune, e nèn dù, e màʼ e kimbiirìn ke və́yí bo sho, baári moo mekàŋ.

Ŋgaà Yen 18:23

Kikaʼày kí yòʼ dzəə́ wìy ban fo feyì gheéy. A bó á yòʼ dzəə́ wìy yu sa ŋkěŋ vijin fó. Ŋkàlaʼ rə̀n‑eè ló a dzə feyì. Wír ve vé‑eè kávnin wáy vəə́ kù‑uù dzə̀ vitàm e kitu ke nsay adzə̀m. Wù‑uù lèvtí woŋ dzə̀m e sə́me.

Ŋgaà Yen 13:14

Nyùy ku nèn màʼtì wùn nyàm yee fó mbìy rə̀y wáa ghan, yì wáa yiì viŋgaʼnìn ve vinyò bèy, e bòʼtí wír veé ndzə sho adzə̀m. Yì nèn wìy lò, e bàyrí wíri, á fèr kibámmbó ke kí wáa shwinín nyam mbìy ye vé‑eè lemerin e nyùy, bo yì bónén rə̀y.

Ŋgaà Yen 12:9

A kintìŋ ke kigàgǎʼsòŋ ke vé‑eè jùmèn kin ki dzə̀ yó ye yì‑iì siìn fó ŋgùʼ, a dzə̀ wun wo wù ghán ndzə e dzə̀m, bóʼti wíri, aá yoŋ yír rə́ ji Satan, a dzə̀ ji Tavmènàŋ. A vé‑eè jùm, e màʼ a dzə̀ é nsay wùn à nshèelav sə́ sí sidzə̀m.

2 Pita 3:3

Kinyo ke kuʼùn ke m taʼ ji vèn kiíy kí dzə̀ jii, ndzə wíy kèʼ may, é wír ámóʼó fəə́, a sheʼ kinyo ke Nyùy shéʼén, a yiì a dzə̀ vinyo ve mensə́ mev mè koŋ vidzə̀m.

Titur 1:11

Á kér fó a sə̀r wír vee bey, bìʼ fo áwune bvəər vifií vé wíri. Lóo dzə láʼ yímóʼó, la à yòʼ dzəə yèn wír wo wù kiìn fo wù tíyí. Aá yéʼey vinyo ve bó yòʼ dzə̀ á wàa yeʼéy, bìʼ fo á kù kér shií a dzə̀ é mbàm.

Lim Aŋgàa Ntum 20:30

A wír ámóʼó kù wíy fəə sa a dzə̀ fo věn mvəm, a boʼtí aŋgàa biimé, a sə̀ŋrì ámóʼó, aá wáa kfən aáwuné mbìv.

Jeremia 28:16

Bo ke Nyùy Tàr yoŋ ki dzə̀ jii, ‹M sí yìi laàr dzəʼə̀m yé fo kitu ke nsay. À yíi kpu e mvə̀m kiya fèn, a dzə̀ bìʼ fo à bayirin ne wíri, á táv kitú fo Nyùy Tàr.› »

Jeremia 20:10

M yú, aá ghvəvrì mo mbìv sidzə̀m, virə́ʼ vidzə̀m vi sí beéme beèmén. Ŋkar sém sé tim sidzə̀m si sí suuy jii, «Á sómér wun, vèsən wáy wun e vé saʼá wo.» Á sí leey ji m bayrin, yoŋ jii, á lévtí wun, e kòóy kinyo kée màʼ wun sho, e nen siìr ŋkfə́tír.

Aysaya 30:27

Vèn leéy, Nyùy Tàr və̀sə kwaʼda, a wù wiyì. Dòʼshwíiy və shwí moo və́y, a kikfə́m ke kindzəʼ ki dzəm, kóʼó. Kisúŋnìn kfə́ kí kù sì nyár nyár, a kinyo ke kí fəə́ fo wun shuù ki ton virə́ʼ é njà və̀y.

Kintaŋ 31:16

Dzə̀ áwune vin ve vé‑eè jùmrìn ntir Balaam, e lèvtí wír veé Isray, á bìn ndzə̀m e Nyùy Tàr, é bo kifə̀ʼ ki wiy, e teè màŋgòŋ wìr Nyùy Tàr.

2 Wòŋ 13:17

Fòn Abija wùn à və́ vé rərí neèr wír veé Isray e mentey, e yùyrí wír ansə̀kì ghii tàn (500,000), a dzə̀ wír ve á kiìn móo màʼ rə́r kijuŋ.

2 Samuel 16:20

Absalom nèn lò, e yòŋ Ahitofel, e dzə̀r shó jii, «Vèsən lo, e yèe? Fó ver ntir yè.»

Remrí 13:6

«A tàm wìy lò fər wò woo wan yè won, kìn wan wò woo lumèn, kìn woo wiíy, kìn wiiy wò woó mbuùy kikùn, kìn ŋkar yè tìm, a levtí wò bámbám, a suúy ji vèn wun du, a ghvəm anyùy ámóʼó ve bó vèn aàtàr véné yòʼ‑oò ló ne kìíy.

Cù 24:11

Á lòo taŋnín bèy, wàn wiíy woó Isray nèn kuù Nyùy, e shòór yír rə́. Á lì, e wìy, e yèn Mooser sho, a yír yìy à wìr və̀ne‑eè dzə̀ ji Shelomit woo wan Dibri woo rám Dan.

Kintaŋ 25:2

Vikìy víne lo, á wàa bi áwune é ŋkàʼ se á yí, cu anyùy vév shó. Wùn áwune nèn a yinín, a ghvəm anyùy vee shooy.

Ŋgàn 7:5

é yí fíʼ kìŋsìn wò fo wiíy wo wù ghán viŋkar, leerì wíri e kiláyláy ke juŋ ki.

Aysaya 50:11

Vèn yuúrí, ven ve á səʼ vikaʼày ji ví fíʼ a kàʼày ven, vèn kú a ghan rì e vikaʼày vén vee shó vi. Ke m yíi yiì e vèn kí dzə̀ jii, vèn kù yíi bàyrìn, e gbù, a neŋ a dzə̀ é mvə̀m ŋgeʼ.

Jeem 3:7

A fə̀m dzə̀ kfə́ə nyàm rəné, bo wìr kù kì mo dzə̀ wù yèʼéy, e mèrìr. Aá kù‑uù sí yéʼey bèy sinín, kìn dzə̀ nyam kwaʼ, kìn shinə́n, kìn vifá vee moo yó, kìn sə́.