Filipi 3:9 - ŊWÀʼ NYÙY

⁹ é vèr wun maysi, e làŋsìn, a dzə kifá kimòʼón. M dzə̀ lèn bèn, a Nyùy lì ne mo ji wír wo wù gheenen fo wun, a bó yòʼ dzə̀ ji m lèm a nsər sidzə̀m, a dzə là jay. Wù lì bìʼ fo m wayin shilív e Jesus Kristu wùn. M nen ghèén fo wun woo Nyùy lèn mo wír adzə̀m ve á wáy shilív e Kristu wùné gheenè.

Filipi 3:9 Referans Kwoze

2 Korin 5:21

Mo vèsən‑eè kér lòn, Nyùy nèn bàʼtí vinyo vesən ve bi ví, e siìr a dzə̀ e Kristu kitu. Kristu, a bó wù yòʼ kér jay wo dzəə̀n və́ə gheéy. A wù‑uù yii bèy, ji vèsən táti vèsən à Kristu, é vèsən wáa dzə sa là jay moo wun woo Nyùy.

1 Korin 1:30

Dzə̀ wun woo Nyùy wo wù liìn ven, e tàtí vèn à Jesus Kristu, wù wáa fo vèsən vifií ve ru ví, Nyùy kfən lì vèsən ji wír vee là jay, e fə̀ə́r vèsən fó lǒn vinyò ve bi ví, a yòŋ ji və́ vee wír.

Galatia 2:16

Yii bèy, a vèr kì sá jii, bó wìr yòʼ dzə̀ shó wo dzə̀ wù ghèén fo Nyùy ji bìʼ fo wun kì yii mo nsər suuyì. A dzə̀ wù kù ghèén cáʼcáʼ bìʼ fo wù wayin shilív e Jesus Kristu wùn. A dzə̀ mo ver vee wír veé Judàa wáy shilív lèn e Jesus Kristu wùn ji vèr fíʼ gheén fo Nyùy. Aá kù gheen a dzə̀ bìʼ shilív she á wáy e Kristu wùn, a bó yòʼ dzə̀ bìʼ lim yímóʼó ye vèr lim ji á mo nsər suuyì. Bó yòʼ dzə̀ wìr ghèén fo Nyùy bìʼ lim yímóʼó ye wù lìmèn ji á mo nsər suuyì gheéy.

Ŋwàʼ woó Rom 8:1

Kí nén a dzə jii, wìr wo wù tatin wùn Jesus Kristu bòy ne a fo lǒn vinyò ve bi ví.

Ŋwàʼ woó Rom 1:17

A kí dzə̀ jii, sáʼka Nyùy wo juŋ və̀n din mo Nyùy mán vinyo ve wìr, li ŋgaàŋ ji wír woo là jay. A wù li a dzə̀ wír wo wù wayin shilív e Wan və Jesus Kristu wùn, a bó dzəə̀ yìmòʼ yòʼ kfə̀n dzə̀ shó gheéy. A dzə̀ kíwun ke vé‑eè saŋen é Ŋwàʼ Nyùy jii, «Wìr wo wù wayin shilív e Nyùy wùn, wù lí ŋgaàŋ ji wír woo là jay, dzə̀ wo wù wíy lùŋ.»

Aysaya 53:11

Wù wíy yen ŋgeʼ, yì mayì, lóo yen vijuŋ ve yì wìyìn shó, kiiy nsàv, é shilív sə́ shí neem é nsay. Nyùy Tàr suuy jii, «Rúrú, ŋgaà wom lìm wíy yiì, aá mayir ajay wìr anín, bìʼ fo wun wo wù yòʼ kér jay wíy bèʼèy ajay wìr anín.

