Hosea 6:3 - ŊWÀʼ NYÙY

³ Vèsən ku wày vifií a dzə̀ e Nyùy Tǎr wùn, e mùm kitávín ji vèsən kiíy wun kijuujùŋ. Rúrú, wù kù yíi wìy fo vèsən moo shúy ye yì tó kijàvndzə, a wù yòʼ‑óò ndzəy. Wù yíi rəə̀r vèsən moo wuú ye yí loon, nsay rə́, e kù rəə̀r moo wuú mbìyi yeé kimgbù ke wuu.»

Hosea 6:3 Referans Kwoze

Hosea 14:5

M wíy a dzə fo wír veé Israyi moo ŋweʼ ye yí gbu e nsay ye yumér. Áwune wíy tèʼ, e bùy moo kibuushì, é gháŋ yéví nəə́ é nsay moo yé vici veé Lebanon.

Jeremia 24:7

M wíy fo áwune shilív she á kiíy ji m dzə̀ á Nyùy Tàr, aáwune nèn a dzə wír vém, é m wáa dzə Nyùy wov. Áwune wíy kfən e mǒ wùn shilív shév shidzə̀m.

Nsùyrì Nyùy 72:6

Sáʼ fòne ku sə̀ wíri. Yí ku sə̀ wíri moo wuú ye yí ló, ló, a vifa vi kúyí, cuurì, a nsay rə.

Ŋgaà Yen 22:16

«Tùm mo woo Jesus nshìylav yem ji yì wiy, e fìʼtì vinyo vìn e wír vémé ji á fiʼti e vintatì vi. Dzə̀ mo wo dzəə̀n Rám Fòn Davir, kfə́n a dzə mo Sàŋ wo wù lo, ndzə nèn ràn.»

Matio 13:11

Wù bìnèr jii, «Dzə̀ ven vin ve Nyùy yiìn ne, vèn kiíy vinyo ve saʼ rə́ ye yí‑iì dzəə̀n é kilìtì, a bó vísə vee wíri yòʼ kì.

Sekariya 10:1

Vèn lón wuú fo Nyùy Tàr, a lon ye yí náŋsin vifá ve ví siìn é sum. Dzə̀ wun wo wù yii fəər mbàʼ se wuu. Dzə̀ wun wo wù fó wíri wuú, yii, a vifá ve wìr dzə̀m vi teʼ e kwaʼ.

2 Pita 1:19

Mo vèr yenen bey, vèsən nèn màysì, e kìíy mo vinyo ve aŋgàa ntum Nyùyi‑iì fiʼtì vi dzəə̀n. Kí nen bòŋ ji vèn yuúrí vinyo ve áwune‑eè fiʼtì vìn vidzə̀m kijuŋ. Ví dzə̀ moo kikaʼày ke kí kaʼày ven, e meé e ghan se ndzə yíi ran, é Jesus kfə́n moo sàŋ wo wù lo fo tsən, ndzə nèn ràn. Wù kfə́n bèy, é melív men mè nèn yèn rán.

Ŋwàʼ Luk 1:78

bìʼ fo wù yii rə́r mendzən fo wíri é ŋàŋ. Wù wíy tum Ŋgaà Lùŋèr wòsən, é wù wiy fó yuv

Malakay 4:2

Yii bèy, fo ké ven ve á ghvə́m mo kí, kishiíy kee shooy ki wíy a dzə ke m wíy kwàŋrì vinyo tìítiy, e lùŋèr ven. Kí wíy fəəsín moo shúy yee tó kijàvndzə, lóo ban, é vèn wáa yor, a bonén. Bónenè, é vèn wáa liynín, kù moo wan nàʼ wo á sòrìn fó kibìn, wù wáa liy, a dù e kwaʼ.

