Hibru 1:1 - ŊWÀʼ NYÙY

¹ Yì‑iì dzə̀ fó mbìy, a Nyùy súŋnin aàtàr vesəné akàŋ anín e dzəə sí dzəə sí, a wù‑uù túm a dzə̀ aŋgàa ntum və́, aá tiísi.

Hibru 1:1 Referans Kwoze

Joel 2:28

Nyùy Tàr kfə́n a suúy jii: «Wíy lòo dzə fo bàm, é m fó Kiyoy kém e wìr dzə̀m, é wón vén vee vilum wùn à vee vikìyí wáa yu vinyo fo mò, a tiisí. Ŋgày sé wìr sén sí wíy a yen vinyo e njèm, é wón vén vee wónlě nsùme wáa yen vinyo e njà vinjeenjèm.

Ŋwàʼ Luk 24:27

Jesus nèn kèʼ, a toʼtí vinyo vidzə̀m ve vé‑eè saŋen é Ŋwàʼ Nyùy bìʼ wun, e kèʼ fo ve Mooser‑iì saŋen ví, e tùmsín e vé *aŋgàa ntum Nyùy vi adzə̀m.

Lim Aŋgàa Ntum 2:30

Wù‑uù dzə̀ *ŋgaà ntum Nyùy, a wù‑uù kìíy ne ŋkàʼmé wo Nyùy‑iì kàʼàn wun sho, e kfə̀n lìʼ ji wun wíy fo kàvàʼ və e wan woo wùn ram.

Ŋwàʼ Luk 1:55

mo wù‑uù kàʼàn ji wun wíy a sham Abraham wùn à rám rəə́, e dù, e jòʼsì.»

Lim Aŋgàa Ntum 13:32

«Vèr nen wìy sa lèn ji vèr fiʼti ven sáʼka Nyùy wo juŋ və̀n. A wù dzə̀ jii, kinyo ke Nyùy‑iì kàʼàn atǎr ram Isray sho,

Kèʼlo 3:15

M yíi màʼ vibàn e vèn wiíy nsàn, e kfə̀n màʼ e rám yée, à yé wiíyi. Wìr woo wun ram wíy bvə́ʼ kitú ké, áà wìy tè wun fo nsən kiwuù.»

Hibru 2:2

Vèsən kì ji kinyo ke nshèelav se Nyùy si‑iì tiísi fo ŋgùʼ kí‑iì ló a dzə rú, a kí‑iì dzə̀ á kitávín. Wìr‑iì tén kinyo kee shooy, fə́m shóʼor kimòʼón, Nyùy kù màʼ ŋgeʼ sho mo nsər‑iì dzəə̀n.

Ŋwàʼ Luk 1:72

Wù‑uù kàʼ jii, wun wíy a rər mendzən me atàr vér, a kuumé *mensaŋ me wù gwàrìn wùn áwune.

Lim Aŋgàa Ntum 28:23

Wùn à Por nèn kfə̀n sìysì kishiíy ke á wíy dzə̀ʼə̀m. Kishiíy kiy ki gheén, wíri báʼtí e Por lav aneénín, wù wáa sanrí kinyo ke Nyùy aáwune, e kèʼ fo kijàvndzə, e meé vitsə́ʼ, a fìʼtì mo sáʼ Nyùyi dzəə̀n. Wù wáa yòŋ vinyo fo Ŋwàʼ Nsər Mooser, e kfə̀n a yòŋ fo Ŋwàʼ Aŋgàa Ntum Nyùy, a mùm fó bìnèr áwune, aá biímé Jesus.

Joon 9:29

Vèr kì jii, Nyùy‑iì lo sùŋnín wùn Mooser, yii bèy, fo ké wìr və̀n ki, vèr yòʼ kì fo wù loòn.»

Joon 7:22

Yii bèy, mo Mooser‑iì foon nsər e vèn ji kishiíy kí gheenè, á nàŋsín wán woo lumèn, kí lòo gheén a dzə̀ ké bam, vèn kù nàŋsín sa. A bó yòʼ‑oò kèʼ Mooser mbèʼ se saŋén sí, kí‑iì lò a dzə̀ fo atǎr ram yéné.

Ŋwàʼ Luk 24:44

Wù nèn lò, e sùúy aáwune jii, «Kinyo ke vèn yenen lán kìn ki dzə̀ ke mò‑oò suuy e vèn, a vèsən dzə̀ə́. Mò‑oò suuy jii, vinyo vidzə̀m ve vé‑eè saŋen é Ŋwàʼ Nsər Mooser, e sàŋ é Ŋwàʼ Aŋgàa Ntum Nyùy bìʼ mo, e kfə̀n sàŋ é Ŋwàʼ Nsùyrì Nyùy Nyùy vi kù kér fó wìy gheén.»

