Filipi 3:8 - ŊWÀʼ NYÙY

⁸ A bó yòʼ jòʼsì kee shooy cáʼcáʼ. M sí yén vifá vidzə̀m ji kilày ji m fíʼ a ker ke kuʼùn kí, a dzə̀ á ji m maysi, e nəə̀nín vèr Tàr wòsən Jesus Kristu, e kìíy wun kijuŋ. M nen màʼày vinyo vìn vidzə̀m a dzə̀ bìʼ wun woo Kristu, a yen lèn, ví wáa koʼóy koʼoyín ji m fíʼ a tiy a dzə̀ á vèr wun,

Filipi 3:8 Referans Kwoze

Ŋwàʼ woó Rom 8:18

A m kì féyì jii, bó yòʼ dzə̀ á fìʼsìn ŋgeʼ ye vèsən yén fo shintàm fèn wùn à vijuŋ ve vèsən wíy a ker e yuv ghán sidzə̀m vi gheéy.

Lim Aŋgàa Ntum 20:24

Yii bèy, a bó m yòʼ yén kitú kém, a kí mee e kifa, e shaà ji m maysi lim ye Tàr wòsən Jesus‑eè wayin e mǒ kiwo ji m wáa fìʼtì sáʼka Nyùy wo juŋ, a naàrì mo wù bùʼùn wíri.

Filipi 3:7

Yii bèy, a m fə̀m‑eè kér séʼ woo ka fó fo, bo m sí yén lèn ji kilày, tíy e kinyò a dzə̀ ké Jesus Kristu.

Joon 17:3

A dzəʼə̀m yee là may rə̀ne dzə̀ jii, wìr kiíy wò, wo kù jòʼsìn wò Nyùy wo rù, e kfə̀n kìíy sa mo woo Jesus Kristu wo wò‑oò tumen é ndzə fèn.

Filipi 3:10

M nén a tàʼ cáʼ jii, m maysi, e suùsín vèr Kristu, e kìíy wun kijuŋ, a yu mo vitaáví və́ ví lim e mǒ wùn, wun wo wù‑uù fəən fó kpu. A m kfə̀n taʼ ji m biímé sá ŋgeʼ se wù‑uù biimen, a yu a dzə̀ fo Nyùy, e fò kitú kém, e kpù mo wù‑uù foon kfə́,

2 Pita 1:3

Dzə̀ Taàtá wòsən və̀n wo wù‑uù yiìn, é bo vèsən kiíy Nyùy wo wù‑uù liìn vèsən ji wír və́, aá fiʼ nə̀ə́ e wùn mvə̀m vijùŋ, a ker liì a dzə̀ və́ə. Mo vèsən kiiyin ne wun, wù nen fò vitaáví və́ ve ghaʼán ví e vèsən, á kiíy mo dzə̀ á wàa tiír kiwuú dzə́ə sidzə̀m, a ghan moo wír və́.

1 Korin 2:2

bìʼ fo mò‑oò wayin ji vèsən lóo dzə, m kù a tiír vifií cáʼ ji m wáa fìʼtì kinyo a dzə̀ ké Jesus Kristu, bo taaka kpú ye wù‑uù kpuun é kintam.

1 Joon 5:20

Wàn Nyùy‑iì lo wìy e nsay fèn, e mvə̀ʼ vifií vesən, vèsən wáa kiíy Nyùy woo rú, a vèsən sí dzə́ kintatì vèsən à Nyùy woo rú və̀n, bìʼ fo vèsən à Wan və Jesus Kristu suusin ne. A dzə̀ wun wo dzəə̀n Nyùy woo rú. A dzəʼə̀m yee là mayi dzə̀ a dzə̀ e wùn kiwo.

Joon 17:8

Mò‑oò lo tiìsí vinyo ve wò‑oò tumen mo shó aáwune vidzə̀m, áwune biímé, e nèn kìíy rú ji m lò a dzə̀ fo wò, a yiì tùm wò mo.

Joon 14:20

Vèn wíy yen mo é kishiíy fóo fèy, é vèn nèn kìíy rú ji dzə̀ vèr Tàr wor, a vèr wun dzə̀ ji kitú kimòʼón, e kfə̀n kiíy jii, kù dzə̀ vèsən, a m dzə̀ e věn meliv.

Hibru 3:14

Kifá ke Kristu kér kidzə̀m ki sì sá késən, a vèsən fèn tíy a dzə̀ é kinyò ke vèsən‑eè wayin shilív shó fo mbìy, e dù, e jòʼsì.

2 Korin 4:6

Yì‑iì mvə̀ʼ Nyùy vifií vér, é bo vèr yén rán, a kiíy Jesus. A kù dzə̀ wun woo Nyùy wo wù‑uù suuyin fó shuù ji ndzə rán, yì nèn ràn. Vèr nén a yen mo vitaáví vé Nyùy vi lim e Kristu wùn, a kiíy mo wun woo Nyùy ghaʼan.

