Filipi 3:19 - ŊWÀʼ NYÙY

¹⁹ Vee shooy vee wíri wíy jòʼsì kév a dzə̀ é və̀y, bìʼ fo wóov woo Nyùy dzəə̀n shúuyi, aáwune kfə̀n sumrì wún é vinyò ve á kì rə̀ʼ‑ə́ə̀ wáa woomé woomén fó fo, wáy vifií vév a dzə̀ é vinyò veé nsay fèn.

Filipi 3:19 Referans Kwoze

Ŋwàʼ woó Rom 16:18

a kiíy jii, áwune yòʼ lim a dzə̀ á fo Tàr wòsən Jesus Kristu gheéy. Áwune diy a dzə̀ wóv woo shuu. Á lo, á wàa naŋsín kinyo, a fèr, kí wàa nyòm, e nèn a boʼtí wír ve bó á yóʼ ne kìíy vinyo.

2 Pita 2:3

Mo wír vìne kù taʼ a dzə̀ mbàm, á lo, aá nèn taà vinyo vinín, a boʼtí ven shó ji á fíʼ koóy. A Nyùy kù‑uù shòv ne áwune fó ŋgùʼ, e bàʼtí lòn wo áwune wíy nəə́ sho.

Kolosia 3:2

Vèn tiír ri vifií vén ví a dzə̀ é vinyò foo fèy. Lá vèn yòʼ tìír e vinyò veé nsay.

2 Pita 2:1

Mo vé‑eè tiísi a dzə̀ ntum Nyùy e wíri, yii bèy, wír ámóʼó‑oò ló a dzə sa ve vé‑eè lo a dzə̀ ntum kimboʼtì. A kù dzə̀ réŋréŋ sá mo aŋgàa yeʼéy ámóʼó wíy nànèn e věn mvəm, a boʼtí ven. Áwune wíy lì kimboʼtì, a woór e mvə̀m kinyò ke Nyùy, a tuŋ wuú Taàtá wòsən Jesus wo wù‑uù kpuun ji áwune fiʼ lùŋ. Aá wíy yiì bèy, é Nyùy ku nèn tsə̀m áwune e lòné.

2 Korin 11:15

kù dzə̀ réŋréŋ mo dzə̀ aŋgaà və́ lìme wàa bìnkìr sa bèy, a yensín ji wír ve á lim a dzə̀ fo Nyùy. Aá yii bèy, káv a dzə̀ lòn, e wìy nəə́ e ŋgeʼ fo vinyò foo fèy.

2 Korin 11:12

M ku nèn a tiy a dzə̀ e kee shoon ki, fo wír ve á suuy vitú ji áwune dzə̀ aŋgàa ntum Kristùu maysi, a saà wún ji á lim réŋréŋ moo mo woo Por.

Hosea 4:7

«Atàá cù, mo ŋgoo yen kuʼù, kù dzə̀ sá réŋréŋ mo vinyo vén ve bi ví kuʼù. Bìʼ bey, m yíi siìr viwìr vén, é ví kfə́n ji nshoórmé.

2 Pita 2:13

Nyùy wíy màʼ ŋgeʼ aáwuné kitu réŋréŋ sá mo áwune bóʼti wíri, danèr, wáy e lòn. Áwune yéʼey kév wíri jii, a dzə̀ wìr kù a yiì a mo mensə́ mvə mè limè, e fíʼ a yu vijuŋ. Á ku nèn a yiì joonè vən, à e shùy sho. Wír vìne shoor kintatì kén féyì. Vèn áwune lo, á tàtí, a yikír, áwune bin fo bàm, á wàa bùʼtì vinyo ve mensə́ mev mè kér shií shó vidzə̀m.

Galatia 6:13

A bó wír ve á biíme ji á wáa naŋsín áwune víne yòʼ fə̀m lem sa nsər se wìr veé Juda sidzə̀m. Áwune səŋrì ven cáʼcáʼ ji vèn biímé, aá náŋsín sá ven, aá fíʼ a sùmrì wún ji vèn kfə̀n ne aáwuné mbìv.