Mayka 4:2

Vitúm vi wíy a wìy fo vinín, a suúy jii, «Vèn wáa wìy, é vèsən wáa koʼ e Nyùy Tǎr gwan, gwan, a dzə̀ lav Nyùy wo Jakov ghvə́mé. Nyùy yíi a yeʼéy vèsən kinyo ke wù taʼ ji vèsən wáa yiì, a vèsən kù yíi a ghan a dzə̀ e wun mbòv.» Kí dzə̀ jii, ntir se Nyùy Tàr sí kù wíy a lò a dzə̀ fó Sion, a wù kù wíy a suŋnín e wíri a dzə̀ fó Jerusalem foo fèy.

Hibru 3:14

Kifá ke Kristu kér kidzə̀m ki sì sá késən, a vèsən fèn tíy a dzə̀ é kinyò ke vèsən‑eè wayin shilív shó fo mbìy, e dù, e jòʼsì.

Joon 17:3

A dzəʼə̀m yee là may rə̀ne dzə̀ jii, wìr kiíy wò, wo kù jòʼsìn wò Nyùy wo rù, e kfə̀n kìíy sa mo woo Jesus Kristu wo wò‑oò tumen é ndzə fèn.

Hosea 10:12

Vèn yú ke m suuy ki. Vèn ku wày ŋgoòy liì wo juŋ, é vèn yiì kàv koŋ ye m koŋ wíri. Vèn shev nsay ye dzəə̀n shilív shén she tavín shin shi, bìʼ fo lèn siìn ghán se vèn lo, e bìnkìr, e kfən fo Nyùy Tàr. Kfə́né, é wù yii vinyo vee réŋ ví e vèn, e səə̀vì ven.

Aysaya 54:13

Mómò woo Nyùy Tàr, m wíy yeʼéy wír ve á dzə́ e wò ŋkàlaʼ adzə̀m. Áwune wíy a dzə dzə́ yee nyaáŋ, a ker kifá kidzə̀m ke á kér shií shó.

Lim Aŋgàa Ntum 17:11

Wír veé Juda vee fóo wáa dzə wír, aá yii kwaʼtì kinyo, e shaà veé Tesalonika. Á nèn a ker shií fó a yuurí kinyo ke Por wùn Silar. Lóo yuurí, á wàa yòŋ Ŋwàʼ Nyùy vishiíy vidzə̀m, a leéy fo fo ji kinyo ke áwune suuy ki sà kù yòʼ dzə̀ réŋ á?

Hosea 2:20

Rúrú, m wíy way wò e lav, e kù lum a dzə̀ wò, e kpu sho, áà nèn bìnsí ji m dzə̀ á rú Nyùy Tàr.

Aysaya 44:3

Kí dzə̀ jii, m wíy səə̀vì nsay ye yì yúm ji káv, e fəə́r ndzə́v, é yí wáa leŋ e nsay ye yì yumen ne, e mày. M wíy səə̀vì rám yén, e fo Kiyoy kém aáwune, é kiŋgoòy kén kí wáa yu vijuŋ ve kisəə̀vì kém.

Aysaya 32:15

Kí wíy a dzə bèy, e dù, e meé mo Nyùy Tàr wíy tsənsí Kiyoy kfə́ e vèsən. Wù tsə́nsi, é kirə́ʼ ké woʼ kí kfə́n lèn ji súm, é súm sí rəŋsin, a dzə ji kóv.

Nsùyrì Nyùy 65:9

À leey fo kitú ke nsay ki, tsə́nsi wuú. À bórir kitú ke nsay e mbòómbòŋ, yii, a ndzə́v sí rún ghán sidzə̀m. Yii wò, bo wíri wáa ker vifá ve yi e nsay, a kù dzə̀ mo à baʼtin ne bèy.

Remrí 32:2

La yéʼéy yémé kù síri a rə̀sìn moo wuú á, é jí sém sí wáa sə̀v moo ŋweʼ a? Sí kú a fə̀fə̀ mo wuú yii fəfə̀ e viŋgà ve bór vi, a ŋwàʼrì mo yí yii ŋwaʼrì e vikwiíy.

Mayka 5:2

Fo ké ki, wò woo Betlehem Efrata, aà kù dzə̀ shintèntèʼ ben e nsay Juda, yii bèy, a wìr wo wù wíy a saʼ wír veé Isray wíy fəə a dzə̀ fo wò mvəm, wír feyì, a wù kù‑uù sì, e kèʼ fo yàŋgùʼ.