Joon 14:7

A vèn kì kì rú mo m dzəə̀n, bo vèn kìíy ne a dzə̀ Tàr wor. Yii bèy, kèʼ fo lèn, vèn yíi kiíy Tàr wor, a vèn‑eè sí yén wun e sí yéné.»

Aysaya 53:11

Wù wíy yen ŋgeʼ, yì mayì, lóo yen vijuŋ ve yì wìyìn shó, kiiy nsàv, é shilív sə́ shí neem é nsay. Nyùy Tàr suuy jii, «Rúrú, ŋgaà wom lìm wíy yiì, aá mayir ajay wìr anín, bìʼ fo wun wo wù yòʼ kér jay wíy bèʼèy ajay wìr anín.

Efesor 4:13

é vèsən nèn màysì, a way shilív e wun woo Wan Nyùy wùn, a kiíy mo vinyo və́ ví dzəə̀n, a tiy sho ji wír amòʼón. Vèsən nén a dzə wír ve sí yéví ranen ne, a kiíy vinyo ve Jesus Kristu réŋréŋ mo wun woo Kristu kiìn.

2 Pita 3:18

Vèn ku wày kén vifií ji vèn à Taàtá wòsən Jesus Kristu wo wù‑uù tinen ven fó lòn nəə́nín, é vèn wáa tiy e dzə̀ʼə̀m ye wù bùʼùn ven shó, a kiíy wun, a dù duùn fó mbìy. Vèsən kú a burí wun, a koʼór yír rə́, e kèʼ fo lèn, e dù, e mày. Amen.

1 Joon 1:3

Kí nén a dzə jii, kinyo kidzə̀m ke vèr‑iì yenen, e kfə̀n yù, a dzə̀ vèr fèr sá, é vèn yú. Mo vèn yuun, é vèn nèn tàtí sa, é vèsən wáa yuurí kinyo kee shó kimòʼón. A vèr tàtí a dzə̀ vèr à Tàr wòsən Nyùy, à Wan və wo dzəə̀n Jesus Kristu.

2 Timoti 4:6

Kee kùm mo kí wáa dzə jii, ghán se m sí yìi màʼtì nsay si sì á fo mentsə̀m. Sì á ghán se á yíi lì mo, e yuyrí bìʼ kinyo ke Nyùy.

Joon 20:28

Tomar ku nèn sùúy suuyín jii, «Dzə̀ wò Tàr wor, aà dzə̀ Nyùy wom.»

Joon 16:3

Aá wíy a yiì bèy, bìʼ fo bó á yòʼ kiìn mo, a bó á yòʼ kì sá Tàr wor.

Nsùyrì Nyùy 126:6

Rúrú, wìr yii li ŋgoòy kifa, wáy e nsay e mensíy mè si, wù kù wìy a kfən e bàm, a beʼ vifá ve wù kavin, a yòv nsiì.

1 Joon 2:19

A wír vìne kù fəə́kir a dzə̀ fo vèsə́n mvəm. A bó yòʼ‑oò dzə̀ wír vee vèsə́n mvəm. A yì‑iì dzə̀ vee vèsə́n ŋgoo rú, bo bó á yoʼ kfə̀n fəə̀kír. Mo á fəəkin, kí nen dìn kiránén ji bó á yòʼ‑oò lo tàtí a vèsən.

1 Pita 2:7

Ké ven vee wír ve á wayin shilív e Jesus Kristu wùn kí nén a dzə jii, wù bòŋ rú á fo vèn féyì. Yii bèy, ké wìr ve á méŋ wun méŋén kí wáa dzə mo vé‑eè saŋen é kirə̀ʼ kímóʼ kí jii: «Tíy ye vé kimbome leeyin ntéŋé sì yíwun ye yí loòn ne, e tòm kór lav.»

Galatia 1:16

Wù nèn wìy yiì, m yén Wán və e sí yémé ji m fíʼ a ghan, a fìʼtì kinyo kfə́ e wír ve bó yòʼ dzəə̀n veé Judàa. Mo m yenen Kristu bèy, e làa yòʼ kfə̀n dù ji m yú kinyo a fo wìr.

2 Korin 4:4

Ké wír vìn ki dzə̀, a sə̀tí Satan woo nyùy wo wù kér ndzə rə̀n lèn vifií vév fo á biíme sáʼka Nyùy wo juŋ. A bó yòʼ dzə̀ áwune yèn rán ye sáʼka Nyùy wìyìn shó, a kiíy mo Kristu dzəə̀n. Kristu, wo wùn Nyùy dzəə̀n kikúv kimòʼón.

