Filipi 2:15 - ŊWÀʼ NYÙY

¹⁵ é vèn nèn a dzə e wírí si là njò, e làa yòʼ a ker nsem yìmòʼ gheéy. Vèn lóo yiì bèy, é vèn nèn a dzə wír Nyùy ŋkuuŋkùŋ, là jay e ndzə ye wíri yii joonè shó, kér melív me bi mè rə̀n. A vèn yíi a njàʼkìr e wír vee shooyí mvəm moo mejiy,

Filipi 2:15 Referans Kwoze

1 Pita 2:12

Vèn lóo dzə vèn à wír ve bó á yòʼ kiìn Nyùyi, vèn kù a dìn a dzə̀ liì wo juŋ. Aá fə̀m lór ven, aá kú a yen a dzə̀ vinyo vén ve ru ví, wíy lóo dzə e kishiíy ke Nyùy taʼ, e sham áwune, wù jaŋè, aá nèn màʼtì liì wov wo bi və̀y, e bìnkìr, a ghvəm a dzə̀ wun.

Matio 5:45

Vèn lóo yiì bèy, é vèn nèn a dìn ji vèn dzə̀ rú wón Tàr won wo wù dzəə̀n é yuv. Dzə̀ wun wo wù yii, a ndzə rán wír adzə̀m. Yì rán sa wír ve á yii vinyo ve bi ví réŋréŋ mo yì rán ve á yii ve juŋ vi. A kù dzə̀ mo wù yii, a wuú ló e wír ve á méŋ wuné sum réŋréŋ mo yí ló e ve á yú wuné sum.

Aysaya 60:1

Éè Jerusalem, vèn ŋáʼáy, e dìn e wìr msòŋ mo Nyùy luŋèr ven. Rán yéné wìy ne, vikuʼùy vé Nyùy Tàr ví nəə́ ven.

1 Tesalonika 5:23

Vèr nén a lon jii, wun woo Nyùy wo wù yii, a melív mèsən mè dzə́ nyaáŋ ku yiì, é vèn wáa dzə wír və́ ŋkuuŋkùŋ. A vèr kfə̀n lón sa jii, wù kú a shìy ven, é vèn wáa dzə ajuŋ là nsem, a kwàʼtì a dzə̀ vinyo ve juŋ vi, a ker melív me juŋ mè, é la wìr wùmòʼ yòʼ a ker lóm yìmòʼ e wun wùn gheéy, e dù, e meé e ghan se Tàr wòsən Jesus Kristu wíy a wìy.

Remrí 32:5

Yii bèy, Isray yiì ne kinyo ke bi kí e Nyùy Tàr. Á bèy, bìʼ jay wov, á yòʼ kfə̀n dzə̀ə́ wón və́. Áwune dzə̀ vé liì kisaŋ, a dzə̀ aŋgàa kimboʼtì.

2 Pita 3:14

Á bèy lèn ŋkàr sem, mo vèn sí shiy kishiíy ke Kristu wíy kfən, vèn ku tìír vifií vén féyì ji vèn à Nyùy wáa dzə a kiránén, é melív men mè wáa neŋ ji nyaáŋ, é la vèn yòʼ a fàn kinyo kímóʼ kí gheéy.

1 Korin 1:8

A wun woo Jesus Kristu kù yíi a yiì, é vèn wáa tiy e wùn kinyò kitávín, e dù, e jòʼsì. Wíy lóo dzə e kishiíy ke wù wíy wìy kee shooy, é la vèn yòʼ dzəə gbù njò yìmòʼ gheéy.

Titur 2:10

e làa yòʼ a shwìvìr kifá. Áwune kú a yiì vinyo tìítiy, a dìn ji áwune dzə̀ á wír vee réŋ. Á lóo yiì bèy, é wíri nèn a yen duŋrì ye vèsən duŋrì kùm Nyùy wo wù luŋèr vèsən ji kinyo.

1 Pita 2:9

Yii bèy, fo kén kí, vèn dzə̀ kén rám, a shòʼ Nyùy ven. A vèn dzə̀ atàá cù, lim a dzə̀ fo wun woo Fon. Wù‑uù nàŋsín ven ji kitúm kee jeéy kí, vèn wáa dzə və́ vee wír ji vèn wáa fìʼtì vijuŋ ve vinyò ve wù rə́si yii e vèn, ven ve wù‑uù fəərin fó ndzə vitsə̀ʼ, e wày e wùn mvə̀m ran ye ghaʼáné.

Matio 5:48

Kidzə̀m ki wáa dzə jii, vèn wáa yiì vinyo vén tìítiy, é ví wáa ran réŋréŋ mo Tàr won wo wù dzə́ e yuv ráné.»

