Jeem 1:1 - ŊWÀʼ NYÙY

¹ Ŋwàʼ və̀ne sàŋ mo woo Jeem wo dzəə̀n ŋgaà lìm Nyùy wùn Taàtá wòsən Jesus Kristu. A m sàŋ, a shàʼtì ven vee wír Nyùy ve á taʼrin, a dzə woŋ dzə̀m.

Jeem 1:1 Referans Kwoze

Esiker 12:15

« ‹M wíy taʼár áwune e vitúm ví mvəm, á lóo dzə a dzə̀ é wòŋ se sən sí, aá nèn kìíy ji m dzə̀ á Nyùy Tàr.

1 Pita 1:1

Ŋwàʼ və̀ne sàŋ mo woo Pita wo dzəə̀n ŋgaà ntum Jesus Kristu. A m sàŋ a dzə̀ fo wír ve Nyùy shoʼon ji və́ ve á sàmèrìn wún, a beè e wòŋ see Pontur wùn à Galatia, à Kapadosia, à Asia, e lì woó Bitinia.

Joon 7:35

Vé wòŋe nèn a kfə̀ynìn jii, «Jwè və̀n suuy ji wun du fèé, fo bó yòʼ dzə̀ vèsən yèn wun? A tàm bo wù taʼ, a ghan fo wír veé Juda ve á dzəə̀n é vitum vímóʼ ví, a yeʼéy wír vee fó.

Lim Aŋgàa Ntum 8:1

a Saul tíy fo, bínsi. Kèʼ fo kishiíy fóo fèy, á ku nèn a fo ŋgeʼ ye biibí e kintatì ke wìr Jesus keé Jerusalem ki, á wáa nyeŋkír adzə̀m, a taʼrí e wòŋ woo Juda. Ámóʼó dùkìr e wòŋ *Samaria, ku bèr aŋgàa ntum Jesus e Jerusalem cáʼcáʼ.

Lim Aŋgàa Ntum 26:7

A dzə̀ ŋkàʼmé woo shooy wo rám yer áwune yee nshòv sibaà e ghvə̀me shiyì, bunrì Nyùy e shùy, bunrì vitsə́ʼ. Nyàr, vèr à wír veé Judàa nén a ker nsaʼ a dzə̀ bìʼ fo m shiy sa ŋkàʼmé woo shooy.

Lim Aŋgàa Ntum 15:23

Á sáŋ ŋwàʼ wo á kì yíi tum áwune shó, a wú dzə̀ jii: «Ver vee afə́r vén vee aŋgàa ntum Jesus wùn aàtǎr vintatìi shaʼtì ven vee afə́r vér ve bó yòʼ dzəə̀n wír veé Juda, ve á dzəə̀n é Antiyok wùn à ve á dzəə̀n é wòŋ woo Siiriàa, à veé wòŋ woo Silisiàa adzə̀m.

Titur 1:1

Ŋwàʼ və̀ne sàŋ mo woo Por wo dzəə̀n ŋgaà lìm Nyùy, e kfə̀n a dzə ŋgaà ntum Jesus Kristu. A lim yémé dzə̀ ji m sə́ á wír ve Nyùy shoʼon ji və́, aá maysi, e wày shilív é wùn wó, e kìíy kinyo kfə́ ke ru kí, a ghan moo wír və́.

Galatia 2:9

Áwune kfən lòo yen mo Nyùy rə́si sə́ mo, a kinyo kfə́ kí du fo mbìy, Jeem wùn à Pita, à Joon ve vé‑eè yoŋ ji ntom se kintatìi nèn fò kiwó e vèr Banabar ji vèr áwune lim a lim e mòʼón, e bìnsí ji vèr wáa dù rì fo wír ve bó yòʼ dzəə̀n veé Judàa, aáwune wáa dù kév á fo wír veé Judàa.

Lim Aŋgàa Ntum 15:13

Áwune fèr vinyo vidzə̀m, ví mày, Jeem nèn a suŋnín, a suúy jii, «Afə̀r vem, vèn yuúrí kém kí.

Remrí 28:64

«Nyùy Tàr wíy taʼár ven e vitúm vidzə̀m ví mvəm, e kèʼ fo buu ndzə wúmóʼó, e dù, e bàʼ e wúmóʼó, a vèn wíy dù, a ghvəm anyùy ámóʼó ve á fèrìn e kicí kí, wùn à vé á fèrìn e tíyí. Dzə̀ anyùy ve vèn yòʼ‑oò yiì ne kìíy. Fə̀m atàr vén, bó áwune yòʼ‑oò lo kìíy sa.

Ŋwàʼ woó Rom 1:1

Ŋwàʼ və̀ne sàŋ mo woo Por, a m dzə̀ kém ji ŋgaà lìm Jesus Kristu. Wù‑uù lì mo ji m wáa dzə ŋgaà ntum və, e lèm ji m wáa fìʼtì a sáʼka Nyùy wo juŋ.

Lim Aŋgàa Ntum 21:18

Yì rán kibvəə́shí, vèr à Por dù, e ghàn Jeem, aàtǎr kintatìi kì bàʼtí fó adzə̀m.