Jeremia 33:16

Wíy lòo dzə e ghan fen, é wír veé Judàa boy, é dzəʼə̀m wìr veé Jerusaleme wáa dzə e kiŋsìn. A yír ye á wíy a yòŋ ŋgaàŋ shoo dzə̀ jii, ‹Nyùy Tàr dzə̀ Ŋgaà Lùŋèr wor.›

Titur 3:5

e tìn vèsən fó lòn, á lùŋ. A bó wù yòʼ‑oò luŋèr bèy ji vèsən‑eè yii a vinyo ve ví wáa gheén wun. Wù‑uù lùŋèr vèsən cáʼ bìʼ və́ə woo nshámmé. Wù‑uù sù vinyo vesən ve bi ví, e fò Kiyoy kfə́ ke Ranén kí, kí yiì, vèsən kfə́n ji wír ve á siìn afíy, a ker dzəʼə̀m ye fíyi.

2 Timoti 1:9

Wù‑uù tìn vèsən fó lòn, á lùŋ, wù lì vèsən ji və́ vee wír. A bó wù yòʼ‑oò li bìʼ kinyo kímóʼ kí ke vèsən‑eè yiìn. Wù‑uù lì a dzə̀ mo kù‑uù sìysìn wun fo yàŋgùʼ ji wun wíy tatí vèsən à Jesus Kristu, e bùʼ ji wír və́.

2 Korin 5:17

Ke kí dzəə̀n kí dzə̀ jii, wìr táti wùn Jesus Kristu, bo ŋgaàŋ sì wír wo fíy. Dzəʼə̀m ye mvəə́ shaà ne, a wù sí kér lèn a dzə̀ ye fíyi.

Filipi 3:6

A mò‑oò lo wày kitávín féyì, a tom mbìv yee shooy, a nyàvrì e wír Kristùu ji á bívir a Nsər Mooser. Fo mbìv fóo fèy, mò‑oò ló a tiy réŋréŋ vèr à Nsər Mooser, a dzə là nsem.

Ŋwàʼ woó Rom 10:10

A kí dzə̀ bey, bìʼ fo Nyùy li wír, náŋsin ji woo là jay a dzə̀ mo wù yén, a wù wáy shilív e Jesus wùn. Ŋgaàŋ kfə́n lóo fìʼtì fo shuù, kí nèn a dìn ji wù lùŋ a ne.

Ŋwàʼ woó Rom 8:3

Nyùy yiì ne kinyo e mǒ wùn, a bó m yoʼ lò, a tùr a dzə̀ fó nsər, m yiì, bìʼ fo mensə́ mem mè yòʼ koŋ kinyo ke nsər suuyì. A kí dzə̀ jii, Nyùy‑iì tùm Wán wo dzəə̀n və́ə, wù wìy, e lì mbom a dzə̀ ye wìr wo wù yii vinyo ve bi ví. Wù‑uù kpù fo wírí ajay, nèn ndzəə̀r vitaáví vé vinyò ve ví lim aáwuné wùn vee shooy.

Jeremia 23:6

Wíy lòo dzə e wun ghan sé saʼ, é wír veé Judàa boy, é dzəʼə̀m wìr veé Israyi wáa dzə e kiŋsìn. Yír ye á wíy a yòŋ wun shoo dzə̀ jii, ‹Nyùy Tàr woo Ŋgaà Lùŋèr wor.› »

Ŋgaà Tàrvìnyò 7:20

Rúrú, bó wìr woo là nsem yòʼ dzə̀ shó e kitu ke nsay, wo wù kù yii vinyo a dzə̀ ve réŋ ví, a bó yòʼ dzə̀ wù jày kinyo.

Matio 9:13

Wù kfən sùúy jii, «Vèn du, e yèʼéy nsàv kinyò ke vé‑eè saŋen é Ŋwàʼ Nyùy ji Nyùy suuy a jii, ‹Ke m koŋ ki dzə̀ ji wìr wáa sham wùmòʼ woo wír, e shaà fó a rəsí, a seerí a dzə̀ nyám si, a cù mo shó.› Mo Nyùy suuy bèy, kém kí nén a dzə, a bó m yòʼ wìy ji m kfə́n a bi wír ve á yén vitú vév ji vé Nyùyi. M wìy ji m bí a dzə̀ vé jayi.»