1 Timoti 3:10

Bo á wáa lèm, á kù sàáy liì wov kijuŋ. Yén, aá gheén, á nèn lèm, aá wáa lìm e kintatì.

1 Timoti 3:2

Aá wáa kiíy jii, kilìmbìy ke kintatì ki kù kér fó a dzə a wír wo bó yòʼ dzə̀ wíri wàa ndzəə. A wù kù kér fó a ker wiíy e mòʼón cáʼcáʼ, a dzə wír wo wù lo ji weè, kfə̀n kwaʼtì vinyo kijuŋ, é kfə́n a dzə sa wír wo wíri wáa yu. A kù kfə̀n kér fó a dzə wír wo wù koŋ vé kiŋgàné, kfə̀n kiiy mo dzə̀ wù yèʼéy wíri kijuŋ.

Filipi 1:10

Vèn lóo səə̀m, é vèn nèn a fəə́r a dzə̀ ve juujùŋ vi, é wíy lóo dzə e kishiíy ke Jesus Kristu kfə́n e bàm, é vèn wáa tiy e wùn si là nsem, a wàrkìr.

Efesor 5:27

A Kristu‑uù nàŋsín áwune bey ji wáa dzə ji kfə́ kee kintatì, a bòŋkìr, a njàʼkìr mo kifá ke Nyùy ki yii dzə́. A dzə̀ jii, kí wáa dzə a là shilóm, e làa yòʼ a ker nsem yìmòʼ gheéy, a dzə bèn là jay.

Ŋwàʼ woó Rom 16:19

Mo wìr dzə̀m fə̀m kiìn ji vèn tíy kitávín é kinyò ke vé‑eè yeʼeyin ven shó, a m shéʼri ven féyì, m ku kfə̀n a tàʼ, e tir ven jii, vèn ku wày vifií, a tàr vinyo vidzə̀m, e fíʼ kiíy ke dzəə̀n ke juŋ ki, e baàmè ke bi kí.

Lim Aŋgàa Ntum 2:40

Pita nèn kfə̀n a suúy vinyo vímóʼ ví vinín, a tir áwune jii, «Vèn ku sə̀ vitú vén fó ŋgeʼ ye Nyùy wíy màʼ e ŋgwàʼ ye bi rə̀n kitu.»

Matio 10:16

«Vèn wáa kiíy jii, m tsə̀nsí ven é kwaʼ bèn, a vèn du moo njiì wo wù du, e nəə́ e nyám se bi sí wo. Kí nén a dzə jii, vèn lóo ghan, á wàa fiír moo yó si, e kfə̀n a ghan ji weè moo vibìŋ, e làa yòʼ a ŋaʼrí.

Hibru 7:26

Wù nen ghèén feyì e taà cù wo kuʼùn wo dzə̀ vèsən wàa ker, e bóo fíʼ lùŋ. Wù kù dzə̀ kfə́ ji wir Nyùy cáʼ, a bó wù yòʼ kér njò yìmòʼ gheéy, a bó shilóm shi yòʼ dzə̀ é wùn wó gheéy shishàr, e bó a dor. Wù tíy kfə́ jeéy fo wíri adzə̀m, bìʼ fo áwune dzəə̀n aŋgàa jay. Nyùy kfən lì wun, e kòʼór e ntoò yùv.

Titur 2:15

Á vinyo vìn ve à kù kér fó yeʼéy wíri shó, a tavír melív mev, a dìn fo wìr jayin. Kú a yeʼéy, a dìn ji à sə́ vitaáví a dzə̀ fo Nyùy, e làa yòʼ biimé, é wìr wáa kay wò.

Titur 1:6

taà kintatì kér fó a dzə a wír woo là nsem, a ker wiíy e mòʼón cáʼ, é wón vəə́ wáa dzə ve á jumrì sa kinyo ke Nyùy, é la á yòʼ a ker liì kisaŋ, e kfə̀n a tav kitú.

1 Timoti 5:20

Wáa dzə wo wù jayin rú kinyo, à tìír e kintatì kí si, e sàʼ, é kibér ki fiʼ fìír.

Lim Aŋgàa Ntum 20:30

A wír ámóʼó kù wíy fəə sa a dzə̀ fo věn mvəm, a boʼtí aŋgàa biimé, a sə̀ŋrì ámóʼó, aá wáa kfən aáwuné mbìv.

Joon 5:35

Joon‑eè fiʼtì bèy, a wù dzə̀ moo kikaʼày ke kí shwí, bán, a virə́ʼ ví ráné, a vèn‑eè ló a ghan e mvə̀m ran foo fèy shishàr, a sheʼrí.