Ŋgaà Yen 21:8

Yii bèy, ké wìr ámóʼó kí kù jòʼsì ne kimbiirìn ke və̀y fo və́yí bo, baári moo mekàŋ, a dzə̀ kpú yee akàŋ abaà. A kù dzə̀ áwune adzə̀m ve bó á yòʼ‑oò lo kùr shilív, a tiy e mǒ kinyò, e làa yòʼ a way shilív e mǒ wùn, tíy a dzə̀ é vinyò ve kisaŋ vi. Kìn dzə̀ wír wo wù yúyri wír, kìn ŋgaà kinjàŋ, kìn wo viŋkar, kìn wo wù sénin sə́m, kìn wo wù ghvə́m vifá vímóʼ ví ji Nyùy, e lì aŋgàa kimboʼtì adzə̀m.»

1 Korin 3:3

Vèn kù dzə̀ə́ moo wír ve á yú a dzə̀ fo mensə́ mev mè. Mo vèn rə́si gheʼnìnè, táŋnin ghán sidzə̀m, bó kí yòʼ din ji vèn dzəə́ yú a dzə̀ fo mensə́ men mè à? Vèn kù dzəə́ yii a dzə̀ kinyo ke wír veé ndzə fène yii.

Nsùyrì Nyùy 17:14

Éè Nyùy Tàr, nàn kóy wóo, e bòyìr mo fo wír vìne. Ku laàr áwune fó nsay fèn. Sə́ʼsí kilíŋ kév kí, aá lay fó wòŋ. Ké wìr ve à koŋè, à yíi rəə̀r jíŋ yev, é wón véví kú a ker ké a yi, é kí wáa jàmtìn, aá koóy keé lèm sa e wón véví.

Ŋgaà Yen 22:15

Wír ve á wíy a gòʼ kév a dzə̀ fó ndzəə dzə̀ á ve á yii joonè wùn à ve á sénin sə́m, à ve á jaŋ kinjàŋ wùn à ve á ghán viŋkari, à ve á yúyri wíri wùn à ve á ghvə́m vifá vímóʼ ví ji Nyùyi. A wír ve á koŋ kimboʼtì, tíy a dzə̀ shó adzə̀me kù wíy gòʼ sa fo ndzə.

Ŋwàʼ Jud 1:16

Enok wáa suúy bèy, a kù dzə̀ mo wír vìne rə́si ghvəvrì Nyùy, e làa yòʼ a yen kinyo, é kí wáa gheén áwune gheéy. Á kù yii vinyo a dzə̀ ve mensə́ mev mè taʼà, ghaŋtì shuu, sévti vinyo sévtín, leerì wíri ji á fíʼ a koóy kifá.

2 Timoti 3:4

Á wíy a kar menàŋ, a yiì mo áwune koó, a kwàʼ vifií kwáʼan. Á wíy a kòŋ fó a yi a dzə̀ vitú vév, a bó yòʼ dzə̀ á wàa kòŋ Nyùy gheéy.

1 Timoti 6:5

Aáwune táŋnin bèy, a dzə̀ bìʼ fo wìr yòʼ dzəə́ kér shilív she juŋ shi wùn wùmòʼ, a bó wìr yòʼ dzəə́ yéʼey áwune sá kinyo ke dzəə̀n ke ru kí. Á lò ne, a yeʼéy vinyo jeéy jeéy mo kinyo ke Nyùy ki dzə̀ á dzəə wày yìmòʼ bey, ye dzə̀ wìr kùʼ fó fo.

2 Tesalonika 2:12

Aá biímé bey, é nsaʼ Nyùy nèn wìy koò áwune vee shooy adzə̀m ve á tenen kinyo ke ru kí, a jùmrì ké kisaŋ ki.

Filipi 2:21

A m suuy bèn, bìʼ fo kùʼùn wìr diy a dzə̀ kfə́ kee kinyo, e làa yòʼ a ci ké Jesus Kristu gheéy.

1 Korin 5:6

Mo vèn yén kfə́ə kinyò kee ben, kfə̀n raʼsì wún, kí yoʼ bòŋ gheéy. Vèn wáa kiíy ji kinyo ke bi kí yii keʼ shishàr, kí nèn ghànén e wírí mvəm réŋréŋ moo shinyaà she á ŋèʼèn meŋkfəŋ kighín kifur, shí yií, meŋkfəŋ mè kóʼ medzə̀m.

1 Korin 5:2

Vèn yén kfə́ə joònè vən, kfə̀n raʼsì wún ji ka? Bo vèn kì yíi a dìy dìyìn. Vèn kér fó fəə́r wír wo wù yiìn kfə́ə kinyò kee ben fəə́rín fo věn mvəm.

