Hibru 1:3 - ŊWÀʼ NYÙY

³ Wù dzə̀ ji kikúv ke wun woo Nyùy, a dzə kinyo kidzə̀m ji Nyùy, njaʼkìr réŋréŋ moo Nyùy. A dzə̀ wun wo wù kér ndzə e dzə̀m e wùn kiwo, súŋnin, bo yì wáa ker vitaáví, a lìm mo yì limè. Nén a dzə wun wo wù‑uù manen vinyo ve wìr veé ndzə ji á fíʼ ran fo áwuné ajay. Wù màysì, e nèn kòʼ é yuv, e dzə̀ʼə̀m e Nyùy woo Taà Vitu ghaŋ.

Hibru 1:3 Referans Kwoze

Ŋgaà Yen 4:11

«Nyùy, kù dzə̀ wò Tàr wor. Kér wò vitaáví vidzə̀m. Bòm wò vifá vidzə̀m. Wò‑oò bòm mo wò‑oò kòŋèn, ví wáa dzə sho a dzə̀ bìʼ wò. Dzə̀ wò wo dzə̀ á wàa ghvəm, a burí.»

Joon 1:14

Á mo Jínyùy‑iì wìyìn, e lì mbom wìr, a dzə wùn à wíri, a kòŋ áwune féyì, a dìn rú mo Nyùy dzəə̀n, vèr wáa yen vikuʼùy və́. A kù dzə̀ vikuʼùy vé Tàr wov, bìʼ fo kù jòʼsìn wun wo dzəə̀n Wan Nyùy.

2 Korin 4:4

Ké wír vìn ki dzə̀, a sə̀tí Satan woo nyùy wo wù kér ndzə rə̀n lèn vifií vév fo á biíme sáʼka Nyùy wo juŋ. A bó yòʼ dzə̀ áwune yèn rán ye sáʼka Nyùy wìyìn shó, a kiíy mo Kristu dzəə̀n. Kristu, wo wùn Nyùy dzəə̀n kikúv kimòʼón.

Hibru 12:2

a leéy a dzə̀ fó mbìy fo vèsən du, e jòʼsì, a dzə̀ e Jesus wùn. Dzə̀ wun wo wù yiìn, vèsən wáa way shilív e Nyùy wùn, a kù wíy lì wun vèsən, e way e Nyùy kiwo ŋkuuŋkùŋ. Wù‑uù dzə̀ é nsay fèn, e biìmé ji wun ku yiì mo Nyùy sìysìn, e kpù é kintam moo ŋgaà jay, e làa yòʼ a ci woómé se sí dzəə̀n é kfəə kpu foo fèy. Wù‑uù leey kfə́ a dzə̀ vijuŋ ve ví dzəə̀n fó mbìy. Wù nén a dzə lèn e yuv, a dzə e Nyùy ghaa kàvàʼ, e koy yìyí.

Joon 1:4

Dzə̀ wun wo wù‑uù foon dzəʼə̀m yee dzəʼə̀m e wíri, á nèn a ker sa rán ye dzə̀ á kìíy Nyùy.

Hibru 10:12

Kristu kù‑uù tàŋrí və́ə woo ntàŋrí kàŋ mòʼón, wù ku nèn ghèén mo dzə̀ wù wàa sù ajay wíri ghán sidzə̀m. Wù yiì bèy, e kù nèn dzə̀ʼə̀m e Nyùy koy yìyí,

Ŋwàʼ Jud 1:25

Á kú a beè Taàtá wòsən Jesus Kristu, a burí Nyùy wo wù luŋèr vèsən. Kù mày wun Nyùy. Kér wun vitaáví vidzə̀m. Á wáa ghvəm wun woo Fon, a yu a dzə̀ fó fo, é sáʼ rəə́ wáa dù fo mbìy mo yí‑iì siìn fó ŋgùʼ, e kfə̀n a dzə lèn, e wìy a dzə ghán sidzə̀m, là may. Amen.

Hibru 9:26

A kee shooy ki‑iì dzə̀ é shií, bo Jesus kù dzəə́ rə́si kpú, kfə̀n lo kpú, e kèʼ mo Nyùy‑iì bomen ndzə. Ké Jesus ki dzə̀ jii, wù wìy e ghan se ndzə ye mvə sí shaa sìn ji wun mayir vinyo ve bi ví, e fò kitú kfə́, e tàŋrí wíri shó kàŋ mòʼón.

1 Joon 1:7

Yii bèy, mo Nyùy dzəə̀n é ndzə ye ranén, wíri lóo ghan sa e ndzə ye ranén, áwune nèn a dzə kintatì, a ghan kiwuú kév kimòʼón. Mo á ghán bèy, Nyùy nèn kfə̀n sù sa njò yev, á wàa dzə là jay. A wù su a dzə̀ e mensə́ me Wan və woo Jesus mè.

