Hosea 10:8 - ŊWÀʼ NYÙY

⁸ Á wíy laàr virə́ʼ vé anyùy veé ŋkàlaʼ Aven, fo wír veé Israyi yii cu mebvə̀m. Vitiír vé njoŋ wùn à vikwiíy ví wíy kuy, e sùm kíy sév sé cù. Wíy lòo dzə e ghan see shooy, é wíri wáa toŋ, a jàŋ virùmèn jii, «Vèn ku keèsì e věr kitu,» a toŋ, a jàŋ agwan jii, «Vèn sə́y, e sə̀tí ver.»

Hosea 10:8 Referans Kwoze

Ŋwàʼ Luk 23:30

Wíy lòo dzə e ghan see shooy, é wíri wáa jàŋ virùmèn jii, vèn ku keèsì e věr kitu, a jàŋ agwan jii, vèn sə́y, e sə̀tí ver.

Ŋgaà Yen 6:16

a fuŋ agwan wùn à vilán vi jii, «Vèn ku keèsì e věr vitu, e kìŋ ver fo ŋgaà wo wù dzə́ e kàvàʼ yén ver, é vèr fíʼ bòy fo ŋgeʼ ye Wàn Njiì sí sə́ti nsay sho rə̀n.

Aysaya 2:19

Kishiíy ke Nyùy Tàr wíy jevrí, a màʼ ŋgeʼ e kitu ke nsay, wíri wíy a nəəkír e mbvə̀ʼ si, a lìr e bii sí, bìʼ fo Nyùy Tàr wiy e ŋgeʼ ye beemén, a wúnwun kùʼ e ŋàŋ, e kfə̀n a dzə e gháʼtín, a bó yòʼ dzə̀ wìr msòŋ yù fóo tiím e si wo.

Hosea 9:6

A vèn fèn lèʼ, fo wír veé Assiriyàa laar ven, bo wír veé Ejivi kù‑úù báʼtí ven, e yùyrí. Yúyri, é wír veé Memfisi dzəəme. Vimbìn ví wíy fəə, e sətí bùʼ won, é vitiír vé njoŋ vi wáa tèʼ láʼ sén sidzə̀m.

Amos 8:14

Ké wìr ve á kan yír Ashima woo nyùy woó Samaria, yéʼti a dzə̀ e nyùy woó Dan wùn, kfə̀n yéʼti e bùnrì ye á du, bunrì e Beersheba, áwune wíy gbù adzə̀m, e làa yòʼ dzə́ə ŋaʼáy.

Aysaya 32:13

Kí wíy a dzə bèy, bìʼ fo nsay ye wír vesəné limè kù wíy wuy, é wáa tèʼ vitiír vé njoŋ fo wùn à vimbìn ví. Vèn wáa dìy sa bìʼ láʼ se sí yú vijuŋ e ŋkàlaʼ kisheʼrì fèn si.

Ŋgaà Yen 9:6

A wíy lòo dzə fo ŋwee woo tàn və̀n, aá wáa tàʼ kpú ye yí li áwune, e làa yòʼ a ker. Á wíy a siimé kpú, é yí wáa nyeŋ áwune nyéŋén.

Mayka 1:13

Ven vee wír veé Lakish, vèn báʼtí nyám se sí səŋ *viténtén vé rər sí. Kù‑uù yiì ven, é bo wír veé Jerusaleme jáy kinyo. Yì‑iì tòmbìy bìʼnìn ven vinyo ve bi vé wìr veé Isray Kùy.

Mayka 1:5

Vinyo vìn vi kooy bèn bìʼ vinyo ve bi vé rám Jakov, vinyo ve bi vé wìr veé Isray. Yiì ka, é bo wír veé Israyi wáa tsəy kóy wùn à Nyùy? Bó yòʼ kù yiì Samaria à? Yiì ka, é bo wír veé Judàa wáa cù anyùy kisaŋe? Bó yòʼ kù yiì Jerusalem à?

Hosea 10:5

Wír ve á dzə́ e ŋkàlaʼ yee Samariàa wíy a dìy, a shèŋ kitú, bìʼ shibvə̀m sheé nsə̀nin wàn nàʼ, she áwune làyìn é Bet‑Aven. Áwune wùn aàtàá cù véví wíy a toŋ, a jeetí, bìʼ vijuŋ ve shibvə̀m shìn she á liìn, e dù sho.