Joon 12:26

A wìr taʼ ji wun wáa dzə wán wom lìm, wù kù a ghan vèr wun. M lóo dzə fo m dzə́, é kú a dzə vèr wun. Wìr wáa lìm fo mò, bo Tàr wor wíy bùʼ ŋgaàŋ.»

Matio 19:28

Jesus bìnèr jii, «M suuy kinyo ke ru kí e vèn jii, ndzə ye fíy wíy wìy, a ŋgaà wo yírí dzəə̀n *Wanwìr və̀n kóʼ ne e wùn kàvàʼ wo Nyùy foon, é wù nèn fò sá kàvàʼ nshòv sibaà e ghvə̀m, é ven ve vèn áwune ghán e nsay fène wáa dzə sa sho, a saʼ rám yeé Isray yee nshòv sibaà e ghvə̀m.

Ŋwàʼ Jud 1:1

Ŋwàʼ və̀ne sàŋ mo woo Jud wo dzəə̀n ŋgaà lìm Jesus Kristu. A dzə̀ mo woo Jud wo dzəə̀n fər Jeem. A m sàŋ a dzə̀ fo vèn ve Nyùy woo Tàr wòsən‑eè kòŋèn, e lì ji wír və́, e wày e Jesus Kristu kiwo.

2 Pita 1:1

Ŋwàʼ və̀ne sàŋ mo woo Simon Pita. M dzə̀ ŋgaà lìm Jesus Kristu, e kfə̀n a dzə ŋgaà ntum və. A m sàŋ a dzə̀ fo vèn adzə̀m ve á tíy e kinyò kee shó ke ver vee aŋgàa ntume tíy sho. Dzə̀ kinyo feyì feyì, a wày sá Jesus Kristu e věn kiwo, bìʼ fo wù kù yii yii kinyo kfə́ réŋ. Dzə̀ wun Nyùy wòsən, kfə́n a dzə Ŋgaà Lùŋèr wòsən.

Filipi 1:1

Ŋwàʼ və̀ne sàŋ mo woo Por vèr Timoti ve dzəə̀n aŋgàa lìm Jesus Kristu. Vèr sàŋ a dzə̀ fo vèn vee wír Nyùy ve á dzəə̀n é Filipi adzə̀m ve vèn à Jesus Kristu tatin. A wú dzə̀ fo vèn à vilìmbìy vén ví, à wír ve á lim e věn mvəmé adzə̀m.

Galatia 2:12

A kí‑iì dzə̀ jii, Pita kì tòmbìy, e wìy, a ghan, a yikír wùn à wír ve bó yòʼ dzəə̀n veé Judàa, e làa yòʼ a nyàʼ. Wír ve Jeem‑eè tumen ámóʼó siíy, e wìy, wù nèn tsə̀ʼ wún é bàm, e jàv ŋgoo, bìʼ fo wù‑uù fan áwune ve vé‑eè tíy kév ji á kù kér fó a saŋ mbèʼ se wír Kristu adzə̀m mo liì woó Juda dzəə̀n.

Galatia 1:19

A bó m yòʼ‑oò lo dù bèy, e yèn ŋgaà ntum Kristu wùmòʼ gheéy, kù‑uù jòʼsì Jeem wo dzəə̀n fər wun woo Tàr wòsən Jesus Kristu.

Lim Aŋgàa Ntum 15:21

Aá kù sàŋ bey, bìʼ fo vé‑eè sí fiʼtì vinyo ve Mooser vìn virə́ʼ vidzə̀m, e kèʼ fo ŋgùʼ, a wíri yú. Aá kù dzəə́ yoŋ fo ŋwàʼ lèn e ŋgày se bùnrì vishiíy vé bam vidzə̀m.»

Lim Aŋgàa Ntum 1:13

Á wìy, e nə̀ə́ e lav, e nèn tòsín, e kòʼ e yee fó yuv fo áwune‑eè bee. A vé‑eè dzə̀ jii, Pita, Joon, Jeem wùn Andru, Filiv wùn Tomar, Batolome wùn Matio, Jeem woo wan Afiyur, à Simon wo vé‑eè yoŋ ji ntom wòŋ, wùn à Judar woo wan Jeem.

Matio 13:55

Bó sà yòʼ dzə̀ wan Joosev woo ŋkom vicì, a yè wov dzə̀ Maria a? Afə́r vəə́ sà yòʼ dzə̀ Jeem wùn à Joosev, à Simon, à Judar a?

1 Afòn 18:31

Wù lì tíy nshòv sibaà e ghvə̀m mo rám seé Isray see wón Jakov si dzə̀kìn, Jakov wo Nyùy Tàr‑iì yòŋèn ji á wíy a yòŋ a wun ji Isray.

Remrí 30:3

bo Nyùy Tàr woo Nyùy won wíy rər mendzən men, e baʼtí ven fó vitum vidzə̀m vee fo wù‑uù tsənsin ven. Báʼti, é wù siir vikuʼùy vén fó.