Hibru 4:14

Vèsən wáa kuumé ji vèsən kér taà cù wo kuʼùn wo wù táti vèsən à Nyùy, a dzə̀ Jesus woo Wan Nyùy wo wù‑uù duùn, e mèé e ntoò yùv fo Nyùy dzəə̀n. Vèsən ku nèn ghàr kinyo kfə́ ke vèsən biimen kitávín,

1 Joon 3:5

Vèn kì ji Jesus‑eè wìy é nsay fèn a ji wun laar vinyo ve bi ví ve wíri yii. A bó wun woo Jesus yòʼ yii yii vinyo ve bi ví gheéy.

2 Pita 1:16

A dzə̀ m kù a yìmrì vinyo vìn bèn, bìʼ fo vèr yòʼ‑oò jumrì vinjeenjèm ve vinyò ve bomen wíri, e bó a yeʼéy ven mo vikuʼùy vé Taàtá wòsən Jesus Kristu vi dzəə̀n, a dìn ji wù wíy kfən, a saʼ nsay rə̀n. Vèr‑iì lo yèn vifon və́ vin e sí yérí.

1 Pita 3:22

e kòʼ é yuv, fo wù dzə́ lèn e Nyùy koy yìyí, sáʼ nshèelav se Nyùy wùn à vitú vév ví, à vifá ve ví kér vitaáví é yuv ví vidzə̀m.

1 Pita 1:21

Vèn nén a way shilív e Nyùy wùn lèn, a dzə̀ bìʼ Kristu wo wù‑uù tumen, wù wìy, e kpù fo vèn. Wù kfən fə̀ə́r fo kpu, e bùʼ e vikuʼùy və́ ví. Melív men mè nén a tiy lèn a dzə̀ e Nyùy wùn, vèn wáa leéy fó mbìy ji wù li sá ven, e wày e wùn mvə̀m vijùŋ foo fèy.

Hibru 8:1

Tím kinyò ke vèsən kì fer ki nén a dzə jii, Jesus dzə̀ rú á taà cù wòsən wo kuʼùn wo wù gheenen féyì. A wù sì a dzə̀ é yuv wùn Nyùy, dzə́ e Nyùy ghaa kàvàʼ, e koy yìyí.

Maak 16:19

Mo Taàtá Jesus suŋnin wùn à wón və́ lìme, e màysì, Nyùy nèn lì wun e yuv. Wù kóʼ, e dzə̀ʼə̀m e Nyùy koy yìyí.

Nsùyrì Nyùy 75:3

A kitú ke nsay ki fə̀m lò, a sə̀ʼ, à kifá kidzə̀m ke kí dzəə̀n shó ki, bo mómò, bo m kù‑úù yii, é vitóm və́ ví wáa tiy ji ŋkǐŋ.

Ŋgaà Yen 3:21

Vèn wáa kiíy jii, wìr wo wù wíy so vinyo veé ndzə ye bi rə̀n, dzə̀ wo m wíy lì, é vèr wun wáa dzə e mǒ kàvàʼ, réŋréŋ sá mo mò‑oò soon vinyo veé ndzə, Tàr wor Nyùy lì mo, vèr wun wáa dzə e wùn kàvàʼ.

Hibru 7:27

Wù kfə́n a dzə jeéy fo atàá cù ve kuʼkìné vee fó mbìy ve á kù‑uù kér fó a rəsí, a taŋrí antàŋrí vishiíy vidzə̀m. Aá kù‑uù kér fó tòmbìy kwàŋrì vév vee vinyo, e bó a kwàŋrì vé wìr ámóʼó. Jesus nèn yiì və́ə woo ntàŋrí kàŋ mòʼón, wù ku nèn ghèén. Wù‑uù lì a dzə̀ kitú kfə́, e tàŋrí wíri shó adzə̀m.

Lim Aŋgàa Ntum 2:33

Nyùy nèn kfə̀n kòʼór wun, e dzə̀ʼə̀r e wùn koy yìyí, e fò Kiyoy ke Ranén kí shó mo wù‑uù kàʼàn. A vinyo ve vèn yén lèn, kfə̀n yú vìn vi dzə̀ Kiyoy kee shooy mo Jesus foon sá e wír vəə́.

Joon 1:29

Yì rán kibvəə́shí, Joon yén Jesus, a wù wiyì, e nèn a dìn e wíri jii, «Vèn yén wír wo wù mán vinyo ve wír veé ndzə adzə̀me jáyí. Wù dzə̀ moo wan njiì wo Nyùy seé, e taŋrí wíri shó.

Kolosia 3:1

Mo vèn tatin Kristu e kpu ye wù‑uù kpuun, Nyùy fəə́r vèn áwune fó fo, vèn ku nèn wày shilív shén a dzə̀ é vinyò veé yuv fo Jesus Kristu dzə́ lèn e Nyùy koy yìyí.

