Filipi 1:27 - ŊWÀʼ NYÙY

²⁷ Á bèy lèn, kinyo ke vèn wáa yiì ki dzə̀ jii, vèn wáa ker liì a dzə̀ á wo wìr ve á jumrì rú kinyo ke Jesus Kristu. A ke m taʼ ki dzə̀ jii, kìn m wìy fo vèn, kìn bó m yoʼ wìy, m kù a yu a ji vèn tíy kitávín, kér shilív shimòʼón, e kfə̀n a yu ji vèn wày vifií, a fùnèn kinyo kimòʼón cáʼ ji sáʼka Nyùy wo juŋ wáa dù fo mbìy, é wíri wáa biimé.

Filipi 1:27 Referans Kwoze

Efesor 4:1

Mo woo Por wo m lim sháŋ bìʼ kinyo ke Tàr wòsən Jesus Kristu nén a lon jii, vèn kú a ker dzəʼə̀m a dzə̀ yé wìr Nyùy mo wù‑uù liìn ven ji vèn wáa dzə.

1 Korin 1:10

Afə̀r vem, m nén a lòn feyì e Tàr wòsən Jesus Kristu yir jii, vèn ku tàtí, a dzə a shuu e mòʼón, e làa yòʼ jàvsìn, a dzə jeéy jeéy. Vèn kú a sìysì kinyo kén amòʼón, a tiy a dzə̀ e kíwun ki.

2 Pita 3:14

Á bèy lèn ŋkàr sem, mo vèn sí shiy kishiíy ke Kristu wíy kfən, vèn ku tìír vifií vén féyì ji vèn à Nyùy wáa dzə a kiránén, é melív men mè wáa neŋ ji nyaáŋ, é la vèn yòʼ a fàn kinyo kímóʼ kí gheéy.

Kolosia 1:10

Vèn kiiyì, é vèn nèn a dzə mo dzə̀ wír Nyùyi wàa dzə, a yiì kinyo a dzə̀ ke kí wáa bòŋ wún Nyùy. Vèn yíi a yiì vinyo ve juŋ vi vidzə̀m, e kfə̀n màysì a kiíy mo wun woo Nyùy dzəə̀n, a dù duùn fó mbìy.

Ŋwàʼ Jud 1:3

Ŋkàr sem, mò‑oò ló a kwàʼ feyì ji m sáŋ ŋwàʼ fo vèn kùm vinyo ve Jesus Kristu‑uù yiìn, e tìn vèsən fó lòn, á lùŋ. M nèn yèn ji kinyo keé shií kí dzə̀ á ji m sáŋ ŋwàʼ fo vèn cér, a tir ven ji vèn wáa giìmè a kinyo ke Kristu ke Nyùy‑iì wayin ne e vèsən vee wír vəə́ kiwo. Wù kù‑uù fò a dzə̀ kinyo kee shoon kimòʼón, a bó kímóʼ kí yòʼ dzəə́ wìy a dzə.

1 Tesalonika 4:1

Afə̀r ver, vèr nen kfə̀n a tàʼ ji vèn kuúmé á kinyo ke Tàr wòsən Jesus‑eè yiìn e vèsən, a lon feyì jii, vèn ku màysì, a nəə́ nəə́n é liì wo Nyùy taʼ ji vèn wáa ker. Liì və̀n dzə̀ wo vèr‑iì yeʼeyin ven shó, a dzə̀ woo shooy wo wù bòŋèn Nyùy.

Filipi 2:12

Ŋkàr sem, dzə̀ sá mo vèn kú a yu a dzə̀ fo Nyùy. Vèn‑eè ló a yu e ghan se vèsən‑eè dzəə̀n. Vèn ku nèn a yu e shaà bèy lèn wo bó m yòʼ dzə̀ə́ vèsən, e màysì, a yiì moo wír ve Nyùy liìn ji və́, a fàn, a yàʼ fó jay kinyo e wun, é vèn nèn wìy lùŋ.