Cù 26:33

Fo kén kí, m wíy taʼár ven, é vèn sáŋrí e vitúm vímóʼ ví nsay, é m kfə́n a ròn wúu yén e rə́r sí. Woŋe siiy bèy, é wú nèn dù e vifə̀m, é ŋkà se laʼ sén si kerkir.

Lim Aŋgàa Ntum 12:17

Wù nəə́, e sə̀r áwune e kiwó ki, a fèr mo Nyùy kì yiìn, e bóo fəə́r wun fo sháŋ. Wù màysì, e sùúy jii, á fiʼti á kinyo kee shooy e Jeem, e kfə̀n fìʼtì aàŋgàa biimée adzə̀m, e nèn lò, a dù fomóʼó.

Esra 6:17

Vé‑eè lòo yiì ŋkàʼ woo bìʼ lav Nyùy və̀n, e fò wón nàʼ vee vilum wií, viyáʼ ghii baà, wón viyaʼ ghii kweè. Cu ajay wìr veé Israyi wáa dzə vibév nshòv sibaà e ghvə̀m, mo rám seé Isray si dzəə̀n.

Remrí 4:27

A kí dzə̀ jii, Nyùy Tàr wíy taʼár ven, é vèn dukir é vitum vímóʼ ví. Vèn du fo, aá kár, e wìy bèr wír ashàr.

Ŋwàʼ Fəə 39:14

Síbaŋ e dzə̀me‑eè dzə̀ nshòv sibaà e ghvə̀m, aá náŋsín, e sàŋ yír sí shó, a dzə̀ sé wón Isray ji ŋkùvtu rǎm Isray yee nshòv sibaà e ghvə̀m.

Ŋwàʼ Fəə 24:4

Mooser nèn sàŋ nsər se Nyùy Tàr sidzə̀m fo nsay. Ndzə bvəə́shí, e jàv, wù bóm *kíy cù e sar gwan, e lì sə́y si nshòv sibaà e ghvə̀m mo rám seé Isray si dzəə̀n, e tùúy, sí wáa tiynín fo e kitu kitu.

Ŋgaà Yen 7:4

Á nèn sùúy e mò jii, wír ve á səəm vee shooyi dzə̀ á wír nsə̀kì nshòv sikweè e mkweè e wiì (144,000). Aá shòʼtí wír vìn fo rám wìr veé Isray e dzə̀m.

Lim Aŋgàa Ntum 2:5

Wáa dzə e ghan see shooy, a wír veé Juda ve vé‑eè ghvə́m Nyùyi kì lòkìr vitúm vidzə̀m, e wìy, e bàʼtí e Jerusalem foo fèy.

Ŋwàʼ Luk 22:30

Wíy lòo dzə e ghan se m wíy a saʼ vifon vém, é vèsən wáa yikír, a nonín kirə́ʼ kimòʼón, a vèn kfə̀n wíy koʼ aàkàvàʼ, a saʼ rám wìr veé Isray yee nshòv sibaà e ghvə̀m.»

Matio 10:3

Filiv wùn Batolome, Tomar wùn Matio wo wù‑uù báʼti mbàm se bàràʼ, Jeem woo wan Afiyur, Taadiyor wùn

Esta 3:8

Á bèy, Haman ku nèn bùn fon, e sùúy jii, «Wír ámóʼó tàʼár a ne vitú vév, e shwìr wún á e wír fòné mvəm. Á sì á vishév ve wòŋ vidzə̀m vee fòn nsay. Nsər sév sí yòʼ fə̀m táti a sé wìr ámóʼó e fòn wòŋ, a bó áwune yòʼ yúnin a sáʼ yeé ntoʼ. Bìʼ bey, bó kfə́ə wìr vee béne yoʼ ghèén a ji fòn lem, aá wáa dzə e wun nsay.

Ŋwàʼ Fəə 28:21

Síbaŋ e dzə̀me wíy a dzə nshòv sibaà e ghvə̀m, áà náŋsín, e sàŋ yír sí shó, a dzə̀ sé wón Isray, é síbaŋ mòʼón mòʼóne wáa dìn rám Isray e kitu kitu.

2 Timoti 4:21

Ku mùm feyì fó wìy, é bo ghán sé kintòn si wáa gheén. Yubulur wùn à Puden, à Linur, à Kiladia shaʼtì wò. A kù dzə̀ mo afə́r vesən vee féne shaʼtì wò adzə̀m.

Lim Aŋgàa Ntum 23:26

«Ŋwàʼ və̀ne sàŋ mo woo Kiladiyur Lisiar fo wò woo Feliy woo ŋgaà saʼ, a shàʼtì wò.

Ŋwàʼ Luk 6:15

Matio wùn à Tomar, à Jeem woo wan Afiyur, à Simon wo vé‑eè yoŋ ji ntom wòŋ,

Maak 3:18

Aámóʼó dzə̀ Andru wùn Filiv, à Batolome, à Matio, à Tomar wùn Jeem woo wan Afiyur, à Taadiyor, à Simon woo ntom wòŋ,

Remrí 32:26

Mò‑oò rə̀m ji m lo, e taʼár ven, e tsənsí e virə̀ʼ vee kwaʼda, e laàr laàrìn féyì fo wìr kfən wìy kuùmé ven.