Ŋwàʼ Luk 6:35

Ke kí dzəə̀n kí dzə̀ jii, vèn wáa kòŋ aŋgaà vén vibàn, a yiì kijuŋ aáwune, e kfə̀n a foòr kifá, e làa yòʼ a shìy ji á wíy siìr. Vèn lóo yiì bèy, é wìy laàmé Nyùy ven kijuujùŋ, é vèn kfə́n a dzə wón wun woo Nyùy woo Taà Vitu, bìʼ fo vèn yii a dzə̀ mo wù yii sa. Wù yii vinyo ve juŋ vi e wír ve bií, a bó á yòʼ fə̀m beerì wun.

Matio 17:17

Jesus yòŋ jii, «Wír vìn, vèn dzə̀ wír kisaŋe. Bó vèn yòʼ lo, vèn wày shilív e Nyùy wùn gheéy. M wíy tsəmrí vinyo vén, e dù meé e le? Vèn taʼ ji m wìy dzə̀ʼə̀m vesən, e mèé e le?» Wù nèn sùúy jii, «Vèn wiy e wan woo shooy, e fò shan.»

Nsùyrì Nyùy 122:5

Dzə̀ fo á yii maʼ akàvàʼ veé Isray, aàfon vee Davir ramé tínen vinyo veé wòŋ.

Ŋgaà Yen 3:9

M kì wír ve á yoŋ vitú vév ji wír vém veé Juda, aá dzə̀ kév a dzə̀ e Satan ŋgoo. Vèn yú, m wíy yiì, aáwune kiíy ji wír ve m kòŋèné dzə̀ ven vin, e yiì, aáwune wiy, a gbù e věn si.

1 Timoti 5:14

Ke m suuy ki dzə̀ jii, vikǐy ŋkfə vee wónlèé wáa tàʼ a alúm vév, a dzəə́ wón, a leéy a fo kfə́ə. Á lóo yiì bèy, é la á yòʼ dzəə fò kintóʼ, áàŋgàa vibàn vesəné wáa roòmè vèsən.

1 Timoti 5:7

Ku wày vinyo vìn vi ji nsər, fo wír veé kintatìi wáa yiì vinyo ve dzə̀ wíri wàa ndzəə áwune fó fo.

2 Korin 6:17

Nyùy Tàr nén a suúy jii: «Vèn fəə́ fo wír ve bó yòʼ dzəə̀n vémé mvəm, a dzə kén jeéy. Lá vèn yòʼ kùm kifá ke *kifàn kí, é vèsən fíʼ a dzə kijuŋ,

Ŋwàʼ Luk 1:6

Wùn wiiy və wáa yiì vinyo réŋréŋ mo Nyùy taʼà, a yu sáʼ Nyùy, e kfə̀n a lèm nsər sə́ sidzə̀m, a dzə là nsem.

Ŋgàn 4:18

Liì wìr wo wù yúnin Nyùy dzə̀ moo ndzə ye yì ráné, yì kù a ran, a dù duùn fó mbìy, a kàʼày wíri.

Ŋgàn 8:8

Jí se sí fəə́ fo mǒ shuù si dzə̀ là nsem sidzə̀m, sí yòʼ litì kinyo fo bàm, a bó yòʼ dzə̀ sí bàʼ wír e koŋ.

Daniel 6:4

Vitú ve saʼ vi nèn tàtí wùn à kibér ke vé saʼ ki, e kèʼ, a shweʼ ji mo Daniel lim vinyo veé wòŋ, á sà‑áà yén kintéŋ ke kinyò sho a. Á leéy, e làa yòʼ yen, bìʼ fo Daniel‑iì dzəə̀n wir suuyrú, a wù yòʼ‑oò kér kintéŋ ke kinyò.

Filipi 3:6

A mò‑oò lo wày kitávín féyì, a tom mbìv yee shooy, a nyàvrì e wír Kristùu ji á bívir a Nsər Mooser. Fo mbìv fóo fèy, mò‑oò ló a tiy réŋréŋ vèr à Nsər Mooser, a dzə là nsem.

Ŋgaà Yen 2:5

Vèn kuúmé mo vèn‑eè dzə́, a shilív shén shí dzəə́ tíy e mǒ wùn kitávín. Vèn biner melív men, a yiì mo vèn‑eè yii fo mbìy. A vèn dzə̀ là fóo bìnèr melív men, bo m yíi wìy, e shàʼàr kitiir kén ké làm, é kintatì ki lay.

Ŋwàʼ Fəə 34:35

áwune kù nèn yèn a vishí və́ ví njaʼkìrì, bo Mooser kfən sə̀tí e kintìm ki, e dù, e meé mo wù yíi kfən e bàm ji wun súŋnín á wùn Nyùy Tàr.