Esiker 36:25

M wíy tsəm shindzə́v she ranén shí e věn wùn, é vèn rán fó kifàn ke vèn‑eè liìn bìʼ vinyo vidzə̀m ve vèn‑eè lorin vitú vén shó. Vèn wíy ran fo kifàn ke vèn‑eè ghvəmen mebvə̀m, e lì.

Aysaya 5:6

M yíi màʼtì, é súm və́ne kwiíy, e rə̀ŋsìn. Wìr yòʼ yíi a kom, kìn ji wù wáa naŋsín vitiír vee fó. Vimbìn wùn à vicí vé njoŋ vi kù yíi sə fó səə́n, é m kfən tìír mbàʼ, fo yì yii, é wuú wáa lo fo.»

Ŋgàn 4:18

Liì wìr wo wù yúnin Nyùy dzə̀ moo ndzə ye yì ráné, yì kù a ran, a dù duùn fó mbìy, a kàʼày wíri.

Ŋwàʼ Jov 29:23

Áwune lo, á wàa shìy mo mo wíri shìy wuú, a sə jí sém é shií mo nsay ye yumér sə̀ wuú.

Mayka 5:7

Á bèy, kibér ke wìr veé Isray ke kí bòyìn, kí wíy a dzə e vitúm ví mvəm, a dzə moo ŋweʼ ye Nyùy Tàr tsə́nsi, a dzə moo wuú ye yí ŋwaʼrì e viŋgà. A bó áwune yòʼ wíy a shìy wír, aá yòʼ wíy a yeʼtí e vitaaví a dzə̀ vé wìr msòŋ.

Nsùyrì Nyùy 19:4

Yii bèy, a jí sév sí kù dunìn kitú ke nsay kidzə̀m, a sáʼka wov ghánen vitóŋtóŋ vé ndzə vidzə̀m. Nyùy‑iì bàʼrì kikum e yuv, e lèm shúy sho.

Joon 7:17

A wìr wày ji wun wáa yiì a dzə̀ kinyo ke Nyùy taʼà, ŋgaàŋ nèn wìy kìíy rú ji kinyo ke m yéʼey kìn ki sà lò fo Nyùy, mo kí lò a dzə̀ fo mò á.

2 Samuel 23:4

wù wàa dzə moo ndzə ye yì rán kijàvndzə, a dzə moo kintoshùy ke mbàʼ si yòʼ dzəə̀n é yuv, a dzə moo wuú ye yí ló, shùy lóo ban, vikwiíy ví wàa tokír.›

Nsùyrì Nyùy 19:6

Shùy lo, yì tò fó buu ndzə wúmóʼó, kárí, yì dù nə̀ə́ e wúmóʼó, a bó yòʼ dzə̀ kifá ki lèʼ lum ye yí fəə́ fo fo.

Nsùyrì Nyùy 63:8

M kù rə́ŋ a dzə̀ e wò wùn, a vitaáví vé vi kiŋ mo.

Aysaya 2:3

Vitúm vi wíy a wìy fo vinín, a suúy jii, «Vèn wáa wìy, é vèsən wáa koʼ e Nyùy Tǎr gwan, gwan, a dzə̀ lav Nyùy wo Jakov ghvə́mé. Nyùy yíi a yeʼéy vèsən kinyo ke wù taʼ ji vèsən wáa yiì, a vèsən kù yíi a ghan a dzə̀ e wun mbòv.» Kí dzə̀ jii, ntir se Nyùy Tàr sí kù wíy a lò a dzə̀ fó Sion, a wù kù wíy a suŋnín e wíri, a dzə̀ fó Jerusalem foo fèy.

Hosea 14:6

Áwune kfə̀n dzəə́ wìy tokír, a kuy, a bòŋkìr moo vicí vé *oliv, a rə̀m, a rə̀ʼtìn moo vicí vé *sidar veé Lebanon.