Filipi 3:18

Mò‑oò ló a suúy e vèn fó ŋgùʼ, a m kfə̀n sí rémri lèn e mensíy mè e si jii, wíri dzə̀ e vèsə́n mvəm anín ve á loòn ne, a ker liì, a wù shwínin a dzə̀ á wo wìr ve á ban kinyo ke Kristu, ŋwáy kpú ye wù‑uù kpuun é kintam ŋwáyín.

2 Korin 13:11

Afə́r vem, m nén a shàʼtì ven ji á bèr á ne. A m tír ven ji vèn navti vinyo vén, e yuùrí ntir sém kijuŋ. Vèn kfə́n shuu e mòʼón, a dzə dzə́ yee nyaáŋ, é Nyùy wo wù koŋ ven, kfə̀n yii, a melív men mè dzə́ nyaáŋ, nèn a dzə e věn mvəm.

Lim Aŋgàa Ntum 4:32

Kintatì ke wìr Jesus ki wáa dzə, a ker shuu e mòʼón, e kfə̀n a ker shilív shimòʼón, la wìr yòʼ a yòŋ kifá kímóʼ kí ji kfə́. Kifá ke wìr ki kù‑uù dzə̀ ké wìr dzə̀m.

Nsùyrì Nyùy 133:1

Yén ri, kí bòŋ, e kfə̀n a dzə kijuŋ feyì, fo afə́rí wáa dzə shuu mòʼón.

Jeremia 32:39

M wíy yiì, aáwune wáa dìy kinyo kimòʼón, a tiír vifií cáʼ ji á wáa ghvəm mo ghán sidzə̀m, aáwune nèn wìy a dzə kijuŋ, é rám yéví wìy a dzə sa bèy.

2 Pita 3:11

Mo vèn kiìn ji vifá vidzə̀m vi wíy bvəʼə́y, vèn wáa kwàʼtì ji dzə̀ vèn wàa dzə e ndzə fèn lèn, a yèe le? A dzə̀ vèn kù a way vinyo vén vidzə̀m a dzə̀ e Nyùy kiwo, a yu fo fo,

1 Korin 15:58

Á bèy lèn, ŋkar sém sé sày, vèn wáy ri shilív, a tiy kitávín, a yu kinyo kimòʼón cáʼ ji kinyo ke Tàr wòsən Jesus Kristu, a kiíy ji kinyo kidzə̀m ke wìr yii bìʼ wun woo Kristu ki yòʼ dzə̀ á kí lày kisáŋ.

Ŋwàʼ woó Rom 1:16

A bó yòʼ dzə̀ m wàa woomé fó a fìʼtì gheéy, bìʼ fo m kiìn féyì ji dzə̀ á vitaáví vé Nyùy, a ví yii, á lóo fìʼtì, wíri wàa way shilív e Wan və́ wùn, wun woo Nyùy wàa lùŋèr áwune adzə̀m, kìn dzə̀ wír veé Juda ve kinyo kìn ki‑iì dzəə̀n kév fó mbìy, kìn vitúm ve ví yú kév a dzə̀ lèn.

Jeem 3:18

Kù dzə̀ mo vé kimane yii rə́si wáy ŋgoòy ye juŋ ji nyaáŋ, a nèn káv wír anín vijuŋ fo fo.

Filemon 1:5

a dzə̀ bìʼ fo m yú mo à koŋ Taàtá wòsən Jesus Kristu, wáy shilív é wùn wó, kfə̀n koŋ sa wír ve dzəə̀n vé Nyùy adzə̀m.

Titur 2:10

e làa yòʼ a shwìvìr kifá. Áwune kú a yiì vinyo tìítiy, a dìn ji áwune dzə̀ á wír vee réŋ. Á lóo yiì bèy, é wíri nèn a yen duŋrì ye vèsən duŋrì kùm Nyùy wo wù luŋèr vèsən ji kinyo.

2 Timoti 4:7

M yiì ne yéem yee mbìv. M fùnèn ne e Nyùy kinyò feyì, e sò kinyeŋ ke mò‑oò nyéŋé, a tiy kitávín vèr Nyùy wo m wayin shilív é wùn wó.