Hosea 10:2

Mo áwune lumen ne a dzə̀ kimboʼtì, e kpù shó, bo á kù lo, e màʼ ŋgeʼ aáwune bìʼ njò yev. Nyùy Tàr yíi bvəʼə́y kíy sév sé cù, e kètì sə́y sév sé anyùy.

Hosea 5:8

Nyùy Tàr suuy jii: «Á tóŋ á sóŋ rər é Gibea, e bùʼ shirəə́ e Rama, a koʼór kiyor e Bet‑Aven. Éè vilum veé Benjamin, vèn ku fəə̀ é shùu rər.

Hosea 4:15

Yìiy, wìr veé Isray, mo vèn kfənen ne ji asàkì, lá kí yòʼ mùm kòóy ji wír veé Judàa biʼnin, é dzə̀rkìtu lo, a koo áwune. Vèn wáa yen fó tiír kiwuú kén é Gilgal, kìn ji vèn kóʼ é Bet‑Aven ji á suyrì mo. Vèn wáa yen fó lìʼ kinyo e mo woo Nyùy Tǎr yir, mo wo m dzəə̀n e tin.

Hosea 4:13

Áwune cu mebvə̀m e vitu ve agwan, yii cu ye tonèné aàŋkoŋ. Cu anyùy e sar vici vee *oak, à vé *popar vi, à vé *terebint vi. Aá cu bèy, yú vijuŋ ve kindzə̀ə́ndzəm kee fó. «Á bèy, wìr vem, wón vén vee vikìyí lò ne, e kfə̀n ji asàkì, a vikǐy won véné fəə́, ghán viŋkar.

Aysaya 34:13

Vitiír vé njoŋ vi wíy kuy, e sə ntoʼ seé Edom sidzə̀m, é kiv wùn à kimbìn kí sə́ virə́ʼ vév ve tavkín ví vidzə̀m. Fóo wíy a dzə kirə́ʼ kee fo viŋgày ve akoosàʼ vi wíy a shiíy, a viŋkfə̀y vi wíy sə fó səə́n e dzə̀m.

2 Wòŋ 31:1

Vé‑eè yì ŋkàʼ, e màysì, wìr dzə̀m woó Isray wo wù‑uù dzəə̀n fó nèn fəə̀, e dù e ŋkà se laʼ seé Juda, e bvə̀ʼtí sə́y se sí‑iì tíynin aáwuné virə̀ʼ vé cù, e gwàtì wúr sé nyùy woo *Ashera, e kfə̀n kètì virə́ʼ vé anyùy wùn à kíy se cù si. Vé‑eè kètì bey woŋ Juda e dzə̀m, e kètì sa e nsay Benjamin, à ye Efrayim, à ye Manasse. Vé‑eè màysì virə́ʼ vé anyùy vidzə̀m, e kètì, wìr dzə̀m woó Isray nèn a kfən e wun ntèʼ, a wìr mòʼón mòʼón du e wun kitu ke keŋ.

2 Afòn 23:15

Fòn Josia‑aà kètì sá kíy cù woó Betel wùn à kirə́ʼ ké anyùy ke Jeroboam woo wan Nebat‑iì bàʼrìn fó ki. Dzə̀ wun woo Jeroboam wo wù‑uù domsì wír veé Isray, aá yii vinyo ve bi ví. Josia‑aà sàʼày kíy cù woo shooy wùn à kirə́ʼ ké anyùy ki, e tàtí, e tòn, e jò kibér ke vifa, kí kfə́n é kibvə. Wù kfən tòn sa wúr nyùy woo Ashera.

1 Afòn 14:16

Wù kù wíy màʼày Isray máʼayin bìʼ vinyo ve bi ve Jeroboam yii, domsì wír veé Isray, aá jáy sa.»

1 Afòn 13:34

Kinyo kìn ki nén a dzə kinyo ke bi kí e Fòn Jeroboam kfəə, ke kí‑iì màʼàn kfə́ə rə́, e laàr fo kitu ke nsay.