Malakay 1:12

Yii bèy, ven vee atàá cùu káy mo káyín, mo vèn liìn kíy cù wóm ji kirə́ʼ kee fó tèr, li vifá ve ví kér nsem, wiy ji á cu mo shó.

Ŋgaà Yen 19:20

Á nèn tàm, wù koó nyám ye beemén rə̀y wùn ŋgaà ntum və wo wù‑uù rə́si ghán fo wùn mbìy, shóʼ virom, bóʼti wíri shó. A wù kù‑uù bóʼti a dzə̀ wír ve vé‑eè kér nsáŋti nyàm ye beemén rə̀y aáwuné wùn, ghvə́m kibámmbó kfə́. Mo á koon áwune, e nèn dù, e màʼ e kimbiirìn ke və́yí bo sho, baári moo mekàŋ.

Jeem 4:16

Vèn lo kén, á nèn a dzə̀v a dzə̀ nsaŋ, a sevtí mo vèn bvəə́shi, e yiì. Vèn wáa kiíy jii, fó a sevtí bèy dzə̀ á kinyo ke kisaŋ ki.

2 Tesalonika 2:8

é bo wun woo Fon Vinyò ve Bi ví fəə́sín. Yii bèy, a Taàtá wòsən Jesus wíy sàsìn, e bvəy, e fer wun férín e kiyoy ke kí fəə́ fo wùn shuù ki, e yuyrí, e màysì, e laàr e kishiíy fóo fèy.

Ŋwàʼ Luk 18:4

Ŋgaà saʼ və̀y tén, wù kú a dù duùn. Kí gháʼ, wù suúy jii, ‹Mo bó m yòʼ fə̀m fan Nyùy, a bó m yòʼ yii kér dzə̀rkìtu fo wìr,

Ŋwàʼ Luk 16:19

Jesus kfə́n a fèr jii, «Ŋgaà kav wùmòʼ‑oò dzə̀, a wù wáyri wún é ŋàŋ, rə́si vishiíy vidzə̀m, yí a dzə̀ kitú kfə́.

Ŋwàʼ Luk 12:19

M yii bèy, é m nèn sùúy e kitú kém kí jii, mo‑óò meeme lèn. M sí kér vifá ve dzə̀ m yì é bǎm viya vinín. A m yíi a yi lèn, a no, a yu vijuŋ.

Matio 25:41

«Wù suuy bèy, é wù nèn bìnkìr, e sùúy e veé koy ŋkoòvìi jii, ‹Lǒn Nyùyi shòv ne ven. Vèn kóʼtí ben fo mǒ si, e dù, e nə̀ə́ e və̀y wo Nyùy‑iì naŋsin, e lèm fo Satan wùn à nshèelav sə́ sí.

Matio 16:23

Jesus leéy Pita, e wàm jii, «Kóʼtí fo mǒ si, à dzə̀ Satan. Lá à yòʼ a jivír mo fo m yii kinyo ke Nyùy sìysìn. À kwaʼtì ké kinyo moo wír, bó à yòʼ kwaʼtì moo Nyùy.»

Mayka 3:11

Atǎr saʼ vee fóo kù sə́ a dzə̀ kòyàr, e bó a saʼ, aàtàá cùu sə́ mbvə́nkíwó, e bó a toʼtí nsər se Nyùy, aàŋgàa ntum Nyùyi kù maʼ sa kiwó, e bó a tiisí vinyo ve ví yíi a koóy. Áwune sə́ bèy, dzəv nsaŋ, suuy jii, «Nyùy Tàr dzə̀ vèr áwune, a dzə̀ sə̀ʼ ka ver.»

Mayka 3:5

Nyùy Tàr nén a suúy kùm aŋgàa ntum kimboʼtìi jii: «Áwune taʼ kév ji wír vémé jáy dzə́ə. Wìr wáy shuu wóv, á nèn a kàʼ mo Nyùy yíi səə̀vì ŋwérín, é wù wáa dzə e vijùŋ. Wìr tén fóo fo kòyàr, á nèn a fìʼ rə́mrə́m kinyò wo Nyùy yíi yiì e ŋgaàŋ.