1 Timoti 1:19

À lóo màʼ, à kù a tiy a dzə̀ é kinyò ke wò‑oò wayin shilív shó, a yiì a dzə̀ kíwun ke shilív shé shi bínsi ji dzə̀ á kinyo ke ru kí. Kú a kiíy jii, wír ámóʼó lò ne, e kùn a dzə̀ é vinyò ve melív mev mè sháʼninè, e nèn màʼày kinyo ke ru kí ke vé‑eè wayin shilív shó fo mbìy.

1 Timoti 1:11

ye yí lo a dzə̀ fó sáʼka wo juŋ wo Nyùy‑iì wayin e mǒ kiwo, m wáa fìʼtì və̀n. A dzə̀ sáʼka wo wù din vikuʼùy vé wun woo Nyùy wo wù gòʼòn kàŋ mòʼón.

Lim Aŋgàa Ntum 2:46

Á kfə́n a lò, a tarnín sa e *lav cù yeé Jerusalem foo fèy vishiíy vidzə̀m, a bùnrì, e kfə̀n a yikír e melav, a fonín e kishéʼrì ki,

Matio 12:25

Jesus kiíy kinyo ke vé‑eè woóne sho, e nèn sùúy jii, «Vèn kì sá jii, a woŋe lò, e jàvsìn, a taŋ kóy, bo bó yòʼ dzə̀ wú wìy tìím. A wír veé laʼ, kìn veé ntèʼé kfə̀n lò, a taŋ kóy, bo bó yòʼ dzə̀ áwune wìy tìím.

Ŋgàn 22:23

Nyùy Tàr yíi sə nsaʼ yev, e saʼ, e nyàvrì e wír ve á nyavrì aáwuneé.

1 Tesalonika 3:6

Timoti nen kfə̀n é bàm lèn e sáʼka wo juŋ jii, vèn kù wáy shilív e Nyùy wùn, koŋ wun, du duùn á fo mbìy. Wù kfən sùúy sa jii, vèn kuúme ver á ghán sidzə̀m, kfə̀n kér shií fó yen ver réŋréŋ á mo vèr kér sa fó yen ven.

Kolosia 1:4

bìʼ fo vèr yén ji vèn wày shilív e Jesus Kristu wùn kitávín, kfə̀n yú sa mo vèn koŋ wír ve dzəə̀n vé Nyùy adzə̀m.

Filipi 2:24

A m wáy vifií ji Tàr wòsən Kristu tav sə̀, é mómò woo Por jumri sá, e wìy, e yèn á ven.

Efesor 1:15

M nén a sheʼrí wun woo Nyùy mo m yú ji vèn kù wáy shilív e Tàr wòsən Jesus Kristu wùn kitávín, koŋ wír Nyùy adzə̀m.

Efesor 1:13

A kù dzə̀ sá mo kén kí dzəə̀n, ven ve bó yòʼ dzəə̀n wír veé Isray. Vèn‑eè yù sáʼka woo rú woo kùm Jesus Kristu wo dzə̀ wù lùŋèr ven, e wày shilív é wùn wó. Mo vèn à Kristu siìn kintatì, Nyùy nen fò ven Kiyoy kfə́ ke Ranén kí ke wù‑uù yiìn ne kàʼ wír və́ shó. Wáa dzə kisəəm ke wù səə̀mèn ven shó ji və́ vee wír,

Galatia 1:7

Vèn jumrì bèy, a bó sáʼka Nyùy wo juŋ yòʼ dzə̀ dzə́ə sinín gheéy. Ke kí dzəə̀n kí dzə̀ jii, yii a wír ámóʼó ve á ghán e věn mvəm, bvəər vifií vén, aá taʼ ji á bívír á sáʼka woo kùm Jesus Kristu və̀n.

2 Korin 9:13

Aá wíy a beèrì wun, a koʼór yír rə́ ji kinyo ke vèn yii kìn ki din a ji vèn tíy e kinyò ke Jesus Kristu kitávín, yii réŋréŋ á mo kí dzəə̀n, e kfə̀n a beèrì, bìʼ fo vèn sə́ áwune é ŋàŋ, kfə̀n sə́ wír ámóʼó.