1 Korin 9:10

Bó wù yòʼ suuy a dzə̀ e vèsən a? Vé‑eè sàŋ a dzə̀ fo vèsən, bìʼ fo wìr yii lóo lìm súm wìr, wù kù a kiíy ji wun wíy a ker a kifá fo fo, kìn dzə̀ ŋgaà lìm, kìn dzə̀ ŋgaà kav.

Joon 20:13

Á nèn yòŋ jii, «Yaà, à diy ka?» Wù bìnèr jii, «M diy, bìʼ fo á shàʼàrìn dzə́n Taàtá wom, la m yòʼ kìíy fo á lèmèn.»

Ŋwàʼ Luk 11:20

Wáa dzə, a m jum rú anyùy a dzə̀ é vitaaví vé Nyùy, bo dzə̀ ji sáʼ Nyùyi kèʼ ne lèn e nsay e sén see ghán sí.

Kintaŋ 14:30

Bó wìr mòʼón fo áwune yòʼ wíy shov woŋ wo mò‑oò kàʼàn ji m wíy lèm áwune fó. Kù mày Kalev woo wan Jefunne wùn Joshua woo wan Nun.

Ŋwàʼ Luk 1:43

Nyùy bùʼ mo ben ji ka, é bo yìy à Taàtá wom wiy, e ghàn mo?

Malakay 2:3

Vèn yuúrí, ké lèn ki, m lo, e màʼ ŋgeʼ e rám yéné kitu. M yíi sam jáŋ nyàm se vèn wiy, yii cu sho e věn si. Sámé, aá tátí vèn à jáŋ yee shooyi, e kùúy, e dù màʼày.

Ŋwàʼ Jov 20:7

bo wù kù wíy lày kisáŋ moo jáŋ ye wù nye, é wír ve vé‑eè kiìn wune wáa dzətí ji wù bèé a?

2 Afòn 9:37

é dzə́n rəə́ wáa neŋ ji jàʼkìkì moo jáŋ bèy fo nsay, a bó yòʼ dzə̀ wìr kfə̀n kìíy ji dzə̀ á Jesebel.»

1 Afòn 14:10

Bìʼ bey, m yíi màʼ ŋgeʼ e wò kfəə. M yíi yuyrí wan bàm woo lumèn e dzə̀m fo wò kfəə, kìn dzə̀ wan kwàn, kìn dzə̀ wan nsay. M yíi tòn kfə́ə yé, wò woo Jeroboam mo wìr tòn jáŋ nàʼ yí shwí, e bò.

Nsùyrì Nyùy 73:25

Nyùy Tàr, m kfə̀n kér la é yuv, e shaà wò? M yòʼ siíme kifá kímóʼ kí é nsay, e kfə̀n shaà wò.

Ŋwàʼ woó Rom 8:39

Kìn wìr dzə̀ feé, kìn wù dzə̀ é ntoò yùv, kìn wù nə̀ə́ e loònsay, bo bó kifá ki yòʼ dzə̀ shó ndzə e dzə̀m ke dzə̀ kí shèm fo Nyùy wáa kòŋ vèsən. Vèsən vin ve á tatin vèsən à Taàtá wòsən Jesus Kristu.

Filipi 1:1

Ŋwàʼ və̀ne sàŋ mo woo Por vèr Timoti ve dzəə̀n aŋgàa lìm Jesus Kristu. Vèr sàŋ a dzə̀ fo vèn vee wír Nyùy ve á dzəə̀n é Filipi adzə̀m ve vèn à Jesus Kristu tatin. A wú dzə̀ fo vèn à vilìmbìy vén ví, à wír ve á lim e věn mvəmé adzə̀m.

Filipi 3:12

A bó m yòʼ suuy bèn ji m sí yii a vinyo ve m shóvti sí, leey vìn vidzə̀m, kìn ji m ràn ne a fo vinyò foo fèn. Yii bèy, m kù tùytí sí, a leéy fó mbìy ji m ghár á vinyo vee shooy e mǒ kiwo, bìʼ fo Kristu‑uù liìn mo ji wír və ji m wáa yiì vinyo vee shooy.

2 Pita 1:2

M nén a lon jii, vèn kú a kiíy a Nyùy wùn Tàr wòsən Jesus Kristu, a dù duùn fó mbìy, aá maysi, a leéy fo vèn, a yiì, é melív men mè wáa dzə nyaáŋ.

2 Pita 1:8

A vèn lò, a yiì vinyo vìn vidzə̀m, a dù duùn fó mbìy, é vèn nèn màysì, e kìíy dzəʼə̀m Taàtá wòsən Jesus Kristu, a wàrkìr, a yiì vinyo a dzə̀ ve ví gheen Nyùy.