Aysaya 53:6

Vèsən adzə̀me‑eè dzə́ fo mbìy, ján janén moo njiì wo wù jayin dzə́ə. Vèsən‑eè shwèy ne dzə́ə Nyùy, wìr wáa bìn e rə́ə yee dzə́ə. Yii bèy, Nyùy Tàr lí vinyo vesən ve bi ví vidzə̀m, e siìr e wìr və lìm və̀n kitu.

Nsùyrì Nyùy 143:2

M dzə̀ ŋgaà wò lìm, lá à yòʼ wày mo é kibàʼ ke nsaʼ. Bó yòʼ dzə̀ wìr wàa dzə là jay e wò si.

Nsùyrì Nyùy 19:12

Yii bèy, wìr yòʼ yii yén ndzə̀m rə. Sù ajay vém ve á yòʼ yénsinèe.

Nsùyrì Nyùy 14:3

Áwune adzə̀me kù jày ne dzə́ə, kù sì vé kiŋkùvrìi adzə̀m, wìr wo juŋ yòʼ kfə̀n dzə̀ə́ gheéy, fə̀m e mòʼón.

2 Wòŋ 32:25

Fòn Hesekiya lò, e nèn a koʼór a dzə̀ wún, e làa yòʼ a beèrì Nyùy béerin fó vinyò vidzə̀m ve wù yiìn e wun. Nyùy nèn yù nyár, e bàʼtí ŋgeʼ, a kìʼ Fòn Hesekiya wùn à wír veé Jerusalem, à veé Judàa shó.

1 Afòn 8:46

«Mo bó wìr woo là jay yòʼ dzəə̀n, a wír vée lòo dzə, e jày e wò, à shwiíy kilòŋ, e màʼtì aŋgàa vibàn véví koórí áwune ji akwàn, e dù sho aáwuné wòŋ kwaʼda, kìn fó mentsə̀m,

Kèʼlo 7:23

Nyùy ku nèn laàr kifá kidzə̀m ke kí‑iì ŋeʼ e kitu ke nsay, wir msòŋ wùn à nyám si, à kifá kidzə̀m ke kí ŋaŋrì e nsay ki, à menə́n meé yuv mè. Kù‑uù jòʼsì Noa wùn à kfə́ə rəə́, à vifá vidzə̀m ve ví‑iì dzəə̀n é kikoŋ wùn áwune ví.

1 Joon 3:4

Wìr wáa yiì kfə́ a dzə̀ vinyo ve bi ví, bo sì ŋgaà njò, bìʼ fo wìr yii kinyo ke bi kí, bo wù lì a dzə̀ njò.

2 Pita 1:1

Ŋwàʼ və̀ne sàŋ mo woo Simon Pita. M dzə̀ ŋgaà lìm Jesus Kristu, e kfə̀n a dzə ŋgaà ntum və. A m sàŋ a dzə̀ fo vèn adzə̀m ve á tíy e kinyò kee shó ke ver vee aŋgàa ntume tíy sho. Dzə̀ kinyo feyì feyì, a wày sá Jesus Kristu e věn kiwo, bìʼ fo wù kù yii yii kinyo kfə́ réŋ. Dzə̀ wun Nyùy wòsən, kfə́n a dzə Ŋgaà Lùŋèr wòsən.

Jeem 3:2

Dzə̀ rú, vèsən dzə̀ ben, a vèsən jáy vinyo vinín. Yii bèy, wìr lóo dzə a dzə̀ wù mèy kiliímé kfə́, e làa yòʼ a jay kinyo fo wùn shuù, bo ŋgaàŋ ghèén feyì. A dzə̀ wù kòytí kitú kfə́ dzə́ə sidzə̀m.