2 Korin 4:4

Ké wír vìn ki dzə̀, a sə̀tí Satan woo nyùy wo wù kér ndzə rə̀n lèn vifií vév fo á biíme sáʼka Nyùy wo juŋ. A bó yòʼ dzə̀ áwune yèn rán ye sáʼka Nyùy wìyìn shó, a kiíy mo Kristu dzəə̀n. Kristu, wo wùn Nyùy dzəə̀n kikúv kimòʼón.

Ŋwàʼ woó Rom 15:29

A m kì kijuŋ jii, m wíy wìy, é Jesus Kristu yii, é vèn maysi, a yu vijuŋ fo wùn vinyò ve m yíi a fèr e vèn.

Ŋwàʼ woó Rom 15:16

Wù‑uù lì mo ji m wáa dzə ŋgaà ntum Jesus Kristu, a fìʼtì sáʼka və wo juŋ e wír ve bó yòʼ dzəə̀n veé Judàa. A m fiʼtì bèy ji Kiyoy ke Ranén kí fiʼ bìnèr áwune, aá wáa dzə wír wun woo Nyùy, é m wáa dzə kém moo taà cù wo wù báʼti áwune, e cù Nyùy sho, é wù wáa kòŋ.

Ŋwàʼ woó Rom 10:8

Ke kí dzəə̀n kí dzə̀ ke vé‑eè saŋen jii, «Kinyo kìn ki dzə̀ e věn mentsə̀m, kfə̀n a dzə e věn shuù, e kfə̀n a dzə sa e věn meliv.» A dzə̀ kíwun ke vèr fiʼtì lèn ji wíri wáa way shilív e Jesus Kristu wùn.

Ŋwàʼ woó Rom 1:9

M suuy bèn, a Nyùy wo m foon kitú kém shó, a fìʼtì sáʼka və wo juŋ woo kùm Wán və kì ji m suuy a rú. M yii lóo bùnrì ghán sidzə̀m, m kù a kuumé ven,

Ŋwàʼ woó Rom 1:5

A dzə̀ wun woo Jesus Kristu wo wù‑uù bùʼùn mo ji m wáa dzə ŋgaà ntum və, a ghan e wùn yir, a fìʼtì kinyo ke Nyùy e vitum ve bó yòʼ dzəə̀n veé Juda vidzə̀m, é wíri fíʼ a way shilív e Nyùy wùn, a yu a dzə̀ fó fo.

Lim Aŋgàa Ntum 24:24

Vishiíy ví lòo koʼtí, Feliy wùn wiiy və Duusila wìy ji á yén a Por, a wiíy dzə̀ wír woó Juda. Á jàŋ Por, wù wìy, á wáa yuurí, wù wáa fèr mo dzə̀ wìr wày shilív e Jesus Kristu wùn.

Nsùyrì Nyùy 122:3

Jerusalem wo á bàʼrìn moo ŋkàlaʼ, wù dzə̀ kilàŋsìn, a tiy kitávín.

Filipi 1:5

bìʼ fo m kù kuúme mo vèn‑eè tatin mo, e kèʼ fo kishiíy ké mbìy ki, vèsən wáa sàmèr sáʼka wo juŋ woo bìʼ Jesus Kristu, e shem lèn.

Filipi 3:20

Vèsən dzə̀ késən wír veé wòŋ woó yuv, a vèsən tùytí sí, a leéy ji Ŋgaà Lùŋèr wòsən wo dzəə̀n Tàr wòsən Jesus Kristu wiy fó fo.

Filipi 4:1

Á bèy lèn afə̀r vem, m koŋ ven féyì, a jìŋ yen yár mo é ŋàŋ. Dzə̀ ven vin ve á yii, a m kér kishéʼrì. A m kfə̀n kwá ŋgúʼ a dzə̀ bìʼ ven. Ŋkar sem, vèn ku nèn a tiy kitávín a dzə̀ vèn à Tàr wòsən Kristu mo m kì suuyin ne.

1 Wòŋ 19:12

Wù nèn sùúy e Abishay jii, «Aà yèn, a wír veé Siiriàa sí gháʼ mo, à wìy, e tòm mo. M yén, a wír veé Ammone sí gháʼ sa wò, é m wiy, e tòm wò.