1 Afòn 13:2

Wù nèn a fìʼtì ntum Nyùy Tàr, a beèmè kíy cù və̀y jii, «Ébéèy kiy cù, yìiy. Nyùy Tàr yoŋ jii, ‹Á wíy dzəə́ wán e Davir ram, e shù yír rə́ ji Josia, é wù li atàá cù, áwune ve á cu anyùy aàgwan virə́ʼ vidzə̀m, e seèrí a dzə̀ é kitu ke kiy cù fèn, aá wáa tòn vighvə́r vé wíri fó.› »

Remrí 9:21

M nèn lì kifá ke lòn kiy, kee shibvə̀m sheé njà wàn nàʼ, aá fér e kisha ki, e tòn e və̀y. M tòn bèy, e bvə̀ʼtí, e jò, shí kfə́n moo kibvər bèy. M kuúy, e dù, e shùʼ e ndzəv ye yí‑iì léŋ, sə́y fo gwan.

Kèʼlo 3:8

Lòo meé e kimbòrndzə, lùmèn və̀y wùn wiíy yú nsən se Nyùy Tàr, a sí giv e mvə̀m kiboò, e nèn nyèŋ, e nə̀ə́, e lìr fo Nyùy Tǎr si, e mvə̀m vicì veé kiboo fey.

Hosea 2:6

«Bìʼ bey, m yíi tsəm káy njoŋe, e gìŋ wun sho, e bom kay, e sətí wun sho, é la wù yòʼ a ker dzə́ə ye dzə̀ wù kfə̀n fəə̀ shó.

Hosea 10:9

Nyùy Tàr suuy e wír veé Israyi jii: «Éè wìr veé Isray, e kèʼ fo ghan se vèn‑eè bùʼùn kinyo e Gibea, vèn kù jáy jay vèsən, dzəsì jay e wùmǒʼ kitu. Vé‑eè tòn wír ve bií e rə́r sí é Gibea bèy, a bó yòʼ‑oò dzə̀ kinyo ke juŋ ki bey à?

Amos 7:9

M yíi sàʼtì virə́ʼ vidzə̀m ve rám Aysi rə̀ne yii cu sév fó, e laàr lav se cù seé Isray sidzə̀m. M yíi ghiʼ rám Fòn Jeroboam e rə́r sí, e tòn áwune.»

Nahum 3:11

Nineve, wò kitú ké, à kù yíi no, a fəə̀nè. À kù yíi a tàʼ fóo laáy. À kù yíi a tàʼ fó lìr bìʼ aŋgaà vé vibàn.

Aysaya 2:21

Ghán sin se Nyùy wíy jevrí, a màʼ ŋgeʼ e kitu ke nsay, wíri wíy nəəkír e mbvə̀ʼ vilan, e nəəkír e nsàn se vilan veé kitu ke vilála, bìʼ fo Nyùy Tàr wiy e ŋgeʼ ye beemén, a wúnwun kùʼ e ŋàŋ, e kfə̀n a dzə e gháʼtín, a bó yòʼ dzə̀ wìr msòŋ yù fóo tiím e si wo.

Hosea 8:5

«Éè wìr veé Samaria, m ban shibvə̀m she vèn fèrìn e fèr, shí wáa shwinín wan nàʼ. Dòʼshwiíy kív mo kívín bìʼ ven. Vèn wíy neèr mebvə̀m me vèn cu mèn e ghàn ka?

Amos 1:5

M yíi kètì shuu se kày seé Damaskus sidzə̀m, e laàr fon wo wù dzə́ e Mboʼ Aven. M kù yíi laàr wun wo wù sáʼ e Bet‑Eden, bvə́ʼ dzəʼə̀m, aá kuúy wír veé Aram adzə̀m, e dù sho e Kir.» Á mo Nyùy Tàr suuyin.

Amos 3:14

«M wíy lòo màʼ ŋgeʼ e wír veé Israyí kitu bìʼ vinyo ve á buʼtì, lóo màʼ e kishiíy fó, é m keti kíy se cù seé Betel, e kètì loŋ se sí dzəə̀n é kor se kiy cù sidzə̀m, é sí gbukir.