Hibru 6:18

Mo wù‑uù kàʼàn, e kfə̀n lìʼ, vinyo vìn vi nén a dzə vibaà ve bó yòʼ dzə̀ ví shaà fó ghaŋ, bìʼ fo vinyo vee shoon vi fəən a dzə̀ fo Nyùy shuù, a bó wù yòʼ yii bóʼti kimboʼtì. Kí nén a lùmèr melív mèsən ve á nəən ne e Nyùy sar, ji á fíʼ lùŋ vìn, á wáa ghar ŋkàʼmé və kitávín, a leéy a dzə̀ fó mbìy.

Ŋwàʼ woó Rom 16:7

Vèn shaʼti Andonikur wùn Juniar ve dzəə̀n afə́r vém veé Juda ve vèr áwune‑eè lim sháŋ amòʼón. Áwune dzə̀ aŋgàa ntum Jesus Kristu ve á din vitú vév féyì ji á lim a fo Kristu. A vé‑eè biìmé kinyo kfə́, é bo m wìy sìíy, e biìmé.

Ŋwàʼ woó Rom 5:21

Kidzə̀m ki nén a dzə jii, mo kinyo ke bi kí yiìn ne, a wíri kù kér fó a kpu, dzə̀ sá mo Nyùy koŋ wíri lèn, li áwune ji wír vee là jay, aá nəə e dzə̀ʼə̀m yee là may. A wù li a dzə̀ wír ve á wáy shilív e Tàr wòsən Jesus Kristu wùn.

Daniel 9:24

«Ku kìíy ji Nyùy lèm ne ntàm bìʼ vinyo ve wìr vén, à vé ŋkàlaʼ yen ye ranén ví, a ntàm rə̀n dzə̀ kiyá saàmbà kàŋ msaàmbà. Wù lèm ji á mayir á yii ye bií, é vinyo ve á jáy vi seéy, aá kfən màn lòn woo bìʼ vinyo ve bi ví, é Nyùy nèn tìír kinyo kee tínén é nsànloŋ, é kí wáa tiy fo ŋkuuŋkùŋ, e kfə̀n tiír kinyo ke wù‑uù ghemen ndzə e wír vəə́, à ke wù‑uù tumen aŋgàa ntum və́ shó ki. Wù tiirì, aá nèn *kfə̀mrí kirə́ʼ keé lav cù kee jeéy kí féyì.

Aysaya 46:13

M kù sí lo, e yiì, é yii yém yee réŋé fəə́sín lèn lèn, e bòyìr ven. Rúrú, m kù sí lo, e lùŋèr ven lèn lèn, m yòʼ dzə̀ kwaʼda. M wíy lùŋèr wír veé Sion, e bùʼ wír veé Isray e vikuʼùy vém ví.»

Aysaya 6:5

Á bèy, m nèn sùúy jii, «Lòné gbù ne e mǒ kitu. Ké ru kí, kém kí kù mày ne bèy. M shòv ne Fon e si, wun woo Nyùy Tàr woo Taà Mànjòŋ, a m dzə̀ kém wír wo kù fəə́ kinyo ke bi kí fó shuù wo, a m kù dzə́ a dzə̀ vèr à wír ve fəə́ kinyo ke bi kí fo áwuné shuù.»

2 Wòŋ 32:31

Fə̀m é ghan se vé saʼ veé Babilone‑eè tsənsin wír vév fo wun woo Fòn Hesekiya wùn ji á wiy, e dzə̀r á kisəəm ke Nyùy foon e wun, Nyùy kù‑uù màʼtì ji wù fó á binèr yee kwaʼtì rə́, e fíʼ taasín wun, e yen kinyo ke kí dzəə̀n e wun shiliv.

Remrí 27:26

« ‹Lǒn Nyùyi ku koò wír wo bó wù yòʼ yúnin nsər se Nyùy sìn wùn à ntir sə́ sí sidzə̀m, yii mo sí dzəə̀n.› «Á yoŋ bèy, é wìr dzə̀m ku nèn bìnsí jii, ‹Kí kú a dzə bèy.› »