Ŋwàʼ woó Rom 8:34

Wìr dzə̀ shó wo dzə̀ wù wày vèsən é ŋgeʼ ji nsaʼ koò vèsən á? Jesus Kristu‑uù kpù ne fo vèsə́n ajay, e kfə̀n fəə̀ fó kpu, a wù dzə́ lèn e Nyùy ghaŋ, tóm vinyo vesən.

Lim Aŋgàa Ntum 7:56

Tefan nèn sàsìn jii, «Vèn leéy, e yèn, m yén yúv e rə́, a ŋgaà wo yírí dzəə̀n *Wanwìr tíy e Nyùy koy yìyí.»

Nsùyrì Nyùy 110:1

Nyùy Tàr‑iì sùúy e tàr wor jii, «Dzə̀ʼə̀m e mǒ koy yìyí, e meé e ghan se m wíy neèr aŋgaà vé vibàn e wò si, áà tiír wuú yé sho.»

1 Wòŋ 29:11

Feyì, feyì, Nyùy Tàr, à dzə̀ e gháʼtín. À tàv é ŋàŋ, e kfə̀n kùʼ e ŋàŋ. À yii só soón, a vifon vé vi dzə̀ ve wiy ví. Kér wò vifá vidzə̀m veé yuv, à veé nsay vi. Rúrú, Nyùy Tàr, kù sáʼ wò vifon, a kifá kidzə̀m ki kù néŋ a dzə̀ e wò sar.

Ŋwàʼ woó Rom 1:16

A bó yòʼ dzə̀ m wàa woomé fó a fìʼtì gheéy, bìʼ fo m kiìn féyì ji dzə̀ á vitaáví vé Nyùy, a ví yii, á lóo fìʼtì, wíri wàa way shilív e Wan və́ wùn, wun woo Nyùy wàa lùŋèr áwune adzə̀m, kìn dzə̀ wír veé Juda ve kinyo kìn ki‑iì dzəə̀n kév fó mbìy, kìn vitúm ve ví yú kév a dzə̀ lèn.

Mayka 5:4

Á kfə́né, é ŋgaà saʼ nèn kèʼ sáʼ rə́, a dànèr áwune mo nshìy dànèr njiì, a dànèr e vitaáví ve Nyùy Tàr foon e wun vi, a dànèr e vikuʼùy ve ghaʼán ví, vikuʼùy vé wun woo Nyùy Tàr woo Nyùy və. Wír vəə́ wíy a dzə dzə́ yee nyaáŋ, là kinyo ké a fàn, bìʼ fo wìr msòŋ e dzə̀m woó kitu ke nsay wíy a binsí sáʼ rə́.

Ŋgaà Tàrvìnyò 8:4

Jì fòn kér vitaáví. A dzə̀ wàa sòv la vinyo ve wù yii?

Ŋwàʼ Jov 37:22

Nyùy sə́y fó taa e viwìr vi, njaʼkìr moo *kisha ke mbàm ke baar kí, a vikuʼùy və́ ví dzə̀ viwíy, a wìr lèéy, shúu kù mà wun.

Hibru 9:16

Aá kfə̀n nəə, bìʼ fo vijuŋ vee shooy vi dzəə̀n sá vitsə́ʼ ve Jesus lèmèn aáwune. Mo wù‑uù kpuun, bo dzə̀ lèn, á yì,

Matio 22:24

Á wìy, e yòŋ jii, «Ŋgaà Yèʼey, Mooser‑iì sùúy jii, ‹A wìr kér wiíy, e kpù, a bó wù yòʼ kér wán, bo fər və kù kér a fó lèm wiíy woo shooy, a dzəə́ wón shó, e fíʼ lèm kitsə́ʼ ké ŋkfə fər və.›

Titur 2:14

Wù‑uù fò kitú kfə́, e kpù fo vèsən, e tìn vèsən fó vinyò ve bi ví vidzə̀m ji wun náŋsín wír ji və́, aá wáa dzə là jay, e tiír vifií ji á wáa yiì a dzə̀ vinyo ve juŋ vi.

Hibru 1:13

A bó Nyùy yòʼ‑oò yiì ne sùúy e nshìylav rə yìmòʼ jii: «Dzə̀ʼə̀m e mǒ koy yìyí, a shìy ghán se m wíy neèr aŋgaà vé vibàn e wò si, áà tiír wuú yé sho moo kibur.»

2 Pita 1:17

Tàr wov Nyùy‑iì din vikuʼùy və́ vé saʼ, a vèr dzə̀ fó. Vèr yú mo wun wo dzəə̀n Vitú ve Saʼ suuy kùm Jesus jii, «Və̀n dzə̀ Wán wom. M koŋ wun e ŋàŋ. Wù bòŋ mo féyì.»

Cù 15:15

Taà cù yíi yiì cu ajay e shímóʼ shí, e yiì cu ye tonèné e shímóʼ shí, e nèn kfəmrí wun e Nyùy Tǎr si, bìʼ yàsí və.