Kèʼlo 6:3

Nyùy Tàr nèn sùúy jii, «Bó m yòʼ wíy màʼtì wír, é wù shaari gheéy, wù dzə̀ ben, a wù kér fóo wìy kpu. Kèʼ fo lèn, wù yòʼ dzəə́ wìy dzə̀ʼə̀m, e shaà kiyá kishóv mbaà é wiì (120).»

Joon 16:13

Wun woo Kiyoy ke Ranén kí wíy wìy, é wù yii, é vèn kiíy vinyo ve dzəə̀n ve ru ví vidzə̀m, bìʼ fo kù yii din wun kinyo ke dzəə̀n ke ru kí. A bó wù yòʼ wíy a suúy kinyo ji suuy wun. Wù kù wíy a tiisí a dzə̀ kinyo ke wù yú, a fèr ven vinyo ve ví dzəə́ wìy a koóy.

Lim Aŋgàa Ntum 3:21

A wù kù wíy a dzə e yuv, e meé e ghan se Nyùy wíy naŋsín vinyo vidzə̀m, é ví kfə́n vifíy mo aŋgàa ntum və́ vee fó ŋgùʼú‑uù tiísi mo wù‑uù suuyì.

Hibru 2:3

Mo kí dzəə̀n ben, vèsən kfən lò, a meŋ kiŋgaʼnìn ke kinyò ke yiìn Wan Nyùy ji vèsən fiʼ lùŋ, bo dzə̀ vèsən yèe, e bóo bòy fo ŋgeʼ? Kù‑uù tòmbìy, a fìʼtì wun woo Taàtá wòsən Jesus Kristu kinyo kìn, é bo wír ve vé‑eè yuuné wáa fìʼtì, é vèsən wáa kiíy sa mo kí dzəə̀n.

Hibru 3:5

Mooser‑iì ló a lìm rú e Nyùy lav shilív shimòʼón ji wír wo Nyùy lèmèn, wù wáa lìm lìmèn é lav foo fèy. A vinyo ve wù‑uù yii vi‑iì din a dzə̀ ve Nyùy‑iì dzəə́ wìy a yiì.

Hibru 4:8

A bo kirə́ʼ ké meèmè ke Nyùy yoŋ kìn ki yòʼ dzə̀ ke Joshua‑aà liìn wíri, e nə̀ə́ sho e wòŋ wo Nyùy‑iì foon aáwune. A vé‑eè nə̀ə́ é ghan see shooy, bo bó Nyùy yòʼ‑oò lo kfə̀n a kàʼ fo bàm ji kishiíy kímóʼ kí wíy a dzə, aá nəə́ é kirə̀ʼ ké meèmè foo fèy.

Hibru 5:5

A dzə̀ réŋréŋ sá mo bó Kristu yòʼ‑oò lo shòʼ kitú kfə́ ji wun wáa ker ntaʼ, a dzə ji taà cù wo kuʼùn. Yì‑iì lèm Nyùy wun mo wù‑uù suuyin kùm wun woo Kristu jii: «À dzə̀ Wán wom, a m sì Tàr won lán.»

Hibru 9:19

Yì‑iì dzə̀ é ghan see shooy, Mooser tómbìy yòŋ nsər se Nyùy‑iì foon bìʼ mensaŋ mee shooy, wíri yú adzə̀m. Wù nèn lì mensə́ me bvəy wùn à me nàʼ mè, e shwìr é mendzə̀v, e wàŋ é ŋwàʼ wo vé‑eè saŋen nsər see shooy sho, e kfə̀n wàŋ sá e wírí wùn. A wù‑uù lì a dzə̀ kikwiíy ke á yoŋ ji *hisov wùn à wúy njiì ye vé‑eè baàrsìné, e bó a waŋ sho.

Hibru 11:2

A Nyùy‑iì ló a binsí wír vee fó ŋgùʼ ámóʼó ji wír feyì mensəʼ metàn, a dzə̀ bìʼ fo vé‑eè wáy shilív e wun woo Nyùy wùn, yú a dzə̀ fó fo.

Hibru 11:18

A dzə̀ wán və woo shooy wo Nyùy‑iì suuyin e Abraham jii, «Á wíy a kiíy rám yé, a dzə̀ fo wan wò woo Aysi.»

Hibru 12:25

Vèn wáa yen rì fó ŋway kinyo ke Nyùy wo wù súŋnin e vèn ŋwáyín. Vèn kì sá ji wù‑uù lo màʼ ŋgeʼ e wír ve vé‑eè ŋwáy kinyo ke ŋgaà wo wù‑uù lèmèn é nsay fèn ji wù wáa tir wíri. Mo kí dzəə̀n ben, bo bó wìr wo wù ŋwáy kfə́ a dzə̀ kinyo ke wun woo Nyùy súŋnin fo yuv yòʼ wíy bòy fo ŋgeʼ gheéy.