Esiker 34:3

Vèn nó vín njiì, bá ndzə̀y sén e wuyi. Vèn seéri ve faŋkìné, yii bèy, a bó á yòʼ yiir ŋgoo yem njiì.

Nsùyrì Nyùy 52:1

Ntav və̀n, à buʼtì vinyo, dzəv nsaŋ bèn a dzə̀ ka? Nyùy kù tíy wùn à wír vəə́ kishiíy kidzə̀m, kiŋsìn áwune.

Ŋgaà Yen 18:7

Mo wù‑uù kóʼnin, yí kitú kfə́, á kù yíi sə̀r sa wun réŋréŋ bey, é wù wáa ŋeèy, a ser e kibvə̀r. Wù‑uù sévti jii, ‹M yéʼ e kàvàʼ, a sáʼ mo woŋ. M yòʼ dzə̀ wiíy ŋkfə. M yòʼ wíy a ser e vifù é ghan símóʼ sí ji m diy kpú lum.›

Ŋwàʼ Jud 1:4

A m suuy bèn, bìʼ fo wír ve á méŋ Nyùy ámóʼó woonen ne, e nə̀ə́ e věn kintatì, a yeʼéy kév wíri jii, mo Nyùy bùʼùn ne ven, e lì ji wír və́, vèn bóy fó lòn, a dzə̀ vèn wàa yiì lèn a mo mensə́ men mè taʼà. Aá suuy bèy, nèn káy Jesus Kristu wo kù jòʼsìn wun ji Taàtá wòsən wo dzə̀ á wàa yu fo fo. A Nyùy‑iì yiì ne dìn lòn wo wù wíy màʼ e wír vee bené kitu.

Ŋwàʼ woó Rom 6:21

Vèn‑eè yii vinyo a dzə̀ ve ví gheenen ven, a dzə̀ víwun ve vèn lo, kuúme lèn, á wàa woomé fo fo. Vèn‑eè yii bèy, kooy ka fó fo? Ví kù‑uù danèr ven, wáy a dzə̀ é kpu yee ŋkuuŋkùŋ.

Esiker 13:19

Vèn shòór ne yír yém e wír vémé si ji á diy a kù dzə̀ kiwó ke saŋ yee *barli, kìn kimbéʼ ke kiban. Vèn bóʼti wír vém, aá kù koŋ kòŋèn, a kimboʼtì kén kí yúyri wír ve yòʼ kì dzə̀ á kpù, bávti wír ve kì dzə̀ á kpù.›

1 Samuel 2:29

Yiì ka lèn, bo vèn wáa siimé cu wùn aàfómo ve wír vémé fó e mǒ kibàn? Aá kù fó réŋréŋ mo m suuyin. À ghàn é le, bó a ghvəm wón vé, e shaà mo? Wír vém veé Israyi wiy ji á cu mo, à màʼtì wón vé, á shòŋ mbìv sé nyàm se juŋ si, vèn áwune wàa fomér bvəm yén shó.

Jeremia 44:17

Vèr kù wíy a yiì vinyo vér vidzə̀m, a dzə̀ mo vèr‑iì kàʼàn ne. Vèr wíy a tòn kiláy, a cù Yaà woó Yuv shó, e kfə̀n a cù wun e meluʼ mè. Vèr kù wíy a yiì réŋréŋ mo atàr vér wùn aàfone, à vé saʼa‑aà rə́si yii e ŋkà se laʼ seé Juda, kfə̀n yii e dzəə seé Jerusalem. Vèr‑iì yii bèy, kér vifá ve yi nyanyày, kér dzəʼə̀m ye juŋe, a bó ŋgeʼ yòʼ‑oò dzə́.

2 Tesalonika 1:9

Aáwune nèn nə̀ə́ e ŋgeʼ yee là may e kishiíy fóo fèy, a bó yòʼ dzə̀ áwune shòv Taàtá Jesus e si e ghan se wù wíy a saʼ vifon və́, a ker vikuʼùy ve ghaʼán ví.

Ŋwàʼ Jud 1:10

Wír vìne nén a dzə kév, a kuùrì vifá vidzə̀m kúurin, a bó á yòʼ kì mo ví dzəə̀n. Á kù yii vinyo mo áwune koó, réŋréŋ moo nyám se kwaʼ. A dzə̀ vinyo vìn ve ví yíi way áwune é ŋgeʼ.